Ngimbo
Lungimbo.
98 Yimbilenu Yehowa lungimbo luhe-luhe,
handaga wakalagala ndaga jia gushimana.
Muene watuhuluisa nu koko dienji dia madia, yakotelesa egi koko dienji dia gijila.*
2 Yehowa wamonesele egi muene wana huluisa;
wamonesele gubonga guenji gutuama dia ifutshi.
3 Wawungulugile guzumba guenji gua giamatshidia
nu gujinginyina guenji mukunda nu inzo ya Isalele.
Athu a gu songi jiagasue jia ha mavu amonele luholo Nzambi wetu wahuluishile athu enji.
4 Enue athu agasue a ha mavu, mbenu milolo ya gusuanguluga mukunda nu Yehowa.
Dihalenu, mbenu milolo ya gusuanguluga, yimbenu ngimbo ha gumutumbuisa.
5 Yimbenu ngimbo* ha gutumbuisa Yehowa nu gitare,
nu gitare nu ngimbo jiafula.
6 Yimbenu nu gusuanguluga gutuama dia Fumu, Yehowa,
nu phungi nu mbinga,
7 kianga nu ima idi ya guzala muene inume,
mavu* nu athu agasue adi hene.
8 Mita ibunde mago;
milundu imbe indanda ya gusuanguluga hamoshi
9 gutuama dia Yehowa, handaga muene udi muza* ha gusophesa mavu.
Muene mbawusophesa mavu* mu luholo luabonga,
mbawusophesa nji athu nu giamatshidia.