KUYAMBISA MACHEZA
MSOLO 6
Kulimba ntima
Mpfundo: ‘Tidalimba ntima mothandiziwa na Mulungu wathu ndipo tidayankhula kwa imwepo ntontholo wabwino.’—1 Ates. 2:2.
Vomwe Yesu adachita
1. Nyang’anirani VIDIYO, panango werengani Luka 19:1-7. Patsogolo pake ganizirani mibvunzo aya:
Ndawa chani wanthu anango ambamupewa Zakeyu?
Koma olo kuti venze teno, ni chani chidachitisa Yesu kumulalikira?
Ko tinkupfunzira chani kwa Yesu?
2. Tifunika kukhala wolimba ntima kuti tilalikire ntontholo wabwino tiribe tsankho.
Tewedzerani Yesu
3. Thembani Yahova. Mzimu wa Mulungu udathandiza Yesu kuti akwanise kulalikira ndipo ungakuthandizenimbo imwepo. (Mat. 10:19, 20; Luka 4:18) Mukumbireni Yahova kuti akuthandizeni kulalikira wanthu womwe muchita nawo mantha.—Mac. 4:29.
4. Pewani kumbaweruza wanthu. Panango mungakayikire kuyankhula na munthu ndawa ya mawonekedwe yake, momwe aliri, chuma chake, moyo wake panango pomwe ndawa ya vinthu vomwe achakhulupirira. Koma kumbukirani kuti:
Yahova na Yesu akwanisa kuwona muntima mwa munthu, koma ise neye.
Palibe munthu yemwe angaleke kuwonesewa chifundo na Yahova.
5. Mumbachite vinthu molimba ntima komasoti mosamala. (Mat. 10:16) Mbapewani nkangano. Peno munthu yemwe munkucheza naye ankuwonesa kuti ankufunalini kubvesera ntontholo wabwino, malisani macheza koma muchite vimwevi mwaulemu maninge.—Miy. 17:14.