LONGO DIA 42
LUNGIMBO 44 Prière du petit
Ndaga Yajiya Gugukuatesa ha Gutshita Isambu Yabonga
‘Ngudi gugutamega nu mutshima wami wagasue. Nguhane mvutu, Oo Yehowa.’—NGI. 119:145.
MU GUHIHIA
Tuza mumona malongo tuajiya guzula mu isambu ya akombeledi a Yehowa idi mu Biblia.
1-2. a) Itshi yajiya gutukanga njila ha gukangudila Yehowa mutshima? b) Luholo lutshi tudi mujiya egi Yehowa wana tegelela muabonga isambu yetu?
UDI mutangiza egi wana vutugila mbimbi jia luholo lumoshi mu isambu yaye nga ndo isambu yaye yana khala holu-holu ba? Gula idi ngenyi, ushigo hakhaye. Luholo tuana khala nu ndaga jiavula jia gukalagala, matangua ako tuajiya gusendesa gutshita isambu phushi-phushi. Nga ndo yajiya gukhala lamba ha gukangudila Yehowa mutshima handaga tudi mutangiza egi tushigo tuatagana ha gusuena hehi n’enji.
2 Biblia yana monesa egi ndaga yana khala nu ndando gu meso a Yehowa ishigo luholo tudi mutshita isambu, uvi wana tshigina egi isambu yetu ikatuge mu mitshima. Wana guvua ‘gutoga gua athu a gudibulumuisa.’ (Ngi. 10:17) Wana tegelela muabonga ndaga jiagasue tuana gumuwambela handaga wana gutuzumba.—Ngi. 139:1-3.
3. Mihu itshi tuza mutadila mu longo edi?
3 Tuajiya gudihula egi: Mukunda natshi tushigo naye guvua woma ha gukombelela Yehowa? Luholo lutshi isambu yetu yajiya gutukuatesa ha gusuena hehi nu Yehowa? Malongo atshi tuajiya guzula mu isambu ya akombeledi a Yehowa idi mu Biblia? Itshi tuajiya gukalagala gula tudi nu gikenene nu tushigo mujiya ndaga tuajiya guwambela Yehowa mu gisambu? Tutadilenu mvutu jia mihu eyi.
UBEMBIGO EGI NGA NDAGA IMOSHI IGUKANGE NJILA HA GUKOMBELELA YEHOWA
4. Itshi yajiya gutukuatesa ha gutuna guvua woma ha gukangudila Yehowa mutshima mu gisambu? (Ngimbo 119:145)
4 Gula tudi mujiya egi Yehowa wakhala futa diabonga munu wana tshigina egi tukhale nu gusuanguluga, mbayitukuatesa ha gumukombelela nu mutshima wagasue. Muthu wasonegele mukanda wa Ngimbo mukhapho 119 wakhalele nji mukamba gukhala futa dia Yehowa hakhalele muene gumukombelela. Watagenele nu malamba avula mu monyo wenji. Athu abola azuelele ndaga jia mambo mukunda nu muene. (Ngi. 119:23, 69, 78) Matangua ako wakhalele nji muleba muila mukunda nu ndaga jiabola jiakalegele muene. (Ngi. 119:5) Ikhale ngenyi, gavuilego woma ha gukangudila Yehowa mutshima wenji.—Tanga Ngimbo 119:145.
5. Mukunda natshi tushigo naye gubemba egi nga ndaga imoshi itukange njila ha gukombelela Yehowa? Hana gifezegeselo.
5 Yehowa wana tshigina egi athu agasue amukombelele, nga ene athu akalegele gubola guakoma. (Yesh. 55:6, 7) Hene, tushigo naye gubemba egi nga ndaga imoshi itukange njila ha gumukombelela. Ha gukotelesa ndaga yene muabonga, tangiza gale egi waya mu dimbo dimoshi dihe-dihe. Tangua waya nu guwenda mu dimbo diene, watota nu ushigo mujiya njila ya guyila. Uvi udi mujiya egi gula wahula muthu wana khala mu dimbo diene, wajiya gugukuatesa ha gujiya njila yabonga. Mbawutuna gumuhula handaga udi muvua sonyi mu luholo watotshi ba? Ndo sha! Luholo lumoshi nji, gula tushigo mujiya desizio dia guzula nga ndo tuakalagala gubola, tushigo naye guvua woma ha gukombelela Yehowa.—Ngi. 119:25, 176.
NDAGA YAJIYA GUTUKUATESA HA GUTSHITA ISAMBU YABONGA
6-7. Luholo lutshi gutangigiza makalegelo a Yehowa guajiya gutukuatesa ha gusuena hehi n’enji? Hana gifezegeselo. (Tala nji mbimbi goshi’a diyiji.)
6 Gula tudi mukangudila Yehowa mutshima mu isambu yetu, tudi gumuwambela matangi etu nu luholo tudi gudivua, mbayitukuatesa ha gusuena hehi n’enji. Itshi yajiya gutukuatesa?
7 Khala mutangigiza makalegelo a Yehowa.a Gula tudi muzula tangua dia gutangigiza makalegelo a Yehowa, mbayikhala yaleba ha gumuwambela matangi etu muabonga. (Ngi. 145:8, 9, 18) Tutadilenu gizegeselo gia phangi Kristine. Sh’enji wakhalele muenya khuta diago. Udi muzuela egi luholo sh’enji wakhalele muenya khuta, yakhalele lamba gudi muene ha gutshigina egi Yehowa wakhala Tata wa guzumba nu ha guta n’enji maga. Wakhalele nji mutangiza egi gashigo diago nu ndando nu Yehowa mbawubemba gumuzumba mukunda nu ndaga jiabola jiakhalele mutshita muene. Khadilo ditshi dia Yehowa diamukuatesele? Udi muzuela egi: “Guzumba gua giamatshidia gua Yehowa guana gungukuatesa ha gudivua mu ubambi. Ngudi mujiya egi muene mbagashigo gungubemba nga hazonda. Ikhale ngatshita gubola, muene mbawulandula gunguzumba nu gungukuatesa. Gujiya ngenyi guana gungukuatesa ha gumuwambela ndaga jiagasue jiana gungusuanguluisa nu jinyi jiana gungusagesa.”
8-9. Gubonga gutshi tuajiya guheta gula tudi muzula tangua dia gutangigiza gutuama dia gutshita gisambu? Hana gifezegeselo.
8 Zula tangua dia gutangiza ndaga udi mutshigina guzuela mu gisambu. Gutuama dia gutshita gisambu, wajiya gudihula mihu eyi: ‘Milonga itshi ngudi nayo masugu awa? Gudi nu muthu ngudi naye gutotesela ba? Gudi nu ndaga yakatuga gungubuila inyi ngudi mutshigina egi Yehowa angukuatese ba?’ (2 Maf. 19:15-19) Wajiya nji gulandula gifezegeselo gia Yesu gula udi muzula tangua dia gutangiza ndaga wajiya guwambela Yehowa yatadila jina dienji, Ufumu wenji nu gutshigina guenji.—Mat. 6:9, 10.
9 Tangua phangi Aliska wavuile egi mulumi’enji udi nu misongo ya cancer ga mu wongo nu misongo yene yajiyilego gusagewa, yakhalele lamba gudi muene ha gutshita gisambu. Udi muzuela egi: “Ngakhalele nu gikenene giavula, ngakhalelego mujiya ndaga ngajiya guzuela mu gisambu.” Itshi yamukuatesele? Udi muzuela egi: “Ngana zula tangua dia gutangigiza gutuama dia gutshita gisambu hagula ndaga ngudi mutshigina gutoga Yehowa jikhadigo phamba jiami nga jiatadila misongo ya mulumi’ami. Gutshita ngenyi guana gungukuatesa ha gudivua mu guhuima nu ha gukhala nu luholo lua gukombelela Yehowa mukunda nu ndaga jiavula.”
10. Mukunda natshi tudi naye gukhala nu khadilo dia gutshita isambu yaleha? (Tala nji ifuanesa.)
10 Khala muzula tangua dia gutshita isambu yaleha. Idi yadiago egi isambu yahihia yajiya gutukuatesa ha gusuena hehi nu Yehowa, uvi gula tudi muzula tangua dia gutshita isambu yaleha, mbayitukuatesa ha guwambela Yehowa ndaga jietu jiavula.b Phangi Elijah mulumi’a phangi Aliska udi muzuela egi: “Ngana tshita yagasue ha gukombelela Yehowa mbala jiavula mu lusugu; gutshita ngenyi guangukuatesele ha gusuena hehi n’enji nu ha gukhala nu khadilo dia gutshita isambu yaleha. Ngudi mujiya egi Yehowa ganago gukhala suga-suga egi nga ngamanesela gale gisambu giami, gishina giene ngana zula diago tangua dia gumukombelela.” Ndaga wajiya gutshita yenyeyi: Kamba tangua diabonga wajiya gutshita isambu, kamba nji fundo diabonga wajiya guyitshita nga mu mbimbi yakola. Tomba fundo dinyi athu nga ima iko yajiyilego guguwunganesa matangi. Gungima, tshita yagasue ha gubamba khadilo diene lusugu nu lusugu.
Kamba tangua nu fundo diabonga diajiya gugukuatesa ha gutshita gisambu gialeha (Tala paragrafe 10)
KHALA MUTANGIGIZA ISAMBU YA AKOMBELEDI A YEHOWA IDI MU BIBLIA
11. Luholo lutshi isambu ya akombeledi a Yehowa a mu tangua dikulu yajiya gutukuatesa? (Tala nji galuanda, “Milonga Idi Gugusagesa idi Gifua Yawo ba?”)
11 Ndaga iko yajiya gugukuatesa idi gutangigiza ndaga jiazuelele akombeledi a Yehowa a mu tangua dikulu mu isambu yawo nu mu ngimbo jiawo akhalele mutumbuishila Yehowa. Tangua mbawumona luholo akombeledi a Yehowa akhalele gumukangudila mutshima, mbayigukuatesa nji ha gumukangudila mutshima waye. Isambu yawo yajiya gugukuatesa ha guheta mbimbi jihe-jihe wajiya gukalegela mu isambu yaye. Mbawumona nji isambu iko ya akombeledi a Yehowa idi gudivua diago nu milonga udi mutagana nayo.
12. Mihu itshi tuajiya gudihula tangua tudi mutanga gisambu gimoshi mu Biblia?
12 Tangua udi mutanga gisambu gimoshi mu Biblia, wajiya gudihula mihu eyi: ‘Nanyi watshitshile gisambu egi? Ndaga itshi akhalele mutagana nayo? Ngajiya nji gukalegela mbimbi jidi mu gisambu giene ba? Gisambu giene gidi gungulongesa itshi?’ Wajiya gukamba mvutu gu mihu yene, uvi yana toga gutshita ngolo. Tutadilenu ifezegeselo eyi yalandula.
13. Longo ditshi tuajiya guzula mu gisambu gia Ana? (1 Samuele 1:10, 11) (Tala nji gifuanesa holu dia gizula.)
13 Tanga 1 Samuele 1:10, 11. Tangua Ana wakalegele gisambu egi, wakhalele mutagana nu ndaga mbadi jia lamba. Gakhalelego muvuala nu mufuagaji’enji (mbanda) wakhalele gumusagesa muavula. (1 Sam. 1:4-7) Gula udi mutagana nu ndaga imoshi idi mulandula gugusagesa, longo ditshi wajiya guzula mu gisambu gia Ana? Ana wawambelele Yehowa ndaga jiagasue mu gisambu, gungima wadivile muabonga. (1 Sam. 1:12, 18) Esue nji tuajiya gudivua muabonga gula ‘tuatuludila Yehowa ginemo gietu,’ yakotelesa egi gumuwambela luholo tudi gudivua mukunda nu ndaga jidi gutusagesa.—Ngi. 55:22.
Ana watogele Yehowa ha gumukuatesa handaga gakhalelego muvuala nu mbanda wenji wakhalele gumusagesa muavula (Tala paragrafe 13)
14. a) Longo ditshi diko tuajiya guzula mu gifezegeselo gia Ana? b) Luholo lutshi gutangigiza isambu idi mu Biblia guajiya gutukuatesa ha gutshita isambu yetu muabonga? (Tala mbimbi goshi’a diyiji.)
14 Tangua Ana wavualele mun’enji Samuele, guabalegele ivo yazonda, gungima wayile nenji gudi Nganga-nzambi Wakoma Eliya. (1 Sam. 1:24-28) Mu gisambu giakalegele muene, wamonesele diago egi Yehowa wana bamba nu wana kuatesa akombeledi enji agujinginyina.c (1 Sam. 2:1, 8, 9) Ikhale ndaga yakhalele musagesa Ana yakhalele khenji ihuagalego, uvi muene wakhalele mutangiza ndaga jiakhalele gumukalegela Yehowa. Ndaga yene idi gutulongesa itshi? Esue nji tuajiya guheta ngolo jia gukolesela malamba tudi mutagana nawo gula tudi mutala luholo Yehowa wana gutukuatesa.
15. Gula adi gutukalegela ndaga mu luholo luabola, longo ditshi tuajiya guzula mu gisambu gia profete Yelemiya? (Yelemiya 12:1)
15 Tanga Yelemiya 12:1. Profete Yelemiya walebele muila tangua diakhalele muene mumona athu abola nu umonyi. Enya Isalele akhalele nji gumukalegela ndaga mu luholo luabola. (Yel. 20:7, 8) Tuajiya nji gudivua ngenyi gula tudi mumona athu abola nu umonyi nga tangua adi gutusegulula. Yelemiya wawambelele Yehowa luholo luakhalele gudivua muene, uvi gazuelelego egi Nzambi wana tshita ndaga mu luholo luabola. Uvi tangua Yelemiya wamonele luholo Yehowa wahanele athu abola disipline, yamukuatesele ha gutshigina diago egi Yehowa wana tshita ndaga mu luholo luabonga. (Yel. 32:19) Esue nji tuajiya guwambela Yehowa luholo tudi gudivua mu gisambu nu gusha mutshima egi muene mbawulondega ndaga mu tangua diabonga.
16. Longo ditshi tuajiya guzula mu gisambu gia muenya Levi? (Ngimbo 42:1-4) (Tala nji ifuanesa.)
16 Tanga Ngimbo 42:1-4. Lungimbo elu luasonegewe gudi muenya Levi mumoshi, wakhalele mu uhiga nu gakhalelego nu luholo lua gudibungisa nu akombeledi a Nzambi. Tuajiya nji gudivua ngenyi gula tushigo nu luholo luaguzoga gumbo dietu nga ndo gula tuambiwa mu bologo mukunda nu gutshigina guetu. Ndaga yene yajiya gutusagesa muavula, uvi tudi naye guwambela Yehowa ndaga yene mu gisambu. Gutshita ngenyi mbagutukuatesa ha gujiya matangi etu muabonga nu gutadila mulonga wene mu luholo luko. Ha gufezegesa, muenya Levi wakotelesele egi gudi nji nu maluholo ako ajiya muene gutumbuishila Yehowa. (Ngi. 42:5) Wakhalele nji mutangiza luholo Yehowa wamukuatesele. (Ngi. 42:8) Gukombelela nu mutshima umoshi mbagutukuatesa ha gutadila ndaga mu luholo luabonga, ha guheta guhuima nu guheta luko ngolo jia gukolesela mu malamba tudi mutagana nawo.
Muenya Levi wasonegele mukanda wa Ngimbo mukhapho 42 wakangudile Yehowa mutshima wenji. Esue nji tangua tudi muwambela Yehowa luholo tudi gudivua mu gisambu, yajiya gutukuatesa gutadila mulonga wetu mu luholo luabonga (Tala paragrafe 16)
17. a) Malongo tuajiya guzula mu gisambu gia profete Yona? (Yona 2:1, 2) b) Mukunda natshi idi nu ndando ha guwunguluga mbimbi jidi mu mukanda wa Ngimbo tangua tudi mutagana nu malamba? (Tala mbimbi goshi’a diyiji.)
17 Tanga Yona 2:1, 2. Profete Yona wakombelele Yehowa tangua diakhalele muene mu vumu dia ishui yakoma. Yona watunyile gutumagela Yehowa, uvi washile mutshima egi Yehowa mbawutegelela gisambu gienji. Mu gisambu giene, Yona wakalegele mbimbi jiavula jidi mu mukanda wa Ngimbo.d Wakhalele mujiya mbimbi jiene muabonga diago. Hatangijile muene mbimbi jiene, washile mutshima egi Yehowa mbawumukuatesa. Luholo lumoshi nji, gula tudi mukuata verse jia Biblia mu muto, tuajiya gujiwunguluga ngenyi jiajiya gutuhana gikhesa tangua tudi mukombelela Yehowa mu tangua dia lamba.
LANDULA GUSUENA HEHI NU YEHOWA MU NJILA YA GISAMBU
18-19. Gula matangua ako idi lamba ha guwambela Yehowa luholo tudi gudivua, luholo lutshi mukanda wa Roma 8:26, 27 wajiya gutukuatesa? Hana gifezegeselo.
18 Tanga Roma 8:26, 27. Matangua ako gikenene giajiya gutubalegela nu tushigo mujiya ndaga ya guwambela Yehowa. Uvi gudi nu ndaga yajiya gutukuatesa. Mu tangua diene, nyuma ya Nzambi yajiya “gutoga” mukunda nu esue. Luholo lutshi? Yehowa wahanele athu asonegele Biblia nyuma yenji ha gusonega isambu yavula idi mu Biblia. Gula tushigo mujiya ndaga ya guwambela Yehowa mu gisambu, muene wajiya gutshigina mbimbi jiko jidi mu isambu idi mu Biblia gifua esue tudi gumutoga, ngenyi wajiya guhana mvutu mu isambu yene.
19 Yene ndaga yakuatesele phangi wa mukhetu Yelena wana khala gu Russie. Wambiwe mu bologo handaga wakhalele mukombelela nu wakhalele nji mutanga Biblia. Ndaga yene yamusagesele muavula nu yakhalele lamba gudi muene ha gutshita gisambu. Udi muzuela egi: “Mu tangua diene, ngawungulugile egi gula ngudi nu gikenene giavula nu ngushigo mujiya ndaga ya guwambela Yehowa mu gisambu, muene wajiya gutshigina isambu yakalegele akombeledi enji a mu tangua dikulu idi mu Biblia gifua yami. Ndaga yene yana gunguhana diago gikhesa tangua ngudi mutagana nu ndaga idi gungusagesa muavula.”
20. Tangua tudi mutagana nu malamba, luholo lutshi tuajiya gulondega matangi etu ha gutshita gisambu?
20 Tangua tudi mutagana nu malamba, tuajiya gusendesa gutshita gisambu uvi tusendesa getu gutangiza ndaga jiko. Itshi yajiya gutukuatesa mu tangua diene? Tuajiya gutanga mikhapho iko ya mukanda wa Ngimbo. Tuajiya nji gusonega ndaga tudi mutshigina guwambela Yehowa gifua muatshitshile Fumu Davidi. (Ngi. 18, 34, 142; mbimbi jia gisendeselo.) Uvi gushigo nu mikhuala idi mumonesa luholo tuajiya gudilondega ha gutshita gisambu. (Ngi. 141:2) Tshita ndaga udi mumona egi idi yabonga mukunda nu aye.
21. Mukunda natshi tudi naye gukombelela Yehowa nu mutshima wagasue?
21 Tudi nu gusuanguluga ha gujiya egi Yehowa wana kotelesa ndaga tudi mutshigina gumuwambela gutuama egi tujizuele. (Ngi. 139:4) Uvi wana suanguluga ha guvua isambu yetu idi mumonesa egi tuana gumushila mutshima. Hene, uvigo woma ha gukombelela Tata waye wa mu dilu. Wajiya nji gukalegela mbimbi jidi mu isambu yasonegewe mu Biblia. Khala mukombelela nu mutshima waye wagasue. Khala gumuwambela ndaga jiana gugusuanguluisa nu jinyi jiana guguhana gikenene. Yehowa udi guene ha gugukuatesa tangua diagasue handaga udi Futa diaye diabonga!
LUNGIMBO 45 « La méditation de mon coeur »
a Tala “Makalegelo ako a Yehowa” mu mukanda Mbimbi ya Nzambi Yajiya Gugukuatesa, mu gitshinyi gidi nu muto wa lumene egi “Yehowa.”
b Uvi isambu ya gutshita mukatshi dia athu gifua mu gudibungisa gua mu hungu, yana khala yahihia.
c Mu gisambu giakalegele Ana, wakalegele mbimbi jia luholo lumoshi nu jinyi jiasonegele Moize. Wazudile diago tangua dia gutangigiza ndaga jidi mu Biblia. (Mikh. 4:35; 8:18; 32:4, 39; 1 Sam. 2:2, 6, 7) Gungima dia ivo yavula, tangua Madiya gina Yesu watshitshile gisambu ha gutumbuisa Nzambi, wakalegele diago mbimbi jia luholo lumoshi nu jinyi jiakalegele Ana.—Luka 1:46-55.