Ngimbo
Gudi mutuameji wa miziki. Lungimbo lua ana a Kora.
85 Oo Yehowa, wavila gifutshi giaye khenda;
wavutula ana a Yakoba anyi ayile mu uhiga.
2 Watotesela athu aye gubola guawo;
watotesa* gubola guawo guagasue. (sela)
3 Wakandele khabu jiaye jiagasue;
wabembele guvua khabu jiabala.
4 Oo Nzambi, muhuluishi wetu, tutshigine luko,*
utuvilago khabu.
5 Mbawulandula gutuvila khabu mayilago ba?
Mbawulandula guvua khabu mu indongo yagasue ba?
6 Mbawushigo gutuhana luko ngolo
hagula athu aye asuanguluge mukunda nu aye ba?
7 Oo Yehowa, tumonesele guzumba guaye gua giamatshidia,
tuhuluise.
8 Mbangutegelela ndaga jidi muzuela Yehowa Nzambi wa giamatshidia,
muene mbawuzuela mbimbi jia guhuima gudi athu enji, gudi athu adi a gujinginyina gudi muene.
Muene mbagashigo mubemba egi avutugile khadilo diawo dia gudishila mutshima.
9 Muene wana khala hehi ha guhuluisa athu anyi ana gumuvila woma,
hagula lutumbu luenji lukhale mu gifutshi gietu.
10 Guzumba gua giamatshidia nu gujinginyina mbagutagana hamoshi;
gubonga nu guhuima mbaguwenda hamoshi.
11 Gujinginyina mbaguzoga mu mavu gifua mbuto,
gubonga mbagukatuga mu dilu, mbaguza ha mavu.
12 Ayi, Yehowa mbawutuhana ima yabonga,*
mavu etu mbaazola mbuto.
13 Gubonga mbaguwenda gutuama dienji,
mbagulondega njila idi naye muene gulandula.