Ngimbo
Gudi mutuameji wa miziki. Lungimbo lua Davidi.
19 Dilu didi mulongesa lutumbu lua Nzambi;
didi mumonesa midimo ya mago enji.*
2 Lusugu nu lusugu didi mulandula guzuela,
didi mumonesa ujiyi wenji phipha nu phipha.
3 Diana zuela ndo nga mbimbi imoshi;
dijui dienji diana vuiwa ndo.
4 Uvi matululu enji* ana muangana ha mavu agasue,
mbimbi yenji yana guya uu nu gu gisugishilo gia mavu.
Nzambi wajigile tenta mukunda nu tangua mu dilu;
5 tangua diene, didi gifua muvuala wa yala wakatuga guzula mukhetu mu ulo, udi muzoga gu sugu yenji;
didi gifua yala wa ngolo udi musuanguluga guzula phushi.
6 Diana zoga gu songi imoshi ya dilu,
diana guya uu nu gu songi iko;
gushigo nga nu gima giana gudisuega gu muanya wenji wabala.*
7 Mikhuala ya Yehowa idi yatagana, yana kuatesa muthu ha guheta luko ngolo.
Mbimbi jia Yehowa jidi jiatagana ha gushila mutshima,
jiana hana ndunge gudi muthu gashigo mujiya ndaga jiavula.
8 Malongo a Yehowa adi atagana, ana suanguluisa mutshima;
mikhuala ya Yehowa idi yaphelegeta, yana kangula meso a muthu ha gukotelesa ndaga.
9 Guvila Yehowa woma guabalegesa gubonga; athu mbaalandula gumuvila woma mayilago.
Usopheshi wa Yehowa udi wa giamatshidia, wana khala watagana.
10 Yene idi nu ndando yavula gubalega wolo,
gubalega nu wene wolo wabonga,
idi nzegu-nzegu gubalega wigi, gubalega nu wene wigi wakatuga mu gisela.
11 Yatemesele muenya mudimo waye;
gula muthu wayitumagela wana heta gubonga guavula.
12 Nanyi wajiya gukotelesa gubola guenji hakhenji?
Ungufisago milonga mu gubola gunu ngudi mutshita ame gujiya ndo.
13 Kanda muenya mudimo waye hagula gakalagalago ndaga nu lulendo;
ubembigo egi lulendo lunguhinyine.
Ngenyi mbangukhala muthu wabonga diago,
mbangutshitshigo gubola guakoma.
14 Ndaga ngudi muzuela, nu ndaga ngudi mutangigiza mu mutshima wami
jigusuanguluise, Oo Yehowa, aye Seso diami nu Muhuluishi wami.