Ngimbo
Mukunda nu Salomo.
72 Oo Nzambi, kuatesa fumu ha gusophesa gifua aye,
kuatesa mun’a fumu ha gusophesa mu luholo luabonga gifua aye.
2 Muene abatule milonga ya athu aye nu giamatshidia,
abatule milonga ya athu aye anyi ashigo nu ndando* mu luholo luabonga.
3 Milundu ibatele athu guhuima,
milundu yazonda ibate gubonga.
4 Muene azuelele athu ashigo nu ndando,
ahuluise ana a phutu,
ashiye muthu wana huiga athu ako ha guakuiya.
5 Athu aye mbaaguvila woma tangua diagasue kumbi mbadikhala guene
nu tangua diagasue mbeji* mbayikhala guene,
mbaaguvila woma indongo nu indongo.
6 Muene mbawukhala gifua mvula idi munoga holu dia muangu wakokewa,
gifua mvula yavula idi mutebesa mavu.
7 Mu uhinyinyi wenji athu abonga mbaasaphutshila* gifua muangu wa gibisu.
Guhuima mbagukhala guavula uu nu tangua mbeji mbayitota.
8 Muene mbawuhinyina sendese gu kianga uu nu gu kianga giko,
sendese gu Muta* uu nu songi jia mavu.
9 Athu ana jinga mu mavu a luselenga mbaafugama gutuama dienji,
mbalagaji jienji mbajilenza fuphi.
10 Mafumu a gu Tarsise nu a mu mahongo mbafuta gitadi.
Mafumu a gu Sheba nu a gu Seba mbahana bakado.
11 Mafumu agasue mbaafugama gutuama dienji,
ifutshi yagasue mbayimukalegela mudimo.
12 Muene mbawuhuluisa phutu idi mudila ha gutoga ukuateshi,
nu muthu gashigo nu ndando nu muthu gashigo nu mukuateshi.
13 Muene mbawuvila phutu nu athu ashigo nu ndando khenda,
mbawuhuluisa phutu.*
14 Muene mbawaahuluisa* ha mago a athu adi guasagesa nu adi guakalegela ndaga nu khuta,
mahatshi awo mbaakhala nu ndando yavula gu meso enji.
15 Muene akhale nu monyo masugu avula, ahanewe wolo wa gu Sheba.
Athu akhale mukombelela tangua diagasue mukunda nu muene,
ashimbigiwe lusugu lua mudidi.
16 Mbuto mbajikhala jiavula ha mavu;
mbajitutumuga gu songi jia milundu.
Mahia a fumu mbaazola mabundu avula gifua gu Libane,
athu mbaazala mu membo gifua muana saphutshila muangu mu temu.
17 Jina dienji dikhale mayilago,
dikhale ivo nu ivo gifua muana khala kumbi.
Athu ahete ishimbigo mu njila yenji;
ifutshi yagasue izuele egi fumu udi nu gusuanguluga.
18 Yehowa Nzambi atumbuishiwe, Nzambi wa Isalele,
phamba muene wana kalagala ndaga jia gushimana.
19 Jina dienji diakoma ditumbuishiwe mayilago,
lutumbu luenji luzale pha ha mavu agasue.
Amen, amen.
20 Isambu ya Davidi mun’a Yese yasuga haha.