NKHANI YOPFUNZIRA 46
NYIMBO NA. 49 Tizisangalatsa Mtima wa Yehova
Abale, ko munkuyesesa kuti mukhale ntumiki wothandiza?
“Kupasa kutichitisa kukhala okondwa maninge kuposha kutambira.”—MAC. 20:35.
CHOLINGA
Kulimbikisa abale obatizika kuti achite khama kuti ayenerere kukhala atumiki othandiza.
1. Ko ntumi Paulo ambawaona tani atumiki othandiza?
ATUMIKI othandiza athandiza maninge mumpingo. Ntumi Paulo ambalemekeza amuna okhulupirika mwawa. Chomwe chititsimikizira vimwevi, ni vomwe iye adanemba mu kalata yake yoyenda kwa Akhrisitu wa ku Filipi. Iye adapasa moni atumiki othandiza pabodzi na akulu.—Afil. 1:1.
2. Ko m’bale Luis adzibva tani ndawa yokhala ntumiki wothandiza?
2 Abale azinji obatizika wa misinkhu yosiyanasiyana akondwa maninge kuthandiza mumpingo ninge atumiki othandiza. Mwakulinganiza, Devan wenze na magole 18 pomwe adaikhiwa ninge ntumiki wothandiza. Pomwe m’bale munango dzina yake Luis adaikhiwa kukhala ntumiki wothandiza ana magole 50. Iye adanena kuti: “Kwa inepano ni mwayi ukulu maninge nikambathandizira mumpingo ninge ntumiki wothandiza makamaka nikambaganizira chikondi chomwe abale anionesa!” Atumiki othandiza azinji adzibvambo tene.
3. Ko tikambirane chani mu pfunziro ino?
3 Peno imwepo ndimwe m’bale wobatizika koma mukanati mwakhala ntumiki wothandiza, ko mungakhale na cholinga chimwechi? Ko nchani chomwe chingakulimbikiseni kuti muchite vimwevi? Ndipo ko Baibolo ilewa chani kuti muyenerere kutumikira ninge ntumiki wothandiza? Mu pfunziro mweyi tione midawiro ya mibvunzo mwaya. Koma chakuyamba naboni tione basa zomwe atumiki othandiza achita.
KO ATUMIKI OTHANDIZA APHATA BASA ZIPONI?
4. Ko atumiki othandiza aphata basa ziponi? (Onani pomwe foto.)
4 Atumiki othandiza anango anyang’anira gawo na mabukhu yomwe tiphatisa basa mu umboni ndipo anango athandiza pa kuchenesa na kukonza Nyumba za Ufumu. Iwo aikhiwa pomwe kukhala akalinde na kuikhiwa kuti anyang’anire vipangizo vokuzira mawu vomwe tiphatisa basa pa misonkhano. Basa zizinji zomwe atumiki othandiza aphata zifuna mphanvu. Kuposha vose, amwawa ni abale wauzimu omwe akonda Yahova ndipo achita vinthu mobverana na vomwe Baibolo ichapfunzisa ndipo iwo akonda maninge abale na alongo mumpingo. (Mat. 22:37-39) Ko m’bale wobatizika achadekana kuchita chani kuti ayenerere kutumikira ninge ntumiki wothandiza?
Atumiki othandiza atewedza Yesu pakudzipereka pakuthandiza anango (Onani ndime 4)
5. Ko nchani chomwe chingakuthandizeni kukwanirisa cholinga chanu chokhala ntumiki wothandiza?
5 Baibolo ifotokoza viyenereso vomwe m’bale achadekana kukhala navo kuti ayenerere kukhala ntumiki wothandiza. (1 Tim. 3:8-10, 12, 13) Tani imwepo kupfunzira va viyenereso vimwevi na kumbayesesa kuti mumbavichite pa moyo wanu. Vimwevi vidzakuthandizeni kuti mukwanirise cholinga chimwechi. Koma chakuyamba muchadekana kuganizira cholinga chaicho chomwe imwepo munkufunira kukhala ntumiki wothandiza.
NDAWA CHANI MUNKUFUNA KUKHALA NTUMIKI WOTHANDIZA?
6. Ko nchani chomwe chingakulimbikiseni kuti mumbathandize anango? (Mateyu 20:28; onani pomwe foto .)
6 Yesu Khrisitu ni chitsanzo chathu chabwino maninge, ndipo vose vomwe ambachita, ambalimbikisiwa na chikondi chomwe wenze nacho kwa Ababa wake na chikondi chomwe wenze nacho kwa wanthu. Chikondi chomwe Yesu wenze nacho chidamuthandiza kuti athandize wanthu anango na kuphata basa zonyozeka. (Werengani Mateyu 20:28; Yoh. 13:5, 14, 15) Peno vose vomwe imwepo muchita muvichita ndawa ya chikondi, Yahova adzakudaliseni ndipo adzakuthandizeni kukwanirisa cholinga chanu chokhala ntumiki wothandiza.—1 Akor. 16:14; 1 Pet. 5:5.
Pakusambika mapazi ya atumi, Yesu adawapfunzisa kuti achadekana kukhala odzichepesa na kumbatumikira anango m’malo mwakuti ambalemekezewe (Onani ndime 6)
7. Ndawa chani tichadekanalini kukhala odzikonda?
7 Kudziko uku wanthu akhumbira maninge wanthu omwe achita vinthu na maganizo yakuti wanthu anango awaone. Koma wanthu wa Yahova alilini tene. M’bale yemwe atumikira wanthu anango ndawa ya chikondi ninge Yesu, aphatisalini basa mphanvu pakufuna kulemekezewa ndipo adziwonalini kukhala wofunika maninge kuposha anango. Peno munthu wodzikonda waikhiwa kukhala ntumiki wothandiza, vingachitike kuti iye angalambe kuphata basa zinango zonyozeka zomwe ni zofunika pa kusamalira nkhosa za Mulungu. Panango iye angadzione kuti ni wapadzulu maninge mwakuti angaphatelini basa zimwezi. (Yoh. 10:12) Yahova adalisalini ne pang’ono wanthu omwe achita vinthu modzikuza panango ndawa ya kufuna kudzionesera kuti ni wapadzulu.—1 Akor. 10:24, 33; 13:4, 5.
8. Ko Yesu adapereka malangizo yaponi kwa atumi wake 12?
8 Pa nthawe inango, azishamwali anango wa Yesu adayesesa kuti atambire maudindo na maganizo yophonyeka. Onani vomwe vidachitika na atumi awiri wa Yesu omwe ni: Yakobo na Yohani. Iwo adakumbira Yesu kuti akakhale pa malo yapadzulu maninge mu Ufumu wa Mulungu. Yesu alibe kuwatembeja ndawa ya maganizo yawo mwaya yofuna kukhala wapadzulu maninge kuposha anango. M’malo mwavimwevi, iye adawauza opfunzira 12 wale kuti: “Aliyese yemwe ankufuna kuti akhale nkulu pa gulu yanu, afunika kukhala mtumiki wanu ndipo yemwe ankufuna kuti akhale woyambirira pa gulu yanu, afunika kukhala kapolo wa wose.” (Maliko 10:35-37, 43, 44) M’bale akambayesesa kuti akhale ntumiki wothandiza na cholinga chabwino chomwe ni kutumikira anango, iye akhala mphaso ya mpingo.—1 Ates. 2:8.
KO MUNGAINGIZIRE TANI CHOLINGA CHOFUNA KUKHALA NTUMIKI WOTHANDIZA?
9. Ko mungaingizire tani chifuno chanu chofuna kutumikira anango?
9 Mosakaika imwepo mukonda Yahova ndipo munkufuna kutumikira anango. Olo nteno, panango mulibe cholinga chokhala ntumiki wothandiza ndawa yakuti munkudziwa kuti mudzakhale na basa zizinji maninge. Manje mungaingizire tani cholinga chanu chofuna kutumikira anango? Chinthu chibodzi chomwe tingachite ni kuganizira momwe tikhalira okondwa tikambathandiza abale na alongo. Yesu adanena kuti: “Kupasa kutichitisa kukhala okondwa maninge kuposha kutambira.” (Mac. 20:35) Yesu ni chitsanzo chikulu maninge pa nkhani mweyi. Iye ambakhala wokondwa ndawa yakuti ambatumikira anango ndipo ni vimwevi vomwe vidzakuchitikirenimbo imwepo.
10. Ko nchani chomwe chinkuonesa kuti Yesu ambakondwa ndawa ya kutumikira anango? (Maliko 6:31-34)
10 Onani momwe Yesu ambakhalira wokondwa ndawa ya kutumikira anango. (Werengani Maliko 6:31-34.) Pa nthawe inango, Yesu na opfunzira wake enze adaneta maninge. Iwo ambayenda ku malo komwe kwenze kulibe wanthu kuti akapumule. Koma wanthu adafika kumuko iwo akanati wafika ndipo ambadikhirira Yesu. Iwo ambafuna kupfunzisiwa na Yesu. Iye adakawauza kuti neye. Vinkuonekeratu kuti Yesu na atumi “enzebe nthawe yakuti apumule panango kudya chakudya.” Ndipo pamwapa panango adakawapfunzisako vinthu ving’onong’ono basi nkuwauza kuti ambayende. Koma Yesu ambakonda wanthu. Ndawa ya vimwevi iye “adayamba kuwapfunzisa vinthu vizinji” ndipo adapitiriza “kuwapfunzisa mpakana maulo.” (Maliko 6:35) Yesu adachita vimwevi osati ndawa yokakamizika. Koma ndawa yakuti “iye ambabvera ntsisi wanthu mwawale.” Iye ambafuna kuwapfunzisa ndawa yakuti ambawakonda ndipo kuchita vimwevi kumbachitisa Yesu kukhala wokondwa.
11. Ko Yesu adachita pomwe chani kuti athandize gulu ya wanthu wale? (Onani pomwe foto.)
11 Kuingizira pa kuwapfunzisa vinthu vizinji, Yesu adatumikira wanthu mwawale mwanjira inango. Iye adawapasa wanthu mwawale vosowa vawo vakuthupi. Pa chochitika chimwechi, iye adawandisa nkate na ntsomba modabwisa maninge ndipo adaphatisa basa atumi wake kuti agawire wanthu chakudya. (Maliko 6:41) Mwanjira mweyi, Yesu adapfunzisa opfunzira wake kutumikira anango. Iye adaonesa pomwe kuti ni vodekana kuthandiza wanthu anango mwakuthupi ndipo ni vimweviretu vomwe atumiki othandiza achadekana kuchita. Ganizirani momwe atumi adakhalira okondwa pakuthandiza Yesu kugawa chakudya ndipo “wose adadya mpakana kukhuta.” (Maliko 6:42) Kenzelini kamwaka kokha pomwe Yesu adaikha vofuna va wanthu anango pa malo yoyamba. Iye adachita vimwevi kwa moyo wake wose pomwe wenze pano pa dziko yapasi. (Mat. 4:23; 8:16) Kupfunzisa anango na kuphata basa zonyozeka pa kuwathandiza, vimbamukondweresa maninge Yesu. Mosakaika imwembo mudzakondwe maninge mukambaikha vofuna va wanthu anango pa malo yoyamba na kuyesesa kuti muyenerere kukhala ntumiki wothandiza.
Chikondi chanu kwa Yahova na chifuno chofuna kutumikira, vidzakulimbikiseni kuchita vose vomwe mungakwanise kuti muthandize anango mumpingo (Onani ndime 11)a
12. Ndawa chani palibe yemwe anachifukwa chonenera kuti ni wosafunika mumpingo?
12 Wanthu anango aganiza kuti alibe luso yapadera yomwe angaiphatisire basa mumpingo. Peno imwepo mudzibva tene, ayi kukhumudwa. Mosakaika, imwepo mu na makhalidwe yomwe yangakhale yothandiza kuti mumbathandize abale. Tani kuwerenga mawu ya Paulo yomwe yagumanika pa lemba ya 1 Akorinto 12:12-30 na kupempherera vimwevi. Pa lemba mweyi, Paulo adafotokoza mobveka bwino kuti, ntumiki aliyese wa Yahova kuphatanidzapo imwepo ni wodekana maninge na wofunika mumpingo. Peno munkuona kuti manjeuno munkukwanirisalini viyenereso vakuti mukhale ntumiki wothandiza, ayi kufoka. Yesesani kuchita vomwe mungakwanise pa kutumikira Yahova na kuthandiza anango. Ndipo mungakhale otsimikiza kuti akulu adzakuganizireni ndipo adzakupaseni basa zinango zomwe mungakwanise kuzichita.—Aro. 12:4-8.
13. Ko chochitisa chidwi ni chani na viyenereso vomwe atumiki othandiza achadekana kukhala navo?
13 Onani chifukwa chinango chomwe chingakuchitiseni kuti muyesese kukhala ntumiki wothandiza. Viyenereso vizinji vomwe imwepo muchadekana kukhala navo kuti muyenerere kukhala ntumiki wothandiza ni vomwe Mkhrisitu aliyese achadekana kukhala navo. Mwakulinganiza, Mkhrisitu aliyese achadekana kulimbisa ushamwali wake na Yahova, nkukhala wokonzeka kutumikira anango mokondwa na kukhala chitsanzo chabwino pa makhalidwe yake. Ndipomwapa, vingachitike kuti munayo kale makhalidwe yose yodekana kuti muyenerere kukhala ntumiki wothandiza. Ko ni viyenereso viponi vapadera vomwe m’bale yemwe ankufuna kukhala ntumiki wothandiza achadekana kukhala navo?
VOMWE MUNGACHITE KUTI MUKHALE NTUMIKI WOTHANDIZA
14. Ko “kukhala wanthu omwe alibe masenzeka” kutanthauza chani? (1 Timoteyo 3:8-10, 12)
14 Naboni tipfunzire viyenereso vinango vomwe vigumanika pa lemba ya 1 Timoteyo 3:8-10, 12. (Werengani.) Atumiki othandiza achadekana “kukhala wanthu omwe alibe masenzeka.” Mawu mwaya yangatsumbudzuliriwe pomwe kuti achadekana “kulemekezewa na anango,” “kukhala wothembeka” panango kuti “ambachite vinthu munjira yomwe wanthu alemekeza.” Vimwevi vinkutanthauzalini kuti mungachitelini vinthu vosekesa panango kukondwa. (Mla. 3:1, 4) Nkhani ni yakuti muchadekanalini kukhala munthu wa masenzeka pa maudindo yanu. Imwepo mukakhala na mbiri yakuti muchita khama ndipo ndimwe wothembeka, wanthu ose mumpingo adzakulemekezeni.
15. Ko mawu yakuti “omwe anenalini chinthu chibodzi munjira ziwiri” na yakuti “wosakonda kugumana phindu munjira ilibe chilungamo,” yatanthauza chani?
15 “Omwe anenalini chinthu chibodzi munjira ziwiri.” Vimwevi vinkutanthauza kuti imwepo ndimwe okoma moyo, wothembeka ndipo nthawe zose muyankhula chaivo. Imwepo musunga mawu yanu ndipo mupusisalini wanthu. (Miy. 3:32) “Wosakonda kugumana phindu munjira ilibe chilungamo.” Vitanthauza kuti ndimwe owona ntima kubasa na momwe muyiphatisira basa kobiri. Imwepo mujereralini anzanu wa mumpingo kuti mugumane kobiri.
16. (a) Ko “kusamwa maninge vinyu,” kutanthauza chani? (b) Ko “kukhala na chikumbuntima chochena,” kutanthauza chani?
16 “Omwe akumwalini vinyo maninge.” Vitanthauza kuti imwepo mumwalini mowa mopitirira malire nakuti mudziwikalini kuti ndimwe chidakwa. Kukhala na “chikumbuntima chochena” kutanthauza kuti mulemekeza maganizo ya Yahova pa nkhani ya chabwino na choipa. Ni shuwadi kuti ndimwelini wa ungwiro koma muli pa ushamwali wabwino na Yahova womwe ukuchitisani kuti mumbakhale na ntendere wa muntima.
17. Ko mawu yakuti “ayambe ayesewa peno ni oyenerera,” yatanthauza chani? (1 Timoteyo 3:10; onani pomwe foto.)
17 “Ayambe ayesewa peno ni oyenerera.” Vitanthauza kuti akulu adaona kuti musamalira bwino maudindo yanu ndipo angakuthembeni. Ndipomwapa, akulu akakukumbirani kuti muphate basa inango, tewedzani malangizo yawo na malangizo yomwe tichatambira ya gulu yathu. Yesesani kudziwa vose vomwe vinkufunika pa basa yanu na nthawe yomwe muchadekana kumaliza. Mukambasamalira bwinobwino basa zomwe mwapasiwa, abale ose mumpingo adzaone kuti ndimwe wothembeka ndipo adzaone pomwe kuti munkukula mwauzimu. Akulu, ayi kusiya kutherena abale omwe adabatizika kale. (Werengani 1 Timoteyo 3:10.) Ko mumpingo mwanu mu na abale obatizika wa magole 13, 14 panango akanati wakwanisa magole mwaya? Ko iwo achita pfunziro ya paokha na kukonzekera bwino misonkhano? Ko apereka ndemanga pa misonkhano ndipo agumanika mokhazikika mu umboni? Peno m’dawiro wa mibvunzo mwaya ni wakuti inde, wapaseni basa zomwe iwo angakwanise kuziphata podiya kuti anamagole yang’onong’ono. Mwanjira mweyi alumbwana mwawa “adzayesewe peno ni oyenerera.” Pomwe adzakwanise magole 17 panango 18 panango angadzaikhiwe kukhala atumiki othandiza.
Akulu apereka basa kwa abale obatizika, mwanjira mweyi awayesa kuti aone peno ni “oyenerera” (Onani ndime 17)
18. Ko mawu yakuti “akhale alibe chifukwa chowanenera voipa,” yatanthauza chani?
18 “Akhale alibe chifukwa chowanenera voipa.” Vitanthauza kuti palibe yemwe angakhale na chifukwa chobveka chokunenerani kuti muchita vinthu voipa. Ni shuwadi kuti nthawe zinango anango angakunenereni vinthu vabodza. Vimwevi vidachitikirambo Yesu ndipo iye adanena kuti vimwevi vidzachitikirembo ateweri wake. (Yoh. 15:20) Koma imwepo mukakhala na mbiri yabwino ninge Yesu, mudzakhale na mbiri yabwino kwa abale.—Mat. 11:19.
19. Ko kukhala “mwamuna wa nkazi mbodzi,” kutanthauza chani?
19 “Amuna wa nkazi m’bodzi.” Vitanthauza kuti imwepo muchadekana kukhala na maganizo ya Yahova pa nkhani ya ukwati. Panango kuti kulowolana kwa mwamuna na nkazi. (Mat. 19:3-9) Mkhrisitu achadekanalini kuchita chigololo. (Aheb. 13:4) Kuingizira pamwapa, imwepo muchadekana kukhala wokhulupirika kwa nkazi wanu ndipo muchadekanalini kutengeka na akazi anango.—Yobu 31:1.
20. Ko ni paponi pomwe tinganene kuti mwamuna “asamalira bwino banja yake”?
20 “Wonyang’anira bwino wana wawo na mabanja yawo.” Peno ndimwe msolo wa banja, muchadekana kusamalira bwino banja yanu. Mumbachite pfunziro ya banja mokhazikika, mumbayesese kuchita vomwe mungakwanise kuti mumbayende mu umboni pabodzi na nkazi wanu na wana wanu. Thandizani wana wanu kuti akhale pa ushamwali wolimba na Yahova. (Aef. 6:4) Mwamuna yemwe akwanisa kusamalira bwino banja yake aonesa kuti angakwanise kusamalira mpingo.—Linganizani na 1 Timoteyo 3:5.
21. Ko mungachite chani peno mukanati kuikhiwa kukhala ntumiki wothandiza?
21 Peno imwepo ndimwelini ntumiki wothandiza, ipfunzireni mosamala nkhani ino ndipo ipempherereni nkhani mweyi. Pfunzirani pomwe mosamala viyenereso va m’Baibolo va atumiki othandiza ndipo yesesani kuti muvikwanirise. Ganizirani va chikondi chanu kwa Yahova na abale na alongo mumpingo. Vimwevi vidzakuthandizeni kukhala na chifuno cha kuwatumikira. (1 Pet. 4:8, 10) Mukadzayamba kutumikira ninge ntumiki wothandiza, mudzakondwe maninge ndawa ya kutumikira abale na alongo mumpingo. Ndipo tsimikizirani kuti Yahova adzadalise khama yanu yofuna kukhala ntumiki wothandiza!—Afil. 2:13.
NYIMBO NA. 17 “Ndikufuna”
a MAWU YOFOTOKOZERA MAFOTO: Kumanzere, Yesu ankutumikira opfunzira wake modzichepesa. Kumakulu, ntumiki wothandiza ankuthandiza m’bale wachikulire wa mumpingo mwake.