NKHANI YOPFUNZIRA 18
Momwe mungakhalire na volinga vauzimu na kuvikwanirisa
‘Ganizira vimwevi mwamphanvu, dzipereke pavinthu vimwevi kuti wanthu wose awone kuti ukupita patsogolo.’—1 TIM. 4:15.
NYIMBO NA. 84 Tichadzipereka
VOMWE TIPFUNZIREa
1. Ko tingadziyikhire volinga vauzimu viponi?
NDAWA yakuti ndise Akhrisitu chaiwo, timukonda maninge Yahova. Ndipomwapa tikufuna kuchita vose vatingakwanise pakumutumikira. Koma kuti tikwanise kuchita vose vatingakwanise pakutumikira Yahova, tichadekana kukhala na volinga vauzimu ninge kukulisa makhalidwe yachikhrisitu, kupfunzira maluso yosiyanasiyana na kuwona njira zomwe tingathandizire azinzathu.b
2. Ndawa chani tichadekana kudziikhira volinga vauzimu na kuyesesa kuvikwanirisa?
2 Ndawa chani tichadekana kuyesesa kukula mwauzimu? Chifukwa chikulu ni chakuti tifuna kukondweresa Ababa wathu wakudzulu womwe achatikonda maninge. Yahova akondwa akambawona kuti tinkuphatisa basa maluso yathu pakumutumikira. Kuthimizira pamwapa, tifuna kukula mwauzimu pakufuna kuti timbathandize abale na alongo wathu. (1 Ates. 4:9, 10) Viribe basa kuti takhala nthawe itali tani muchonadi, tose tingachite bwino kuyesesa kuti tikule mwauzimu. Naboni manje tiwone momwe tingachitire vimwevi.
3. Mobverana na 1 Timoteyo 4:12-16, ko mtumi Paulo adalimbikisa Timoteyo kuchita chani?
3 Panthawe yomwe mtumi Paulo anganembera Timoteyo kalata yoyamba, Timoteyo wenze kale nkulu wodziwa vizinji. Podiya venze teno, Paulo adamulimbikisa kuti ayesese kukula mwauzimu. (Lewengani 1 Timoteyo 4:12-16.) Mukawonesesa bwinobwino mawu ya Paulo mwaya, mungawone kuti Paulo angafuna kuti Timoteyo apite patsogolo pa mbali ziwiri. Yakuyamba, angadekana kukulisa makhalidwe yachikhrisitu ninge chikondi, chikhulupiriro na kukhala wochena. Yachiwiri, angadekana kukulisa maluso yanango ninge kulewenga bwino pagulu, kutsuula na kupfunzisa. Tikambirane chitsanzo cha Timoteyo kuti tiwone volinga vauzimu vatingakhale navo na kuwona momwe vingatithandizire kukhala atumiki wabwino wa Yahova. Ndipo tiwone pomwe mbali zinango za momwe tingathimizirire utumiki wathu.
KULISANI MAKHALIDWE YACHIKHRISITU
4. Mobverana na Afilipi 2:19-22, nchani chidathandiza Timoteyo kuti aphatisiriwe basa na Yahova?
4 Ko nchani chidathandiza Timoteyo kuti aphatisiriwe basa mwakukwana na Yahova? Vomwe vidamuthandiza ni makhalidwe yake yachikhrisitu. (Lewengani Afilipi 2:19-22.) Vomwe Paulo adafotokoza vingawoneseratu kuti Timoteyo wenze wodzichepesa, wokhulupirika, wodzipereka ndipo angawonalini kuti payekha angakwanise kuchita vinthu mosathandiziwako na anango. Iye angakonda abale na alongo ndipo wenze wokonzeka kuwathandiza, ndipo vimwevi vidachitisa kuti Paulo ambamukonde maninge Timoteyo ndipo alibe kuzeza kumupasa utumiki woshupa. (1 Akor. 4:17) Ntsiku zinombo, Yahova angatikonde ndipo angatiphatisire basa mwakukwana pa mpingu, peno tinkuyesesa kukulisa makhalidwe yomwe iye achakonda.—Sal. 25:9; 138:6.
Onani khalidwe yachikhrisitu yomwe munkufuna kumbaiwonesa maninge (Onani ndime 5-6)
5. a) Ko mungachite tani kuti mudziwe khalidwe yomwe mungafunikane kukulisa? b) Ninge mwayinkuwonesera foto, ko mulongo wachitsikana ankuyesesa tani kuti akwanirise chakulinga chake chakuti ambawonese chifundo maninge wanthu anango?
5 Salulani cholinga chomwe mukufuna kuchikwanirisa. Pempherani ndipo ganizirani khalidwe yomwe mukufuna kuyesesa kukhala nayo. Mungasalule khalidwe yomwe mungafune kumenyera nkhondo kuti mukhale nayo. Mwakulinganiza mungadziyikhire cholinga chofuna kukulisa khalidwe ya chifundo na kufuna kuti mumbakhale wofunisisa kuthandiza abale na alongo wanu. Mungawone pomwe vamungachite kuti mukulise khalidwe yokhazikisa ntendere na kukhululukira anzanu na moyo wose. Mungachite bwino kubvunza shamwali wanu kuti akuuzeni mosabisa mbali zomwe mungafunikane kukonza.—Miy. 27:6.
6. Ko mungakulise tani khalidwe yomwe mukufuna kukhala nayo?
6 Yesesani kukwanirisa cholinga chanu. Ko mungachite tani vimwevi? Njira ibodzi ni kupfunzira mwakhama khalidwe yomwe mukufuna kukhala nayo. Tilinganize kuti chakulinga chanu nchakuti mumbakhululukire anango na moyo wose. Kuti mukwanirise chakulinga chimwechi, mungafunikane kuwerenga vitsanzo va wanthu wa m’Baibolo womwe adakhululukira anzawo na moyo wose na anango womwe alibe. Mungaganizire pomwe chitsanzo cha Yesu Khrisitu yemwe wenze wokonzeka kukhululukira anango. (Luka 7:47, 48) Yesu angayebwa vomwe anango amuphonyera, ndipo angayesesa kuwona makhalidwe yawo yabwino. Koma Afalisi wamunthawe ya Yesu alibe kuchitako vimwevi. Iwo angawona kuti ‘wanthu anango alibe na basa.’ (Luka 18:9) Mukamaliza kuganizira vitsanzo vimwevi dzibvunzeni kuti: ‘Ko niwawona tani anzangu? Ko iwo anamakhalidwe yabwino yaponi yomwe ningafunikanembo kuyatewedzera?’ Peno imwepo vikushupani kukhululukira anzanu, yesani kuchita kunemba makhalidwe yabwino yomwe munthu mouyo anayo. Patsogolo pake dzibvunzeni kuti: ‘Ko Yesu ankumuwona tani munthu moyu? Adakati ndiye sembe wamukhululukira?’ Kupfunzira Baibolo mwanjira mweyi kungatithandize kuchinja kaganizidwe kathu. Tingafunikane kuchita khama maninge kuti tikhululukire munthu yemwe watiphonyera. Koma tikazolowera kumbakhulukira azinzathu nthawe zose, tidzakhale wokonzeka kumukhululukira munzathu akaphonyesa.
PFUNZIRANI MALUSO YOMWE MUNGATHANDIZE NAYO ANZANU
Mumbadzipereke kupfunzira momwe mungakonzere vodzongeka pa Nyumba ya Ufumu yanu (Onani ndime 7)e
7. Mobverana na Miyambo 22:29, ko Yahova ankuphatisa tani basa wanthu wa buya ntsiku zino?
7 Cholinga chinango chomwe tingakhale nacho ni kupfunzira luso yomwe tikufuna kukhala nayo. Ndoganizani kuwanda kwa abale womwe ankufunikana kuti amange Mabeteli, nyumba zochitira misonkhano ikuluikulu na Nyumba za Ufumu. Azinji adapfunzira luso yomanga ndawa yophata basa pabodzi na abale womwe achayidziwa bwino basa mweyi. Ninge mwayinkuwonesera foto, abale angapfunzire kukhala na luso yomwe ingawathandize kukonzakonza malo yochitira misonkhano ikuluikulu na Nyumba za Ufumu. Mwanjira mweyi Yahova Mulungu yemwe ni ‘Mpfumu yomwe idzakhalepo mpaka kalekale’ na Yesu Khrisitu yemwe ni ‘Mpfumu . . . ya mafumu,’ ankukwanirisa vinthu vodabwisa maninge pophatisa basa wanthu mwawa. (1 Tim. 1:17; 6:15; lewengani Miyambo 22:29.) Tikufuna kuyesesa mwakhama kuti tiphatise basa maluso yathu kuti titamande Yahova osati kufuna kuti wanthu atiwone.—Yoh. 8:54.
8. Nchani chamungachite kuti mudziwe luso yamungakhale nayo?
8 Salulani luso yomwe munkufuna kukhala nayo. Ko imwepo mukufuna kukhala na luso iponi? Bvunzani akulu panango wonyang’anira dera kuti akuuzeni kuti ni luso iponi yomwe mungakhale nayo. Peno iwo angakuuzeni kuti mufunika kuyesesa kuti mumbalewenge na kupfunzisa mwabuya, auzeni kuti amasuke kuti akufotokozereni vomwe mungachite kuti mukwanisedi. Akakuuzani, yesesani kuti mukhale nayo buya mweyo. Ko nchani chamungachite?
9. Nchani chamungachite kuti mukwanirise chakulinga chanu chakuti mukhale wabuya?
9 Chitani khama kuti mukwanirise chakulinga chanu. Panango imwepo chakulinga chanu nchakuti mumbakwanise kupfunzisa mwabuya. Peno nteno, mumbapfunzire mwakusamala kabrosha kakuti: Chitani khama pa kulewenga na kupfunzisa mwabuya. Mukapasiwa mbali pamisonkhano ya pakati pa sondo, mungafunikane kukumbira m’bale wabuya kuti akubvesereni kudakali na nthawe kuti akuuzeni mbali zomwe mungafunikane kukonza. Mumbakonzekere mbali zomwe mwapasiya kumisonkhano na kumbabvunzako anzanu kuti iwo awone kuti mudziwonalini kuti mungakwanise kuchita pamwekha vinthu mosathandiziwako na anzanu.—Miy. 21:5; 2 Akor. 8:22.
10. Fotokozani chitsanzo chowonesa momwe tingakulisire buya.
10 Manje tani peno mukufuna kukhala wabuya pambali yomwe ni yoshupa kwa imwepo? Peno nteno, ayi kubwerera m’mambuyo! M’bale munango yemwe dzina yake ni Garry vimbamushupa kuti ambawerenge bwino. Iye ankukumbukira kuti ntsiku inango ambanjenjemera kuti awerenge pamisonkhano ya mpingu. Koma iye alibe kubwerera m’mambuyo. Iye adafotokoza kuti vomwe abale adamupfunzisa na vomwe adalewenga m’mabukhu yathu, vidamuthandiza maninge kuti ambakwanise kukamba bwino nkhani pa misonkhano ya mpingu, misonkhano yadera na yachigawo!
11. Ninga mwavidakhalira na Timoteyo, ko isembo nchani chingatithandize kuti tichite vizinji pakutumikira Yahova?
11 Ko Timoteyo adadzakhaladi munthu wodziwa kupfunzisa? Baibolo ifotokozalini. Koma ni vosachita kubvunza kuti Timoteyo angasamalira bwino maudindo yake ndawa yotewedza malangizo ya Paulo. (2 Tim. 3:10) Ninga mwavidakhalira na Timoteyo, isembo tikayesesa kukulisa buya yathu tidzakwanise kuchita vizinji pakutumikira Yahova.
ONANI NJIRA ZOMWE MUNGATHANDIZIRE ANANGO
12. Ko imwepo mudaphindula tani ndawa yothandiziwa na anango?
12 Tose tiphindula maninge tikambathandiza anzathu. Mwakulinganiza, peno tadwala tili kushipitali, titembeja maninge peno akulu woyankhulana na wakushipitali abwera kudzatizungira. Peno vinthu vinkutifambiralini bwino pamoyo wathu, titembeja maninge peno akulu abwera kudzatiyikhira nzeru, kudzatibvesera na kutilimbikisa. Peno vinkutishupa kupfunzira Baibolo, tikondwa maninge peno mpainiya wabuya wabwera kudzatiwonesa mbali zomwe tingachite kuti timbakwanise kupfunzira. Ndipo abale na alongo mwawa achakhala wokondwa pakutithandiza. Isembo tikambayesesa kuthandiza anango, tichakhala wokondwa maninge. Yesu adalewa kuti: ‘Kupasa kuchabweresa chimwemwe chikulu kuposha kutambira.’ (Mac. 20:35) Peno chakulinga chanu ni chakuti mukhale wofunisisa kumbathandiza anango, nchani chamungachite kuti mumbawathandizedi?
13. Ko tingachite tani kuti tikwanirisedi cholinga chomwe tidadziyikhira?
13 Dziyikhireni chakulinga chomwe mungachikwanirisedi. Mwakulinganiza, panango imwepo mungalewe kuti: ‘Nikufuna kuti nimbaphatisiriwe basa maninge mumpingu wathu.’ Koma panango vingakushupeni kudziwa kuti nilini pati mudzayambe kuphatisiriwa basa. Ndipomwapa mungachite bwino kudziyikhira chakulinga chomwe mungachikwanirisedi ndipo mungachite bwino kunemba chakulinga chanu na momwe mudzachikwanirisire.
14. Ndawa chani tichadekana kukhala wachikatikati tikambadziikhira volinga?
14 Koma timbakhale wachikatikati tikambadziikhira volinga. Ndawa chani? Ndawa yakuti pamoyo wathu pangachitike vinthu vomwe tingakwaniselini kuvikangisa. Mwakuliganiza, mtumi Paulo adathandiza kukhazikisa mipingu inyowani ku Tesalonika. Ndipo ni vosachita kubvunza kuti iye ambafuna kupitiriza kukhala kumoku kuti awathandize mokwana Akhrisitu mwawa. Koma wanthu wotsutsa adamuchichimiza Paulo kuti achoke kumoku. (Mac. 17:1-5, 10) Adakati Paulo adakhalilira kumoku adakaikha moyo wa abale wake pangozi. Koma Paulo alibe kulekeratu kuwathandiza abale mwawa. M’malo mwake adachita vinthu mobverana na momwe vachinjira pamoyo wake. Patsogolo pake adadzatumiza Timoteyo kuti akathandize abale wake ku Tesalonika. (1 Ates. 3:1-3) Ndoganizani momwe abale waku Tesalonika adakondwera kuwona kuti Timoteyo wadzipereka kuti adzawathandize!
15. Ko kuchinja kwa vinthu pamoyo kungatikangise tani kukwanirisa volinga vathu? Perekani chitsanzo.
15 Tingapfunzire vizinji kuchokera pa vomwe vidachitikira Paulo ku Tesalonika. Panango tingadziikhire cholinga bwinobwino, koma vinthu nkuchinja pamoyo wathu mpakana ne kukwanisa kuchikwanirisa. (Mla. 9:11) Vimwevi vikakuchitikirani mungachite bwino kudziikhira cholinga chinango chomwe mungakwanise kuchikwanirisa. Vimwevi ndivo vomwe vidachitikira Ted na Hiedi omwe ali pabanja. Ndawa ya kudwaladwala kwawo, angadekana kusiya utumiki wa pa Beteli. Koma pakuti iwo achakonda maninge Yahova, adathimizira utumiki wawo munjira zinango. Iwo adayamba na kuchita upainiya wokhazikika, ndipo nkuyeda kwa nthawe adaikhiwa kukhala apainiya wapadera ndipo Ted adapfunzisiwa kuti akhale wonyang’anira dera wogwirizira. Koma patsogolo pake gulu yathu idachinja viyenereso pankhani ya magole ya munthu yemwe ankufuna kukhala wonyang’anira dera. Panthawe mweyo Ted na Hiedi adadziwiratu kuti vikwanisikelini kukwanirisa cholinga chawo. Podiya kuti iwo pakuyamba adakwinyirira, adadziwa kuti angakwanise kutumimikira Yahova munjira zinango. Ted adati: “Vimwevi vidatipfunzisa kuti osati timbangingimire utumiki ubodzi na ubodzi.”
16. Ko tinkupfunzira chani kuchokera pa Agalatiya 6:4?
16 Tingakwaniselini kukangisa chilichose chomwe chinkutichitikira pamoyo wathu. Ndipomwapa osati timbawone kuti utumiki wathu ndiwo unkuchitisa kuti tikhale wofunika kwa Yahova. Ndipo osati timbadzilinganize na wanthu anango omwe ankuchita utumiki womwe isepano tilibe. Hiedi adati: “Munthu ungakhalelini wokondwa peno undokhalira kulinganiza moyo wako na vomwe anango ankuchita.” (Lewengani Agalatiya 6:4.) Chofunika maninge ni kuwona njira zomwe tingathandizire anango na kupitiriza kutumikira Yahova basi.c
17. Ko mungachite tani kuti muyenerere utumiki?
17 Vingakhale vosashupa kuchita vizinji pakutumikira Yahova peno manjeuno mungayesese kukhala moyo wosafuna vizinji na kupewa kumbandokhala na vikwerete. Dziikhireni volinga ving’onoving’ono vomwe vingakuthandizeni kudzakwanirisa volinga vikuluvikulu kutsogolo. Mwakulinganiza peno cholinga chanu nchakudzakhala mpainiya wokhazikika, tani kubakachita upainiya wothandiza mwezi uliwose pakali pano? Peno cholinga chanu nchodzakhala mtumiki wothandiza, ko mungathimizireko nthawe yomwe muchakhala munkulalikira na kumbazungira odwala na wokalamba wa mumpingu mwanu? Phindu yomwe mungagumane mukambachita vimwevi ingakuthandizeni kuti mudzakwanirise volinga vinango kutsogolo. Mumbachite bwino mbali iliyose yomwe mungapasiwe pampingu.—Aro. 12:11.
Dziikhireni cholinga chomwe mungachikwanirisedi (Onani ndime 18)f
18. Ninge momwe foto inkuwonesera, ko mwapfunzira chani pa chitsanzo cha Beverley?
18 Peno imwepo ndimwe wachikulire, ayi kuthamingira kuganiza kuti mungakwaniselini pomwe kukwanirisa volinga vauzimu. Wonani chitsanzo cha mulongo Beverley yemwe anamagole 75. Iye andokhalira kudwaladwala ndipo vimwevi vichitisa kuti ambakangire kufamba. Koma iye wenze na shungu yakuti adzachemerere wanthu azinji ku Chikumbuso. Kuti akwanise kuchita vimwevi adadziikhira volinga. Beverley padakwanisa kuchemerera wanthu azinji ku Chikumbuso adakondwa maninge. Chitsanzo chake chidathandiza wanthu anango kuti ambachitembo khama mu utumiki. Yahova achatembeja maninge wachikulire ndawa ya khama yomwe ankuchita, podiya kuti ankukwanisalini kuchita vizinji ndawa ya momwe vinthu viriri pamoyo wawo.—Sal. 71:17, 18.
19. Ni volinga vauzimu viponi vomwe tingadziyikhire?
19 Dziikhireni volinga vomwe mungavikwanirisedi. Kulisani makhalidwe yomwe yangachitise kuti Yahova ambakukondeni. Pfunzirani maluso yomwe yangachitise kuti Yahova na gulu yake akuphatise basa mokwana. Onani njira zomwe mungathandizire abale na alongo wanu mwakukwana.d Mukachita teno, Yahova adzakudaliseni ninge mwadadalisira Timoteyo ndipo ‘kupita kwanu patsogolo kudzawonekere kwa wanthu wose.’—1 Tim. 4:15.
NYIMBO NA. 38 Mulungu Adzakulimbitsa
a Timoteyo angalalikira ntontholo wabwino mwabuya. Podiya venze teno mtumi Paulo adamulimbikisa kuti apitirize kukulisa maluso. Kuphatisa basa malangizo ya Paulo kudakamuthandiza Timoteyo kuti aphatisiriwe bwino basa mwakukwana na Yahova nakuti ambathandize bwino abale na alongo wake. Ko imwepombo ndimwe wofunisisa kutumikira Yahova na kumbathandiza bwino abale na alongo wanu ninge Timoteyo? Tinashuwa kuti chimwechi ndicho chakulinga chanu. Manje ni vakulinga viponi vamungakhale navo kuti mukwanise kuchita vimwevi? Ndipo ni vinthu vinango viponi vamungachite kuti mukwanirise volinga vimwevi?
b THANDAUZO YA MAWU YANANGO: Volinga vauzimu vinkuphatanidzapo chilichose chomwe tingayesese kuchita kuti titumikire Yahova mwakukwana na kumuchitisa kukhala wakukondwa.
c Onani nkhani yakuti: “Kutumikira Kumene Kukufunikira Ofalitsa Ambiri” mu bukhu yakuti Gulu Lochita Chifuniro cha Mulungu, msolo 10, ndi. 6-9.
d Onani nkhani yakuti: “Pitirizani kulimbisa ushamwali wanu na Yahova” mu msolo 60 wa bukhu yakuti Kondwani na moyo mpaka kalekale!
e MAWU YOFOTOKOZERA MAFOTO: M’bale ankupfunzisa alongo awiri kukonzakonza vodzongeka pa Nyumba ya Ufumu ndipo iwo ankupitiriza kuphatisa basa luso yomwe apfunzisiwa.
f MAWU YOFOTOKOZERA MAFOTO: Mulongo yemwe akwanisalini kuchoka pamuyi ankulalikira pafoni ndipo ankuchemerera wanthu ku Chikumbuso.