Janeiro

Tinkukwanisa kuona kuti Yesu ‘akuona’ nkazi moule ndipo ‘ankubva naye ntsisi.’ (Luka 7:13) Koma Yesu alibe kundobva naye ntsisi nkazi moyu, koma adamuonesa pomwe chifundo. Iye adamuuza mawu yolimbisa kuti ‘leka kulira’ ndipo adachitapo kanthu kumuthandiza. Patsogolo pake adamumukisa mulumbwana ule ‘nkumupereka kwa amayi wake.’ (Luka 7:14, 15) Ko tinkupfunzira chani pa chodabwisa mwechi cha Yesu? Tinkupfunzira kuti tichadekana kuonesa chifundo kwa wale womwe aferewa. Ninge Yesu tingaone njira zomwe tingaonesere chifundo kwa wanthu mwawa. Tingayambe ndise kulewa panango kuwachitira vinthu vomwe vingawalimbikise panango kuwathandiza. (Miy. 17:17; 2 Akor. 1:3, 4; 1 Pet. 3:8) Olo mawu yochepa yomwe tingawauze yangawalimbikise maninge. w23.04 tsa. 5-6 ndi. 13-15

Podiya kuti shamwali wake adamwalira, Yesu adadikhira kwa ntsiku zinango ziwiri kuti achite ulendo woyenda ku Betaniya. Pomwe Yesu ambafika ku Betaniya penze padapita kale ntsiku zinayi Lazaro ali manda. Ndawa chani Yesu adadikhira ntsiku zose mwezi m’malo mwakuti athandize azishamwali wake mwawa? Iye ambafuna kuchita chinthu chomwe chidakapereka ulemerero kwa Ababa wake Yahova. (Yoh. 11: 6, 11, 17) Nkhani mweyi itipfunzisa pomwe va ushamwali. Ganizirani ivi: Pomwe Malita na Mariya adatumiza ntontholo kwa Yesu, iwo alibe kumukumbira kuti ayende ku Betaniya, koma adandomudziwisa kuti shamwali wake ankudwala. (Yoh. 11:3) Olo venze teno Yesu adakamumukisa Lazaro alikutali. Iye adachita kuyenda ku Betaniya kuti akagumane na azishamwali wake Malita na Mariya. Ko muna azishamwalimbo watene omwe afunisisa kukuthandizani olo kuti mulibe kuchita kuwakumbira? Peno nteno mungawakhulupirire azishamwali mwawa pa ‘nthawe ya mabvuto.’ (Miy. 17:17) Ninge Yesu tingakhalembo azishamwali watene kwa wanthu anango. w23.04 tsa. 10 ndi. 10-11

Tikakhala kuti tinkulimbana na mabvuto yakulu, tingayambe kukhala na maganizo ya kuti dziko inyowani yomwe Mulungu watipolomisa chipo ifikelini. Ko vimwevi vinkutanthauza kuti chikhulupiriro chathu ni chofoka? Neye. Ganizirani fanizo iyi: Pakati pa mainza, mungakhale na maganizo yakuti chisalo (chilimo) chifikelini. Koma chisalo chifika nthawe zose. Molingana na vimwevi, tikakhala kuti ndise okhumudwa maninge tingaganize kuti dziko inyowani chipo ifikelini. Koma chikhulupiriro chathu chikakhala cholimba, tidzakhale na chitsimikizo chakuti mapolomisi yomwe Mulungu wachita yadzakwanirisike. (Sal. 94:3, 14, 15; Aheb. 6:17-19) Tikakhala na chitsimikizo chimwechi, kutumikira Yahova kudzapitirize kukhala chinthu chodekana maninge pamoyo wathu. Isepano tichadekana pomwe chikhulupiriro cholimba kuti tikwanise kulalikira. Kwa wanthu azinji ‘ntontholo wabwino’ wa dziko inyowani vioneka ninge maloto panango nthano basi. (Mat. 24:14; Ezek. 33:32) Koma isepano tichadekanalini kubvuma kutengerambo maganizo ya wanthu mwawa. Kuti tipewe vimwevo, tichadekana nthawe zose kulimbisa chikhulupiriro chathu. w23.04 tsa. 27 ndi. 6-7; tsa. 28 ndi. 14

Ko imwepo mudakayikirako kale kuti panango Yahova akudawira mapemphero yanu? Peno munkubva teno dziwani kuti ndimwelini mwekha. Abale na alongo azinji abvambo teno makamaka pomwe ankugumana na mabvuto. Vikakhala teno vingakhale voshupa kudziwa kuti Yahova ankudawira mapemphero yathu. Ndawa chani tifunika kukhulupirira kuti Yahova adawira mapemphero ya atumiki wake?. Baibolo ititsimikizira kuti Mulungu atikonda ndipo ationa kuti ndise wanthu ofunika maninge kwa iye. (Hag. 2:7; 1 Yoh. 4:10) Ndipomwapa iye atikumbira kuti timbapemphere kwa iye. (1 Pet. 5:6, 7) Yahova afuna maninge kuti timufenderere kuti tikwanise kulimbana na mabvuto. M’Baibolo, tigumanamo nkhani zizinji za momwe Yahova adadawirira mapemphero ya atumiki wake okhulupirika. Ko imwepo mukukwanisa kuganizirako chitsanzo chibodzi? w23.05 tsa. 8 ndi. 1-4

Mariya wenze pa ushamwali wakulimba na Yahova, chikhulupiriro chake chimbathembalini Yosefe, ambayadziwa bwino Malemba ndipo ambapatula nthawe yoganizira. (Luka 2:19, 51) Mosakayika pakukhala munthu wauzimu Mariya wenze nkazi wabwino maninge. Ntsiku zino akazi azinji olowodwa iwo achita khama kuti akhale ninge Mariya. Mwakulinganiza, mulongo munango dzina yake Emiko adati: “Pomwe nenze wosalowodwa nenze na ndandanda yangu yochitira vinthu vauzimu, koma pomwe nidalowodwa mwamuna wangu ndiye angapemphera kwa ise na kutsogolera pfunziro ya banja. Nidazindikira kuti mwamuna wangu ambachite vose mwevi kwa inepano. Pamwapo nidaona kuti yemwe angadekana kusamalira ushamwali wangu na Yahova nenze inepano pa nekha. Manjeuno nipatula nthawe yopemphera kwa Yahova na kuganizira vomwe nalewenga.” (Agal. 6:5) Akazi olowodwa pitirizani kulimbisa ushamwali wanu na Yahova. Kuchita vimwevi amuna wanu adzakhale na vifukwa vokutembejerani na kukukondani imwepo.—Miy. 31:30. w23.05 tsa. 22 ndi. 6

Tiribe kubadwa tinkugopa kale Yahova, koma tichadekana kupfunzira. Njira ibodzi yochitira vimwevi nikuona chilengedwe. Tikambaona nzeru za Mulungu, mphanvu yake, na chikondi chake chomwe iye adachionesa ‘pavomwe adasika,’ vimwevi vidzachitise kuti timbamulemekeze maninge na kumukonda. (Aro. 1:20) Njira ibodzi yomwe tingaonesere kuti tinkugopa Mulungu ni kupemphera nthawe zose. Tikambapemphera nthawe zose Yahova akhala chaiye kwa isepano. Nthawe zose timukumbira mphanvu kuti atithandize kupirira pachiyeso, ndawa ya vimwevi tikumbusiwa va mphanvu zake zodabwisa. Tikambamutembeja ndawa ya mphaso ya mwana wake, tikumbukira vachikondi cha Yahova kwa isepano. Pomwe tinkugwigwilira Yahova kuti atithandize kukonza bvuto inango, vichitisa kuti tione mu ntima mwathu momwe iye aliri wanzeru. Mapemphero yakhaindi mweyi yathandiza kuti timbamulemekeze maninge Yahova. Ndipo vichitisa kuti timbakhale otsimikiza kuleka kuchita chilichose chomwe chingadzonge ushamwali wathu na iye. w23.06 tsa. 15 ndi. 6-7

Yahova ndiye yekha yemwe angadekane kupereka malamulo kwa wanthu wake ndipo malamulo yake ni yodziwika bwino. Mwakulinganiza, Bungwe Yotonga ya mu nthawe ya Akhrisitu adafotokoza vinthu vitatu vomwe iwo angachite kuti apitirize kukhala olimba: (1) kuleka kutumikira mafano koma Yahova yekha, (2) kulamba kuyikhiwa magazi ndipo (3) kubvera malamulo ya m’Baibolo yakuti ayi kuchita chigololo. (Mac. 15:28, 29) Ko Akhrisitu angabvere tani Yahova pa Vinthu vitatu vofunika mwevi? Koma titumikira Yahova yekha. Iye adalamula Aizirayeli kuti ambatumikire iye yekha basi. (Deut. 5:6-10) Pomwe angayesewa na Satana, Yesu adalewa mobveka bwino kuti isepano tichadekana kutumikira Yahova yekha. (Mat. 4:8-10) Ndawa ya vimwevi isepano titumikiralini mafano, kuyingizira mwapa isepano titumikiralini wanthu womwe ni wapadzulu m’dziko ninge akuakulu wavipembedzo, akuluakulu waboma, panango wanthu wodziwika maninge. Koma titumikira Yahova yekha yemwe ‘adalenga vinthu vose.’ (Chiv. 4:11) w23.07 tsa. 14-15 ndi. 3-4

Dziko ya Satana iyi, ilidzale na nkhani za chigololo na volaula. (Aef. 4:19) Ndipo mwapa tifunika kupitiriza kugopa Mulungu na kuzonda vinthu voipa. Mu chaputala 9 cha bukhu ya Miyambo tiwewerenga va nzeru na kupusa zofotokozewa ninge azikazi awiri. Ose mwawa ankufotokozewa kuti ankuchemera wanthu osadziwa vinthu panango kuti osazindikira. Pakulewa kuti ‘bwelani mudzadye chakudya kumuyi kwangu.’ (Miy. 9:1, 4-6) Koma vomwe vidachitika patsogolo pake nivosiyana maninge. Ganizirani kuchemera komwe ‘nkazi wopusa’ adakuchita. (Miy. 9:13-18) Iye ankuchemera wanthu wosadziwa vinthu kuti ‘ngenani muno ndipo kondwani.’ Nchani chidachitika? Wanthu osazindikira wale adangenadi. Tinkuchenjezewa va ‘nkazi wosabvera na makhalidwe yoipa.’ Lemba mweyi ilewa kuti: ‘Ndawa nyumba yake ichitisa wanthu kuyenda kumanda.’ (Miy. 2:11-19) Pa Miyambo 5:3-10 papereka chenjezo pa nkhani ya ‘nkazi moyu wosabvera,’ panena kuti ‘mapazi yake yatsogolera ku impfa.’ Wale omwe agumana na ‘nkazi wopusa moyu’ ankufunika kusalula kuyenda panango kulamba. w23.06 tsa. 21-22 ndi. 6-7

Akulu achadekana kukhala chitsanzo chabwino pa nkhani ya kulolera. (1 Tim. 3:2, 3) Mwakulinganiza, nkulu achadekanalini kuti nthawe zose ambaganize kuti malangizo yake ndiyo yomwe yangaphatisiwe basa ndawa yakuti ni wachikulire kuposha akulu anango. Iye achadeka kumbaganizira kuti mzimu wa Yahova ungaphatisire basa nkulu aliyese kuti ayankhule vinthu vomwe vingathandize kuti asalule bwino vinthu. Peno akulu azinji ankubverana na maganizo yanango yomwe yankusiyanalini na mpfundo za m’malemba, nkulu wachikatikati angathandizire maganizo mwaya olo kuti iye anamaganizo yosiyana. Akhrisitu omwe ni ololera adalisiwa maninge. Mwakulinganiza, tikhala pa ushamwali na abale na alongo vomwe vilimbikisa mbverano mu mpingu. Ndise okondwa ndawa tinamwayi wodziwana na abale na alongo wamakhaindi yosiyanasiyana na vikhalidwe vosiyanasiyana. Ni vodabwisa maninge pakudziwa kuti olo kuti ndise osiyanasiyana tose titumikira Yahova mobverana. Koposha vose ndise okondwa kudziwa kuti tinkutewedza Ababa wathu wakudzulu Yahova yemwe ni wololela. w23.07 tsa. 25 ndi. 16-17

Danieli ambapfunzira maulosi ya m’Baibolo na vifukwa vabwino, iye ambafuna kudziwa chaivo. Danieli wenze wodzichepesa ndipo ambadziwa kuti Yahova angamuthandize kubvesa maulosi mwaya kuti apitirize kukhala pa ushamwali wolimba na Yahova na kumubvera nthawe zose. (Dan. 2:27, 28) Ndipo Danieli wenze adatsimikiza kuti wenze wodzichepesa ndawa ambathemba thandizo ya Yahova. (Dan. 2:18) Kuingizira pamwapa Danieli ambapfunzira mosamala. Ambafagafaga nkhani mosamala maninge mu mipukutu yomwe yenzepo mu nthawe yake. (Yer. 25:11, 12; Dan. 9:2) Manje ko isepano tingamutewedzere tani Danieli? Onani volinga vanu ndipo mbapfunzirani na volinga vabwino. Ko imwepo muchapfunzira maulosi ya m’Baibolo ndawa yofuna kudziwa chaivo? Peno nteno Yahova adzakuthandizeni. (Yoh. 4:23, 24; 14:16, 17) Wanthu anango apfunzira Baibolo na volinga voipa. Pomwe anango apfunzira Baibolo na chakulinga chakuti ambatsutse kuti ilibe kuuziriwa na Mulungu. M’maganizo ya wanthu mwawa aganiza kuti peno Baibolo ni bukhulini youziriwa na Mulungu, ni yosadekana kuibvera ndipo angasalule wokha vinthu vabwino panango voipa. Ndawa ya vimwevi tichadekana kupfunzira Baibolo na volinga va bwino. w23.08 tsa. 9 ndi. 7-8

Tingakhale okhumudwa maninge peno tinkudzilinganiza na anango. (Agal. 6:4) Tingakhale wanjiru komasoti tingambachite vinthu mwampikisano. (Agal. 5:26) Tikambandoganizira na kuona vomwe wanthu anango ankuchita vomwe isepano tingavikwaniselini vimwevo vingatipwetekese. Peno ‘chinthu chomwe timbachidikhira chakangika, chidwalisa ntima.’ Ndoganizani momwe vikhalira vowawa kukhala na chidikhiro cha vinthu vomwe tingakwaniselini kuvichita! (Miy. 13:12) Tikachita vimwevi tidzakhale okhumudwa maninge ndipo tidzasiye kuthamanga pa mpikisano wokatambira moyo. Ayi kumbadikhira vizinji kwa imwepo vomwe Yahova ankuvidikhiralini. Iye adikhiralini kuti mumupase vinthu vomwe imwepo mulibe. (2 Akor. 8:12) Yahova alinganizalini vomwe imwepo muchachita na vomwe wanthu anango achachita. (Mat. 25:20-23) Yahova alemekeza maninge basa yose na khama yanu yomwe imwepo muchachita, chikhulupiriro chomwe imwepo munacho na kupirira komwe imwepo muchakuonesa. w23.08 tsa. 29 ndi. 10-11

Yahova adamudawira Samisoni pomwe adamukumbira thandizo ndipo adamuwonesa modabwisa chitsime cha madzi. Pomwe Samisoni adamwa madzi mwaya, ‘mphanvu zake zidabwererapomwe’ ndipo iye adakondwa maninge. (Ower. 15:19) Vinkuwonekeratu kuti chitsime mwechi chenze chilipo pomwe mneneri Samueli adauziriwa kunemba bukhu ya Oweruza. Nthawe zose pomwe Aizirayeli ambawona chitsime mwechi iwo ambakumbukira kuti akambathemba Yahova iye adzawathandize pamabvuto yaliyose. Isepanombo tichadekana kunyang’ana thandizo ya Yahova. Viribe basa vinthu vomwe tichadziwa, luso yomwe tinayo panango vinthu vomwe takwanisa kale kuchita pakumutumikira. Isepano tichadekana kukhala odzichepesa na kudziwa kuti tingakwanise kuchita chilichose chomwe Yahova ankufuna tikambamuthemba. Ninge momwe Samisoni adakhalira wamphanvu pomwe adamwa madzi yomwe Yahova adamupasa, isepanombo tingakwanise kukhala na mphanvu tikambaphatisa basa vinthu virivose vomwe Yahova watipasa.—Mat. 11:28. w23.09 tsa. 4 ndi. 8-10

Ko tichadekana kuchita chani peno munthu wayamba kuyankhula vinthu votikalipisa pakulewa va Mulungu panango Baibolo? Tichadekana kupemphera kwa Yahova kukumbira mzimu uchena na nzeru kuti tikwanise kuchita vinthu modekha. Manje ko tingachitetani peno tazindikira kuti tachita vinthu vomwe timbafunikalini kuvichita? Tichadekana kupemphera pomwe na kuganizira vomwe timbadekana kuchita na chakulinga chakuti tileke kudzavichita pomwe. Tikachita vimwevi Yahova adzatipase mzimu wake uchena womwe udzatithandize kukhala ofatsa na kuti tipitirize kukhala odekha. Mavesi yazinji ya m’Baibolo yadzatithandize kuyankhula modekha panthawe zoshupa. Mzimu uchena ungatithandize kuti timbakumbukire mavesi mwaya. (Yoh. 14:26) Mwakuliganiza, mpfundo zomwe zigumanika mu bukhu ya Miyambo, zingatithandize kukhala odekha. (Miy. 15:18) Lemba mweyi ya m’Baibolo iwonesa ubwino wa kukhala ofatsa pa nthawe zoshupa.—Miy. 10:19; 17:27; 21:23; 25:15. w23.09 tsa. 15 ndi. 6-7

Mtumi Petulo ambadziwa kuti amwalire manjemanje. Pa magole yose ya utumiki wake, iye adakhala nteweri wa Yesu wokhulupirika, adayamba kulalikira malo yosiyanasiyana ndipo wenze M’bugwe yotonga. Koma basa ya Petulo yenze ikalibe kumala. Cha m’ma 62-64 Yesu wayenda kale kudzulu, iye adauziriwa kunemba makalata yawiri ndipo yagumanika m’Baibolo yomwe ni 1 Petulo na 2 Petulo. (2 Pet. 1: 13-15) Petulo adanemba makalata yake yawiri mwaya youziriwa pa nthawe yomwe abale ‘ambabonera na viyeso vizinji.’ (1 Pet. 1:6) Amuna wamaganizo yoipa adayamba kupsipiza mpingu na vipfunziso va bodza. (2 Pet. 2:1, 2, 14) Akhrisitu ambakhala mu nthawe ya ‘mapeto ya vinthu vose’ panango kuti Aroma adakadzonga thaundi ya Yerusalemu na dongosolo yose ya Ayuda ya nthawe mweyo. (1 Pet. 4:7) Mosakaika makalata ya Petulo yadakathandiza Akhrisitu kudziwa vodekana kuchita kuti alimbane na mabvuto ya munthawe mweire na yanango yomwe yadakabwera kutsogolo. w23.09 tsa. 26 ndi. 1-2

Ninge Yesu, isepanombo kawirikawiri tipfunzira kukhala obvera tikambagumana na vinthu voshupa. Mwakulinganiza, pomwe matenda ya Koronaviru yadayamba, isepano tidatambira malangizo yakuti tileke kumbasonkhana mu Nyumba za Ufumu na kuleka kulalikira muyi na muyi. Ko imwepo vidakushupani kubvera malangizo mwaya? Koma kubvera kwanu kudakuthandizani imwepo, kudathandiza mpingu kuti ukhale wobverana ndipo kudakondweresa Yahova. Manje tose isepano ndise okonzeka kutewedza malamulo yomwe tidzatambire pa chisautso chikulu. Kubvera malangizo mwaya ndiko kudzapulumuse moyo wathu (Yobu 36:11) Isepano tinachifukwa chikulu chokhalira obvera chomwe ni kukonda Yahova na kufuna kumukondweresa. (1 Yoh. 5:3) Isepano tingakwaniselini kupagali vinthu vose vabwino vomwe Yahova watichitira. (Sal. 116:12) Koma isepano tichadekana kubvera Yahova na wale omwe atinyang’anira, tikachita vimwevi tidzaonese kuti ndise wanzeru ndipo munthu wanzeru akondweresa ntima wa Yahova.—Miy. 27:11. w23.10 tsa. 11 ndi. 18-19

Vichikhala kuti mngelo akufuna kuyankhula namwe, ko imwepo mungatetekere vomwe akufuna kukuuzani? Ntsiku zino angelo akuyankhula kwa wanthu wa ‘makhaindi yose, mtundu uliwose na chiyankhulo chilichose.’ Ko iye ankunena kuti chani? ‘Gopani Mulungu ndipo mupaseni ulemelero . . . Tumikirani yemwe adalenga kudzulu na dziko yapasi.’ (Chiv. 14:6, 7) Yahova ni Mulungu yekha yemwe wanthu wose achadekana kumutumikira. Ndise okondwa ndawa yotipasa mwayi wotumikira mu kachisi wake wauzimu. Ko kachisi wauzimu ni chani? Ndipo ni kuponi komwe tingakagumane nkhani zobveseseka za kachisi moyu? Kachisi wauzimu moyu ni nyumbalini chaiyoiyo. Kachisi wauzimu moyu ankuphatanidzapo vose vomwe Yahova adakonza pakuphatisa basa ntsembe ya dipo ya Yesu kuti wanthu akwanise kumutumikira. Mtumi Paulo adafotokoza bwinobwino vimwevi u kalata yake yomwe adanembera Akhrisitu Wachiheberi womwe ambakhala ku Yudeya. w23.10 tsa. 24 ndi. 1-2

Mu gole ya 522 azondi wa Ayuda adakwanisa kuchitisa kuti ufumu wa Perisiya uletse basa yomanga kachisi. Koma Zekariya adawatsimikizira Ayuda pakuwauza kuti Yahova adzaphatise basa mphanvu zake pakuwathandiza podiya kuti ankugumana na mabvuto yazinji. Koma mu gole ya 520 Mpfumu Dariyo idabvumiza kuti basa yokonza kachisi ipitirize. Ndipo iye adaperekambo kobiri zothandizira basa mweyi. Adalamula pomwe kuti maboma yanango yomwe enze nayo pafupiyathandizirembo. (Ezara 6:1, 6-10) Yahova adapolomisa wanthu wake kuti adzawathandize akayikha basa yomanga kachisi pa malo yoyamba. (Hag. 1:8, 13, 14; Zek. 1:3, 16) Ayuda adalimbikisiwa maninge na vomwe aneneri mwawa adanena. Ndipo adayamba pomwe kumanga kachisi mu gole ya 520. Iwo adamaliza kumanga kachisi moyu akanati kumala magole 5. Iwo adatambira madaliso na thandizo ya Yahova ndawa yakuti adayikha basa ya Yahova pa malo yoyamba m’malo mwakuti ambandoganizira va mabvuto yawo. Ndawa ya vimwevi iwo adakwanisa kutumikira Yahova mokondwa.—Ezara 6:14-16, 22. w23.11 tsa. 15 ndi. 6-7

Wanthu azinji adabvako kale va mbiri ya Abulahamu, koma adziwalini vizinji va iye. Isepano tidziwa vizinji va munthu wotomolewa m’Baibolo moyu. Mwakulinganiza, tidziwa kuti Abulahamu adachemerewa kuti: ‘Ni baba wa ose omwe anachikhulupiriro.’ (Aro. 4:11) Panango imwepo mungadzibvunze kuti: ‘Ko inepano ningakwanise kukhala na chikhulupiriro cholimba ninge cha Abulahamu?’ Inde, vimwevi nivokwanisika. Njira ibodzi yomwe tingakwanisire kukhala na chikhulupiriro ninge cha Abulahamu ni kupfunzira chitsanzo chomwe iye adatisiyira. Pambuyo pakuti watambira malamulo ya Mulungu, Abulahamu adafuluka nkukakhala kutali komwe kwa magole yazinji ambakhala m’mahema. Ndipo wenze wokonzeka kupereka ntsembe mwana wake yemwe ambamukonda maninge, Isaki. Vose vimwevi vimbawonesa kuti Abulahamu wenze na chikhulupiriro cholimba maninge kwa Yahova. Chikhulupiriro cha Abulahamu na basa zake vidachitisa kuti Yahova amubvume kukhala shamwali wake. (Yak. 2:22, 23) Yahova ankufuna kuti tose kuphatanidzapo imwepo pamwekha tikhale azishamwali wake. Ndipomwapa iye adauzira Paulo na Yakobo kuti anembe va chitsanzo cha Abulahamu m’Baibolo. w23.12 tsa. 2 ndi. 1-2.

Alongo dziwani momwe mungambachezere na anango. Ni vabwino maninge kuti Mkhrisitu ambakwanise kucheza na anango. Ni mwanjira mweyi momwe mtumi Yakobo adaperekera malangizo yomwe yali mu lemba ya ntsiku ya lero Imwepo mukababvesera mwatcheru vomwe anango ankuyankhula, muwonesa kuti munachifundo komasoti ‘muganizira’ anango. (1 Pet. 3:8) Mukakhala kuti imwepo munkubvesalini bwinobwino vomwe munthu ankuyankhula panango momwe iye ankubvera, mubvunzeni mibvunzo yomwe yangakuthandizeni kumubvesa. Patsogolo pake ganizirani mukanati kuyankhula. (Miy. 15:28) Dzibvunzeni kuti: ‘Ko vomwe ninkufuna kunena ni chaivo ndipo vimulimbikise? Ko vinkuwonesa kuti ndine waulemu komasoti wokoma ntima?’ Yesesani kupfunzira na alongo omwe achabvesera mwatcheru na kuyankhula mokoma ntima. (Miy. 31:26) Mbakhalani tcheru na momwe iwo ankuyankhulira. Kucheza bwino na anango kudzakuthandizeni kuti mukhale na azishamwali wabwino komasoti kukhala pa ntendere na wanthu anango. w23.12 tsa. 21 ndi. 12

Manjeuno Yahova angaphatise basa abale wathu, azishamwali panango akulu kuti atithandize. Tikakhala kuti tinkugumana na mabvuto yakulu maninge, m’maganizo mwathu tikonda kudzisalula ndipo tikonda kukhala pa zii kwatekhatekha. Vimwevi ni vobveka. Manje ko tingatambire tani thandizo ya Yahova peno tinkudzisalula? Malisani bvuto yofuna kukhala kwamwekha. Tikambadzisalula, m’maganizo yathu tikonda kuganizira va mabvuto yathu na vomwe tinkugumananavo. Kumbandoganizira mwevi vingachitise kuti tisalule vinthu voipa. Ni vobvekadi kuti tose isepano nthawe zinango tifuna kukhala patekha makamaka tikakhala kuti tinkugumana na bvuto ikulu. Koma tikambadzisalula kwa nthawe ikulu, tikhala kuti tinkusiyana na anzathu ndipo ni imweyiletu njira yomwe Yahova aphatisa basa kuti atithandize. bvumani thandizo ya abale wanu, azishamwali na akulu. Yesesani kuona momwe iwo aliri, imweyi ni njira ibodzi yomwe Yahova achaperekera thandizo.—Miy. 17:17; Yes. 32:1, 2. w24.01 tsa. 24 ndi. 12-13

Anaziri ambadekanalini kugwata tsitsi yawo. Imweyi yenze njira yowonesa kuti ankugonjera Yahova. Koma chobvesa ntsitsi ni chakuti nthawe zinango Anaziri ambalemekezewalini ndipo ambatambiralini thandizo kuchokera kwa Aizirayeli anango. Anaziri ambadekana kukhala olimba ntima maninge kuti akwanirise lumbiro yawo na kukhala osiyana na wanthu anango. (Amosi 2:12) Wanthu akwanisa kuwona kuti tisiyana nawo vochita ndawa yakuti isepano tibvera Yahova. Isepano tichadekana kukhala olimba ntima kuti tiuze wanthu anango ku basa panango ku shikola kuti ndise wa Mboni za Yahova. Pomwe vinthu vinkuyipirayipira mu dziko iyi, nthawe zinango vikhala voshupa kuti timbachite vinthu mobverana na mpfundo za m’Baibolo na kuuza anango va ntotholo wabwino. (2 Tim. 1:8; 3:13) Nthawe zose mbakumbukirani kuti ‘ntima wa [Yahova] uchakondwa’ tikakhala olimba ntima kuti tikhale osiyana na wanthu omwe amutumikiralini.—Miy. 27:11; Mal. 3:18. w24.02 tsa. 16 ndi. 7; tsa. 17 ndi. 9

Chikondi ni khalidwe yofunika maninge yomwe imbadziwikisa Akhrisitu oyambirira. Koma ko venze vosashupa kuti iwo awonese chikondi? Onani momwe abale wa mu mpingu wa Roma enzere osiyana. Mu mpingu momu mumbagumanika pomwe Ayuda womwe adalelewa motewedza chilamulo cha Mose na wanthu wakunja womwe enze adalelewa mosiyana maninge. Akhrisitu anango enze akapolo pomwe anango enzelini akapolo. Vingachitike kuti anango enze anikachilo wa akapolo. Ko Akhrisitu mwawa adamalisa tani kusiyana kumoku ndipo adaonesa tani chikondi kwa anango? Mtumi Paulo adalimbikisa Akhrisitu mwawa kuti ‘ambatambirane.’ Ko iye ambatanthauza chani pamwapa? Mawu ya chigiriki yotsumbudzuliliwa kuti ‘kutambirana’ yatanthauza kutambira munthu na kucheleza. Vili ninge munthu yemwe watambira mulendo pa muyi pake na kubvuma kuti akhale mu gulu ya azishamwali wake. Mwakulinganiza, Paulo adauza Filimone kuti ankufunika kutambira Onesimo ‘mokoma ntima’ ninge kapolo mwanzawo yemwe wenze adawathawa. (Filim. 17) Akula na Purisikila adatambira pomwe Apolo, ‘nkumuchemelera payekha’ na kumulimbisa kuti akulise makhalidwe yake ya Chikhrisitu. (Mac. 18:26) M’malo mwakuti kusiyana kuwagawanise Akhrisitu mwawa adalimbana na bvuto mweyi ndipo adakwanisa kuthandizana. w23.07 tsa. 6 ndi. 13

Chinthu chikulu chomwe chikuchitisani kuti mudzipereke kwa Yahova ni chikondi chomwe imwepo munacho kwa iye. Nimaganizolini yomwe yandobwera nkuyenda, koma yachokera ‘pakumudziwa bwino iye’ komasoti ‘kubvesa vinthu vauzimu.’ Kubvesa vinthu vomwe imwepo mudapfunzira va Yahova na cholinga chake vikuchitisani kuti mumbakonde Yahova ntsiku iliyose. (Akol. 1:9) Kupfunzira Baibolo komwe imwepo mudachita, kudakuchitisani kuti mutsimikizire vinthu ivi (1) Yahova ni chaiye, (2) Baibolo ni mawu yake youziriwa ndipo (3) Yahova achaphatisa basa gulu yake kuti akwanirise cholinga chake. Munthu yemwe adzipereka kwa Yahova, achadekana kudziwa vipfunziso voyambirira va m’Baibolo na malamulo ya Yahova komasoti kumbachita vinthu mobverana na mpfundo zake. Iye achita vose vomwe angakwanise kuti auze pomwe anango vomwe adapfunzira m’Baibolo. (Mat. 28:19, 20) Chikondi chake kwa Yahova chakula ndipo ankufuna kutumikira Yahova na ntima wose. Ko nteno momwe imwepo muchabvera? w24.03 tsa. 4-5 ndi. 6-8

Abigayeli wenze nkazi wa Nabala, ndipo Baibolo ilewa kuti Nabala wenze wankhanza komasoti woshupa. (1 Sam. 25:3) Venze voshupa maninge kwa Abigayeli kukhala na mwamuna watene. Vingachitike kuti Abigayeli adakanyang’ana njira zakuti amalisire banja mwayire, ndipo mpata moyu wenze udaoneka pomwe Davide adadzodzewa kuti adzakhale mpfumu ya Aizirayeli ndipo ambafuna kupha mwamuna wake ndawa yakuti iye wenze adamunyoza Davide pabodzi na amuna omwe enze naye. (1 Sam. 25:9-13) Abigayeli adakathawa nkumusiya Nabala kuti aphewe na Davide. Koma ndivolini vomwe iye adachita. M’malo mwavimwevi iye adanyengerera Davide kuti amusiye wamoyo Nabala. (1 Sam. 25:23-27) Koma ndawa chani iye adachita vimwevi? Abigayeli ambakonda maninge Yahova ndipo ambalemekeza ukwati ninge momwe Yahova achaulemekezera. Iye ambadziwa kuti banja ni chinthu chochena pa maso pa Yahova ndipo ambafuna kumukondweresa. Vingachitike kuti mwevi ndivo vomwe vidamuchitisa kuti apulumuse wanthu wa m’banja yake kuphatanidzapo mwamuna wake. Ndipomwapa iye adachita vinthu mwakankulumize kuti aletse Davide kukapha Nabala. w24.03 tsa. 16-17 ndi. 9-10

Ko pana abale anango mumpingu wanu omwe ankukhala moyo wosafuna vizinji ndawa yofuna kuchita vizinji pa kutumikira Yahova? Ko munkudziwa alumbwana omwe ankukhala olimba ntima kuti akhale osiyana na anzawo ku shikola podiya kuti kuchita vimwevi ni koshupa? Ko mungakumbukire m’bale munango yemwe ankupitiriza kukhala okhulupirika podiya ankutsutsiwa na wanthu wa m’banja yake? Khalani otsimikiza kuchita vose vomwe mungakwanise kuti mulimbikise wanthu mwawa na kuwauza momwe imwepo muchakhalira wokondwa ndawa ya kulimba ntima kwawo na vose vomwe ankumuchitira Yahova (Filim. 4, 5, 7) Iye adziwa kuti isepano tifuna kumukondweresa nakuti ndise okonzeka kuchita vose vomwe tingakwanise kuti tikwanirise lumbiro yathu ya kudzipereka. Iye atilemekeza pakutipasa mwayi wosalula kuti timbamuwonese chikondi. Naboni tichite vose vomwe tingakwanise kuti tipitirize kumutumikira Yahova ndipo nthawe zose timbakhale okonzeka kumupasa vose vomwe tingakwanise. w24.02 tsa. 18 ndi. 14; tsa. 19 ndi. 16

Linganizani kuti muli mugole ya 29 yakuyamba kwa utumuki wa Yesu pa dziko yapasi, Yesu na amayi wake adachemerewa ku phwando ya ukwati ku thaundi ya Kana. Mariya wenze adayamba kuthandizana nawo kusamalira alendo. Nkati mwa phwando mweyo padagumanika bvuto inango yomwe yenze kumala kwa vinyu. Ndipomwapa, Mariya adayenda mwakankulumize komwe kwenze Yesu nkumuuza kuti: ‘Vinyu wamala.’ (Yoh. 2:1-3) Ko Yesu adachita chani? Iye adachita chinthu chodabwisa kusandusa madzi ‘kukhala vinyu.’ (Yoh. 2:9, 10) Chimwechi chenze chodabwisa choyamba pa vodabwisa vizinji vomwe Yesu adachita padziko. Iye adaphatisa basa mphanvu zomwe wenzenazo ndipo adachita vodabwisa vizinji maninge. Mwakulinganiza, Yesu panthawe inango adadyesa modabwisa amuna okwana 5000 ndipo pa chochitika chinango Yesu adadyesa pomwe amuna okwana 4000. Kuti tiphatanidze akazi na wana chiwerengero chimwechi chingafike 27 000. (Mat. 14:15-21; 15:32-38) Pavochitika viwiri vimwevi, Yesu adachirisa pomwe wanthu azinji odwala.—Mat. 14:14; 15:30, 31. w23.04 tsa. 2 ndi. 1-2

Peno imwepo mudagumanakokale na mabvuto yakulu pa moyo wanu, vingachitike kuti nthawe zinango mungadzibve ofoka mwakuthupi komasoti m’maganizo. Molingana na Eliya mungawone kuti mungakwaniselini kuyimirira koma chinthu chomwe munkufuna ni kugona basi. (1 Maf. 19:5-7) isepano tinkufunikambo thandizo kuti tipitirize kukhala olimba pa basa ya Yahova. Ni panthawe mweyi pomwe Yahova atitsimikizira kuti: Mfumu Davide adaona thandizo ya Yahova. Pakulimbana na mabvuto ya azondi wake, iye adauza Yahova kuti: ‘Djanja yanu ya mphanvu idanilimbisa.’ (Sal. 18:35) Kawirikawiri Yahova aphatisa basa wanthu anango kuti atipase thandizo yomwe tinkudekana. Mwakulinganiza, pa nthawe yomwe mpfumu Davide adadzibva kuti ni wofoka, ni shamwali wake Yonatani yemwe adabwera kudzamuzungira kuti amulimbikise. (1 Sam. 23:16, 17) Mwanjira ibodzibodzimbo Yahova adaphatisira basa Elisa kuti athandize Eliya.—1 Maf. 19:16, 21; 2 Maf. 2:2. w24.01 tsa. 23-24 ndi. 10-12

Yahova ni Mulungu yemwe ni wopasa. Makhalidwe mwaya yaoneselatu va nzeru chaizo zomwe ‘ziimira nkazi’ yemwe atomolewa pa lemba ya Miyambo msolo 9. Nkhani mweyi ilewa pomwe kuti nkazi wophiphirisa moyu, wakonzekera nyama, wasanganiza vinyo wake ndipo walongedza meza kumuyi kwake. (Miy. 9:2) Kuingizira pamwapa mobverana na vesi 4 na 5: ‘Nzeru yophiphirisa yofotokozewa ninge munthu wosowa nzeru ile ilewa kuti: ‘Bwera dyaya chakudya changu.’’ Ko nyumba ya nzeru chaiyo ingadye chakudya mwechi? Yahova afuna kuti wana wake ambakhale ozindikira komasoti otetezeka. Iye afunalini kuti timbapfunzire vinthu pa moyo wathu kuchokera pa vinthu vowawa vomwe taphonyesa. Ndawa yakuti iye ni ‘chuma chanzeru zophindulisa kwa wale omwe azifuna.’ (Miy. 2:7) Tikakhala kuti tinkugopa Yahova moyenera tifunisisa kumukondweresa. Tibvera malangizo yake mwanzeru ndipo tikhala okondwa kuyaphatisa basa.—Yak. 1:25. w23.06 tsa. 23 ndi. 14-15

Podiya pomwe tinkukwanisalini kuchita vose vomwe tinkufuna kwa Yahova, isepano tingatsimikizire kuti iye awona khama yathu yomwe tinkuchita. Ndipo vimwevi vikondweresa ntima wake. Ndawa chani tinkunena vimwevi? Ndawa mu nthawe ya Zekariya, Yahova adakumbira kuti mneneri wake akonze chisoti pakuphatisira basa ouro na siliva vomwe Ayuda omwe enze ku Babulo adatumiza ku Yerusalemu. (Zek. 6:11) ‘Chisoti cha ulemelero’ mwechi, chenze ninge ‘chikumbuso’ pa vopereka vomwe iwo ambachita mosaumira. (Zek. 6:14) Ni chibodzibodzimbo isepano tingakhale na chitsimikizo chakuti Yahova adzayebwelini khama yomwe tichachita yakumutumikira panthawe yoshupa. Mosakaika isepano tipitirize kulimbana na mabvuto ntsiku zomalizira zino. Ndipo vinthu vipitirize kuipiraipira. (2 Tim. 3:1, 13) Koma tichadekanalini kubvuma kuti nkhawa zisokoneze chikhulupiriro chathu. Kumbukirani mawu yomwe Yahova adauza wanthu wake mu nthawe ya Hagai kuti: ‘Inepano nilinamwe . . . Ayi kukhala na nkhawa.’ (Hag. 2:4, 5) Isepanombo tichadekanalini kukayikira kuti Yahova adzakhale kumbali yathu tikapitiriza kuchita vomwe tingakwanise pakumutumikira. w23.11 tsa. 19 ndi. 20-21

Yahova adakafuna, adakabvumalini kuti vophonya va mtumi Petulo vinembewe m’Baibolo. Koma ivo vidanembewa m’Baibolo na chakulinga chakuti tipfunzirepo kanthu. (2 Tim. 3:16, 17) Kupfunzira va munthu moyu yemwe wenze wofoka ndipo ambabva ninge timbverambo vitithandiza kudziwa kuti Yahova adikhiralini kuti timbachite vinthu mosaphonyesa. Chomwe Yahova ankufuna ni chakuti tileke kufoka nakuti tipitirize kuyesesa podiya kuti ndise wanthu tilibe ungwiro. Ndawa chani tifunika kulimbikira? Patsogolo pakuti tagonjesa chofoka chinango vingachitike kuti tingachibwerezere pomwe, olo viri tene tipitiriza kuyesesa kuti tileke kubwerezera pomwe. Tose isepano tiyankhula panango kuchita vinthu vomwe patsogolo pake tingadzilinge. Koma chodekana ni kuleka kufoka ndawa mwanjira mweyi Yahova adzatithandize kuyesesa nthawe zose kuchinja. (1 Pet. 5:10) Chifundo chomwe Yesu adaonesa kwa Petulo olo kuti ambaphonyesa vinthu, chingatithandize kupitiriza kutumikira Yahova. w23.09 tsa. 20-21 ndi. 2-3

Yesu adakamumukisa Lazaro, ninge momwe Malita adalewera mu lemba ya lero. Koma ambafuna kuchita chinthu chinango chodabwisa maninge ndipo adamupolomisa kuti ‘m’bale wako adzamuke.’ Ndipo Yesu adamuuza pomwe kuti: ‘Ine ndine kumuka na moyo.’ (Yoh. 11:23, 25) Nishuwadi ndawa iye adapasiwa mphanvu zomukisa wakufa. Ndipo Yesu wenze adamukisa kale wanthu awiri pa vochitika vosiyana, adamukisa mntsikana yemwe adandoti mwalireni na mulumbwana yemwe palibe kupita ntsiku. (Luka 7:11-15; 8:49-55) Koma pa nkhani ya Lazaro penze padapita ntsiku zinayi ndipo thupi yake yenze idayamba kuwola. Ko Yesu adakakwanisa kumumukisa? Mariya mulongosi munango wa Lazaro ankugumanambo na Yesu. Iye ankubwerezera vomwe m’bale wake Malita walewa kuti: ‘Ambuya sembe mwenze kuno, m’bale wangu adakamwaliralini’. (Yoh. 11:32) Padawona Mariya na anango ankulira, Yesu adakhudziwa maninge ndipo adakhala na ntsisi. Pakuwawiwa ndawa yowona kuti azishamwali wake akulira, iye adayambambo kulira. Yesu ambadziwa bwino momwe viwawira kuluza munthu yemwe umukonda! w23.04 tsa. 10-11 ndi. 12-13