Ngimbo
Gudi mutuameji wa miziki. Lungimbo luayimbile Davidi tangua profete Natana wayile gumumona gungima dia gubungisa muila nu Batesheba.
51 Oo Nzambi, nguvile khenda mukunda nu guzumba guaye gua giamatshidia.
Kukumuna gubola guami guagasue mukunda nu khenda jiaye jiavula.
2 Nguweve diago mukunda nu gubola guami,
nguphelegetese mukunda nu gubola guami.
3 Handaga ngudi mujiya muabonga gubola ngatshitshi,
gubola guami gudi gutuama diami* tangua diagasue.
4 Ngagutshitshila gubola, aye ngakalegela gubola;*
ngakalagala ndaga yabola gu meso aye.
Wabinga gaye luholo udi gungubela.
Wana sophesa mu luholo luabonga.
5 Tala! Ngavualewe nu gubola,
ngakhalele nu gubola sendese tangua mama wamitshile vumo diami.*
6 Aye wana suanguluga nu giamatshidia giana khala mu mutshima wa muthu;
longesa mutshima wami* ndunge jia giamatshidia.
7 Nguphelegetese mu gubola guami nu gamutshi ga hisophe, hagula guphelegete;
nguweve, hagula ngubue phe gubalega neje.
8 Ngukuatese hagula nguvue matululu a gusuanguluga,
hagula ngajiya gusuanguluga, ngatshima wangubogola mifiya.
9 Bemba gutala* gubola guami,
kukumuna gubola guami guagasue.
10 Oo Nzambi, nguhane mutshima waphelegeta,
mba nyuma ihe-ihe mukatshi diami, hagula ngusale ya gujinginyina.
11 Ungukayigo gutuama diaye;
ungukatulago nyuma yaye yabonga.
12 Nguhane luko gusuanguluga ngavile tangua wanguhuluishile.
Nguhane luko nzala ya gugutumagela.
13 Mbangulongesa njila jiaye gudi athu adi mushiya mikhuala,
hagula athu abola avutuge gudi aye.
14 Oo Nzambi, Nzambi wami wana huluisa, ngukatule mukudi wa mahatshi ngudi nawo,
hagula ngajiya gulongesa ndaga jiaye jiabonga nu gusuanguluga guagasue.
15 Oo Yehowa, kangula kano diami,
hagula ngajiya gugutumbuisa.
16 Handaga aye ushigo mutshigina milambu—gula ndo nga ngaguhanyi gale nayo;
aye ushigo musuanguluga nu milambu ya guwotshia.
17 Nzambi wana tshigina milambu ya athu adi gudisagesa muavula mukunda nu gubola guawo.
Oo Nzambi, aye mbawushigo mutuna mutshima wa muthu udi nu gikenene.
18 Mukunda nu mutshima waye wabonga, tshita ndaga jiabonga mukunda nu Siona;
tunga ibayi ya Yelusalema.
19 Ngenyi, mbawusuanguluga nu milambu ya athu abonga,
milambu ya guwotshia nu milambu yahanewa ya mudidi;
gungima ngombe jia milume mbajihanewa ha giwotshielo giaye.