Volinga viri ninge pulani ya nyumba, ndipo vichada khama kuti muvikwanirise
Alumbwana Na Atsikana
12 Kukhala Na Volinga
VOMWE VICHITIKA
Volinga ni vinthu vomwe munkufuna kuti mudzavikwanirise. Muchadekana kukonzekera bwino, kuchinja vinthu vinango na kuchita khama kuti muvikwanirise.
Volinga vichakhala vosiyanasiyana. Vinango vitenga nthawe itali vinango neye. Vinango vitenga minyezi panango magole. Nthawe zizinji tingafunike kuyamba takwanirisa volinga ving’ono-ving’ono kuti tidzakwanirise volinga vikuluvikulu.
NDAWA YAKE NIVODEKANA
Mukakwanirisa volinga vanu muchakhala wolimba moyo. Vichathandiza pomwe kuti anango ambakuthembeni ndipo mukhala wokondwa.
Kulimba moyo: Mukakwanirisa volinga ving’ono-ving’ono, mungakwanise pomwe kukwanirisa volinga vikuluvikulu. Ndipo mukagumana na mabvuto mungabwererelini m’mambuyo. Mwakulinganiza, mungabvumelini kuti anzanu akuchichimizeni kuchita vophonyeka.
Anzanu: Wanthu azinji achabverana na wanthu womwe achakhala na volinga ndipo achavikwanirisa. Ndipo mukambathandizana na munthu munango pakukwanirisa chakulinga chanu, muchayamba kubverana naye maninge.
Kukhala wokondwa: Volinga vomwe mwenze navo vikakwanisika mukhala wokondwa maninge.
Christopher adati: “Nichakonda kudziikhira volinga vati nikwanirise. Vimwevi vinithandiza kuti nisambasowe chochita. Ndipo ukakwanirisa cholinga chako uchabva bwino maninge. Muntima uchandoti: ‘Vanimbafuna vire vachitika manje.’”
MPFUNDO YA M’BAIBOLO: ‘Wonyang’ana mphepo adzabzalelini, ndipo wonyang’ana mitambo adzakololelini.’—Mlaliki 11:4.
VOMWE MUNGACHITE
Phatisirani basa njira izi kuti mukwanise volinga vanu.
Volinga. Nembani vamuchada kukwanirisa. Patsogolo pake salulani volinga vomwe mukufuna kukwanirisa, chakuyamba, chachiwiri, chachitatu na chomaliza.
Konzani pulani. Pa cholinga chilichose chitani ivi:
Nembani nthawe yomwe mukufuna kudzachikwanirisa.
Nembani njira zamungatewedze pakukwanirisa.
Konzekerani mabvuto yamungadzagumane nayo na vomwe mungadzachite.
Yambani mwakankulumize. Ayi kudikhira kuti vose vikhale bwino ndipo pomwe mudzayambe. Dzibvunzeni kuti, ‘ko ni chinthu chiponi chaningayambirire kuchita?’ Mukagumana poyambira yambirantuni. Mumbanembe momwe vose vinkufambira na njira zamukutewedza.
MPFUNDO YA M’BAIBOLO: ‘Volinga va munthu wakhama vimuphindulira.’—Miyambo 21:5.