Guzumba gua Nzambi Guana Khala Mayilago

1-2. Ndaga itshi Aklisto avula ana tagana nayo?

TANGIZA egi funji yakola idi munyigisa wato. Gula muthu gambilego longo, wato wene wajiya guya fundo diagasue funji idi guwubata. Uvi longo mbadikuatesa wato ha gutuna gudinyigisa muavula tangua funji idi mubunda.

² Tangua udi mutagana nu malamba, wajiya gudivua gifua wato tuazuelela. Wajiya gubua tunga-tunga. Matangua ako wajiya gusha mutshima egi Yehowa wana guguzumba nu mbawugukuatesa. Uvi matangua ako wajiya gusendesa gudihula gula Yehowa udi diago mumona ndaga jidi gugubuila. (Ngi. 10:1; 13:1) Mu tangua diene wajiya gudivua muabonga gula futa diaye mumoshi wa guhana gikhesa. (Ish. 17:17; 25:11) Uvi gungima wajiya gusendesa luko gudihula gula Yehowa mbawugukuatesa. Wajiya nji gusendesa gutangiza egi Yehowa wagubemba gaye. Gifua luholo tuayimonesa, longo diana kuatesa wato ha gutuna gudinyigisa. Uvi aye itshi yajiya gugukuatesa mu tangua dia lamba? Mu guzuela guko, itshi yajiya gugutshiginyisa egi Yehowa wana guguzumba nu mbawugukuatesa?

3. ‘Guzumba gua giamatshidia’ adi muzuelela mu mukanda wa Ngimbo 31:7 nu 136:1 gudi mukotelesa itshi? Mukunda natshi tudi muzuela egi Yehowa udi gifezegeselo giabonga mu ndaga yene? (Tala nji gifuanesa.)

³ Ndaga yajiya gutukuatesa ha gutuna gubua tunga-tunga tangua tudi mutagana nu malamba idi guwunguluga guzumba gua giamatshidia gua Yehowa. (Tanga Ngimbo 31:7; 136:1.) Mbimbi ‘guzumba gua giamatshidia’ idi mumonesa guzumba guakola guana khala nago muthu mukunda nu muthu muko. Yehowa udi gifezegeselo giabonga giatadila guzumba guene. Gishina giene Biblia yana zuela mukunda nu muene egi, “wazala pha nu guzumba gua giamatshidia.” (Guz. 34:6, 7) Biblia yana zuela luko mukunda nu Yehowa egi muene ‘wana monesa guzumba guavula gudi athu agasue ana gumutamega.’ (Ngi. 86:5) Ndaga yene idi mukotelesa egi: Yehowa ganago gubemba akombeledi enji agujinginyina nga hazonda! Gujiya ndaga yene guajiya gugukuatesa ha gukolesela mu malamba akola udi mutagana nawo.​—Ngi. 23:4.

GUZUMBA GUA YEHOWA GUDI GIFUA MALONGO A THOMO A BIBLIA

4. Malongo atshi a thomo walongugile mu Biblia? Mukunda natshi tuana gusha diago gutshigina mu malongo ene?

⁴ Gujiya luko egi guzumba gua Yehowa gudi gifua malongo a thomo walongugile mu Biblia guajiya gugukuatesa ha gutuna gudisagesa muavula tangua udi mutagana nu malamba. Malongo ene a thomo a Biblia adi mukotelesa itshi? Yajiya gukhala egi watangiza giamatshidia walongugile mu Mbimbi ya Nzambi. Ha gufezegesa, walongugile egi jina dia Nzambi didi Yehowa nu Yesu udi mun’enji mumoshi ha mumoshi. Walongugile nji egi athu a gufua anago gujiya nga gima gimoshi nu gudi nu lusugu athu mbaajinga mayilago mu phaladiso. (Ngi. 83:18; Mulo. 9:5; Yone 3:16; Gumo. 21:3, 4) Tangua wakotelesele malongo awa, yakhalelego luko yaleba hagula muthu aguhuige. Mukunda natshi? Handaga wakotelesele diago egi malongo ene adi a giamatshidia. Yadiago, guzumba gua Yehowa gudi gifua malongo a thomo walongugile mu Biblia. Gujiya ndaga yene guajiya gugukuatesa ha gujiya egi Yehowa wana mona nu wana gudisagesa mukunda nu ndaga jidi gugubuila. Luholo lutshi?

5. Luholo lutshi muthu wajiya gutuna malongo a mambo?

⁵ Itshi yagukuatesele ha gutuna malongo a mambo tangua wasendesele gulonguga Biblia? Yajiya gukhala egi wakhalele mufuanesa ndaga jia gikombelelo giaye nu jinyi jiana longesa Biblia. Ha gufezegesa, yajiya gukhala egi wakhalele mutshigina egi Yesu udi Nzambi wa Ngolo jiagasue. Yajiya nji gukhala egi tangua wakhalele mulonguga Biblia wadihudile egi: ‘Malongo awa adi diago a giamatshidia ba?’ Uvi gungima dia gulonguga Biblia, wakotelesele egi Yesu gashigo Nzambi. Ha fundo dia gutshigina malongo a mambo, wasendesele gusha gutshigina mu giamatshidia gia Biblia egi: Yesu udi “somi ya ima yagasue yafugiwe,” “mona mumoshi ha mumoshi wa Nzambi.” (Kol. 1:15; Yone 3:18) Yadiago, malongo a mambo ajiya gukhala gifua “phango jiakola jia seso” nu yajiya gukhala lamba ha guakatula. (2 Kol. 10:4, 5) Uvi gungima dia gulonguga giamatshidia, wajiya gusendesa luko gutshigina malongo ene a mambo.​—Fili. 3:13.

6. Mukunda natshi tuajiya gusha mutshima egi ‘guzumba gua giamatshidia gua Yehowa guana khala mayilago’?

⁶ Wajiya gutshita luholo lumoshi nu ndaga Biblia yana longesa mukunda nu guzumba gua Yehowa. Tangua udi mutagana nu malamba gula watangiza egi Yehowa ganago guguzumba, dihule egi: ‘Ngudi mutangiza diago muabonga ba?’ Mu tangua diene, dihule egi itshi idi gungutuma ha gutangiza egi Yehowa ganago gunguzumba? Gungima, tanga mbimbi jidi mu mukanda wa Ngimbo 136:1​—verse yakuata muto wa lumene wa longo edi. Mukunda natshi Biblia yana tamega guzumba gua Yehowa egi guzumba gua ‘giamatshidia’? Mukanda wa Ngimbo mukhapho 136 udi muvutugila mbimbi ‘guzumba guenji guana khala mayilago’ mbala 26. Mukunda natshi? Gifua luholo tuayimonyi, guzumba gua giamatshidia gua Yehowa mukunda nu akombeledi enji, gudi mukatshi dia malongo a thomo walongugile anyi watshiginyile mu phushi. Hene idi matangi abola gula udi mutangiza egi Yehowa ganago guguzumba nga guguzula nu ndando. Katula diago matangi ene mbala imoshi gifua luholo watunyile malongo ako a mambo!

7. Hana gifezegeselo gia verse jidi mumonesa egi Yehowa wana guguzumba.

⁷ Biblia idi nu ndaga jiavula jiajiya gututshiginyisa egi Yehowa wana gutuzumba. Ha gufezegesa, Yesu wawambelele alandudi enji egi: “Mudi nu ndando yavula gubalega mbodio jiavula.” (Mat. 10:31) Yehowa nji wawambelele akombeledi enji egi: ‘Mbanguguhana ngolo, ayi mbangugukuatesa, mbangugukuata nu koko diami dia madia diana tshita ndaga mu luholo luatagana.’ (Yesh. 41:10) Mbimbi eji jidi diago muhana gikhesa. Yesu gazuelelego egi: ‘Ngumumona gifua muajiya gukhala nu ndando,’ Yehowa nji gazuelelego egi: ‘Ngajiya gumikuatesa.’ Uvi azuelele egi: “Mudi nu ndando yavula” nu “mbangugukuatesa.” Gula udi mutangiza egi Yehowa ganago guguzumba tangua udi mutagana nu malamba, verse eji jiajiya gugukuatesa ha gudivua muabonga, jiajiya nji gugukuatesa ha gujiya egi Yehowa wana guguzumba. Jidi diago verse jiabonga. Gukombelela nu gutangigiza muabonga verse eji guajiya gugukuatesa ha guzuela mbimbi jidi mu mukanda wa 1 Yone 4:16 egi: “Tuajiyile nu tuashile gutshigina mu guzumba Nzambi wakhala nago mukunda nu esue.”a

8. Itshi wajiya gutshita gula udi mulandula gutangiza egi Yehowa ganago guguzumba?

⁸ Itshi wajiya gutshita gula udi mulandula gutangiza egi Yehowa ganago guguzumba? Ndaga wajiya gutshita idi gufuanesa luholo udi gudivua nu ndaga wana jiya mukunda nu Yehowa. Matangi etu ajiya gusombegesa, uvi guzumba gua Yehowa tuana tanga mu Biblia, guajiyilego gusombegesa. Gula tudi mutangiza egi Yehowa ganago gutuzumba, idi gifua tudi muzuela egi verse yana zuela egi “Nzambi udi guzumba” idi ya mambo.​—1 Yone 4:8.

KHALA MUJIYA EGI YEHOWA ‘WANA GUGUZUMBA’

9-10. Ha gutadila Yone 16:26, 27, itshi Yesu wakhalele muzuelela tangua diazuelele muene egi: “Tata hakhenji wana gumizumba”? (Tala nji gifuanesa.)

⁹ Tuajiya gujiya ndaga jiavula jiatadila guzumba gua Yehowa gula tuatadila ndaga jiawambelele Yesu alandudi enji egi: “Tata hakhenji wana gumizumba.” (Tanga Yone 16:26, 27.) Yesu gawambelelego alandudi enji mbimbi eji ha guasuanguluisa. Gula tuatadila verse jidi gu thunda, mbatukotelesa egi Yesu gakhalelego muzuelela luholo alandudi enji akhalele gudivua mu tangua diene. Uvi wakhalele muzuelela ndaga jiatadila gisambu.

¹⁰ Yesu wakhalele muwambela alandudi enji egi adi naye gukombelela mu jina dienji uvi ishigo muene adi naye gukombelela. (Yone 16:23, 24) Yakhalele nu ndando egi ajiye ndaga yene, handaga idi mumonega egi gungima dia gufuzumuga guenji alandudi enji atshiginyile gumukombelela. Uvi akotelesele egi Yesu udi futa diawo. Akhalele mutangiza egi luholo Yesu wakhalele guazumba muavula, wakhalele naye gutegelela isambu yawo, gungima atogi Sh’enji ha guakuatesa. Uvi Yesu wawambelele egi ashigo naye gutangiza ngenyi. Mukunda natshi? Handaga waawambelele egi: “Tata hakhenji wana gumizumba.” Ndaga yene idi mukatshi dia malongo a thomo a Biblia tuana longuga mukunda nu gisambu. Idi mukotelesa itshi? Idi mukotelesa egi tangua wakhalele mulonguga Biblia wajiyile Yesu nu wamuzumbile. (Yone 14:21) Uvi gifua alandudi a mu siekle ya thomo, wajiya gukombelela Nzambi nu gusha mutshima egi muene ‘hakhenji wana guguzumba.’ Hene, tangua diagasue wana kombelela Yehowa wana monesa egi udi musha gutshigina mu mbimbi jiene.​—1 Yone 5:14.

KAMBA GUJIYA NDAGA YANA GUGUTUMA HA GUTANGIZA EGI YEHOWA GANAGO GUGUZUMBA

11. Mukunda natshi Satana wana suanguluga gula tuasendesa gutangiza egi Yehowa ganago gutuzumba?

¹¹ Matangi ana gututuma ha gutangiza egi Yehowa ganago gutuzumba ana katuga gui? Wajiya guzuela egi Satana wana tshigina egi tutangize ngenyi. Uvi gudi nu ndaga jiko tudi naye gujiya. Diabula ‘wana kamba gutudia,’ hene mbawukhala nu gusuanguluga gula tuasendesa gutangiza egi Yehowa ganago gutuzumba. (1 Phet. 5:8) Yehowa wafutshile gibawu handaga wana gutuzumba. Uvi Satana wana tshigina egi tutangize egi gubola guetu gudi guavula nu gibawu giafutshile Yehowa giajiyilego gutotesa gubola guene. (Heb. 2:9) Hene wana suanguluga muavula gula tudi mutangiza egi Yehowa ganago gutuzumba. Wana khala nji nu gusuanguluga guavula gula tuabemba gukombelela Yehowa. Satana wana tshigina egi tutangize gamba Yehowa ganago gutuzumba. Uvi ishigo ngenyi. Yehowa ganago guzumba luko Satana. Hene Satana wana kamba gututuma ha gutangiza egi Yehowa ganago gutuzumba nu watutunyile gale getu. Matangi awa adi mukatshi dia miheto yakoma yana kalegela muene. (Ef. 6:11) Gula tuajiya miheto yana kalegela Satana, mbayitukuatesa ha gukhala ‘mbalagaji jienji.’​—Yak. 4:7.

12-13. Gubola guana gututuma ha gudivua luholo lutshi?

¹² Ndaga iko yajiya gututuma ha gutangiza egi Yehowa ganago gutuzumba, idi gubola tuana vualewa nago. (Ngi. 51:5; Roma 5:12) Gubola guana bolesa ufuta wa muthu nu Nzambi. Guana bolesa nji matangi, mutshima nu muila wa muthu.

¹³ Gubola guana gubuisa matangi etu tunga-tunga. Ha gufezegesa, gula tuatshita gubola, tuajiya guvua gikenene, gudibela nu guvua musonyi nga gutangiza egi tushigo mu ubambi. Tuajiya nji gudivua ngenyi handaga tushigo athu atagana nu Yehowa gatufugilego ha gutshita gubola. (Roma 8:20, 21) Gifua luholo pine ya gamiyo yakoboga yana tshita egi gamiyo gawendjigo luko muabonga, esue nji luholo tushigo athu atagana, tuajiyilego gutshita ndaga jiabonga tangua diagasue gifua muakhalele gutshigina gua Yehowa. Gishina giene matangua ako tuajiya gusendesa gudihula gula Yehowa wana gutuzumba. Gula ndaga ya luholo elu yatubuila, tujimbilago egi Yehowa udi ‘Nzambi wakoma munu tudi naye guvila woma, wana monesa guzumba gua giamatshidia gudi athu agasue ana gumuzumba nu ana tumagela mikhuala yenji.’​—Neh. 1:5.

14. Luholo lutshi gibawu giajiya gutukuatesa ha gusha mutshima egi Yehowa wana gutuzumba? (Roma 5:8) (Tala nji galuanda: “Monesa Gutema Hagula ‘Ngolo jia Masumu’ Jigu Huigigo”)

¹⁴ Matangua ako tuajiya gutangiza egi tushigo atagana hagula Yehowa atuzumbe. Idi yadiago egi tushigo atagana hagula Yehowa atuzumbe, uvi luholo luana gutuzumba muene idi diago ndaga ya gushimana. Gushigo nga nu ndaga tuajiya gutshita hagula Yehowa atuzumbe. Uvi luholo Yehowa wana gutuzumba, wafutshile gibawu ha gututotesela gubola. (1 Yone 4:10) Tujimbilago nji egi Yesu wajile ha mavu ha guhuluisa enya gubola, uvi ishigo athu atagana. (Tanga Roma 5:8.) Gushigo nga nu muthu mumoshi mukatshi dietu wajiya gutshita ndaga mu luholo luatagana, Yehowa nji ganago gututoga ha gutshita ndaga mu luholo luatagana. Luholo tushigo athu atagana, matangua ako tuajiya gutangiza egi Yehowa ganago gutuzumba. Gula tuakotelesa ndaga yene, yajiya gutukuatesa ha gukatula matangi ene.​—Roma 7:24, 25.

SALA YA GUJINGINYINA GUDI YEHOWA

15-16. Mu ndaga itshi tuajiya gusha mutshima gula tuasala ya gujingina gudi Yehowa? Mukunda natshi? (2 Samuele 22:26)

¹⁵ Yehowa wana tshigina egi tusale ‘ya gujinginyina gudi muene.’ (Mikh. 30:19, 20) Gula tuatshita ngenyi, tuajiya diago gusha mutshima egi muene nji mbawusala ya gujinginyina gudi esue. (Tanga 2 Samuele 22:26.) Gula tuasala ya gujinginyina gudi Yehowa, tuajiya diago gusha mutshima egi muene mbawutukuatesa ha gukolesela ndaga yagasue tuajiya gutagana nayo.

¹⁶ Gifua luholo tuayizuelela, tudi diago nu ndaga jiavula jidi gututuma ha gusala ya gujinginyina gudi Yehowa tangua tudi mutagana nu malamba. Tudi mujiya egi Yehowa wana gutuzumba nu mbawutukuatesa. Yene ndaga yana longesa Biblia. Gula tudi mulandula gutangiza egi Yehowa ganago gutuzumba, tudi naye gutangiza ndaga tuana jiya mukunda nu muene ha fundo dia gutangiza luholo tudi gudivua mu tangua diene. Gifua luholo Biblia yana zuela, tulandulenu gusha mutshima egi guzumba gua Yehowa guana sala mayilago.