Ngimbo
Lungimbo lua ana a Kora. Gudi mutuameji wa miziki; ludi naye gushigiwa mu Mahalate.* Athu ako adi naye guluyimba, ako muya nu gukumbulula. Maskile* a Hemane mujigulu wa Ezela.
88 Oo Yehowa Nzambi wami, wana gunguhuluisa,
mu muanya ngudi gugudidila,
mu phipha ngudi muza gutuama diaye.
2 Gisambu giami gize gudi aye,
haga kutshi uvue* luholo ngudi mudila ha gutoga ukuateshi.
3 Monyo wami wazala pha nu malamba,
ngudi mutshigina gufua*
4 Ngana tangewa gale mukatshi dia athu adi muya mu malumba;*
gushigo nga nu muthu wa gungukuatesa,*
5 ngabembewa mukatshi dia athu a gufua
gifua imbi yabandesewa mu malumba,
inyi wanago guwunguluga luko
nu wanago gukuatesa.
6 Wangumba mu wina dialeha,
mu mafundo abuita, mu wina diakoma dishigo nu gisugishilo.
7 Khabu jiaye jiangunemena sulu,
matshipha-tshipha* aye akola angutshuiga. (Sela)
8 Wakaya athu ngana jiya gualeha nu ame;
wangubuisa gifua gima gia usala gutuama diawo.
Ngakuatagana mu muheto, ngushigo nu luholo lua gushooga.*
9 Meso anguhola mukunda nu lamba.
Oo Yehowa, ngudi gugutamega lusugu lua mudidi.
Ngathuphula mago ami gudi aye.
10 Aye mbawukalagala ndaga jia gushimana mukunda nu athu a gufua ba?
Athu a gufua ajiya guzuga ha gugutumbuisa ba? (Sela)
11 Guzumba guaye gua giamatshidia, mbagulongesewa mukatshi dia malumba* ba?
Gujinginyina guaye mbagulongesewa mukatshi dia malumba* ba?
12 Ndaga jiaye jia gushimana mbajijiyiwa mu phipha yakola ba?
Nga ndo gubonga guaye mbagujiyiwa mu gifutshi giabuitshiwe gale mutshima ba?
13 Uvi ngana gugudidila ha gugutoga ukuateshi, Oo Yehowa,
gimenegena giagasue gisambu giami giana guza gutuama diaye.
14 Oo Yehowa, mukunda natshi wangutuna?
Mukunda natshi udi gungusuegela phala yaye?
15 Sadige ulenge wami,
Ngana mona malamba, ngana khala hehi nu gufua;
ngahuila gami mukunda nu malamba akola udi mubemba egi angubuile.
16 Khabu jiaye jiakola jiangulebesa muila;
woma waye wangushiya.
17 Ndaga udi mutshita jiangujieta gifua meya lusugu lua mudidi;
jianguphategesa gu khanda jiagasue.*
18 Aye wazula mafuta ami nu athu ngana khala nawo, waalengesa gualeha nu ame;
na phipha yabua futa diami.