Ngimbo
MUKANDA WA THATHU
(Ngimbo 73-89)
Lungimbo lua Asafe.
73 Nzambi udi diago mutshita ndaga jiabonga mukunda nu Isalele,
mukunda nu athu adi nu mitshima yaphelegeta.
2 Uvi malu ami atshiginyile gujimbila njila;
guasalele hazonda ngudiadiumuge.
3 Handaga ngakhalele muvila enya lulendo* giphi
tangua ngakhalele mumona athu abola mu guhuima.
4 Ene ana khala gawo muabonga uu nu tangua ana gufua;
ana khala gawo nu mila yabonga.*
5 Ene ana gudisagesa ndo gifua athu ako,
ana monago malamba gifua athu ako.
6 Gishina giene, adi musudiga lulendo gifua musanga mu shingo;
adi musudiga umbundudi gifua mulele.
7 Umonyi wawo waazola meso tshui;
ima yahetshi ene yabalega nu inyi akhalele mutangiza mu mitshima yawo.
8 Adi mulela nu adi muzuela ndaga jiabola.
Adi mukanena* athu nu lulendo luagasue ha guasagesa.
9 Adi muzuela gifua adi gosa mu dilu,
adi muwenda ha mavu, adi muya nu guzuela ndaga jiagasue atshigina.
10 Hene athu a Nzambi abalumuga gudi ene,
adi munua meya awo avula.
11 Athu abola adi muzuela egi: “Nzambi wajiya gujiya ndaga jidi mubalega ba?
Nzambi wa Gudinyinyiga udi mujiya diago ndaga jiagasue ba?”
12 Luene luholo luana khala athu abola, ana khala gawo muabonga.
Adi mulandula guvudisa umonyi wawo.
13 Ngalabele gami diago gubamba mutshima waphelegeta,
ngalabele gami nji guwevua mago ha gumonesa egi ngushigo nu gubola.
14 Ngakhalele gudisagesa lusugu lua mudidi;
akhalele gungubalela gimenegena giagasue.
15 Uvi gula nga ngazuelele ndaga eji,
nga ngakalegele athu aye* gubola.
16 Tangua ngakhalele mukamba gukotelesa ndaga yene,
yangusagesele muavula
17 uu nu tangua nganginyile ha fundo diakoma dia gijila dia Nzambi,
nu ngakotelesele ndaga mbajibuila athu abola.
18 Yadiago, waahagele mu mavu aladiadiadia,
hagula abue nu afue.
19 Gufua guawo mbaguza mu gisagumuisa!
Malamba nu gufua mbaguabuila mu gisagumuisa.
20 Oo Yehowa, mbawaatotesa* tangua mbawuzuga,
gifua luholo nzoji yana tota tangua muthu wana zuga gu tulo.
21 Uvi mutshima wami wazalele nu gikenene,
ngavile lamba diavula mu mutshima.*
22 Ngakhalele ngaheya, ngakhalelego nu ndunge;
ngabuile gifua shitu gutuama diaye.
23 Uvi henyaha ngudi nu aye tangua diagasue;
wangukuata gu koko diami dia madia.
24 Udi gunguhana malongo ha gungutuameza,
gungima mbawungubata gu lutumbu.
25 Nanyi muko ngudi n’enji mu dilu?
Ngushigo muvua nga nzala ya gima gimoshi ha mavu, phamba nzala yaye.
26 Muila wami nu mutshima wami wajiya guleba,
uvi Nzambi wana bamba mutshima wami; muene udi seso diami, udi shinda diami mayilago.
27 Yadiago, athu agasue adi gualeha nu aye mbaafua.
Mbawushiya* athu agasue ashigo ya gujinginyina* gudi aye.
28 Uvi idi ndaga yabonga mukunda nu ame ha gusuena hehi nu Nzambi.
Ngabuishile Yehowa Fumu Wabalega Gukoma fundo diami dia gulengela,
ha gulongesa midimo yenji yagasue.