Vomwe atumi adachita
15 Manje amuna anango wochokera ku Yudeya adayamba kupfunzisa abale kuti: “Mukaleka kuchitiwa mdulidwe mobverana na mwambo wa Mose, mungapulumukelini.” 2 Koma Paulo na Baranaba alibe kubverana navo ndipo adatsutsana nawo. Pamwapo iwo adasankhula Paulo, Baranaba na wanthu anango, kuti ayende kwa atumi na akulu ku Yerusalemu nkukawauza va nkhani mweyi.
3 Mpingo pudawaperekeza, wanthu mwawa adapitiriza ulendo wawo kupita na ku Foinike na ku Samariya. Kumuko adafotokoza bwinobwino vakuti wanthu wa makhaindi yanango adayamba kutumikira Mulungu, ndipo abale wose adakondwa maninge na vimwevi. 4 Padafika ku Yerusalemu adatambiriwa bwino maninge na mpingo, atumi komasoti na akulu. Ndipo adafotokoza vinthu vizinji vomwe Mulungu adachita pakuphatisira basa iwo. 5 Koma wokhulupirira anango, womwe kalekale enze mugulu ya mpatuko ya Afalisi, adaimirira m’mipando yawo nkunena kuti: “Mpofunika kuwachita mdulidwe nkuwalamula kuti ambatewedze Chilamulo cha Mose.”
6 Pamwapo atumi na akulu adasonkhana kuti akambirane nkhani mweyi. 7 Padatsutsana maninge va nkhani mweyi, Petulo adaimirira nkuwauza kuti: “Abale wangu, mukudziwa bwino kuti muntsiku zoyambirira Mulungu adanisankhula ine pakati panu, kuti pakuphatisa basa pakamwa pangu, wanthu wa makhaindi yanango abve mawu ya ntontholo wabwino nkukhulupirira. 8 Ndipo Mulungu, yemwe adziwa va muntima, adachitira umboni pakuwapasa mzimu uchena ninge momwe adachitirambo na isepano. 9 Iye alibe kusiyanisa olo pang’ono pakati pa isepano na iwo. Koma adachenesa mitima yawo ndawa ya chikhulupiriro chawo. 10 Manje ndawa chani imwepo mukumuyesa Mulungu pakutakulisa wopfunzira, djoko yomwe azibereki wathu olo isepano tiribe kukwanisa kuitakula? 11 Koma manje tikukhulupirira kuti isepano tidzapulumuke ndawa ya kukoma ntima kukulu kwa Ambuya Yesu, ninge momwe vidzakhalirembo na wanthu mwawa.”
12 Pavidateno gulu yose mwiyo idakhala chete, ndipo idayamba kubvesera pomwe Baranaba na Paulo angafotokoza vizindikiro na vodabwisa vizinji vomwe Mulungu adachita pakati pa wanthu wa makhaindi yanango pakuphatisa basa iwo. 13 Padamaliza kuyankhula, Yakobo adadawira kuti: “Abale wangu, nibvesereni. 14 Sumiyoni wafotokoza bwino momwe Mulungu adaganizirira wanthu wa makhaindi yanango kwa nthawe yoyamba, kuti pakati pawo atengepo wanthu wodziwika na dzina yake. 15 Ndipo vimwevi vikubverana na vomwe aneneri adanemba vakuti: 16 ‘Vimwevi vikadzamala nidzabwerere nkumanga pomwe tenti* ya Davide yomwe idagwa. Nidzamange pomwe malo yogumuka ya nyumba mwiyo nkuikonza pomwe. 17 Nidzachite vimwevi kuti wanthu wosala mwawo afagefage Yahova* na ntima wose. Amufagefage na makhaindi yose ya wanthu, wanthu wochemerewa na dzina yangu, wanena teno Yahova* yemwe ankuchita vinthu vimwevi, 18 vomwe adavitsimikizira kalekale kuti adzavichite.’ 19 Ndipomwapa chigamulo changu ni chakuti, wanthu wa makhaindi yanango womwe ayamba kutumikira Mulungu, ayi kuti tiwashupise. 20 Koma naboni tiwanembere kuti apewe vinthu vopsyipiziwa na mafano, chigololo, vosakhesa na magazi. 21 Pakuti kundoyambira kalekale, wanthu akhala ankulalikira mu thaundi na thaundi mawu yochokera m’mabukhu ya Mose, pakuti mabukhu mwaya yawerengewa mokuwa m’masunagoge satade iriyose.”
22 Patsogolo pake atumi na akulu pabodzi na mpingo wose, adabverana vosalula amuna pakati pawo, kuti awatumize ku Antiokeya pabodzi na Paulo na Baranaba. Pamwapo adasankhula Yudasi wochemerewa Barasaba na Sila, womwe angatsogolera abale. 23 Patsogolo pake adanemba kalata nkuwapasira yonena kuti:
“Ise abale wanu atumi pabodzi na akulu, tinkunembera imwepo abale wathu wochokera m’makhaindi yanango, omwe muli ku Antiokeya, ku Siriya na ku Kilikiya: Tambirani moni! 24 Tabva kuti anango wochokera pakati pathu akhala ankukushupisani poyankhula vinthu vokusokonezani, olo kuti isepano tiribe kuwapasa malangizo yaliyose. 25 Ndipomwapa tose tabverana kuti tisalule amuna nkuwatumiza pabodzi na abale wathu wapamoyo, Baranaba na Paulo. 26 Wanthu mwawa apereka moyo wawo ndawa ya dzina ya Ambuya wathu Yesu Khrisitu. 27 Tikutumiza Yudasi na Sila, kuti iwombo adzakufotokozereni vinthu vimwevi na mawu ya pakamwa. 28 Ndawa mzimu uchena komasoti isepano tawona kuti vingakhale bwino kuti ayi kuti tikutakuliseni ntolo wolemera, kupatulapo vinthu vofunika vimwevi vomwe ni 29 kupitiriza kupewa vinthu voperekewa ntsembe kwa mafano, magazi, vosakhesa na chigololo. Mukambapewa kuchita vinthu vimwevi mosamala maninge, vinthu vidzakufambireni bwino. Tinkufuna kuti vimbakufambireni bwino!”
30 Amuna mwawo padanyamuka, adayenda ku Antiokeya. Kumuko adasonkhanisa gulu yose ya wanthu nkuwapasa kalata mwiyo. 31 Padaiwerenga, adakondwa ndawa ya mawu yolimbikisa mwayo. 32 Pakuti Yuda na Sila enzembo aneneri, adawakambira nkhani zizinji abale mwawo ndipo adawalimbikisa. 33 Padakhala kumuko kwa kanthawe, abale mwawo adawaperekeza ndipo adabwerera mwa ntendere kwa omwe adawatuma. 34* —— 35 Koma Paulo na Baranaba adasalirira ku Antiokeya. Iwo pabodzi na wanthu anango azinji ambapfunzisa komasoti kulengeza ntontholo wabwino wa mawu ya Yahova.*
36 Pazidapita ntsiku, Paulo adauza Baranaba kuti: “Nabo tibwerere kumathaundi yose komwe tidalalikira mawu ya Yahova* kuti tikachezere abale na kuwawona kuti ali tani.” 37 Baranaba ambafunisisa kuti atenge Yohani, wochemerewa pomwe kuti Maliko. 38 Koma Paulo adawona kuti vingakhalelini bwino kumutenga ndawa ulendo unango Yohani adawasiya ku Pamfuliya ndipo alibe kuyenda nawo ku basa mweyi. 39 Pavidateno adagegedzana maninge mpakana adasiyana. Baranaba adatenga Maliko ndipo adayenda ulendo wapanyanja kuyenda ku Kupuro. 40 Koma Paulo adasankhula Sila, ndipo abale padamupempherera Paulo muyo kuti Yahova* amuwonese kukoma ntima kukulu, adanyamuka. 41 Iye adapita na ku Siriya na ku Kilikiya ndipo ambalimbikisa mipingo.