Ngimbo
94 Oo Yehowa, aye Nzambi wana vutula gubola,
Oo Nzambi wana vutula gubola, monesa lutumbu luaye.
2 Oo Nzuji wa mavu, zuga!
Hana enya lulendo ndola mukunda nu ndaga akalagala.
3 Oo Yehowa, uu nu tangua ditshi athu abola mbaalandula gudihala?
Uu nu tangua ditshi?
4 Adi muzuela izuele-zuele, adi nji muzuela nu lulendo.
Athu agasue abola adi gudisunzula.
5 Oo Yehowa, adi mumonesa athu aye lamba,
adi musagesa khapho diaye.
6 Adi mushiya mukhetu wa gafunda nu ngenji,
adi mushiya nji an’a shiye.*
7 Adi muzuela egi: “Yah gashigo mumona;
Nzambi wa Yakoba gashigo mumona ndaga yene.”
8 Enue athu aheya, kotelesenu ndaga eyi;
enue iyilu, mbamutema giwa tangua ditshi?
9 Muthu walondele* matshui, gajiyilego guvua ba?
Muthu walondele meso, muene gajiyilego gumona ba?
10 Muthu wana hana ifutshi ndola, gajiyilego gubala ba?
Muene muthu wana hana athu ndunge!
11 Yehowa wana jiya matangi a athu,
muene wana jiya egi adi muhehe wa githuhu.
12 Oo Yah, gusuanguluga gudi nu muthu munu wana hana ndola,
munu aye wana longesa mikhuala yaye,
13 ha gumuhana guhuima mu masugu a lamba,
uu nu tangua mbaahaga wina mukunda nu athu abola.
14 Handaga Yehowa mbagashigo mujimbila athu enji,
mbagashigo nji mubemba khapho dienji.
15 Handaga manzuji mbaabatula luko milonga mu luholo luabonga,
athu agasue adi nu mitshima yabonga, mbatumagela ndaga yene.
16 Nanyi mbawuzuga ha gunguluishila athu abola?
Nanyi mbawumagana gu khanda yami ha guluisa athu adi mutshita ndaga jiabola?
17 Gula nga Yehowa gangukuateselego,
nga ngatotele gale muphushi.*
18 Tangua ngazuelele egi: “Kulu diami didi mudiadiumuga,”
Oo Yehowa, mu guzumba guaye gua giamatshidia, wangukuatesele.
19 Tangua gikenene giangulebesele muila,
aye wanguhanele ngolo,* wangutuluile mutshima.
20 Aye wajiya gukuata ufuta nu mafumu abola ba?*
Ene adi mukalegela mukhuala ha gubata malamba.
21 Ana luisa athu abonga nu khuta yagasue,
ana fuisa muthu gatshitshilego gubola milonga, ha gumushiya.
22 Uvi Yehowa mbawubua fundo diami diabonga dia gudisuegela,
Nzambi wami udi seso diami dia gudisuegela.
23 Muene mbawuhaga makalegelo awo abola holu dia mito yawo.
Mbawaatotesa* mukunda nu gubola guawo.
Yehowa Nzambi wetu, mbawaatotesa.*