Ngimbo
MUKANDA WA NGUANA
(Ngimbo 90-106)
Gisambu gia Moize muthu wa Nzambi wa giamatshidia.
90 Oo Yehowa, aye wana khala fundo dietu dia gukhala* mu indongo yagasue.
2 Gutuama egi milundu ivualewe
nga uzole mavu, ayi, mavu ana zola mbuto,
wana khala Nzambi, wana khala ndo nu gisendeselo nga nu gisugishilo.*
3 Wavutuile mun’a muthu mu fuluguta dia mavu;
wazuelele egi: “Enue ana a athu, vutugenu.”
4 Handaga gu meso aye, ivo 1 000 idi gifua lusugu lumoshi* luabalega mu phushi,
gifua matangua azonda a phipha.*
5 Aye wakukumuna ana a athu; ene atota gifua nzoji;
mu gimenegena, adi gifua muangu wasaphutshila.
6 Mu gimenegena, muangu wene wana kula, wana bua lembe-lembe,
uvi mu ngueze wana lela nu wana migina.
7 Tuashidila mukunda nu khabu jiaye
tudi nji muvua woma wakola mukunda nu khabu jiaye.
8 Wahaga gubola guetu gutuama diaye;*
isuegi yetu yamonega gutuama dia phala yaye idi muhenya.
9 Masugu a monyo wetu azonda mukunda nu khabu jiaye jiakola;
ivo yetu yahua muphushi gifua muhehe.
10 Masugu a monyo wetu ana khala ivo 70,
nga ivo 80 gula muthu udi nu ngolo jiavula.
Uvi adi azala pha nu malamba nu gikenene;
ana balega muphushi, nu tuana tota.
11 Nanyi wajiya gukotelesa ngolo jia khabu jiaye?
Athu adi naye guguvuila woma wavula gifua mudi khabu jiaye.
12 Tulongese luholo lua gutanga masugu a monyo wetu
hagula tuajiya guheta mutshima wa ungambi.
13 Oo Yehowa, vutuga! Ndaga eyi mbayihua tangua tshi?
Vila athu aye khenda.
14 Tumonesele guzumba guaye gua giamatshidia mu gimenegena,
hagula tuajiya gumba milolo ya gusuanguluga
nu tukhale nu gusuanguluga masugu agasue a monyo wetu.
15 Tuhane masugu a gusuanguluga gifua masugu anyi watumonesele malamba,
tuhane gusuanguluga ivo yavula gifua ivo tuamonele malamba.
16 Kuatesa enya mudimo waye amone ndaga jiabonga udi mutshita,
an’awo amone lutumbu luaye.
17 Yehowa Nzambi wetu, tushimbige;
tukuatese hagula midimo ya mago etu iyile muabonga.
Ayi, midimo ya mago etu iyile muabonga.