NKHANI YOPFUNZIRA 19
Ko tingalimbise tani chikhulupiriro chathu pa polomisi ya dziko inyowani?
‘Ko [Yahova ] akalewa chinthu akwanirisalini?’—NUM. 23:19.
NYIMBO NA. 142 Tigwire Mwamphamvu Chiyembekezo Chathu
VOMWE TIPFUNZIREa
1-2. Ko tichadekana kuchita chani pakudikhira dziko inyowani?
NI VABWINO maninge kudziwa kuti Yahova wapolomisa kuti manjemanje dziko yoipa iyi idzamale ndipo tidzakhale mu dziko inyowani. (2 Pet. 3:13) Nishuwadi kuti tinkudziwalini nthawe chaiyo yomwe dziko inyowani idzabwere, koma tinachitsimikizo chakuti tidikhirelini nthawe itali.—Mat. 24:32-34, 36; Mac. 1:7.
2 Pakudikhira vimwevi, tose tichadekana kupitiriza kulimbisa chikhulupiriro chathu pa polomisi ya dziko inyowani. Viribe basa peno takhala mu choonadi kwa nthawe itali tani. Koma ndawa chani? Ndawa yakuti podiya chikhulupiriro chathu nicholimba, nthawe zinango chingafoke. Ni utowalini kuti mtumi Paulo adalewa kuti kusowa kwa chikhulupiriro ni ‘tchimo yomwe itiphata mosashupa.’ (Aheb. 12:1) Kuti chikhulupiriro chathu chileke kufoka, tichadekana kuganizira kawirikawiri va chitsimikizo chomwe tinacho chakuti dziko inyowani manjemanje ibweredi.—Aheb. 11:1.
3. Ko tione chani mu nkhani ino?
3 Mu nkhani ino, tione njira zitatu zomwe tingachite kuti tilimbise chikhulupiriro chathu pa polomisi yomwe Yahova adachita yadziko inyowani. Zomwe ni: (1) kuganizira va ntsembe ya Yesu, (2) kuganizira mphanvu za Yahova, na (3) kuphata basa za uzimu. Patsogolo pake tione momwe ntontholo womwe Yahova adapasa Habakuku uchalimbisira chikhulupiriro chathu ntsiku zino. Koma choyamba tione kuti tichadekana kukhala na chikhulupiriro cholimba pa polomisi ya dziko inyowani kuti tikwanise kulimbana na mabvuto ntsiku zino.
VINTHU VOMWE TICHADEKANA KUKHALA NA CHIKHULUPIRIRO CHOLIMBA
4. Ko tichadekana kukhala na chikhulupiriro cholimba kuti tisalule vinthu viponi?
4 Ntsiku zose tichadekana kusalula vochita vikuluvikulu panango ving’onoving’ono. Chinthu chomwe chingatithandize kusalula bwino vochita, ni kukhala na chikhulupiriro cholimba. Mwakulinganiza, ntsiku zose tichadekana kusalula bwino vochita pa nkhani ya azishamwali, vokondweresa, mapfunziro, ukwati, wana na basa. Vingakhale bwino kudzibvunza kuti: ‘Ko vosalula vangu vionesa kuti nitsimikiza kuti dziko yoipa iyi ni yakanthawe kang’onong’ono ndipo dziko inyowani ifike manjemanje?’ (Mat. 6:19, 20; Luka 12:16-21) Tikambalimbisa chikhulupiriro chathu chakuti dziko inyowani iripafupi maninge, tidzakwanise kusalula bwino vochita.
5-6. Ndawa chani tichadekana chikhulupiriro cholimba tikambagumana na mabvuto? Perekani fanizo.
5 Isepano tichadekana pomwe kukhala na chikhulupiriro cholimba kuti tikwanise kulimbana na mabvuto. Nthawe zinango tingagumane na mabvuto ninge kudzudziwa, matenda yokhalisa na mabvuto yanango yomwe yangatifokese. Pakuyamba tingaganize kuti tikwanise kulimbana nayo. Koma mabvuto mwaya yakatenga nthawe, tingafunike chikhulupiriro cholimba kuti tikwanise kupirira na kupitiriza kutumikira Yahova mokondwa.—Aro. 12:12; 1 Pet. 1:6, 7.
6 Tikakhala kuti tinkulimbana na mabvuto yakulu, tingayambe kukhala na maganizo ya kuti dziko inyowani yomwe Mulungu watipolomisa chipo ifikelini. Ko vimwevi vinkutanthauza kuti chikhulupiriro chathu ni chofoka? Neye. Ganizirani fanizo iyi: Pakati pa mainza, mungakhale na maganizo yakuti chisalo (chilimo) chifikelini. Koma chisalo chifika nthawe zose. Molingana na vimwevi, tikakhala kuti ndise okhumudwa maninge tingaganize kuti dziko inyowani chipo ifikelini. Koma chikhulupiriro chathu chikakhala cholimba, tidzakhale na chitsimikizo chakuti mapolomisi yomwe Mulungu wachita yadzakwanirisike. (Sal. 94:3, 14, 15; Aheb. 6:17-19) Tikakhala na chitsimikizo chimwechi, kutumikira Yahova kudzapitirize kukhala chinthu chodekana maninge pamoyo wathu.
7. Ko nimaganizo yophonyeka yaponi yomwe tichadekana kupewa?
7 Isepano tichadekana pomwe chikhulupiriro cholimba kuti tikwanise kulalikira. Kwa wanthu azinji omwe tiwalalikira ‘ntontholo wabwino’ wa dziko inyowani vioneka ninge maloto panango nthano basi. (Mat. 24:14; Ezek. 33:32) Koma isepano tichadekanalini kubvuma kutengerambo maganizo ya wanthu mwawa. Kuti tipewe vimwevo, tichadekana nthawe zose kulimbisa chikhulupiriro chathu. Naboni tione njira zitatu zomwe tingachitire vimwevi.
MBAGANIZIRANI VA NTSEMBE YA YESU
8-9. Ndawa chani kuganizira ntsembe ya Yesu kulimbisa chikhulupiriro chathu?
8 Njira ibodzi yolimbisira chikhulupiriro chathu, ni kuganizira ntsembe ya Yesu. Ntsembe ya Yesu ni chitsimikizo chakuti Mulungu adzakwanirise vose vomwe wapolomisa. Kuganizira kuti ndawa chani Yahova adatipasa ntsembe ya Yesu na vose vomwe adachita kuti vikwanisike, vilimbisa chikhulupiriro chathu pa polomisi yakuti Mulungu adzatipase moyo wosapera mu dziko inyowani idzakwanilisike. Ndawa chani tinkulewa teno?
9 Kuti atipase ntsembe ya Yesu, Yahova adatumiza mwana wake wokondewa munthu yemwe iye angamukonda maninge kuti adzabadwe ninge munthu wangwiro pano padziko yapasi. Pomwe Yesu wenze padziko pano adagumana na mabvuto yazinji. Patsogolo pake iye adafa impfa yowawa maninge. Shuwadi ntengo womwe Yahova adalipira ni wodula maninge! Mulungu wathu wachikondi adakabvumalini ne pang’ono kuti mwana wake adzabonere mpakana kufa so kuti tindokhale na moyo wabwino magole yang’onong’ono. (Yoh. 3:16; 1 Pet. 1:18, 19) Pakuti adalipira ntengo wodula maninge, Yehova adzachite vose kuti moyo wosapera mu dziko inyowani udzakhale chaiwo.
MBAGANIZIRANI VA MPHANVU ZA MULUNGU
10. Mobverana na Aefeso 3:20, ko Yahova anamphanvu zokwanisa kuchita chani?
10 Chinthu chachiwiri chomwe chingalimbise chikhulupiriro chathu, ni kuganizira va mphanvu za Yahova. Iye anamphanvu zokwanirisa vose vomwe adapolomisa. Nishuwadi kuti polomisi yamoyo wosapera mu dziko inyowani ingaoneke ninge niyosakwanisika mu maganizo ya wanthu. Koma nthawe zose Yahova apolomisa vinthu vomwe wanthu angakwaniselini kuvichita. Iye ni Wamphanvuzose. (Yobu 42:2; Maliko 10:27) Manje ko tichadekana kudikhira kuti Mulungu ambachite mapolomisi yomwe munthu aliyese angakwanise kuyakwanirisa?—Lewengani Aefeso 3:20.
11. Perekani chitsanzo cha mapolomisi yomwe Mulungu adakwanirisa yomwe m’maganizo ya wanthu yambaoneka ninge ni yosakwanisika. (Onani bokosi yakuti “Mapolomisi yanango yodabwisa yomwe yadakwanirisika.”)
11 Naboni tione mapolomisi yanango yomwe Yahova adachita na wanthu wake wakalekale yomwe yambaoneka ninge yosakwanisika kuyakwanirisa. Iye adapolomisa Abulahamu na Sara kuti podiya kuti enze okalamba adakadzakhala na mwana. (Gen. 17:15-17) Iye adauza pomwe Abulahamu kuti adzapereke dziko ya Kanani kwa mbewu yake. Polomisi mweyi imbaoneka ninge ingadzakwanirisikelini pakuti Aizirayeli womwe enze mbewu ya Abulahamu kwamagole yazinji ambabonera ninge akapolo ku Iguputo. Koma polomisi mweyi idakwanirisika. Magole yazinji patsogolo pake, Yahova adalewa kuti nkazi munango wokalamba dzina yake Elizabeti adzakhale na mwana. Iye adapolomisa pomwe Mariya yemwe wenze namwali kuti adzabereke mwana wa Mulungu, kukwanirisa polomisi yomwe Yahova adachita kwa magole yazinji mu munda wa Edeni!—Gen. 3:15.
12. Ko lemba ya Yoswa 23:14 na Yesaya 55:10, 11 yankuonesa tani va mphanvu za Yahova?
12 Tikambaganizira momwe Yahova wakwanirisira mapolomisi yomwe adachita, chikhulupiriro chathu chakuti iye abwerese dziko inyowani chikhala cholimba maninge. (Lewengani Yoswa 23:14; Yesaya 55:10, 11.) Tikachita teno tidzakhale wokonzeka kuthandiza anango kubvesa kuti dziko inyowani ni malotolini. Yahova walewa kuti kudzulu kunyowani na dziko inyowani. ‘Mawu mwaya ni yokhulupirika ndipo ni chaiyo.’—Chiv. 21:1, 5.
MBAKHALANI OTANGWANIKA NA BASA ZA UZIMU
MISONKHANO
Ko pakada basa iliyose ya uzimu ingalimbise tani chikhulupiriro chanu?(Onani ndime 13)
13. Ko misonkhano yangalimbise tani chikhulupiriro chathu? Fotokozani.
13 Chinthu chachitatu chomwe chilimbise chikhulupiriro chathu, ni kukhala wotangwanika pa basa za uzimu. Mwakulinganiza, ganizirani va misonkhano yathu. Mulongo munango dzina yake Ana, yemwe wakhala ankutumikira kwa magole yazinji mu mautumiki yanthawe zose yosiyanasiyana adati: “Misonkhano yachitisa chikhulupiriro changu kupitiriza kukhala cholimba ninge ndangula. Podiya kuti nileke kubvesa vomwe wokamba nkhani ankuyankhula panango ankupfunzisalini mpfundo inyowani. Nthawe zose panachinthu chinango chomwe chinithandiza kubvesa bwino Baibolo ndipo vimwevi vilimbisa chikhulupiriro changu.”b Kuingizira pamwapo, chikhulupiriro chathu chikhala cholimba maninge na ndemanga zomwe abale na alongo apereka pa misonkhano.—Aro. 1:11, 12; 10:17.
BASAYOLALIKIRA
Ko pakada basa iliyose ya uzimu ingalimbise tani chikhulupiriro chanu?(Onani ndime 14)
14. Ko basa yolalikira ilimbisa tani chikhulupiriro chathu?
14 Kuphata basa yolalikira kunamphanvu pomwe yolimbisa chikhulupiriro chathu. (Aheb. 10:23) Barbara, yemwe ankutumikira Yahova kwa magole yoposha 70, adalewa kuti: “Kwa ine kuphata basa yolalikira nthawe zose chakhala chithu cholimbisa chikhulupiriro changu. Nikambayankhula na wanthu anango va mapolomisi yodabwisa ya Yahova, chikhulupiriro changu chipitiriza kukhala cholimba maninge.”
PFUNZIRO YA PATEKHA
Ko pakada basa iliyose ya uzimu ingalimbise tani chikhulupiriro chanu?(Onani ndime 15)
15. Ko pfunziro ya patekha ilimbisa tani chikhulupiriro chathu? (Onani pomwe mafoto.)
15 Chinthu chinango chomwe chilimbisa chikhulupiriro chathu, ni pfunziro ya patekha. Mulongo munango dzina yake Susan, akonda kuikha ndandanda ya nthawe yopfunzira. Iye adalewa ivi: “Pasondo nikonzekera pfunziro ya Ntsanja ya ulonda ya sondo yamagwana yake. Pa chiposi na pachiwiri nikonzekera misonkhano ya nkati mwa sondo. Ndipo ntsiku zinango nichita pfunziro ya panekha.” Ndawa yopitiriza kutewedza ndandanda ya pfunziro, Susan akwanisa kulimbisa chikhulupiriro chake. Irene, mulongo yemwe ankutumikira kulikulu yathu ya padziko yose kwa magole yazinji adalewa kuti, kupfunzira va maulosi ya m’Baibolo kulimbisa chikhulupiriro chake. Iye adafotokoza kuti: “Ine niona kuti nivopasa chidwi momwe maulosi ya Yahova yakwanirisikira olo pavinthu ving’onoving’ono.”c
“YADZAKWANIRISIKE SHUWA”
16. Ko ndawa chani tinganene kuti mawu yomwe Yahova adauza Habakuku yaphatambo basa kwa ise ntsiku zino? (Aheberi 10:36, 37)
16 Atumiki anango wa Yahova ankudikhira mapeto ya dziko ino kwa magole yazinji. Nkuona kwa wanthu, vingaoneke ninge kuti mapolomisi ya Mulungu yankuchedwa kukwanirisika. Koma Yahova ankudziwa bwino momwe atumiki wake achabvera. Iye chaiye adamuuza mneneri Habakuku kuti: ‘Masomphenya mwaya yakudikhira nthawe yoikhiwiratu. Yankuthamangira kumapeto kwake. Ndipo ni yonamalini podiya yachedwe, pitiriza kuyadikhirira. Ndawa shuwa yadzakwanirisike. Iyo yadzachedwerini.’ (Hab. 2:3) Ko Yahova adayankhula mawu mwaya pakundofuna kulimbikisa Habakuku yekha? Ko panango mawu mwaya yaphatambo basa kwa ise ntsiku zino? Mouziriwa mtumi Paulo nayembo adaphatisambo basa mawu mwaya kwa Akhrisitu omwe ankundikhirira dziko inyowani. (Lewengani Aheberi 10:36, 37.) Shuwadi podiya kuti mu maganizo yathu polomisi mweyi tingaone ninge kuti inkuchedwa maninge kuti ikwanirisike, koma iyo ‘idzakwanirisike shuwa. Idzachedwelini.’
17. Ko mulongo munamgo ankuphatisa tani basa malangizo yomwe Yahova adapasa Habakuku?
17 Kwa magole yazinji abale akhala ankuphatisa basa malangizo ya Yahova yakupitiriza kudikhira. Mwakulinganiza, Louise yemwe adayamba kutumikira Yahova mu 1939, adalewa kuti: “Pa nthawe mweire nimbaganiza kuti Armagedo ibwere nikanati kumaliza mapfunziro yangu. Koma vimwevi vilibe kuchitika. Chinthu chomwe chikunithandiza kwa magole yazinji nikuwerenga nkhani za wanthu wa m’Baibolo omwe angadekana kudikhira kuti Yahova akwanirise mapolomisi yake ninge Nowa, Abulahamu, Yosefe na anango. Kupitiriza kudikhirira mwachidwi kwanithandiza inepano pabodzi na anango kukhala na chitsimikizo chakuti dziko inyowani iri pafupi.” Shuwadi abale omwe atumikira Yahova kwa nthawe itali ankubverana nayo mawu mwaya!
18. Ko kuganizira va chilengedwe kungalimbise tani chikhulupiriro chathu chakuti dziko inyowani idzabwere?
18 Ni shuwadi kuti dziko inyowani padakalibe. Koma mbaganizirani vitsanzo va vinthu vomwe viripo ninge nyenyezi, miti, vinyama na wanthu. Palibe anganene kuti vinthu vimwevi ni chaivolini, koma penze nthawe yomwe vinthu vimwevi kwenze kulibe. Ivo viripo ndawa yakuti Yahova adavilenga. (Gen. 1:1, 26, 27) Mulungu wathu wapolomisa kuti abwerese dziko inyowani ndipo iye adzakwanirise polomisi mweyi. Ndipo polomisi mweyi ikadzakwanirisika, wanthu adzakhale na moyo wangwiro mpaka kalekale. Pa nthawe yoikhiwiratu ya Yahova, dziko inyowani idzakhale chaiyo ninge vinthu vose vomwe viripo.—Yes. 65:17; Chiv. 21:3, 4.
19. Ko imwepo mungalimbise tani chikhulupiriro chanu?
19 Pomwe tinkudikhira dziko inyowani, tichadekana kuphatisa basa bwino mipata yose yomwe tinayo kuti tilimbise chikhulupiriro chathu. Nthawe zose timbakhale wokodwa na ntsembe ya Yesu. Mbaganizirani mphanvu za Yehova ndipo nthawe zose mumbakhale wotangwanika na basa za uzimu. Mwanjira mweyi mudzakhale ngulu ya wanthu omwe ‘mwachikhulupiriro na kuleza moyo ankutambira cholowa chawo.’—Aheb. 6:11, 12; Aro. 5:5.
NYIMBO NA. 139 Yerekezerani Kuti Muli M’dziko Latsopano
a Wanthu azinji ntsiku zino akhulupiriralini mapolomisi ya m’Baibolo yolewa va dziko inyowani. Kwaiwo viri ninge maloto panango vinzano. Isepano ndise wotsimikiza kuti mapolomisi yose ya Yahova yadzakwanirisike. Olo viriteno, isepano tifunika kuchita khama kupitiriza kulimbisa chikhulupiriro chathu. Ko tingachite tani vimwevi? Naboni towone mdairo wake munkhani ino.
b Madzina yanango yachinjiwa.
c Mungagumane nkhani zizinji mukangena pa “Proficias” mu Índice das Publicações da Torre de Vigia. Mwakulinganiza, onani nkhani ya Chichewa yakuti “Zimene Yehova Amalosera Zimakwaniritsidwa” mu Nsanja ya Olonda ya 1, Janeiro 2008.