NKHANI YOPFUNZIRA 9
NYIMBO NA. 75 “Ine Ndilipo! Nditumizeni!”
Ko ndimwe okonzeka kudzipereka kwa Yahova?
‘Nidzamubwezere chani Yahova pa vinthu vose vabwino vomwe wanichitira?’—SAL. 116:12.
CHOLINGA
Pfunziro mweyi ikuthandizeni imwepo kukhala pa ushamwali wolimba na Yahova, mwanjira mweyi mudzafune kudzipereka kwa Yahova mpaka kubatizika.
1-2. Ko ni chani chomwe munthu achadekana kuchita akanati kubatizika?
MAGOLE 5 mbuyo umu, wanthu oposha midyau adadzipereka na kubatiziwa nkukhala wa Mboni za Yahova. Azinji mwa wanthu mwawa ali ninge Timoteyo yemwe adapfunzira chonadi ‘kundoyambira ali mwana.’ (2 Tim. 3:14, 15) Anango adapfunzira chonadi akula kale ndipo anango enze nkhalamba. Nkazi munango yemwe ambapfunzira Baibolo na Mboni za Yahova adabatizika nkukhala wa Mboni za Yahova ana magole 97!
2 Peno imwepo munkupfunzira Baibolo panango azibereki wanu ni wa Mboni za Yahova, ko imwepo munkuganiza vobatizika? Chimwechi ni chiyambi chabwino maninge. Koma mukanati mwabatizika munkudekana kudzipereka kwa Yahova. Pfunziro mweyi ifotokoze kuti, ko kudzipereka kutanthauza chani? Ndipo tione pomwe kuti ndawa chani muchadekanalini kuchita mantha kudzipereka na kubatizika peno ndimwe okonzeka kuchita vimwevi.
KO KUDZIPEREKA NI CHANI?
3. Perekani vitsanzo va m’Baibolo va wanthu omwe enze odzipereka kwa Yahova.
3 M’Baibolo, kudzipereka kutanthauza kusalula kuti utumikire Yahova munjira yochena. Aizirayeli enze ntundu wodzipereka kwa Yahova. Koma wanthu anango enze odzipereka mu njira yapadera maninge. Mwakulinganiza, Aroni ambavala ‘chinthu chomudziwikisa kuti ni wodzipereka.’ Ambavala kachitsulo konyezimira kokonzewa na ouro wokonzewa bwino kutsogolo kwa chovala chake. Kachitsulo ka ouro kamwaka kambamudziwikisa kuti iye adasaluliwa kuti atumikire Yahova munjira yapadera maninge, ninge nkulu wantsembe wa Aizirayeli. (Lev. 8:9) Anaziri nawombo enze odzipereka kwa Yahova munjira yapadera maninge. Mawu yakuti ‘Mnaziri’ yadachokera kuchiyankhulo chachiheberi yakuti nazir yomwe yatanthauza kuti ‘wodzipereka’ panango ‘wopatuliwa.’ Anaziri ambafunika kutewedza malamulo yanango yomwe yenze mu chilamulo cha Mose.—Num. 6:2-8.
4. (a) Ko kudzipereka kwa Yahova kunkuphatanidza chani? (b) Ko ‘kudzilamba’ wekha kutanthauza chani? (Onani pomwe foto.)
4 Imwepo mukadzipereka kwa Yahova mukhala nteweri wa Yesu. Ndipo kuchokera pa nthawe mweyo kuchita chifuniro cha Mulungu chikhala chinthu chodekana maninge pa moyo wanu. Ko kudzipereka moku kunkutanthauza chani? Yesu adanena kuti: “Peno munthu ankufuna kukhala nteweri wangu, adzilambe yekha.” (Mat. 16:24) Mawu yachigiriki yotsumbudzuliriwa kuti ‘kudzilamba wekha,’ yangatanthauze kuti “kudziuza wekha kuti neye.” Peno imwepo mwadzipereka kwa Yahova muchadekana kunena kuti neye, chinthu chilichose chomwe chingamukhumudwise. (2 Akor. 5:14, 15) Vimwevi vinkuphatanidza pomwe kulamba ‘basa za thupi’ vomwe ni vinthu vachigololo. (Agal. 5:19-21; 1 Akor. 6:18) Ko kubvera Yahova kudzachitise moyo wanu kukhala woshupa? Neye. Peno imwepo mukonda Yahova na kukhala otsimikiza kuti malamulo yake ni yabwino kwa imwepo. (Sal. 119:97; Yes. 48:17, 18) M’bale munango dzina yake Nicholas adanena kuti: “Imwepo mungawone malamulo ya Yahova ninge msuwo wofungira djeri womwe ukuchitisani kuti mukhale mulibe ufulu wobula kunja kukachita chilichose panango msuwo wofungilira mphondolo kuti zingakudyeni.”
Ko imwepo muwona malangizo ya Yahova ninge msuwo wa djeri omwe ukuchitisani kuti mukhale mulibe ufulu, panango ninge msuwo wofungira mphondolo kuti zileke kukudyani? (Onani ndime 4)
5. (a) Ko munthu adzipereka tani kwa Yahova? (b) Ko pali kusiyana kuponi pakati pa kudzipereka na ubatizo? (Onani pomwe foto.)
5 Ko mungadzipereke tani kwa Yahova? Imwepo muchita pemphero kwa Yahova kumupolomisa kuti mudzatumikire iye yekha basi komasoti kuti kuchita chifuniro chake chidzakhale chinthu chodekana maninge pa moyo wanu. Shuwadi imwepo mupolomisa kuti mudzamukonde Yahova na “ntima wanu wose, moyo wanu wose, maganizo yanu yose na mphanvu zanu zose.” (Maliko 12:30) Kudzipereka moku kuchitika pamwekha pakati pa imwepo na Yahova. Pomwe ubatizo uchitikira pa gulu omwe uwonesa kuti imwepo mudadzipereka kwa Yahova. Imweyi ni polomisi ikulu maninge, ndipomwapa muchadekana kuchita vose vomwe mungakwanise kuti mukwanirise polomisi yanu ndipo Yahova adikhira kuti muchite vimwevi.—Mla. 5:4, 5.
Mukadzipereka kwa Yahova imwepo mwamupolomisa kuti mumbatumikire iye yekha basi na kuyikha vofuna vake pa malo yakuyamba (Onani ndime 5)
NDAWA CHANI MUCHADEKANA KUDZIPEREKA KWA YAHOVA?
6. Ko ndawa chani munthu achasalula kudzipereka kwa Yahova?
6 Chinthu chikulu chomwe chikuchitisani kuti mudzipereke kwa Yahova ni chikondi chomwe imwepo munacho kwa iye. Nimaganizolini yomwe yandobwera nkuyenda, koma yachokera ‘pakumudziwa bwino iye’ komasoti ‘kubvesa vinthu vauzimu.’ Kubvesa vinthu vomwe imwepo mudapfunzira va Yahova na cholinga chake vikuchitisani kuti mumbakonde Yahova ntsiku iliyose. (Akol. 1:9) Kupfunzira Baibolo komwe imwepo mudachita, kudakuchitisani kuti mutsimikizire vinthu ivi (1) Yahova ni chaiye, (2) Baibolo ni mawu yake youziriwa ndipo (3) Yahova achaphatisa basa gulu yake kuti akwanirise cholinga chake.
7. Munthu akanati kudzipereka kwa Yahova, ko achadekana kuchita chani?
7 Munthu yemwe adzipereka kwa Yahova, achadekana kudziwa vipfunziso voyambirira va m’Baibolo na malamulo ya Yahova komasoti kumbachita vinthu mobverana na mpfundo zake. Iye achita vose vomwe angakwanise kuti auze pomwe anango vomwe adapfunzira m’Baibolo. (Mat. 28:19, 20) Chikondi chake kwa Yahova chakula ndipo ankufuna kutumikira Yahova na ntima wose. Ko nteno momwe imwepo muchabvera? Imwepo mukakhala na chikondi teneuyu kwa Yahova, mudzadziperekelini kuti mundokondweresa yemwe ankukupfunzisani Baibolo, panango azibereki wanu ndipo mudzachitelini vimwevi ndawa yakuti azishamwali wanu adabatizika.
8. Ko ni chani chomwe chidzakuthandizeni imwepo kuti mudzipereke kwa Yahova? (Salimo 116:12-14)
8 Mukambaganizira vose vomwe Yahova wakuchitirani, imwepo mumutembeja ndipo vikuchitisani kuti mudzipereke kuti mumutumikire. (Werengani Salimo 116:12-14.) Baibolo inena kuti Yahova ni yemwe atipasa ‘mphaso iliyose yabwino komasoti yaungwiro.’ (Yak. 1:17) Mphaso ikulu maninge kuposha zose, ni dipo ya mwana wake Yesu Khrisitu. Ganizirani ivi! Dipo idakuchitisani kuti imwepo mukhale paushamwali wolimba maninge na Yahova. Iye wakupasani mwayi wodzakhala na moyo mpaka kalekale. (1 Yoh. 4:9, 10, 19) Kudzipereka kwa Yahova ni njira ibodzi yowonesa kuti imwepo munkutembeja osati ndawa ya dipo yokha koma ndawa yamadaliso yose yomwe iye wakupasani. (Deut. 16:17; 2 Akor. 5:15) Ni vimwevi vomwe tichapfunzira pa msolo 46 mpfundo 4, mu bukhu yakuti Kondwani na Moyo Mpaka Kalekale! Kuphatanidza pomwe vidiyo ya maminutu yatatu yakuti Kupereka Mphatso kwa Mulungu.
KO NDIMWE OKONZEKA KUDZIPEREKA NA KUBATIZIWA?
9. Ndawa chani aliyese achadekanalini kudzibva kuti ankukakamiziwa kuti adzipereke kwa Yahova?
9 Imwepo mungambadzibve kuti mukanati kukonzeka kuti mudzipereke kwa Yahova na kubatiziwa. Panango munkufunika kuchinja vinthu pa moyo wanu kuti mumbatewedze mpfundo za Yahova, vingachitike kuti muchadekana nthawe kuti mulimbise chikhulupiriro chanu. (Akol. 2:6, 7) Munthu aliyese achapita patsogolo mu njira zosiyana ndipo ni wanthulini ose omwe achabatizika na nsinkhu ubodzibodzi. Nivabwino kudziwa kuti ko ni vinthu viponi vomwe muchadekana kuchinja ndipo chitani vomwe mungakwanise kuti muleke kumbadzilinganiza na anango.—Agal. 6:4, 5.
10. Ko muchadekana kuchita chani peno munkuwona kuti mukanati mwakonzeka kuti mudzipereke na kubatizika? (“Onani pomwe bokosi yakuti: Ko munkulerewa mu chonadi?”)
10 Olo kuti imwepo munkudzibva kuti mukanati kukonzeka kuti mudzipereke kwa Yahova, pitirizani kukhala na cholinga mwechi. Kumbirani nthandizo kwa Yahova kuti akuthandizeni kuchinja vinthu vomwe munkudekana kuchinja. (Afil. 2:13; 3:16) Ndipo tsimikizirani kuti Yahova adzabve pemphero yanu ndipo adzakuthandizeni.—1 Yoh. 5:14.
NDAWA CHANI ANANGO ADZIPEREKALINI KWA YAHOVA
11. Ko Yahova adzatithandize tani tikakhala okhulupirika kwa iye?
11 Wanthu anango omwe ni okonzeka kudzipereka na kubatizika, nthawe zinango akayikira kuti adzipereke. Anango adzibvunza kuti: ‘Ko tani inepano nikabatiziwa nkudzachita chimo ikulu nkuchosewa?’ Peno imwepo mu na mantha na vimwevi, tsimikizirani kuti Yahova adzakupaseni vose vomwe nivodekana kuti ‘mufambe munjira yochena na kumukondweresa na ntima wose.’ (Akol. 1:10) Iye adzakupaseni mphanvu zomwe imwepo muchadekana kuti mumbakwanise kuchita vinthu vabwino, Yahova adathandizako kale wanthu azinji kukhala okhulupirika kwa iye. (1 Akor. 10:13) Ndipomwapa ni wanthu ang’onong’ono basi omwe achosewa mumpingu. Yahova atipasa vose vomwe nivodekana kuti tipitirize kukhala okhulupirika kwa iye.
12. Ko nchani chomwe imwepo mungachite kuti muleke kuchita chimo ikulu?
12 Tose isepano tichayesewa kuti tichite vinthu voipa. (Yak. 1:14) Koma imwepo mungasalule vomwe mungachite mukayesewa. Chaivo ni vakuti imwepo mungasalule vomwe mudzachite pa moyo wanu. Anango anena kuti ni vosakwanisika kudzilamulira pa vomwe tichaganiza na vomwe tichachita. Koma imweyi ni bodza, imwepo mungakwanise kulamulira maganizo yoipa. Ndawa ya vimwevi, nthawe iliyose pomwe mungayesewe, imwepo mungasalule kuleka kuchita vinthu voipa. Ndipomwapa panavinthu vinango vomwe vingakuthandizeni. Mwakulinganiza, kupemphera kwa Yahova ntsiku iliyose, kukhala na chizolowezi chabwino cha pfunziro ya pamwekha na kugumanika pa misonkhano nthawe zose. Phatisirani basa mwayi uliwose womwe ungagumanike kuti mumbauze anango va chikhulupiriro chanu. Mukambachita vimwevi nthawe iliyose imwepo mudzakhale na mphanvu zokwana kuti mupitirize kukhala wokhulupirika kwa Yahova. Ndipo ayi kuyebwa kuti Yahova nthawe zose adzakuthandizeni kuchita vimwevi.—Agal. 5:16.
13. Ko ni chitsanzo chabwino chiponi chomwe Yosefe adatisiyira?
13 Vidzakhale vosashupa kukhala okhulupirika kwa Yahova peno manjeuno mwasaluliratu vomwe mudzachite mukadzayesewa. Baibolo ilewa va wanthu azinji omwe adachita vimwevi ndipo ninge isepano iwombo enze alibe ungwiro. Mwakulinganiza, pomwe nkazi wa Potifara adayesesa kwa maulendo yazinji kumunyengerera Yosefe, iye ambakayikiralini vomwe ambadekana kuchita, Baibolo ilewa kuti: ‘Iye ambalamba.’ Yosefe chaiye adanena kuti: ‘Ningachitirenyi choipa chikulu teneuyu nkuchimwira Mulungu.’ (Gen. 39:8-10) Ni vobveka kuti Yosefe wenze adasaluliratu vochita akanati wayesewa na nkazi wa Potifara ndipomwapa iye adakwanisa kuchita vinthu vabwino pomwe ambayesewa.
14. Ko tingalambe tani viyeso?
14 Ko tingachite tani vinthu ninge momwe Yosefe adachitira? Tingasaluliretu manjeuno vomwe tidzachite tikadzayesewa. Ayi kumbachita kuganiza kawiri vinthu vomwe Yahova achazonda ndipo ayi kumbandokhalira kuviganizira. (Sal. 97:10; 119:165) Imwepo mukambachita vimwevi mudzakwanise kupirira chiyeso ndawa munkudziwa vomwe mungachite.
15. Ko munthu angaonese tani kuti ankufunisisa kutumikira Yahova ‘na ntima wose’? (Aheberi 11:6)
15 Vingachitike kuti imwepo munkutsimikizira kuti mwagumana chonadi ndipo munkufuna kutumikira Yahova na ntima wanu wose. Koma panango munkudzibva kuti mukanati mwakonzeka kudzipereka kwa Yahova na kubatizika. Peno nteno imwepo mungachite chibodzibodzi ninge vomwe Mpfumu Davide adachita. Iye adagwigwirira Yahova kuti: ‘Nifufudzeni imwe Yahova ndipo dziwani va muntima mwangu. Nifufudzeni ndipo mudziwe maganizo yomwe yankunichitisa kukhala na nkhawa, ndipo muwone peno mwa inepano muli chilichose choipa ndipo munitsogolere pa njira ya kumoyo.’ (Sal. 139:23, 24) Yahova achadalisa wale omwe ‘amufagafaga na ntima wose,’ khama yanu yakuti mukwanirise cholinga chanu cha kudzipereka na kubatizika, iwonesa kuti imwepo munkufuna kudzipereka.—Werengani Aheberi 11:6.
PITIRIZANI KUMUFENDERERA YAHOVA
16-17. Ko wale omwe ankulerewa mu chonadi, angachitetani kuti alimbise ushamwali wawo na Yahova? (Yohane 6:44)
16 Yesu adalewa kuti ateweri wake adachita kuchemerewa na Yahova. (Werengani Yohane 6:44.) Ganizirani momwe vimwevi viriri vabwino ndipo ganizirani momwe vinkukukhudzirani imwepo. Yahova achawona chinthu chabwino kwa munthu aliyese yemwe iye adamuchemera kuti adziwe chonadi. Iye achawona munthu aliyese ninge ‘chuma chapadera’ panango kuti ‘munthu wolemekezeka.’ (Deut. 7:6) Yahova akuonanimbo teneuyu imwepo.
17 Vingachitike kuti imwepo ndimwe mulumbwana ndipo munkulerewa mu banja ya mboni, panango mungadzibve kuti munkutumikira Yahova ndawa yakuti azibereki wanu ankuchita vimwevi, osati ndawa yakuti Yahova adakuchemerani. Peno nteno, Baibolo inena kuti: ‘Fendererani Mulungu ndipo nayembo adzakufenderereni.’ (Yak. 4:8; 1 Mbiri 28:9) Imwepo mukayamba kumufenderera Yahova, iye adzachite mbali yake ndipo adzakufendererenimbo. Kwa Yahova imwepo pamwekha ndimwe wodekana maninge osati ninge gulu. Yahova afenderera munthu aliyese payekha olo wale omwe ankulerewa mu chonadi. Munthu akayamba kumufenderera Yahova, achita vomwe viri nembewe pa Yakobo 4:8.—Onani pomwe 2 Atesalonika 2:13.
18. Ko mupfunziro inkubwera tidzapfunzire chani? (Salimo 40:8)
18 Imwepo mukadzipereka kwa Yahova nkubatizika, munkutewedzera Yesu. Mwakufuna kwake, Yesu wenze wokonzeka kuchita vose vomwe Ababa wake adamuuza. (Werengani Salimo 40:8; Aheb. 10:7) Mupfunziro yomwe inkubwera tidzawone vomwe vingakuthandizeni kuti mupitirize kutumikira Yahova patsogolo pakuti mwabatizika.
KO MUNGADAWIRENI TANI?
Ko kudzipereka kwa Yahova kuchatanthauza chani?
Ko kutembeja kudzakuthandizeni tani kuti mudzipereke kwa Yahova?
Ko ni chani chomwe chingakuthandizeni imwepo kuti muleke kuchita chimo?
NYIMBO NA. 38 Mulungu Adzakulimbitsa