Ngimbo
Lungimbo lua Davidi.
103 Ngudi mutumbuisa Yehowa;
monyo wami wagasue utumbuise jina dienji dia gijila.
2 Ngudi mutumbuisa Yehowa;
mbangushigo mujimbila ndaga jiagasue jiakalegele muene.
3 Muene wana gugutotesela gubola guaye guagasue
nu wana saga misongo yaye yagasue;
4 waguhuluishile mu gufua,*
wagumonesele guzumba gua giamatshidia nu waguvidile khenda.
5 Waguhanele ima yabonga monyo waye wagasue,
hagula usale muvuala nu ukhale nu ngolo gifua njila ya khuyi.
6 Yehowa wana kalagala ndaga mu luholo luabonga mukunda nu athu agasue adi musagesewa,
wana batula milonga yawo nu giamatshidia.
7 Muene wadijigile Moize njila jienji,
wamonesele ana a Isalele makalegelo enji.
8 Yehowa udi Nzambi wa khenda nu wa gisemo,*
muene ganago guvua khabu muphushi, udi wazala pha nu guzumba gua giamatshidia.
9 Muene mbagashigo mukamba gubola guetu tangua diagasue,
mbagashigo nji gutubambela khabu mayilago.
10 Muene gatukalegelego ndaga gifua muakhalele gubola guetu,
gatuhanelego nji ndola tuakhalele naye guheta mukunda nu gubola guetu.
11 Guzumba guenji gua giamatshidia mukunda nu athu ana gumuvila woma gudi guavula
gifua luholo dilu diana khala gualeha nu mavu.
12 Muene wana bishila gubola guetu gualeha nu esue,
gifua luholo mazogelo a kumbi ana khala gualeha nu mayilo a kumbi.
13 Yehowa wana vua khenda mukunda nu athu ana gumuvila woma,
gifua luholo tata wana vila an’enji khenda.
14 Handaga muene udi mujiya muabonga luholo tuafugiwe,
wana jiya egi tudi fuluguta dia mavu.
15 Masugu a mun’a muthu ana khala gifua a muangu;
wana sangumuga gifua giyaji gia mu temu.
16 Uvi gula funji yabunda, giene giana tota,
gifua giakhalelego hene nga hazonda.*
17 Uvi guzumba gua giamatshidia gua Yehowa guana khala mayilago*
gudi athu ana gumuvila woma;
muene mbawumonesa nji gubonga guenji mu indongo yawo idi muza,
18 gudi athu ana nemesa gikotelo gienji
nu ana tumagela muabonga mikhuala yenji.
19 Yehowa wajigamesele muabonga nguasa yenji ya ufumu mu dilu;
ufumu wenji wana hinyina ima yagasue.
20 Tumbuisenu Yehowa, enue anjelo enji agasue a ngolo,
enue muana tumagela mbimbi yenji nu muana tagenesa ndaga jiana zuela muene.*
21 Tumbuisenu Yehowa, enue masuta enji agasue,
enue enya mudimo wenji, muana tshita gutshigina guenji.
22 Tumbuisenu Yehowa, enue midimo yagasue ya mago enji,
mutumbuisenu mu mafundo agasue ana hinyina muene.
Monyo wami utumbuise Yehowa.