Ngimbo
Lungimbo lua Davidi.
א [Alefe]
145 Mbangugutumbuisa, Oo Nzambi Fumu wami,
mbangutumbuisa jina diaye mayilago.
ב [Bete]
2 Mbangugutumbuisa lusugu lua mudidi,
mbangutumbuisa jina diaye mayilago.
ג [Gimele]
3 Yehowa udi wakoma, udi watagana ha guheta lutumbu luavula;
tuajiyilego gukotelesa gukoma guenji.
ד [Dalete]
4 Indongo yagasue mbayitumbuisa midimo yaye;
mbaazuelela ndaga wakalegele nu ngolo jiaye.
ה [He]
5 Mbaazuelela lutumbu nu gukoma guaye,
mbangutangigiza midimo yaye ya gushimana.
ו [Waw]
6 Mbaazuelela midimo yaye ikuatesa woma,
mbangulongesa gukoma guaye.
ז [Zayine]
7 Mbaalandula guzuela nu gusuanguluga guavula tangua mbaawunguluga gubonga guaye,
mbaamba milolo ya gusuanguluga mukunda nu gubonga guaye.
ח [Heth]
8 Yehowa udi Nzambi wa khenda nu wa gisemo,
muene ganago guvua khabu muphushi, wazala pha nu guzumba gua giamatshidia.
ט [Teth]
9 Yehowa udi Nzambi wabonga gudi athu agasue,
khenda jienji jiana monega mu midimo yenji yagasue.
י [Yod]
10 Oo Yehowa, midimo yaye yagasue mbayigutumbuisa,
athu aye agujinginyina mbaagutumbuisa.
כ [Kaph]
11 Mbaalongesa lutumbu lua ufumu waye
mbaazuelela ngolo jiaye,
ל [Lamede]
12 ha guwambela athu midimo yaye ya ngolo
nu lutumbu lua gukoma gua ufumu.
מ [Mem]
13 Ufumu waye udi ufumu wa mayilago,
uhinyinyi waye mbawukhala mu indongo yagasue.
ס [Sameke]
14 Yehowa wana zugisa athu adi a gubua
wana hana ngolo gudi athu adi a guhuila.
ע [Ayine]
15 Ima yagasue idi nu monyo idi gugutala, idi gudifelela gudi aye;
aye wana guyihana ima ya gudia mu tangua diatagana.
פ [Pe]
16 Wana kangula koko diaye
wana tagenesa nzala ya ima yagasue idi nu monyo.
צ [Tsade]
17 Yehowa udi wabonga mu ndaga jienji jiagasue,
wana khala ya gujinginyina mu ndaga jiagasue jiana tshita muene.
ק [Qoph]
18 Yehowa wana khala hehi gudi athu agasue ana gumutamega,
gudi athu agasue ana gumutamega nu giamatshidia.*
ר [Resh]
19 Wana tagenesa nzala jia athu agasue ana gumuvila woma;
wana vua tangua ana dila ha gutoga ukuateshi, wana guahuluisa.
ש [Shin]
20 Yehowa wana bamba athu agasue ana gumuzumba,
uvi mbawushiya athu agasue abola.
ת [Taw]
21 Kano diami mbadilongesa lutumbu lua Yehowa;
ima yagasue idi nu monyo itumbuise jina dienji dia gijila mayilago.