LONGO DIA 43
LUNGIMBO 41 « Ô Dieu, entends ma prière »
Ukhadigo Mubuita Mutshima ha Gukombelela Mukunda nu Athu Ako
“Khalenu mukombelela mukunda nu athu ako . . . Gisambu gia muthu wabonga giana khala nu ngolo jiavula.”—YAK. 5:16.
MU GUHIHIA
Tuza mumona mukunda natshi idi nu ndando ha gukombelela mukunda nu athu ako nu ndaga jiajiya gutukuatesa ha guyitshita.
1. Luholo lutshi tudi mujiya egi Yehowa wana zula isambu yetu nu ndando?
GISAMBU gidi ndaga ya gushimana diago. Tangiza gale ndaga eyi: Yehowa wahanele anjelo inemo yavula diago. (Ngi. 91:11) Wahanele nji mun’enji Yesu inemo ya ndando yavula. (Mat. 28:18) Uvi ginemo gia gutegelela isambu wagihanele gudi nanyi? Phamba muene wana tegelela isambu. Gishina giene Biblia yana gumutamega egi ‘Mutegeledi wa isambu yetu.’—Ngi. 65:2.
2. Mukunda natshi mupostolo Phaula udi gifezegeselo giabonga mu ndaga yatadila gukombelela mukunda nu athu ako?
2 Tuajiya gukombelela mukunda nu ndaga jidi gututadila, uvi tudi naye nji gukombelela mukunda nu athu ako. Yene ndaga yakalegele mupostolo Phaula. Ha gufezegesa, wasonegele mukunda nu Aklisto a mu hungu dia Efeso egi: “Ngana landula nji gumisha mu isambu yami.” (Ef. 1:16) Phaula wakhalele mukombelela mukunda nu athu ako. Ha gufezegesa, wawambelele Timote egi: “Ngana gugutangiza tangua diagasue ha ngana bubila Nzambi phipha nu muanya.” (2 Tim. 1:3) Phaula wakhalele nji mukombelela mukunda nu ndaga jiakhalele gumusagesa. (2 Kol. 11:23; 12:7, 8) Uvi wakhalele muzula tangua dia gukombelela mukunda nu athu ako.
3. Mukunda natshi tushigo naye gubemba gukombelela mukunda nu athu ako?
3 Matangua ako tuajiya gubuita mutshima ha gukombelela mukunda nu athu ako. Mukunda natshi? Phangi Sabrinaa udi mumonesa ndaga yajiya gutshita egi tubuite mutshima ha gukombelela mukunda nu athu ako. Udi muzuela egi: “Luholo tuana khala nu ndaga jiavula jia gutshita, tuajiya gusendesa gutangiza phamba milonga yetu nu gukombelela phamba mukunda nu ndaga jidi gututadila.” Aye nji ndaga eyi yana gugubuila matangua ako ba? Gula idi ngenyi, longo edi diza gugukuatesa. Tuza mumona 1) mukunda natshi idi nu ndando ha gukombelela mukunda nu athu ako nu 2) malongo ajiya gutukuatesa ha gujiya luholo lua guyitshita.
MUKUNDA NATSHI TUDI NAYE GUKOMBELELA MUKUNDA NU ATHU AKO?
4-5. Mukunda natshi tuajiya guzuela egi isambu yetu yana khala nu “ngolo jiavula”? (Yakoba 5:16)
4 Isambu tuana tshita mukunda nu athu ako yana khala nu “ngolo jiavula.” (Tanga Yakoba 5:16.) Gukombelela mukunda nu athu ako guajiya diago gusombegesa ndaga jidi guabuila ba? Ayi. Yesu wakhalele mujiya egi mupostolo Phetelo mbawumutuna ha meso a athu, gishina giene wamuwambelele egi: “Ngakombelela muavula mukunda nu aye hagula gutshigina guaye gulebigo.” (Luka 22:32) Phaula wakhalele nji mujiya egi gisambu giajiya gusombegesa ndaga jidi mutagana najio muthu. Hakhalele Phaula mu bologo gu Roma, wasonegele Filemona mukanda, wamuwambelele egi: “Ngudi gudifelela egi mu njila ya isambu yenu mbangumuvutuga gudi enue.” (File. 22) Ndaga jiakalegewe nji ngenyi. Phaula wazogele mu bologo nu walanduile gulongesa lukuma luabonga.
5 Guzuela egi gisambu giajiya gusombegesa ndaga idi mutagana nayo muthu, gushigo mukotelesa egi isambu yetu mbayishinjiga Yehowa ha gutshita ndaga tudi gumutoga. Tudi mujiya egi, Yehowa wana mona ndaga akombeledi enji ana tagana najio nu matangua ako wana guahana mvutu mu isambu yawo. Gujiya ngenyi gudi gutukuatesa ha gukombelela Yehowa nu mutshima umoshi gu mulonga tudi nawo nu gubemba ndaga jiagasue ha mago enji.—Ngi. 37:5.
6. Gukombelela mukunda nu athu ako guajiya gututuma ha gudivua luholo lutshi mukunda nu ene? (1 Phetelo 3:8)
6 Gukombelela mukunda nu athu ako guajiya gutukuatesa ha guavuila “khenda.” (Tanga 1 Phetelo 3:8.) Muthu wana guvuila athu ako khenda wana jiya lamba adi mutagana nadio nu wana kamba luholo lua guakuatesa. (Mako 1:40, 41) Mukulu mumoshi mu jina dia Michael udi muzuela egi: “Tangua ngana kombelela mukunda nu athu ako, yana gungukuatesa ha gujiya muabonga malamba adi guabuila nu ha guazumba luko muavula. Gutshita ngenyi guana gungukuatesa ha gudivua hehi nawo ikhale athu ene ashigo guyijiya.” Mukulu muko mu jina dia Richard udi nji mumonesa gubonga gua gukombelela mukunda nu athu ako. Udi muzuela egi: “Gula tudi mukombelela mukunda nu athu ako, yajiya gututuma ha gutshita ndaga imoshi ha guakuatesa.” Udi muzuela luko egi: “Gula tuakuatesa muthu tuakhadi mukombelela mukunda nu muene, idi gifua tudi mukuatesa Yehowa ha guhana mvutu gu isambu tuatshitshi mukunda nu muthu muene.”
7. Luholo lutshi gukombelela mukunda nu athu ako guajiya gutukuatesa ha gutadila malamba etu mu luholo luabonga? (Filiphi 2:3, 4) (Tala nji ifuanesa.)
7 Gukombelela mukunda nu athu ako guana gutukuatesa ha gutadila malamba etu mu luholo luabonga. (Tanga Filiphi 2:3, 4.) Mukut’etu agasue tuana tagana nu malamba handaga mavu adi mutuamezewa gudi Satana Diabulu. (1 Yone 5:19; Gumo. 12:12) Tangua diagasue tuana kombelela mukunda nu athu ako yana gutukuatesa ha gujiya egi, ‘malamba tudi mutagana nawo ana buila nji aphangi’etu a ha mavu agasue.’ (1 Phet. 5:9) Phangi Katherine udi muvundji wa njila udi muzuela egi: “Gukombelela mukunda nu athu ako guana gungukuatesa ha guwunguluga egi athu ako nji adi mumona malamba. Gujiya ndaga eyi guana gungukuatesa nji ha gutuna gusha matangi phamba mu malamba ami.”
Gukombelela mukunda nu athu ako guana gutukuatesa ha gutadila milonga yetu mu luholo luabonga (Tala paragrafe 7)d
AKUATSHI ADI NU FUNU YA ISAMBU YETU?
8. Akuatshi tuajiya gutanga mu isambu yetu?
8 Akuatshi tuajiya gutanga mu isambu yetu? Tuajiya gukombelela mukunda nu athu adi mukata, mavuala adi musagesewa gu khalasa nu mukunda nu aphangi a gukola. Aphangi avula ana tagana nu usageshi gudi enya fami yawo nga gudi mafumu a leta. (Mat. 10:18, 36; Makal. 12:5) Aphangi avula alengele gumbo diawo mukunda nu ita. Uvi ako atagenele nu malamba a gisagumuisa. Idi yadiago egi tushigo mujiya aphangi ene agasue muabonga. Uvi tangua tuana kombelela mukunda nu athu ako, tuana monesa egi tudi mulandula mukhuala watuhanele Yesu ha gukhala nu ‘guzumba mukatshi dietu.’—Yone 13:34.
9. Mukunda natshi tudi naye gukombelela mukunda nu aphangi adi nu inemo mu ulondegi wa Yehowa nu akaji’awo?
9 Tuajiya nji gukombelela mukunda nu aphangi adi nu inemo mu ulondegi wa Yehowa. Aphangi ene adi: aphangi a gu Hunji dia Akulu Atuameji nu akuateshi awo, aphangi a gu Komite ya Filiale, aphangi ana tuameza badepartema a gu Betele, atadi awendji, akulu nu akuateshi a mudimo. Aphangi avula mukatshi dia aphangi ene ana tagana nji nu malamba, uvi ana tshita ngolo ha gutukuatesa. (2 Kol. 12:15) Ha gufezegesa, phangi Mark udi mutadi muwendji udi muzuela egi: “Luholo ngakhala gualeha nu mvuaji jiami yana gungusagesa muavula, handaga adi athu a gukola. Mukut’awo agasue ana gukata. Phangi’ami wa mukhetu nu mulumi’enji ana guakuatesa muabonga, uvi ngana guvua gikenene handaga ngana tshigina gukhala nawo ha guakuatesa muavula.” Tushigo diago mujiya ndaga jiagasue jidi mutagana najio aphangi awa ana tshita mudimo wakola, uvi tudi naye gukombelela mukunda nu ene. (1 Tes. 5:12, 13) Tuajiya nji gukombelela mukunda nu akaji’a aphangi ene luholo ana guakuatesa ha gutagenesa inemo yawo.
10-11. Yehowa wana suanguluga nu isambu tuana tshita mukunda nu aphangi’etu agasue ba? Kotelesa.
10 Gifua luholo tuayizuelela, tuana kombelela mukunda nu aphangi a mala nu a akhetu. Ha gufezegesa, ikhale tushigo mujiya majina a aphangi adi mutagana nu malamba, uvi tuajiya gukombelela Yehowa ha gukuatesa aphangi adi mu bologo nu anyi afuisa athu ana zumba. Phangi Donald udi mukulu udi muzuela egi: “Aphangi’etu avula a mala nu a akhetu adi mutagana nu malamba, hene matangua ako tudi naye gukombelela mukunda nu mukut’awo agasue.”
11 Yehowa wana gusuanguluga nu isambu ya luholo elu ba? Ayi! Handaga tushigo diago mujiya malamba agasue ana tagana nawo aphangi’etu, hene idi nu ndando ha gukombelela mukunda nu ene. (Yone 17:20; Ef. 6:18) Isambu ya luholo elu yana monesa diago egi tuana ‘zumba aphangi agasue.’—1 Phet. 2:17.
TANGUA TUDI MUKOMBELELA MUKUNDA NU ATHU AKO
12. Luholo lutshi khadilo dia gutala muabonga diajiya gugukuatesa ha gujiya ndaga jia guzuelela mu gisambu giaye?
12 Khala nu khadilo dia gutala muabonga. Katula gukombelela mukunda nu aphangi agasue, wajiya nji gukombelela mukunda nu phangi mumoshi-mumoshi nu gutumbula jina dienji. Gudi nu phangi mumoshi wana kata mu hungu dienu ba? Gudi nu muvuala udi nu gikenene handaga udi musagesewa gu khalasa ba? Gudi nu mvuaji mumoshi udi mutshita ngolo ha gusansa mun’enji muene hakhenji mu “malongo nu mu mikhuala ya Yehowa” ba? (Ef. 6:4) Gula udi nu khadilo dia gutala muabonga, mbadigukuatesa ha guzumba aphangi muavula, ngenyi mbayigutuma ha gukombelela mukunda nu ene.b—Roma 12:15.
13. Itshi yajiya gutukuatesa ha gukombelela mukunda nu aphangi anyi tushigo mujiya muabonga?
13 Khala mutumbula majina a athu ako mu isambu yaye. Tuajiya gutumbula majina a athu ako ikhale khenji tuamonele galego. Ha gufezegesa, tangiza gale aphangi adi mu bologo mu ifutshi gifua Crimée, Érythrée, Russie nu gu Singapour. Mu jw.org, wajiya gusanga majina a aphangi avula adi mu bologo.c Mutadi muwendji mumoshi mu jina dia Brian udi muzuela egi: “Ngakotelesele gale egi gusonega jina dia phangi mumoshi udi mu bologo nu gudizuela ha kano, guana gungukuatesa ha guwunguluga phangi muene nu ha gutanga jina dienji mu isambu yami hakhami.”
14-15. Itshi yajiya gutukuatesa ha gujiya ndaga tuajiya guzuela mu isambu yetu?
14 Khala mujiya ndaga jia gutoga mu isambu yaye. Phangi Michael tuazuelela gu thunda udi muzuela egi: “Tangua ngana tanga mene jia aphangi adi mu bologo jidi mu jw.org, ngana tangiza luholo ngakhadi naye gudivua gula nga yakhadi ame ha fundo diawo. Ngudi mujiya egi ngakhadi naye gudisagesa mukunda nu mukaji’ami nu gudifelela egi udi nu ima yagasue yajiya gumukuatesa. Gula ngatangiza ngenyi, yana gungukuatesa ha gujiya ndaga ngajiya guzuela mu isambu yami mukunda nu aphangi a mala adizudile gale mu ulo adi mu bologo.”—Heb. 13:3, mbimbi goshi’a diyiji.
15 Gula tudi mutangiza ndaga jiana tagana najio aphangi adi mu bologo lusugu nu lusugu, yajiya gutukuatesa ha gujiya ndaga tuajiya gutoga Yehowa mu isambu yetu mukunda nu ene. Ha gufezegesa, tuajiya gutoga egi athu ana bamba aphangi mu bologo a akalegele ndaga nu gisemo nu mafumu a leta a ahane njila ha gukombelela Yehowa mu guhuima. (1 Tim. 2:1, 2) Tuajiya nji gukombelela hagula gujinginyinga gua aphangi adi mu bologo guhane gikhesa gudi aphangi a mu mahungu awo nu gukuatesa athu ashigo Matemue a Yehowa anyi mbaamona makalegelo awo abonga ha gutshigina lukuma luabonga. (1 Phet. 2:12) Yadiago, tudi naye nji gutshita isambu ya luholo lumoshi mukunda nu aphangi’etu adi mutagana nu malamba ako. Gula tudi nu khadilo dia gutala muabonga, tudi mutanga majina a aphangi mu isambu yetu nu tudi mujiya ndaga jia gutoga mu isambu yene, mbatumonesa diago egi tuana ‘gudizumba muavula mukatshi dietu.’—1 Tes. 3:12.
TUDI NAYE GUKHALA NU MATANGI ABONGA TANGUA TUDI MUTSHITA ISAMBU
16. Luholo lutshi tuajiya gumonesa egi tudi nu matangi abonga tangua tudi mutshita isambu? (Matayo 6:8)
16 Gifua luholo tuayimonyi, isambu yetu yajiya gusombegesa ndaga jidi mubuila muthu. Uvi tangua tudi mukombelela, tudi naye gukhala nu matangi abonga. Tudi naye gujiya egi tangua tudi mutshita isambu, tushigo muwambela Yehowa ndaga gashigo mujiya nga gumuwambela luholo luabonga ludi naye muene gulonda mulonga wene. Yehowa wana dianga gujiya ima akombeledi enji adi nayo funu gutuama egi ene hakhawo ajiye egi adi nu funu ya ima yene. (Tanga Matayo 6:8.) Gula idi ngenyi, na mukunda natshi tudi naye gukombelela mukunda nu athu ako? Katula ndaga tuazuelela mu longo edi, gukombelela mukunda nu athu ako gudi mumonesa egi tudi gudisagesa mukunda nu ene. Guzumba guana gututuma ha gukombelela mukunda nu athu ako. Yehowa wana khala nu gusuanguluga ha gumona luholo akombeledi enji ana landula khadilo dienji dia guzumba.
17-18. Tuajiya gufuanesa isambu tuana tshita mukunda nu aphangi’etu nu itshi?
17 Ikhale isambu yetu ishigo musombegesa nga ndaga imoshi, uvi yana monesa egi tuana zumba aphangi’etu; Yehowa nji wana suanguluga nayo. Tuajiya gufezegesa ndaga yene ngegi: Tangiza gale egi fami imoshi idi nu ana mbadi azonda, wa yala nu wa mukhetu. Mona wa yala udi mukata, udi wagubanda. Mon’a mukhetu wawambela sh’enji egi: “Ngabuba tata, kuatesa phangi’ami. Udi diago mukata!” Sh’awo muene udi mujiya mulonga wene muabonga, wana zumba mun’enji wa yala nu wana gudisagesa mukunda nu muene. Uvi mbawukhala nu gusuanguluga ha gumona egi mun’enji wa mukhetu udi nji gudisagesa mukunda nu phangi’enji wa yala nu udi gumububila ha gumukuatesa.
18 Yene ndaga Yehowa udi gututoga ha gukalagala, wana tshigina egi tukhale gudisagesa mukunda nu aphangi’etu nu ha gukombelela mukunda nu ene. Gula tuatshita ngenyi, mbatumonesa egi tuana zumba aphangi’etu nu tuana gudisagesa mukunda nu ene; Yehowa mbawukhala nji nu gusuanguluga. (2 Tes. 1:3; Heb. 6:10) Gifua luholo tuayimonyi, matangua ako isambu yetu yajiya gusombegesa ndaga jidi mubuila muthu. Gishina giene, tulandulenu gukombelela mukunda nu athu ako.
LUNGIMBO 101 Tukombelele Yehowa Hamoshi
a Mu longo edi, majina ako asombegesewe.
b Tala video Takeshi Shimizu: « Jéhovah écoute la prière » mu jw.org.
c Gula udi mutshigina gujiya majina a aphangi adi mu bologo, ngina mu jw.org ha fundo diasonegewa egi “Témoins de Jéhovah emprisonnés en raison de leur foi (par pays).”
d UKOTELESHI WA GIFUANESA: Aphangi a mala nu a akhetu adi mutagana nu malamba adi nji mukombelela mukunda nu athu ako.