Ngimbo
Gisambu gia muthu udi mumonesewa lamba nu gashigo nu felela;* udi muwambela Yehowa ndaga jidi gumusagesa.
102 Oo Yehowa, vua gisambu giami;
vua luholo ngudi mudila ha gugutoga ukuateshi.
2 Ungusuegelago phala yaye mu tangua ngudi mumona lamba.
Haga kutshi diaye,* ungutegelele;
nguhane mvutu muphushi tangua ngudi gugutamega.
3 Handaga masugu a monyo wami adi mutugumuga gifua mishi,
mifiya yami yashidila gifua yawetshiewa ha jigo.
4 Mutshima wami wabua gifua muangu wakokewa nu walela,
nzala ya gudia yangutota.
5 Lamba diami didi diakola diago,
hene, ngudi mumba isugu, ngakhuwa, ngasala ifiya-ifiya.
6 Ngabua gifua pelikane mu mavu a luselenga,
gifua gana ga gahombo mu makhulu.
7 Ngudi mubanda gikole-kole;*
ngabua gifua ganjila gadi hakhenji holu dia yangi.
8 Mbalagaji jiami jidi gungushinga lusugu lua mudidi.
Athu adi gungulela* adi muta mukumbu mu jina diami.
9 Ngudi mudia fuphi gifua dipha,
ima ngudi munua idi ya gufutula nu masoji,
10 handaga wanguvila khabu nu gisegela,
wanguthuphuile hagula gungima ungubishile.
11 Masugu a monyo wami adi muya nu gushiwuga gifua vule,
ngabua gifua muangu wagulela.
12 Uvi aye mbawukhala mayilago, Oo Yehowa,
lukuma* luaye mbalukhala indongo nu indongo.
13 Yadiago, mbawuzuga ha guvila Siona khenda,
handaga idi tangua dia gumuvila khenda;
tangua diatombewe diatagana.
14 Handaga enya mudimo aye ana suanguluga nu maseso enji,
ana zumba nu yene fuphi yenji.
15 Ifutshi mbayivila jina dia Yehowa woma,
mafumu agasue a ha mavu mbaavua woma mukunda nu lutumbu luaye.
16 Handaga Yehowa mbawutunga luko Siona;
muene mbawudijiga lutumbu luenji.
17 Muene mbawutegelela gisambu gia phutu;
mbagashigo mutuna gutegelela gukombelela guawo.
18 Ndaga eyi yasonegewe mukunda nu gindongo gidi muza,
hagula athu anyi khenji avualewa gale ndo atumbuise Yah mu masugu adi muza.
19 Handaga muene wana tala hashi sendese gosa ha fundo dienji dia gijila,
Yehowa wana tala mavu sendese mu dilu,
20 ha gutegelela isugu idi mumba muenya bologo,
nu ha guhuluisa athu adi naye gushiyiwa,
21 hagula jina dia Yehowa mbadilongesewe gu Siona
nu lutumbu luenji gu Yelusalema,
22 tangua athu nu mawufumu
mbaadibungisa ha gukombelela Yehowa.
23 Wangutambudile ngolo ha ngakhalele ame gami muvuala;
wahihishile masugu a monyo wami.
24 Ngazuelele egi: “Oo Nzambi wami,
ungushiyigo ha ngudi khenji gubua gale ndo muthu wa gukola,
aye ivo yaye yana khala mayilago.
25 Sendese mualeha wahagele fondasio jia mavu,
dilu diana khala mudimo wa mago aye.
26 Dilu nu mavu mbaafua, uvi aye mbawusala;
mbayibola gifua muana bola mulele.
Mbawuyisombegesa gifua mulele, yene mbayitota.
27 Uvi aye wana sombegesa ndo, ivo yaye ishigo nji nu gisugishilo.
28 Ana a enya mudimo waye mbaakhala mu ubambi,
ajigulu awo nji mbaalandula gukhala mu ubambi gutuama diaye.”