Ngimbo
Lungimbo lua Davidi.
27 Yehowa udi muanya wami nu muhuluishi wami.
Nanyi ngajiya guvila woma?
Yehowa udi fundo diami dia gulengela.
Woma nguvila nanyi?
2 Athu abola anguluisa ha gunguzavumuna,
mbalagaji jiami jidi gunguluisa, jiakhakhuga, jiabua hashi.
3 Ngatshima masuta ahaga phundo ha gunguluisa,
mbangushigo muvua woma.*
Ngatshima mbalagaji jiaza gunguluisa,
mbangulandula gushila Nzambi mutshima.
4 Ngatogele Yehowa ndaga imoshi,
yene diago ngana kamba:
Ngana tshigina gukhala mu inzo ya Yehowa masugu agasue a monyo wami,
ha gutala gubonga gua Yehowa
nu ha gutala tempelo* yenji nu gusuanguluga guagasue.
5 Handaga muene mbawungusuega ha fundo dienji dia ubambi mu lusugu lua lamba;
mbawungusuega mu tempelo yenji, fundo dia gisuegi;
mbawunguhaga gosa, holu dia seso.
6 Henyaha ngabinga mbalagaji jiami jidi gungujieta;
mbanguhana milambu gu tenta yenji nu milolo ya gusuanguluga;
mbanguyimba ngimbo* ha gutumbuisa Yehowa.
7 Oo Yehowa, vua gudila guami;
nguvile khenda, nguhane mvutu.
8 Mutshima wami wanguwunguluisa ndaga wazuelele egi:
“Kamba phala yami.”
Oo Yehowa, mbangukamba phala yaye.
9 Ungusuegelago phala yaye.
Uvilago muenya mudimo waye khabu, ungukayigo.
Udi mukuateshi wami;
ungujimbilago, ungubembigo, aye Nzambi wami, muhuluishi wami.
10 Ikhale tata nu mama angutuna,
Yehowa mbawunguzula.
11 Oo Yehowa, ngudijige njila yaye,
ngutuameze mu njila yabonga handaga mbalagaji jiami jiangujieta.
12 Unguhanyigo ha mago a mbalagaji jiami,
handaga adi gunguzogela uthemua wa mambo,
adi gungukalegela ndaga nu khuta.
13 Nga ngashilego gutshigina egi mbangumona gubonga gua Yehowa ha mavu a athu a monyo,
nga mangino ngudi gui?
14 Difelele gudi Yehowa;
khala nu gikhesa nu ngolo.
Ayi, difelele gudi Yehowa.