Ngimbo
Gudi mutuameji wa miziki. Idi naye gushigiwa mu “Ubolesago.” Mikitame* ya Davidi, tangua Saula watumile athu ha gubandemena gu inzo ya Davidi ha gumushiya.
59 Oo Nzambi wami, nguhuluise ha mago a mbalagaji jiami;
ngubambe handaga athu adi gunguluisa.
2 Nguhuluise ha mago a athu adi mukalagala ndaga jiabola,
nu ha mago a enya khuta.*
3 Tala! Angubandemena;
enya ngolo adi gunguluisa
uvi ishigo handaga ngalumbugile nga ngakalegele gubola, Oo Yehowa.
4 Ngakalegelego gubola, uvi ene adi muzula phushi, adi gudilondega ha gunguluisa.
Ngudi gugutamega, zuga umone ndaga jidi gungubuila.
5 Uvi aye, Oo Yehowa Nzambi wa masuta, udi Nzambi wa Isalele.
Zuga utale ndaga jidi mukalagala ifutshi yagasue.
Uvilago nga muthu mumoshi wabola khenda. (Sela)
6 Mu ngueze yagasue ene adi muvutuga;
adi muya nu gusha matululu mu dimbo gifua jimbua jidi muya nu gubala.
7 Tegelela ndaga jidi muzoga mu makano awo;
ivungu yawo idi gifua phogo jia khusa,
handaga adi muzuela egi: “Nanyi udi mutegelela?”
8 Uvi aye, Oo Yehowa, mbawaalela tola;
mbawulela ifutshi yagasue.
9 Oo Ngolo jiami, mbangulandula gugunenga;
handaga Nzambi udi fundo diami diabonga dia gulengela.
10 Nzambi munu wana gungumonesela guzumba gua giamatshidia, mbawuza gungukuatesa;
Nzambi mbawungukuatesa ha gumona tangua mbalagaji jiami mbajibingiwa.
11 Waashiyigo, hagula akuaku’ami ajimbilago ndaga wakalegele.
Mu ngolo jiaye, awunganese;
abuise, Oo Yehowa, aye tshibu yetu.
12 Mukunda nu gubola ana kalagala mu mbimbi jiawo,
ene akuatagane mu muheto mukunda nu lulendo luawo,
handaga ana guta mikumbu nu ana mba mambo.
13 Avile khabu, amanesele;
amanesele hagula akhadigo luko;
tshita ngenyi hagula ene ajiye egi
Nzambi udi muhinyina ajigulu a Yakoba uu nu gu songi jia mavu. (Sela)
14 Ene avutuge mu ngueze;
aye nu gusha matululu mu dimbo gifua jimbua jidi muya nu gubala.
15 Ene aye nu guwungagana ha gukamba ima ya gudia;
ubembigo egi adie, akute, nga ahete fundo dia gukhala.
16 Uvi ame, mbanguyimba mukunda nu ngolo jiaye;
mu gimenegena, mbangukhala nu gusuanguluga ha guwambela athu ako guzumba guaye gua giamatshidia.
Handaga aye udi fundo diami diabonga dia gulengela.
Udi nji fundo ngana lengela mu tangua dia lamba.
17 Oo Ngolo jiami, mbanguguyimbila ngimbo ha gugutumbuisa,*
handaga Nzambi udi fundo diami diabonga dia gulengela,
Nzambi wana gungumonesela guzumba gua giamatshidia.