Wonembewa na Yohani
17 Yesu padayankhula vinthu vimwevi, adakwiza maso yake kudzulu nkunena kuti: “Ababa, nthawe yafika. Lemekezani mwana wanu, kuti mwana akulemekezeni. 2 Imwepo mwapasa mwana wanu ulamuliro pa wanthu wose kuti wose* womwe imwepo mwamupasa, awapase moyo wosapera. 3 Moyo wosapera adzaugumane akambapfunzira* va imwepo, Mulungu yekha chaiye, na va Yesu Khrisitu, yemwe imwepo mudamutuma. 4 Nakulemekezani padziko yapasi, ndawa namaliza kuphata basa yomwe mudanituma. 5 Manje Ababa, bvumani kuti nikhale pambali panu ndipo munipase ulemerero womwe nenze nawo pambali panu dziko ikanati kulengewa.
6 Wanthu womwe mudawatenga mudziko nkunipasa, ine nawadziwisa dzina yanu. Enze wanu, koma mudawapereka kwa inepano ndipo iwo abvera mawu yanu. 7 Iwo adziwa manje kuti vose vomwe mudanipasa ni vochokera kwa imwepo, 8 ndawa mawu yomwe mudanipasa nayapereka kwa iwo. Iwo ayatambira ndipo adziwa kuti nidabwera mochita kutumiwa na imwepo ndipo akhulupirira kuti ndimwepo mudanituma. 9 Ndipomwapa nikuwapempherera. Nikupemphereralini dziko, koma nikupempherera wanthu womwe mwanipasa, ndawa ni wanu. 10 Vinthu vose vomwe inepano ninavo ni vanu ndipo vinthu vanu vose ni vangu. Inepano nalemekezeka pakati pa wanthu omwe mwanipasa.
11 Inepano nipitirizelini kukhala mu dziko iyi ndawa ninkubwera kwa imwepo, koma iwo mwawa adakali mudziko iyi. Ababa Wochena, anyang’anireni ndawa ya dzina yanu yomwe mwanipasa, kuti akhale abodzi* ninge momwe isepano tiliri abodzi.* 12 Pomwe nenze nawo pabodzi, nimbawanyang’anira ndawa ya dzina yanu yomwe mwanipasa. Inepano nawateteza mwakuti palibe aliyese wa iwo yemwe wadzongeka kupatulapo mwana yemwe adzadzongewe, kuti lemba ikwanirisiwe. 13 Koma manje ninkubwera kwa imwepo, ndipo ninkuyankhula vimwevi pomwe niri mudziko kuti iwo akhale na chimwemwe chodzala maninge ninge chomwe inepano ninacho. 14 Iwo nawapasa mawu yanu, koma dziko inkuzondana nawo ndawa alilini saidi ya dziko, molingana na inepano yemwe nirilini mbali yadziko.
15 Ninkukumbiralini kuti muwachose mudziko, koma kuti muwateteze kwa woipa. 16 Iwo alilini ku saidi yadziko, molingana na inepano yemwe nirilini mbali yadziko. 17 Acheneseni pakuphatisa basa chonadi. Mawu yanu ni chonadi. 18 Imwepo mudanitumiza ine mudziko. Molingana na vimwevi, inembo nawatumiza mudziko. 19 Ndipo ine ninkudzichenesa ndawa ya iwo, kuti iwombo achenesewe na chonadi.
20 Ninkupemphereralini awa wokha, koma ninkupemphererambo womwe akhulupirira ine akabvesera vomwe iwo apfunzisa. 21 Ninkuchita vimwevi kuti wose mwawa akhale abodzi ninge momwe imwepo Ababa na ine tiliri wobverana, kuti iwombo akhale wobverana na isepano na chakulinga chakuti dziko ikhulupirire kuti imwepo mudanitumadi. 22 Nawapasa ulemerero womwe mudanipasa, kuti iwo akhale abodzi ninge momwe isepano tiliri abodzi. 23 Ine nikhale wobverana na iwo, imwepo mukhale wobverana na ine, kuti iwo akhale mu m’bverano chaiwo, kuti dziko idziwe kuti imwepo mudanituma ine nakuti muwakonda ninge momwe mukondera inepano. 24 Ababa, inepano ninkufuna kuti womwe mwanipasa awa adzakhale pabodzi na inepano komwe inepano nidzakhale, kuti adzawone ulemerero wangu womwe imwepo mwanipasa, ndawa mudanikonda mukanati kukonza dziko. 25 Ababa Wolungama, shuwadi dziko inkukudziwanilini, koma inepano ninkukudziwani ndipo awa adziwa kuti ndimwepo mudanituma. 26 Inepano nachitisa kuti iwo adziwe dzina yanu ndipo nidzapitirize kuwadziwisa dzina mwiyo kuti iwombo ambawonese chikondi ninge chomwe imwepo mudaniwonesa, kuti inembo nikhale wobverana na iwo.”