Dziikhireni volinga panthawe ya Chikumbuso

Gole iliyose ikafika nthawe ya Chikumbuso, atumiki wa Yahova akondwa kuchitira pabodzi. Masondo yanganani chikanati kuchitika Chikumbuso na pomwe chapita, tiyesesa kuganizira maninge ntsembe ya dipo na kumutembeja Yahova. (Aef 1:3, 7) Mwakulinganiza, tiyesesa kuchemerera wanthu azinji kuti adzabwere ku Chikumbuso. Anango mpaka afika pakutenga upainiya wothandiza wa maola 30 panango 50 m’minyezi ya Março na Abril. Ko imwepo munkufunambo kudzachita vizinji mu utumiki m’minyezi mwaya? Peno nteno, nchani chingakuthandizeni kuti vikufambireni?

Kuti tidzakwanise kuchita vizinji, tingachite bwino kukonzeratu ndandanda. (Miy 21:5) Pakuti minyezi mwaya yafendera maninge, ino ndiyo nthawe yokonzeratu ndandanda. Ganizirani nthawe yomwe mungadzamale munkulalikira m’minyezi mwaya ndipo onani vamungachite kuti mukwanirise volinga vanu. Mukateno, mukumbireni Yahova kuti adalise khama yanu.—1Yo 5:14, 15.

Ko mungaganizireko vamungadzachite kuti mudzamale nthawe itali munkulalikira m’minyezi mwaya?