Vomwe atumi adachita
20 Chipiringu chile pachidamala, Paulo adachemeresa opfunzira. Padawalimbikisa nkulairana nawo, adanyamuka ulendo woyenda ku Makedoniya. 2 Iye adafambafamba m’madera ya kumuko nkumbalimbikisa opfunzira na mawu yazinji, patsogolo pake adafika ku Girisi. 3 Padakhala kumuko minyezi yatatu, adaganiza vobwerera ku Makedoniya ndawa yakuti Ayuda ambapangana kuti amuphe. Iwo adapangana vimwevi Paulo padandosala pang’ono kuyamba ulendo wa pamadzi woyenda ku Siriya. 4 Pa ulendo moyu, wenze pabodzi na Sopaturo mwana wa Puro wa ku Bereya, Arisitako na Sekundo wa ku Tesalonika, Gayo wa ku Debe na Timoteyo, koma ochokera mu chigawo cha Ásia enze Tukiko na Terofimo. 5 Wanthu mwawa adatsogola ndipo ambatidikhirira ku Torowa. 6 Koma tidayamba ulendo wa panyanja ku Filipi ntsiku za chikondwerero cha Mikate Yalibe Vofufumisa pazidamala. Ndipo tidawagumana ku Torowa pazidapita ntsiku 5. Kumuko tidakhalako ntsiku 7.
7 Pa ntsiku yoyamba ya sondo, patidasonkhana pabodzi kuti tidye chakudya, Paulo adayamba kuwakambira nkhani ndawa ambafuna kunyamuka mangwana yake ndipo adayankhula kwa nthawe itali mpakana pakati pa usiku. 8 Mu chipinda cha mdzulu momwe tidasonkhana umo, mwenze makandyero yazinji. 9 Paulo pambakamba nkhani, mulumbwana munango dzina yake Utiko yemwe wenze adakhala pa janela, adagona tulo tukulu. Ali gone tene, adakolomoka nkugwa kuchokera pa nyumba yachitatu pa nyumba zosanzikidzana ndipo adamugumana wafa. 10 Koma Paulo adabuluka pasi ndipo adafika pomwe iye wenze nkumukumbatira. Patsogolo pake adanena kuti: “Khalani chete, ndawa anamoyo manje.” 11 Padateno Paulo adayenda pomwe muchipinda cha mdzulu chile ndipo adatenga nkate nkuyamba kudya. Adakambirana nawo kwa nthawe itali mpakana kumadandakucha ndipo patsogolo pake adanyamuka nkumbayenda. 12 Pamwapo iwo adatenga mulumbwana ule anamoyo ndipo adakondwa maninge.
13 Manje ise tidatsogola kukakwera barko nkuyamba ulendo woyenda ku Aso. Iye adatiuza kuti titsogole kuti tikamupakizire ku Aso ndawa ambafuna kufamba na minyendo. 14 Pomwe adatigumana ku Aso, tidamupakiza mu barko nkuyenda ku Mitilene. 15 Machibese yake patidachoka kumuko, tidafika pafupi na Kiyo. Koma mangwana yake, tidaima kwakanthawe ku Samo ndipo machibese yake tidafika ku Mileto. 16 Paulo adaganiza vakuti andolambalala Efeso kuti osati ataye nthawe muchigawo cha Ásia. Adachita vimwevi ndawa ambakulumiza kuti peno ni vokwanisika, pa ntsiku ya Chikondwerero cha Pentekosite akakhale ali ku Yerusalemu.
17 Koma ali ku Mileto adatumiza mawu yakuti akulu wa mpingo wa ku Efeso abwere. 18 Akulu mwawo padafika, iye adawauza kuti: “Imwepo munkudziwa bwino momwe nimbachitira vinthu panthawe yomwe nidakhala namwe, kuchokera ntsiku yomwe nidafika mu chigawo cha Ásia. 19 Nimbatumikira Ambuya ninge kapolo modzichepesa maninge, na misozi komasoti na mayesero yomwe nidagumana nayo ndawa ya voipa vomwe Ayuda ambapangana kuti anichite. 20 Koma niribe kukubisirani chirichose chothandiza* ndipo niribe kuleka kukupfunzisani pagulu komasoti nyumba na nyumba. 21 Koma nachitira umboni mwakukwana kwa Ayuda na kwa Agiriki kuti alape nkubwerera kwa Mulungu komasoti kuti ayambe kukhulupirira Ambuya wathu Yesu. 22 Ndipo manje motsogolerewa na mzimu, ninkuyenda ku Yerusalemu podiya kuti nikudziwalini vomwe vikanichitikire kumuko. 23 Koma chinthu chibodzi chomwe ninkudziwa ni chakuti mu thaundi na thaundi, mzimu uchena wanichitira umboni mobwerezerabwerezera kuti nikudikhira kumangiwa na kudzudziwa. 24 Koma nikuwonalini kuti moyo wangu ni wofunika maninge kwa inepano. Chomwe ninkufuna ni chakuti nimalize kuthamanga mpikisano moyu, komasoti kuti nimalize utumiki womwe nidautambira kwa Ambuya Yesu. Nindofuna kuchitira umboni mokwanira va ntontholo wabwino wa kukoma ntima kukulu kwa Mulungu.
25 Manje tetekerani. Nikudziwa kuti mose imwepo omwe nidakulalikirani va Ufumu, mudzaiwonelini pomwe nkhope yangu. 26 Ndipomwapa mukhale mboni lero, kuti inepano niribe mulandu wa magazi ya wanthu wose 27 ndawa nidakuuzani malangizo yose ya Mulungu. 28 Mumbadzinyang’anire mwekha komasoti kusamalira gulu yose ya nkhosa yomwe mzimu uchena wakuikhani kuti mumbainyang’anire, kuti mubuse mpingo wa Mulungu womwe adaugula na magazi ya Mwana wake chaiye. 29 Ninkudziwa kuti inepano nikachoka, wanthu anango omwe ali ninge mphumphi adzabwere pakati panu ndipo adzasamalirelini gulu ya nkhosa mwachikondi. 30 Ndipo pakati panu wanthu anango adzayambe kuyankhula vinthu vosokoneza kuti apatuse wopfunzira nkumbawalondola.
31 Ndipomwapa khalani maso, ndipo mumbakumbukire kuti kwa magole yatatu usiku na masikati, niribe kuleka kuchenjeza aliyese payekha uku ninkulira. 32 Koma manje ninkukusiyani kuti mutetezewe na Mulungu komasoti na mawu ya kukoma ntima kwake kukulu. Mawu mwayo yangakulimbikiseni na kukupasani vomwe mudasungiriwa pakati pa wochena wose. 33 Niribe kukhumbirako siliva, golide panango chovala cha munthu. 34 Imwepo munkudziwa bwino kuti manja yangu aya yadaphata basa kuti nigumane vofunika pamoyo wangu na va anzangu omwe nenze nawo. 35 Pa vinthu vose, nakuwonesani kuti pophata basa molimbikira tene, mumbathandize ofoka ndipo mumbakumbukire mawu ya Ambuya Yesu. Pale iye adati: ‘Kupasa kutichitisa kukhala okondwa maninge kuposha kutambira.’”
36 Padanena vimwevi, iye na akulu wose mwawo adagwada nkupemphera. 37 Pavidateno, wose adalira maninge. Patsogolo pake adamukumbatira Paulo na kumubejali mwachikondi. 38 Iwo adabva ntsisi maninge, makamaka ndawa ya mawu yomwe iye adanena yakuti adzawonelini pomwe nkhope yake. Patsogolo pake adamuperekeza kukakwera barko.