Wonembewa na Yohani
6 Mwevi pavidamala, Yesu adayambukira tsidya inango ya nyanja ya Galileya, panango kuti nyanja ya Tiberiyo. 2 Ndipo gulu ikulu ya wanthu imbamulondola ndawa ambawona vizindikiro vomwe iye ambachita pakupolesa wanthu wodwala. 3 Pamwapo Yesu adakwira m’phiri ndipo adakhala pasi pabodzi na wopfunzira wake. 4 Manje chikondwerero cha Ayuda cha Pasika chenze chidasala pang’ono kufika. 5 Yesu padakwiza maso yake nkuwona gulu ikulu ya wanthu inkubwera kwa iye, adabvunza Filipo kuti: “Ko mikate yodyesa wanthu wose mwawa tikayagule kuponi?” 6 Koma iye adanena vimwevi pakundofuna kumuyesa ndawa ambadziwa kale vomwe ankufuna kuchita. 7 Filipo adamudawira kuti: “Mikate ya kobiri zokwana madinari 200* yangakwanelini podiya kuti aliyese andotambirako pang’ono.” 8 M’bodzi wa opfunzira wake, Andireya m’bale wake Simoni Petulo, adati: 9 Pali kamulumbwana pano komwe kanamikate 5 ya balere na tuntsomba tuwiri. Koma ko vimwevi vingakwane chigulu cha wanthu chose chimwechi?”
10 Yesu adanena kuti: “Auzeni wanthu mwawa akhale pasi.” Pamalo mwapo penze uswa uzinji. Pamwapo amuna pafupifupi 5000 adakhaladi pasi. 11 Manje Yesu adatenga mikate yale. Padayamika, adayagawa kwa wanthu wose womwe adakhala pasi wale. Adachita pomwe chibodzibodzi na tuntsomba tule ndipo wanthu mwawo adadya momwe aliyese ambafunira. 12 Wanthu wose mwawo padakhuta, iye adauza wopfunzira wake kuti: “Konkhobzani vosala vose, kuti osati padzongeke chirichose.” 13 Pamwapo adalokotera vose ndipo vidadzadza madengu 12 kuchokera pa mikate ya balere 5 yale, yomwe wose adadya mpakana kuyakangira.
14 Wanthu mwawo padaona chizindikiro chomwe iye adachita, adayamba kunena kuti: “Vinkukaikisalini kuti uyu ni mneneri yemwe adati adzabwere padziko.” 15 Yesu padadziwa kuti wanthu akufuna kubwera kudzamuikha kukhala mpfumu, adachoka nkuyenda pomwe ku phiri kwa yekhayekha.
16 Chakumaulo, wopfunzira wake adayenda kunyanja. 17 Iwo adakwera barko nkuyamba kuyambuka nyanja nkumbayenda cha ku Kaperenao. Panthawe mwiyi nkuti mdima wayamba kale ndipo Yesu wenze akanati kufika kwa iwo. 18 Komasoti nyanja idayamba kuchita mabimbi ndawa kumbachita mphepo yamphanvu. 19 Koma padachapa pafupifupi makilometro 5 panango 6, adawona Yesu ankufamba panyanja ankufenderera barko mwiyo ndipo iwo adachita mantha. 20 Koma Yesu adawauza kuti: “Ndinepano, ayi kuchita mantha!” 21 Patsogolo pake adamubvumiza kuti akwere barko yawo, ndipo nthawe mwiyo barko ire idafika kuntunthu komwe ambayenda.
22 Mangwana yake, wanthu womwe enze kutsidya inango ya nyanja mwiyo adawona kuti palibe barko iriyose. Pamalo mwapo penze barko ibodzi ing’ono, koma Yesu alibe kukwera barko mwiyo pabodzi na wopfunzira wake ndawa wopfunzira wake mwawo adachoka pawokha. 23 Koma mabarko yochokera ku Tiberiyo yadafika pafupi na pamalo yomwe wanthu adadyera nkate ule Ambuya padayamika. 24 Pamwapo gulu ya wanthu mwiyo pidawona kuti Yesu komasoti wopfunzira wake kulibe, idakwera barko zawo nkuyenda ku Kaperenao kukafaga Yesu.
25 Padamugumana kutsidya ya nyanja mwiyo adamubvunza kuti: “Mpfunzisi,* mwafika nthawe yanyi kuno?” 26 Yesu adawadawira kuti: “Shuwa ninkukuuzani, sikuti mukunifagafaga ndawa yakuti mudawona vizindikiro neye, koma ndawa yakuti mudadya mikate nkukhuta. 27 Ayi kumbaphata basa kuti mugumane chakudya chomwe chidzongeka, koma kuti mugumane chakudya chokhalisa, chomwe chibweresa moyo wosapera. Mwana wa munthu adzakupaseni chakudya chimwechi ndawa Ababa, Mulungu chaiye, waikha chidindo chake pa iye chomubvumiza.”
28 Pamwapo wanthu mwawo adamubvunza kuti: “Ko tichite chani kuti timbachite vomwe Mulungu ankufuna?” 29 Yesu adawadawira kuti: “Vomwe Mulungu ankufuna kuti mumbachite ni vakuti mumbawonese chikhulupiriro kwa yemwe adamutuma.” 30 Manje iwo adamubvunza kuti: “Ko imwepo muchite chizindikiro chiponi, kuti isepano tichiwone na kukukhulupirirani? Muchite basa yanyi? 31 Azibereki wathu adadya mana muchipululu ninge momwe malemba yanenera kuti: “Adawapasa chakudya kuchokera kudzulu kuti adye.’” 32 Pamwapo Yesu adati: “Shuwa ninkukuuzani, Mose alibe kukupasani chakudya chochokera kudzulu, koma Ababa wangu akupasani chakudya chaicho chochokera kudzulu. 33 Ndawa chakudya chomwe Mulungu wapereka ni ule yemwe wabwera kuchokera kudzulu nkupereka moyo kudziko.” 34 Pamwapo iwo adamuuza kuti: “Ambuya, mumbatipase chakudya chimwicho nthawe zose.”
35 Pamwapo Yesu adawauza kuti: “Ine ndine chakudya chopasa moyo. Aliyese wobwera kwa inepano adzabvelini njala olo pang’ono, ndipo wokhulupirira inepano adzabvelini nyota. 36 Koma pale nidakuuzani kuti, olo mwaniwona, mukhulupiriralini. 37 Aliyese yemwe Ababa adzanipase adzabwere kwa ine, ndipo yemwe wabwera kwa ine nidzamuthamangiselini. 38 Ndawa nidabwera kuchokera kudzulu kudzachita vofuna va yemwe adanituma, osati vofuna vangu. 39 Vofuna va yemwe adanituma ni vakuti ayi kuti niluze aliyese pa wose womwe iye wanipasa, koma kuti nidzawamukise pantsiku yomalizira. 40 Vomwe Ababa wangu ankufuna ni vakuti aliyese wobvuma Mwana komasoti kumukhulupirira akhale na moyo wosapera, ndipo ine nidzamumukise pantsiku yomalizira.”
41 Padateno, Ayuda mwawo adayamba kung’ung’uzika pa nkhani ya iye ndawa adanena kuti: “Ine ndine chakudya chochokera kudzulu.” 42 Iwo adayamba kunena kuti: “Ko ni Yesulini uyu mwana wa Yosefe, yemwe ababa wake na amayi wake tikuwadziwa? Manje ndawa chani akunena kuti: “Nidachokera kudzulu’?” 43 Yesu pakudawira adati: “Imwe lekani kung’ung’uzika. 44 Palibe munthu yemwe angabwere kwa ine pokhapokha peno Ababa omwe adanituma amukwekweta ndipo ine nidzamumukise pantsiku yomalizira. 45 Vidanembewa m’Mabukhu ya Aneneri kuti: ‘Wose adzapfunzisiwe na Yahova.’* Aliyese yemwe wabva kwa Ababa ndipo wapfunzira abwera kwa ine. 46 Palibe munthu yemwe adaonako Ababa, kupatulapo ule yekha yemwe adachokera kwa Mulungu, muyu adawona Ababa. 47 Shuwa ninkukuuzani, aliyese wokhulupirira adzagumane moyo wosapera.
48 Ine ndine chakudya chopasa moyo. 49 Azibereki wanu adadya mana mu chipululu koma adamwalira basi. 50 Mwechi ni chakudya chochokera kudzulu, chakuti aliyese adyeko kuti osati amwalire. 51 Ine ndine chakudya chamoyo chochokera kudzulu. Munthu achiti wadya chakudya mwichi adzakhale na moyo wosapera. Ndipo chakudya chomwe nidzapereke kuti dziko iyi igumane moyo, ni nyompfu wangu uyu.”
52 Pamwapo Ayuda mwawo adayamba kutsutsana wokhawokha, kuti: “Ko munthu muyu angakwanise tani kutipasa mnyompfu wake kuti tidye?” 53 Pamwapo Yesu adawauza kuti: “Shuwa ninkukuuzani, mukaleka kudya mnyompfu wa Mwana wa munthu na kumwa magazi yake, mudzagumanelini moyo. 54 Aliyese yemwe akudya mnyompfu wangu na kumwa magazi yangu adzagumane moyo wosapera, ndipo nidzamumukise pantsiku yomalizira. 55 Ndawa nyompfu wangu ni chakudya chaicho ndipo magazi yangu ni chakumwa chaicho. 56 Aliyese yemwe akudya nyompfu wangu na kumwa magazi yangu, iye na ine tikhala wobverana. 57 Ababa wamoyo adanituma ine ndipo ine ninamoyo ndawa ya Ababa. Molingana na vimwevi, yemwe akudya nyompfu wangu adzakhale na moyo ndawa ya ine. 58 Chimwechi ni chakudya chomwe chidachokera kudzulu. Ni chosiyana na chakudya chomwe azibereki wanu adadya koma nkumwalira. Aliyese wakudya chakudya chimwechi adzakhale na moyo wosapera.” 59 Adanena vinthu vimwevi pomwe angapfunzisa mu sunagoge* ku Kaperenao.
60 Padabva vimwevi, azinji mwa wopfunzira wake adati: “Mawu mwaya ni yosabveseseka. Ni mbani angabvesere vimwevi?” 61 Koma Yesu padadziwa kuti wopfunzira wake ankung’ung’uzika ndawa ya vomwe adanena, adawabvunza kuti: “Ko mawu mwaya mwakalipa nayo? 62 Manje ko vidzakhale tani mukadzawona Mwana wa munthu ankukwera kuyenda komwe wenze pakuyamba? 63 Mzimu ndiwo womwe upereka moyo koma mnyompfu ulibe basa iriyose. Mawu yomwe nakuuzani aya ni mzimu komasoti ni moyo. 64 Koma pali anango wa imwepo womwe ankukhulupiriralini.” Kuchokera pakuyamba, Yesu angadziwa yemwe angakhulupiriralini komasoti yemwe adzamupereke. 65 Iye adapitiriza kunena kuti: “Ndipomwapa nidakuuzani kuti, palibe munthu yemwe angabwere kwa inepano pokhapokha peno Ababa angamubvumize.”
66 Ndawa ya vimwevi, wopfunzira wake azinji adamusiya nkubwerera ku vinthu vawo vomwe enze adavisiya kumbuyo ndipo ambafamba nayelini pomwe. 67 Manje Yesu adabvunza wopfunzira wake 12 wale kuti: “Ko imwepo mukufuna kuyendambo?” 68 Simoni Petulo adadawira kuti: “Ambuya, tingayende pomwe kwa mbani? Imwepo ndimwe munamawu yothandiza munthu kuti adzagumane moyo wosapera. 69 Ise takhulupirira ndipo tadziwa kuti imwepo ndimwe Wochena yemwe Mulungu adamutumiza.” 70 Yesu adawauza kuti: “Ine nidakusankhulani imwepo 12, ni tenolini? Koma m’bodzi wa imwepo ni kapirikoni.”* 71 Pamwapa ambanena va Yudasi mwana wa Simoni Sikariyoti, ndawa muyu ambafuna kudzamupereka, olo kuti wenze m’bodzi wa wopfunzira 12 wale.