Wonembewa na Mateyu

24 Pomwe Yesu angachoka ku kachisi, wopfunzira wake adabwera kwa iye kuti amuwonese nyumba za pakachisi mwapo. 2 Koma iye adawauza kuti: “Ko munkuviwonalini vinthu vose ivi? Shuwa ninkukuuzani, pano padzasalelini mwala uliwose padzulu pa unzake womwe udzagwesewelini.”

3 Padakhala pasi m’phiri ya Maolivi, wopfunzira adabwera kwa iye ali payekha nkumubvunza kuti: “Tiuzeni, nilini pati vidzachitike vinthu vose vimwevi, ndipo chizindikiro cha kukhalapo* kwanu na cha mapeto ya nthawe ino* chidzakhale chani?”

4 Pakudawira, Yesu adalewa kuti: “Samalani kuti munthu osati akusokereseni, 5 ndawa azinji adzabwere mudzina yangu nkulewa kuti: ‘Khrisitu ule ndinepano,’ ndipo adzasokerese wanthu azinji. 6 Mudzabve zungo ya nkhondo na mbiri za nkhondo. Vimwevi osati vidzakuchitiseni mantha, ndawa vimwevi vifunika kuchitika koma mapeto yadzakhale yakanati yafika.

7 “Ntundu udzaukirane na ntundu unango ndipo ufumu udzaukirane na ufumu unango. Kudzakhale njala na vivomezi m’malo yosiyanasiyana. 8 Vose vimwevi kudzakhale kuyamba kwa mabvuto yakulu.

9 “Patsogolo pake wanthu adzakuperekeni kuti mukadzudziwe ndipo adzakupheni. Wanthu wa makhaindi yose adzazondane namwe ndawa ya dzina yangu. 10 Panthawe mweyo, wanthu azinji adzasokonezeke ndipo adzaperekane na kuzondana. 11 Kudzakhale aneneri azinji wabodza ndipo adzasokerese wanthu azinji. 12 Ndawa ya kuingizirika kwa kusabvera malamulo, chikondi cha wanthu azinji chidzazizire. 13 Koma yemwe adzapirire mpakana mapeto ndiye wati adzapulumuke. 14 Ntontholo wabwino moyu wa Ufumu udzalalikiriwe padziko yose yapasi komwe kuna wanthu, kuti ukhale umboni kwa wanthu wamakhaindi yose, patsogolo pake mapeto yadzafike.

15 “Manje mukadzawona chinthu choipa chodzonga chomwe mneneri Danieli adalewa chili imirire m’malo yachena, (wowerenga adzadziwiretu) 16 omwe ali mu Yudeya adzayambe kuthawira kumapiri. 17 Munthu yemwe ali padenga ya nyumba osati adzabuluke nkukatenga mitolo m’nyumba mwake. 18 Munthu yemwe ali m’munda osati adzabwerere nkukatenga malaya yake yakunja. 19 Tsoka kwa akazi wa mimba na woyamwisa wana mu ntsiku zimwezo! 20 Pitirizani kupemphera kuti osati vidzachitike mu nthawe ya mphepo panango pa ntsiku ya Satade. 21 Ndawa pa nthawe mweyo, kudzakhale chisautso chikulu chomwe chikanati chachitikako kundochokera pachiyambi cha dziko mpakana lero, ndipo chidzachitikelini pomwe. 22 Shuwa ninkukuuzani, ntsiku zimwezo adakati zilibe kufupikisiwa, palibe adakapulumuka. Koma ndawa ya wale womwe adawasankhula, tsiku zimwezo zidzafupikisiwe.

23 “Ndipomwapa munthu akadzakuuzani kuti: ‘Onani! Khrisitu ule ali kuno,’ panango ‘ali uko!’ ayi kudzakhulupirira vimwevo. 24 Ndawa kudzabwere wanthu wonamizira kuti ni Khrisitu na aneneri wabodza ndipo adzachite vizindikiro vamphanvu na vodabwisa, kuti peno ni vokwanisika adzasokerese wosankhuliwa mwawo. 25 Onani! Inepano nakuchenjezani vimwevi vikanati kuchitika. 26 Ndipomwapa akadzakuuzani kuti: ‘Onani! Ali muchipululu,’ ayi kudzayendako. Akadzati: ‘Onani! Ali muvipinda va nkati,’ ayi kudzakhulupirira vimwevo. 27 Ndawa ninge momwe kaphaliwali kacherukira kuchokera kumachibese, nkugaka mpaka kukafika kum’maulo, vidzakhalembo teno na kukhalapo* kwa Mwana wa munthu. 28 Kulikose komwe kunachinthu chakufa, mphungu zidzaunjikane muko.

29 “Chisautso cha ntsiku zimwezo chikadzandoti chamala, dzuwa idzachite mdima ndipo mwezi udzagakelini. Nyenyezi zidzagwe kuchokera kudzulu ndipo mphanvu za kudzulu zidzagunduzike. 30 Patsogolo pake chizindikiro cha Mwana wa munthu chidzawonekere kudzulu ndipo madzinza yose ya padziko yapasi yadzadzigugudze pachifuwa ndawa ya kukwinyirira. Iwo adzawone Mwana wa munthu ankubwera m’mitambo yakudzulu na mphanvu na ulemerero ukulu. 31 Iye adzatumize angelo wake na kulira kwamphanvu kwa lupenga ndipo adzaunganidze wosaluliwa wake kuchokera ku mphepo zinayi, kuchokera kumalekedzero ya mlengalenga mpakana kumalekedzero yanango.

32 “Manje pfunzirani va muti wa nkuyu kuchokera pa chitsanzo ichi: Nthawi yake itete ikaphukira nkuchita masamba, mudziwa kuti chisalo chafendera. 33 Nchibodzibodzimbo imwepo, mukadzawona vinthu vimwevi mudzadziwe kuti ali pafupi, ali pa msuwo chaipo. 34 Shuwa ninkukuzani kuti m’badwo moyu udzamalelini wose kufa, mpakana vinthu vose vimwevi vidzachitike. 35 Kudzulu na dziko yapasi vidzachoke, koma mawu yangu yadzakhalepo mpaka kalekale.

36 “Kulewa va ntsiku mweyo na nthawe yake, palibe yemwe ankudziwa, olo angelo wakudzulu panango Mwana, koma Ababa wokha basi. 37 Ndawa molingana na ntsiku za Nowa, vidzakhalembo teno na kukhalapo* kwa Mwana wa munthu. 38 Mu ntsiku zimwezo Chigumula chikanati chafika, wanthu ambadya na kumwa. Amuna ambalowola ndipo akazi ambalowodwa mpakana ntsiku yomwe Nowa adangena mu chingalawa. 39 Wanthu alibe kuikhira nzeru vomwe vimbachitika mpakana chigumula chidafika nkuwadzongeratu wose. Vidzakhalembo teno na kukhalapo kwa Mwana wa munthu. 40 Pa nthawe mweyo, amuna awiri adzakhale ali m’munda. M’bodzi adzatengewe ndipo munango adzasiiwe. 41 Akazi awiri adzakhale ankupeya pa mphero. M’bodzi adzatengewe ndipo munango adzasiiwe. 42 Ndipomwapa, pitirizani kukhala maso ndawa munkudziwalini ntsiku yomwe Ambuya wanu adzabwere.

43 “Koma dziwani ivi: Peno munichiro wa nyumba angadziwe nthawe* yomwe mbava ingabwere angagonelini, ndipo angabvumelini kuti mbava mweyo ithyole nkungena m’nyumba mwake. 44 Ndipomwapa, imwepo khalanimbo wokonzeka, ndawa Mwana wa munthu adzabwere pa nthawe yomwe munkuiganiziralini.

45 “Ko ni mbani makamaka yemwe ni kapolo wokhulupirika na wanzeru yemwe abwana wake adamuikha kuti ambanyang’anire anyabasa wake wa pamuyi nkumbawapasa chakudya pa nthawe yake? 46 Kapolo muyo adzakhale wokondwa peno abwana wake pakubwera adzamugumane ankuchita vimwevo! 47 Shuwa ninkukuuzani, adzamuikhe kuti ambanyang’anire vinthu vake vose.

48 “Koma peno kapolo moyu angawonese kuti ni woipa nkuyamba kulewa muntima mwake kuti: ‘Abwana wangu ankuchebwa,’ 49 nkuyamba kumenya akapolo anzake komasoti kudya, kumwa pabodzi na vidakwa chaivo, 50 abwana wa kapolo muyo adzabwere pantsiku yomwe iye ankuidikhiralini na panthawe yomwe ankuidziwalini. 51 Pamwapo adzamulange maninge ndipo adzamuthuse komwe kuna wanthu woipa. Kumuko adzalire na kukukuta manu.”