NKHANI YOPFUNZIRA 5
NYIMBO NA. 108 Chikondi Chokhulupirika cha Mulungu
Madaliso yomwe tinayo ndawa ya chikondi cha Yahova
“Yesu Khrisitu adabwera m’dziko kudzapulumusa ochimwa.” —1 TIM. 1:15.
CHOLINGA
Kuona madaliso yomwe tinayo ndawa ya dipo na kuona momwe tingaonesere kutembeja Yahova.
1. Ko tingakondwerese tani Yahova?
LINGANIZANI kuti mwapereka mphaso yabwino maninge kwa munthu yemwe mumukonda. Kuingizira pakukhala yabwino, mphaso mwiyo niyothandiza maninge kwa munthu muyo! Koma iye wandoitenga mphaso mweiyo nkuikha n’kasha nkuiyebweratu. Mosakaika, vimwevi vingakukhumudwiseni maninge. Koma chaivo nivakuti iye akaphatisa basa mphaso mweiyo nkukuuzani momwe waikondera, vimwevi vingakuchitiseni kukhala okondwa maninge. Ko chitsanzo mwechi chinkubverana tani na dipo? Yahova adatipasa Mwana wake, ndipo mosakaika iye akhala wokondwa maninge akadziwa kuti ndise otembeja ndawa ya mphaso yodekana maninge mweyi na chikondi chomwe iye adaonesa pakupereka ntsembe kwa isepano!—Yoh. 3:16; Aro. 5:7, 8.
2. Ko tione chani mu nkhani mweino?
2 Koma kuyenda kwa nthawe, vingachitike kuti tingayambe kuyebwa momwe dipo iliri yodekana kwa isepano. Mwa mawu yanango, viri ninge kutenga mphaso yodekana mweyi nkuitsekerera n’kasha. Tingakhale okondwa kuti mphaso yathu ilipo koma tinkuiganiziralini. Kuti vimwevi vileke kuchitika tichadekana nthawe zose timbaganizire na kuingizira kutembeja kwathu pa vomwe Yahova na Yesu adatichitira. Nkhani ino itithandize kuchita vimwevi. Tione madaliso yomwe tinayo ndawa ya dipo manjeuno na yomwe tidzatambire ntsogolo. Tione pomwe vomwe tingachite kuti tionese kutembeja kwathu ndawa ya chikondi cha Yahova, makamaka pa sondo zakuyamba tikanati tachita Chikumbuso na sondo za patsogolo pake.
MADALISO YOMWE TINAYO MANJEUNO
3. Ko ni yaponi madaliso yomwe tinayo manjeuno ndawa ya dipo?
3 Kundoyambira manjeuno tina madaliso yazinji ndawa ya ntsembe ya dipo ya Yesu. Mwakulinganiza, Yahova akhululuka machimo yathu pakuphatisa basa dipo. Vimwevi avichitalini ndawa yochichimiziwa. Chaivo nivakuti Yahova ankufuna kutikhululukira. Wamasalimo ambatembeja kukhululuka kwa Yahova. Ndipomwapa, adanena kuti: ‘Imwepo Yahova ndimwe wabwino ndipo ndimwe wokonzeka kukhululuka.’—Sal. 86:5; 103:3, 10-13.
4. Ko Yahova adapereka dipo kwa mbani? (Luka 5:32; 1 Timoteyo 1:15)
4 Anango panango angaganize kuti ni osayenerera kukhululukiriwa na Yahova koma chaivo nivakuti tose isepano ndise osayenerera. Ntumi Paulo ambadziwa kuti iye ni wosayenerera “kuchemerewa ntumi.” Olo viri teno, iye adanena kuti: “Ndawa ya kukoma ntima kukulu kwa Mulungu, niri ninge mwaniriliumu.” (1 Akor. 15:9, 10) Tikalapa machimo yathu Yahova atikhululukira. Ndawa chani? Osati ndawa kuti ndise oyenerera koma ndawa yakuti iye atikonda maninge. Ndipomwapa, mukakhala wokhumudwa nkumbaganiza kuti ndimwe wosayenerera kukhululukiriwa na Yahova, kumbukirani kuti iye adapereka ntsembe ya dipo osati kwa wanthu waungwiro koma kwa ochimwa omwe alapa.—Werengani Luka 5:32; 1 Timoteyo 1:15.
5. Ko tichadekanadi kuganizira kuti ndise oyenerera kukhululukiriwa na Yahova?
5 Palibe aliyese wa isepano yemwe adekana kuganiza kuti niwoyenerera kukhululukiriwa na Yahova olo kuti wamutumikira Yahova kwa magole yazinji maninge. Nivobveka kuti Yahova alemekeza ndipo akumbukira vose vomwe tidamuchitira. (Aheb. 6:10) Koma iye adatipasa mwana wake ninge mphaso osati ninge kupagali vomwe isepano tamuchitira. Kungakhale kuphonya kuganiza kuti ndise oyenerera kukhululukiriwa na Yahova panango kuti iye achadekana kutisamalira mu njira yapadera. Kuganiza tenoyu nichibodzibodzi na kunena kuti Yesu ambadekanalini kufa ndawa ya isepano.—Onani pomwe Agalatiya 2:21.
6. Ko ndawa chani Paulo adachita khama maninge pa kutumikira Yahova?
6 Paulo ambadziwa kuti iye adzayenererelini kukhululukiriwa na Yahova. Koma ndawa chani iye adachita khama pa kutumikira Yahova? Iye adachita vimwevi pakufuna kuonesa kutembeja ndawa ya kukoma ntima na chifundo chomwe Yahova adamuchitira. (Aef. 3:7) Ninge Paulo, isepanombo tipitiriza kutumikira Yahova mwa khama osati na cholinga chakuti tiyenerere kukhululukiriwa na Yahova koma na cholinga chakuti tionese kuti ndise otembeja pa vose vomwe iye adatichitira.
7. Ko ni madaliso yanango yaponi yomwe tinayo ndawa ya dipo? (Aroma 5:1; Yakobo 2:23)
7 Madaliso yanango yomwe tinayo manjeuno ndawa ya dipo ni kukhala na mwayi wokhala pa ushamwali wolimba maninge na Yahova.a Ninge tidaonera mu nkhani yapita, isepano tilibe kubadwa tilikale pa ushamwali na Yahova koma ndawa ya dipo tingakhale pa “ntendere na Yahova” ndipo mwa njira mweyi tingakwanise kukhala azishamwali wake.—Werengani Aroma 5:1; Yakobo 2:23.
8. Ndawa chani tichadekana kutembeja Yahova ndawa ya mphaso ya pemphero?
8 Naboni tiganizire mbali ibozi ya ushamwali wathu yomwe ni mphaso ya pemphero. Yahova abvesera osati mapemphero yokha yomwe isepano tichita tikakhala kuti tasonkhana kuti timutumikire pabodzi koma abvesera pomwe mapemphero yose yomwe aliyese achita akakhala yekha. Pemphero inganyamalise ntima wathu na kutipasa ntendere wa m’maganizo koma iyo niyodekana maninge kuposha njira yondotambilira thandizo panango kundofuna kunena vomwe viri mu ntima mwathu. Pemphero itithandiza kulimbisa ushamwali wathu na Mulungu. (Sal. 65:2; Yak. 4:8; 1 Yoh. 5:14) Yesu ali padziko yapasi iye nthawe zose ambapemphera ndawa ambadziwa kuti Yahova ankumubvesera. Iye ambadziwa pomwe kuti pemphero ichitisa kuti ushamwali wake na Yahova ukhale wolimba nthawe zose. (Luka 5:16) Ndise otembeja maninge pakudziwa kuti tingakhale azishamwali wa Yahova komasoti kuti tingayankhule naye pa kuphatisa basa pemphero ndawa ya ntsembe ya Yesu Khrisitu!
MADALISO YOMWE TIDZAKHALE NAYO NTSOGOLO
9. Ko ni madaliso yaponi yomwe wanthu wa Yahova adzakhale nayo ntsogolo ndawa ya dipo?
9 Ko ni madaliso yaponi yomwe wanthu wa Yahova angadzakhale nayo ntsogolo ndawa ya dipo? Iwo adzatambire moyo wosapera. Azinji aganiza kuti vimwevi ni vosakwanisika ndawa yakuti impfa nthawe zose ni chinthu chaicho kwa isepano. Koma kundoyambira pachiyambi cholinga cha Yahova nchakuti wanthu ambakhale na moyo mpakana kalekale. Sembe Adamu alibe kuchimwa, palibe yemwe adakaganiza kuti maganizo ya kukhala na moyo mpakana kalekale niyabwino maninge mwakuti yangakwanirisikelini. Vingachitike kuti ntsiku zino maganizo mwaya yangakhale yabwino maninge mwakuti tingaganize kuti vingakwanisikelini. Koma njira yomwe Yahova adaphatisa basa kuti achitise kuti vimwevi vikhale vokwanisika niyabwino maninge iye adapereka Mwana wake wokodewa.—Aro. 8:32.
10. Ko odzodzewa na wankhosa zinango ankudikhira chani?
10 Moyo wosapera ni madaliso ya tsogolo yathu. Koma kundoyambira manjeuno isepano tingambaganizire momwe moyo udzakhalire ndawa Yahova ankufuna kuti tichite vimwevi. Odzodzewa ankudikhilira moyo wokondweresa kudzulu na mwayi wodzatonga dziko yapasi pabodzi na Yesu. (Chiv. 20:6) Wankhosa zinango ankudikhilira kudzakhala m’Paradaiso pano padziko yapasi womwe ni moyo womasuka ku vowawa virivose, vokhumudwisa na vokwinyiririsa. (Chiv. 21:3, 4) Ko imwepo ndimwe m’bodzi mwa wankhosa zinango omwe anachidikhiro chodzakhala padziko yapasi? Chidikhiro chimwechi ni mphasolini yondofuna kukulimbikisani koma ni vimweviretu vomwe Yahova wenze navo m’maganizo pomwe adandolenga wanthu. Moyo padziko yapasi udzatichitise kuti tikhale okondwa maninge.
11-12. Ko ni madaliso yanango yaponi yomwe tinkuyadikhirira mwachidwi yomwe tidzakhale nayo m’Paradaiso? (Onani pomwe mafoto.)
11 Linganizani momwe moyo wanu udzakhalire m’Paradaiso. Mudzakhalerini pomwe na mantha nakuti mungadwale panango kumwalira. (Yes. 25:8; 33:24) Yahova adzakupaseni vinthu vose vabwino vomwe imwepo munkufuna. Ko munkufuna kudzapfunzira va chani? Ko munkufuna kudzapitiriza kupfunzira va vinyama? Ko munkufuna kudzapfunzira kuyimba? Ko munkufuna kudzapfunzira kupintali? Mudziko inyowani tidzafunike wanthu waluso azinji, ninge wa vomangamanga na alimi. Padzafunike pomwe wanthu kuti ambakonze chakudya kukonza vinthu na kusamalira dziko yokhuza yomwe tidzakhale nayo. (Yes. 35:1; 65:21) Na moyo wosapera womwe tidzakhale nawo, imwepo mudzakhale na nthawe ya kukulisa luso yomwe munkufuna kukhala nayo.
12 Ganizirani kukondwa komwe tidzakhale nako ndawa ya kutambira wanthu omwe adamwalira! (Mac. 24:15) Ganizirani pomwe momwe vidzakhalire vokomedza kupfunzira vinthu vizinji vomwe Yahova adalenga na kupfunzira vizinji va iye. (Sal. 104:24; Yes. 11:9) Kuposha vose vidzakhale vokomedza maninge kutumikira Yahova tina chikumbuntima chochena! Ko nivobveka kuchinjanisa madaliso yomwe tinayo ku tsogolo na “machimo nkukondwa kwa nthawe ing’ono”? (Aheb. 11:25) Mosakaika neye! Khama iliyose yomwe tingachite manjeuno tingailinganizelini na moyo wosapera womwe tidzakhale nawo. Kumbukirani kuti, Paradaiso tidzaudikhirirelini mpakana kalekale. Idzafike ntsiku pomwe Paradaiso moyu adzakhale chaiye kwa isepano. Vimwevi vidzakwanirisike ndawa yakuti Yahova adatikonda mpakana adapereka moyo wa Mwana wake wokondewa!
Mukambaganizira va madaliso yomwe mudzakhale nayo mu dziko inyowani, ko chikukomedzani maninge ni chani? (Onani ndime 11-12)
ONESANI KUTEMBEJA KWANU PA CHIKONDI CHA YAHOVA
13. Ko tingaonese tani kuti tinkutembeja Yahova ndawa yotipasa dipo? (2 Akorinto 6:1)
13 Ko tingaonese tani kutembeja ndawa yakuti Yahova adatipasa dipo? Pa kuikha basa yake pa malo yakuyamba pa moyo wathu. (Mat. 6:33) Inde, ndawa yakuti Yesu “adafera wanthu wose kuti omwe ali na moyo osati akhale na moyo wodzikondweresa wokha, koma akhale na moyo wokondweresa yemwe adawafera nkumukisiwa.” (2 Akor. 5:15) Yahova ni wokoma ntima maninge ndipo atikhululukira. Tikambachita vose vomwe tingakwanise pakumutumikira, tionesa kuti tinkubvesa vomwe iye adachita kwa isepano na kuti ndise otembeja.—Werengani 2 Akorinto 6:1.
14. Ko tingaonese tani kuti tithemba malangizo ya Yahova?
14 Njira inango yowonesera kutembeja chikondi cha Yahova, ni kuthemba malangizo yake na kuyatewedza. Ko tingachite tani vimwevi? Pomwe tinkuchita vosalula pa moyo wathu. Mwakulinganiza, pakuganizira kuti tichite mapfunziro yapadzulu panango basa yomwe tingaphate. Tichadekana kuganizira vomwe Yahova ankufuna kuti timbachite. (1 Akor. 10:31; 2 Akor. 5:7) Tikambachita vosalula pakuphatisa basa malangizo yomwe Yahova apereka, tidzachite vinthu vabwino maninge. Chikhulupiriro chathu, chidikhiro chathu cha kutsogolo na ushamwali wanthu na Yahova udzakhale wolimba.—Aro. 5:3-5; Yak. 2:21, 22.
15. Ko tingaonese tani kutembeja pa nthawe ya Chikumbuso?
15 Pana njira inango pomwe yachitatu yomwe tingaonesere kutembeja. Pa kuphatisa basa nthawe ya Chikumbuso pa kumuonesa Yahova kuti dipo niyodekana maninge kwa isepano. Kuingizira pakugumanika pa Chikumbuso tingachemerere pomwe anango. (1 Tim. 2:4) Afotokozereni wanthu mwawa vomwe vidzachitike pa Chikumbuso. Panango vingakhale bwino kuwaonesa vidiyo yakuti: Ndawa Chani Yesu Adafa? Na yakuti: Kumbukirani Impfa ya Yesu, pa saiti ya jw.org. Akulu achadekana kukonza makonzedwe yakuti achemere wanthu wale omwe adafoka. Ganizirani chimwemwe chomwe chikhala kudzulu na padziko yapasi, nkhosa ibodzi ya Yahova yosokera ikabwerera nkhola yake! (Luka 15:4-7) Ndipomwapa, pa Chichikumbuso tichadekana kuyesesa kuti osati tindomonisa abale wathu okha koma timonise pomwe makamaka wale omwe ni anyowani komasoti wale omwe atenga nthawe itali ne kubwera ku misonkhano. Tifuna kuti iwo adzibve kuti ali kumuyi!—Aro. 12:13.
16. Ndawa chani tichadeka kuganizira va kuchita vizinji mu umboni pa nthawe ya Chikumbuso?
16 Ko imwepo mungachite vizinji maninge mu umboni pa nthawe ya Chikumbuso? Imweyi ni njira yabwino maninge yowonesera kutembeja vinthu vose vomwe Yahova na Yesu adatichitira. Pomwe tinkuphata basa mwakhama kwa Yahova tibva thandizo yake ndipo phindu niyakuti timuthemba maninge iye. (1 Akor. 3:9) Kuingizira pamwapa, ayi kuyebwa kuwerenga Baibolo pa kuphatisa basa ndandanda yowerengera Baibolo pa nthawe ya Chikumbuso yomwe ibwera mu kabukhu kakuti: Kupfunzira Malemba ntsiku na ntsiku komasoti mu Utumiki na moyo wathu wachikhrisitu. Imwepo mungaphatise pomwe basa nkhani za m’Baibolo zimwezi pa pfunziro yanu ya pamwekha.
17. Ko nchani chichitisa Yahova kukhala wokondwa? (Onani pomwe bokosi yakuti “Momwe tingaonesere kutembeja chikondi cha Yahova.”)
17 Peno ndawa ya momwe vinthu viriri pamoyo wanu, mungakwaniselini kuphatisa basa mpfundo zose zomwe tafotokoza. Koma kumbukirani kuti, Yahova aonalini vomwe imwepo muchita nkumbalinganiza na vomwe wanthu anango achita, koma iye aona vomwe viri muntima mwanu. Iye akhala wokondwa maninge akambaona momwe imwepo muliri wotembeja ndawa ya mphaso yapadera maninge yomwe adatipasa yomwe ni dipo.—1 Sam. 16:7; Maliko 12:41-44.
18. Ndawa chani ndise otembeja Yahova na Yesu?
18 Kukhululukiriwa machimo yathu, ushamwali wathu na Yahova na chidikhiro chosapera nivokwanisika ndawa ya dipo. Nipomwapa, nthawe zose tichadekana kuonesa kutembeja chikondi cha Yahova chomwe chidamulimbikisa kuti atipase madaliso yose mwaya. (1 Yoh. 4:19) Tinkufuna pomwe kutembeja Yesu yemwe adatikonda mpakana kufika pakupereka moyo wake ndawa ya isepano!—Yoh. 15:13.
NYIMBO NA. 154 Chikondi Sichitha