Vomwe atumi adachita
21 Patidadzichichimiza nkusiyana nawo, tidayamba ulendo wathu wapanyanja. Tidayenda sitiriti mpakana kukafika ku Ko. Mangwana yake tidafika ku Rode ndipo paditachoka kumuko, tidafika ku Patara. 2 Kumuko tidagumana barko yomwe imbayambuka kuyenda ku Foinike ndipo tidakwera nkunyamuka. 3 Ntsuwa ya ku Kupuro paidayamba kuwonekera, tidaisiya kumadzere nkupitiriza ulendo wathu kuyenda cha ku Siriya. Patsogolo pake tidaima ku Turo kuti abuluse katundu mu barko. 4 Tidafagafaga wopfunzira ndipo pitidawagumana tidakhala nawo ntsiku 7. Koma mouziriwa na mzimu, iwo adauza Paulo mobwerezabwereza kuti osati ayese kuyenda ku Yerusalemu. 5 Ntsiku zathu zokhala kumuko pazidamala, tidanyamuka kuti tipitirize ulendo wathu. Abale wose komasoti azimayi na wana adatiperekeza mpakana kunja kwa thaundi mweyo. Kumuko tidagwada m’mphepete mwa nyanja nkupemphera. 6 Patsogolo pake tidalayirana ndipo isepano tidakwira barko, koma iwo adabwerera kumuyi kwawo.
7 Pamwapo tidanyamuka ku Turo pa barko ndipo tidafika ku Tolemayi. Kumuko tidamusana na abale nkukhala nawo ntsiku ibodzi. 8 Mangwana yake tidanyamuka nkukafika ku Kaisareya ndipo tidayenda kumuyi kwa mulaliki munango dzina yake Filipo. Iye wenzembo pagulu ya amuna 7 wa mbiri yabwino wale ndipo tidakhala naye. 9 Filipo wenze na wana akazi 4 osalowodwa,* omwe enze aneneri. 10 Koma pazidapita ntsiku tili kumuko, mneneri munango dzina yake Agabo adabwera kuchokera ku Yudeya. 11 Iye adafika kwa isepano nkutenga bande ya Paulo. Patsogolo pake adadzimanga mapazi na manja nkunena kuti: “Mzimu uchena wanena kuti ‘munichiro wa bande iyi, Ayuda adzamumange tene ku Yerusalemu nkumupereka kwa wanthu wa makhaindi yanango.’” 12 Pitidabva vimwevi, isepano na wanthu omwe enze kumuko, tidayamba kumugwigwirira Paulo kuti osati ayende ku Yerusalemu. 13 Koma Paulo adadawira kuti: “Ndawa chani munkulira komasoti kufuna kunifokesa? Inepano ndine wokonzeka osati kumangiwa kokha, koma kukafa ku Yerusalemu ndawa ya dzina ya Ambuya Yesu.” 14 Patidakangira kumuchinja maganizo, tidaleka kumulambiza nkunena kuti: “Vomwe Yahova* ankufuna vichitike.”
15 Patsogolo pake tidakonzeka nkunyamuka ulendo woyenda ku Yerusalemu. 16 Koma opfunzira anango wa ku Kaisareya adanyamuka nase kuti atiperekeze kunyumba ya Mnaso wa ku Kupuro kuti tikafikire kumuko. Munthu moyu wenzembo pagulu ya opfunzira woyambirira. 17 Patidafika ku Yerusalemu, abale adatitambira mokondwa. 18 Koma mangwana yake Paulo adayenda nase kwa Yakobo ndipo akulu wose enze kumuko. 19 Paulo adawamonisa nkuyamba kuwafotokozera bwinobwino vomwe Mulungu adachitira wanthu wa makhaindi yanango pangachita utumiki wake.
20 Iwo padabva vimwevi adayamba kutamanda Mulungu, koma adamuuza kuti: “M’bale, pali Ayuda azinji okhulupirira ndipo wose mwawa ni wodzipereka pankhani yotewedza Chilamulo. 21 Koma iwo adabva mphekesera yakuti iwepo wakhala unkupfunzisa Ayuda wose omwe ali pakati pa wanthu wa makhaindi yanango kuti aleke kutewedza Chilamulo cha Mose. Ati unkuwauza kuti osati ambachite mdulidwe wa wana wawo komasoti osati ambatewedze miyambo yomwe takhala tinkuyatewedza kuchokera kalekale. 22 Manje tichite tani pamwapa? Tinashuwa kuti iwo abva kuti iwepo wabwera. 23 Manje uchite tene: Tiri nawo amuna 4 omwe adachita polomisi. 24 Utenge wanthu mwawa ndipo ukachite nawo mwambo wa kudzichenesa. Uwalipire vose vofunika kuti agere tsitsi yawo. Ukachita teno, aliyese adziwe kuti mphekesera zomwe adabva pankhani ya iwepo nkundokunamizira. Adzawone kuti unkuchita vinthu motewedza dongosolo nakuti usunga Chilamulo. 25 Koma okhulupirira ochokera m’makhaindi yanango awo, tidawatumizira kalata yonena va chigemulo chathu chakuti apewe voperekewa ntsembe kwa mafano komasoti magazi, vosakhesa na chigololo.”
26 Pamwapo mangwana yake, Paulo adatenga amuna mwawo nkukachita nawo mwambo wa kudzichenesa. Patsogolo pake adangena mu kachisi, kukanena momwe ntsiku zawo za mwambo wa kudzichenesa zidzamalire komasoti pomwe adzapereke ntsembe ya aliyese.
27 Pazidasala pang’ono ntsiku 7 kuti zimale, Ayuda ochokera ku Ásia adawona Paulo ali mu kachisi. Pamwapo adachitisa kuti pagulu yose ya wanthu payambike chipiringu ndipo adamuphata. 28 Iwo ambakuwa kuti: “Imwe Aizirayeli, tithandizeni! Munthu uyu ankupfunzisa votsutsana na wanthu wa khaindi yathu kulikose. Iye ankupfunzisa pomwe votsutsana na Chilamulo komasoti malo yano. Kuingizira mwapa, watenga Agiriki nkuwangenesa mu kachisi ndipo wapsyipiza malo yochena mwaya.” 29 Iwo adanena vimwevi ndawa ntsiku inango adawona Terofimo wa ku Efeso ali naye pabodzi mu thaundi mumo manje adaganiza kuti Paulo adangenesa Terofimo mu kachisi. 30 Pamwapo muthaundi mose mumo mwenze chipiringu ndipo wanthu ambathamangira ku kachisi muko. Patsogolo pake adaphata Paulo nkumukwekwetera kunja kwa kachisi. Nthawe mwiyoletu misuwo yadafungiwa. 31 Pomwe angafuna kumupha, nkulu wa gulu ya masocha adatambira ntontholo wakuti mu Yerusalemu mose muli chipiringu. 32 Nthawe mwiyoletu, iye adatenga masocha na azitsogoleri wawo nkuthamingira kumuko. Wanthu mwawo padawona nkulu wa masocha ule pabodzi na masocha yake, adaleka kumenya Paulo.
33 Pavidateno, nkulu wa masocha ule adafika pafupi nkumuphata ndipo adalamula kuti amumange na matcheni yawiri. Patsogolo pake adabvunza wanthu kuti moyu ni mbani ndipo waphonya chani. 34 Koma anango pagulu mwiyo adayamba kukuwa nkumbafotokoza vinango, anango vinango. Pamwapo padakangira kubva mpfundo chaiyo ndawa ya zungo, adalamula kuti ayende naye ku mpanda wa masocha. 35 Padafika pa ntsikada, masocha mwayo yadachita kumunyamula ndawa yakuti gulu mwiyo imbachita voipa. 36 Wanthu mwawo angawalondola ankukuwa kuti: “Aphewe muyo!”
37 Koma padasala pang’ono kungena naye mumpanda wa masocha, Paulo adakumbira nkulu wa masocha kuti: “Ko munganibvumizeko kuti niyankhule namwe pang’ono?” Iye adati: “Shuwadi uyankhula Chigiriki? 38 Manje ndiye kuti ndiwelini munthu wa ku Iguputo yemwe ntsiku zapita izi adayambisa chipiringu nkutsogolera vigananga 4000 kuyenda navo mu chipululu?” 39 Paulo adadawira kuti: “Inepano ndine Muyuda wa ku Tariso, ku Kilikiya, nzika ya thaundi yobvekera. Pulizi nikukukumbirani, nibvumizeni niyankhule kwa wanthu awa.” 40 Padamubvumiza, Paulo adaimirira pa ntsikada nkukwizira djanja mdzulu wanthu mwawo. Wose padakhala chete, adayankhula nawo mu Chiheberi kuti: