NKHANI YOPFUNZIRA 26
NYIMBO NA. 123 Tizigonjera Mulungu Mokhulupirika
Bvumani modzichepesa vinthu vomwe imwepo munkuvidziwalini
‘Wamphanvu yose tingakwaniselini kumubvesa.’—YOBU 37:23.
CHOLINGA
Kupfunzira kulimbana na mabvuto, pakuganizira vinthu vomwe isepano tidziwa na kuthemba Yahova olo kuti tinkudziwalini vose vomwe vingachitike.
1. Ko ni nzeru ziponi zomwe Yahova adatipasa, ndipo ndawa chani?
YAHOVA adatilenga munjira yakuti timbakwanise kuganiza, kupfunzira vinthu vinyowani na kuphatisa basa vomwe tapfunzira. Ko ndawa chani iye adatilenga tene uyu? Na cholinga chakuti timbakwanise ‘kugumana nzeru za Mulungu’ na kumutumikira pakuphatisa basa mbuya yathu yakuganiza.—Miy. 2:1-5; Aro. 12:1.
2. (a) Ko ni vinthu viponi vomwe tinkudekana kuvibvesa? (Yobu 37:23, 24) (Onani pomwe foto.) (b) Ndawa chani vimwevi ni vabwino kwa isepano?
2 Ni shuwadi kuti Yahova adatilenga munjira yakuti timbakwanise kupfunzira vinthu, koma chaivo ni vakuti pana vinthu vizinji vomwe isepano tingavibveselini. (Werengani Yobu 37:23, 24.) Ganizirani chitsanzo cha Yobu. Yahova adamuchita mibvunzo izinji maninge yomwe idachitisa Yobu kuti azindikire kuti pana vinthu vizinji vomwe iye ankuvidziwalini. Macheza mwaya yadamuthandiza Yobu kuti apitirize kukhala wodzichepesa komasoti achinje kaganizidwe kake. (Yobu 42:3-6) Mwanjira ibodzibodzi, ni vabwino isembo kukhala wodzichepesa na kumbazindikira kuti pana vinthu vinango vomwe tinkuvidziwalini. Mwanjira mweyi tidzakwanise kuthemba Yahova nthawe zose kuti adzatiuze vomwe isepano tidekana kuchita kuti tikwanise kusalula vinthu mwanzeru.—Miy. 2:6.
Kubvuma kuti isepano tidziwalini vinthu vose, ni kwabwino kwa isepano ninge momwe venzere kwa Yobu (Onani ndime 2)
3. Ko tione chani mu nkhani mweino?
3 Mupfunziro mweino, tione vinthu vinango vomwe isepano tinkuvidziwalini na mabvuto yomwe yangabwere ndawa yakuti tinkudziwalini vinthu vose. Mpakana tione pomwe kuti ndawa chani ni vabwino kusadziwa vinthu vinango. Kupfunzira nkhani mwezi kulimbise chikhulupiriro chathu chakuti Yahova yemwe ni waugwiro nkaganizidwe kake, atipasa malangizo yomwe niyodekana kwa isepano.—Yobu 37:16.
TINKUDZIWALINI NTSIKU YOMWE MAPETO YADZAFIKE
4. Mobverana na lemba ya Mateyu 24:36, ko ni viponi mwa vinthu vinango vomwe isepano tinkuvidziwalini?
4 Werengani Mateyu 24:36. Isepano tinkudziwalini ntsiku yomwe mapeto ya dongosolo iyi yadzafike. Olo Yesu alipano pa dziko yapasi ambadziwalini va “ntsiku na nthawe” ya vinthu mwevi.a Patsogolo pake iye adauza opfunzira wake kuti Yahova yemwe ni munichiro wa nthawe ana ndandanda yochitira vinthu vimwevi “mu ulemerero wake.” (Mac. 1:6, 7) Yahova adayikha kale nthawe chaiyo yamapeto ya dongosolo ino, koma isepano tingakwaniselini kudziwiratu kuti nilini pomwe vimwevi vidzachitike.
5. Ndawa yakuti tinkudziwalini ntsiku ya mapeto, ko vimwevi vingatikhunze tani?
5 Mobverana na vomwe Yesu adanena, isepano tinkudziwalini kutalika kwa nthawe yomwe tingadikhire mpakana mapeto kufika. Ndawa ya vimwevi, tingaleke kukhala wodekha panango tingakhale okhumudwa makamaka peno takhala tinkudikhira va ntsiku ya Yahova kwa nthawe itali. Ndipo vingakhale pomwe voshupa peno azibale wathu ankutiseka ndawa yakuti mapeto yakanati kufika. (2 Pet. 3:3, 4) Panango tingaganize pomwe kuti vidakakhala vosashupa kukhala odekha komasoti kupirira pomwe tinkutsutsiwa na anango sembe kuti tinkudziwa ntsiku chaiwo pomwe mapeto yadzafike.
6. Ndawa chani ni vabwino kusadziwa kuti mapeto yafike lini?
6 Shuwadi, ndawa yakuti alibe kutiuza ntsiku chaiwo yomwe mapeto yadzafike, Yahova ankutipasa mwayi wakuti tionese kuti timutumikira ndawa yakuti timukonda komasoti timuthemba. Isepano titumikiralini Yahova tina maganizo yakuti ntsiku inango tidzasiye ninge kuti tina madata mu msolo yakuti ntsiku inango chikhulupiriro chathu chidzamale. M’malo mwakuti timbandoganizire kuti nilini pomwe “ntsiku ya Yahova” idzafike, tingachite bwino kumbaganizira vinthu vabwino vomwe vidzachitike ntsiku mweiyo ikadzafika. Mwanjira mweyi, tidzakwanise kumufenderera maninge Yahova, kuingizira chikhupiriro chathu kwa iye na kuchita vose vomwe tingakwanise kuti timukodwerese.—2 Pet. 3:11, 12.
7. Ni vinthu viponi vomwe tinkudziwa?
7 Ni vabwino maninge kumbaganizira vomwe tinkudziwa vakuti ntsiku zomalizira zidayamba 1914. Yahova adatipasa maulosi ya m’Baibolo yomwe yandonenalini va magole yokha, koma yafotokoza pomwe bwinobwino momwe vinthu vakhala vinkuchitikira kundoyambira mu 1914. Ndipomwapa, tinkutsimikizira na ntima wose kuti ‘ntsiku ya Yahova iri pafupi.’ (Zef. 1:14) Tinkudziwa pomwe basa yomwe Yahova ankufuna kuti tiyichite yomwe ni kulalikira “ntontholo wabwino wa Ufumu kwa wanthu ose.” (Mat. 24:14) Ntotholo moyu unkulalikiriwa pafupifupi m’madziko 240 mu viyankhulo voposha 1000. Isepano tinkudekanalini mpakana kudziwa va “nthawe panango ntsiku” kuti tichite vomwe tingakwanise pa basa yodekana maninge mweyi.
TINKUDZIWALINI MOMWE YAHOVA ANGACHITIRE VINTHU
8. Ko mawu yakuti ‘basa ya Mulungu chaiye,’ yatanthauza chani? (Mlaliki 11:5)
8 Isepano ni nthawelini zose pomwe tingakwanise kudziwa ‘basa ya Mulungu chaiye.’ (Werengani Mlaliki 11:5.) Mawu mwaya yakutanthauza vomwe Yahova achita na vomwe iye wabvuma kuti vichitike na cholinga chakuti akwanirise cholinga chake. Isepano tidziwalini vinthu vose vomwe vichitisa kuti Yahova abvume chinthu chinango kuchitika komasoti na momwe iye angachitire vinthu na isepano. (Sal. 37:5) Baibolo ilinganiza kusabvesa basa ya Mulungu chaiye na kusabvesa kukula kwa mwana yemwe ali m’mimba mwa amayi wake. Olo wanthu wodziwa vizinji akwanisalini kudziwa bwinobwino momwe vimwevi vichitikira. Mwanjira ibodzibodzi isembo tingakwaniselini kubvesa bwinobwino momwe Yahova achitira vinthu.
9. Ndawa yosadziwa momwe Yahova adzachitire vinthu, ko nchani chomwe chingachitike?
9 Ndawa yosadziwa momwe Yahova adzachitire vinthu na isepano vingatichitise kukhala wokaika. Panango tingakhale na mantha yochita vomwe tingakwanise kuti timutumikire. Mwakulinganiza, kukhala na moyo wosafuna vinthu vizinji panango kufulukira kudera komwe kunkudekana ofalisa azinji. Tingayambe kuganiza kuti Yahova akutidalisalini peno tinkukwanisalini cholinga chathu, peno tinkuwonalini maphindu mutumiki, panango tinkubodera na bvuto inango pa basa inango yomwe tinkuthandizira mugulu yathu.
10. Ko ni makhalidwe yaponi yodekana yomwe tingakhale nayo ndawa yosadziwa momwe Yahova adzachitire vinthu?
10 Kusadziwa vomwe Yahova adzachite, kutilimbikisa maninge kukhala na makhalidwe ninge kudzichepesa. Tikwanisa kuona kuti Yahova nthawe zose adziwa vomwe ni vabwino. (Yes. 55:8, 9) Ndipo vitithandiza kupitiriza kuthemba maninge Yahova na kupfunzira kuthemba kuti adzatidalise. Tikakhala kuti tinkuphindula mutumiki panango pa basa iriyose yomwe tinkuthandizira mugulu yathu, tidekana kupereka ulemerero wose kwa yemwe adekana ulemerero moyu yemwe ni Yahova. (Sal. 127:1; 1 Akor. 3:7) Olo kuti vinthu vileke kuchitika munjira yomwe timbadikhira, tidekana kukumbukira nthawe zose kuti Yahova ankunyang’anira vinthu vose. (Yes. 26:12) Isepano tichite mbali yathu, nkuthemba kuti Yahova achitembo mbali yake. Tinkutsimikizira kuti iye adzatitsogolere olo kuti adzachitelini vimwevi munjira yodabwisa ninge momwe adachitira nthawe zinango kumbuyo.—Mac. 16:6-10.
11. Ko ni vinthu viponi vodekana vomwe tinkudziwa vokhudza Yahova?
11 Isepano tinkudziwa kuti Yahova nthawe zose ni wachikondi, wachilungamo komasoti wanzeru. Chinthu chinango chomwe tinkudziwa nchakuti Yahova atembeja maninge vomwe tichita kwa iye komasoti kwa abale na alongo wathu. Ndipo tinkukaikiralini ne pang’ono kuti nthawe zose Yahova adalisa omwe ni okhulupirika kwa iye.—Aheb. 11:6.
TINKUDZIWALINI VOMWE VIDZACHITIKE MANGWANA
12. Ko tapfunzira chani pa lemba ya Yakobo 4:13, 14?
12 Werengani Yakobo 4:13, 14. Chinthu chinango chomwe isepano tidziwa ni chakuti tingadziwelini chomwe chingachitike mangwana. Mudziko yomwe tinkukhala ino, tigumana na nthawe za tsoka komasoti ‘vinthu vosadikhirika.’ (Mla. 9:11) Ndawa ya vimwevi, tingakwaniselini kudziwa peno volinga vathu vikwanisike olo kuti tina moyo kuti tingakwanirise vomwe tinkufuna.
13. Ko vinthu vomwe tinkudziwalini vingatikhunze tani?
13 Kulimbana na vinthu vomwe tinkuvidziwalini kuti vikhale tani, vingakhale voshupa maninge. Ndawa chani? Panango tingakhale otagwanika maninge pakuganizira kuti chichitike mangwana nchani, ndipo nkuluza chimwemwe chathu. Moyo wathu ungachinje mwadzidzidzi, ndipo vimwevi vingatiwawe maninge mu ntima na kutichitisa kukhala okhumudwa. Ndipo vinthu vikaleka kuchitika munjira yomwe timbadikhira, vingatichitise kukhala okhumudwa.—Miy. 13:12.
14. Ko chimwemwe chathu chithemba chani? (Onani pomwe foto.)
14 Tikambalimbana na mabvuto, tina mwayi wowonesa kuti viribe basa vomwe vingachitike, titumikira Yahova ndawa yakuti timukonda osati ndawa ya dyera. Baibolo itionesa kuti Yahova angatitetezelini ku mabvuto yose yomwe yangachitike ndipo iye akonzeratulini vinthu vomwe vingachitike pa moyo wathu. Yahova ankudziwa kuti chimwemwe chathu chithembalini kudziwa vose vomwe vidzachitike kutsogolo. Koma chaivo ni vakuti chimwemwe chathu chithemba kukhala na malangizo ya Yahova na kuyatewedza. (Yer. 10:23) Tikambanyang’ana malangizo ya Yahova kuti tisalule vochita, tidzakhalelini na nkhawa na vomwe vingachitike. Vikhala ninge tinkunena kuti: “Yahova akabvuma, tikhale na moyo ndipo tichite vakutivakuti.”—Yak. 4:15.
Tikambafaga malangizo ya Yahova, tionesa kuti tinkumubvera iye ndipo tikhala otetezeka (Onani ndime 14-15)b
15. Ko tinkudziwa chani vokhudza ntsogolo?
15 Ni shuwadi kuti tinkudziwalini vomwe vidzachitike kutsogolo, koma chomwe tinkudziwa ni chakuti Yahova adatipolomisa moyo wosapera. Kwa anango akatambire moyo moyu kudzulu pomwe anango adzatambire moyo moyu pa dziko yapasi. Tinkudziwa pomwe kuti Yahova anganamelini ndipo palibe chomwe chingamuletse kukwanirisa mapolomisi yake yose. (Tito 1:2) Iye ndiye yekha yemwe ‘aneneratu vomwe vidzachitike ndipo kundochokera kale maninge aneneratu vomwe vidzachitike ntsogolo.’ Vose vomwe Yahova adanena kuti vidzachitike, vidachitikadi. Ndipo vose vomwe iye adanena kuti vidzachitike kutsogolo vidzachitikedi. (Yes. 46:10) Tinkutsimikizira na ntima wose kuti palibe chomwe chingaletse Yahova kutikonda. (Aro. 8:35-39) Viribe basa vomwe vingachitike pa moyo wathu iye atipasa nzeru, atinyamalisa ndipo atipasa pomwe vomwe tinkudekana kuti tikwanise kupirira. Tinkukaikiralini ne pang’ono kuti Yahova adzatithandize ndipo adzatidalise.—Yer. 17:7, 8.
TINGAKWANISELINI KUDZIWA BWINOBWINO MOMWE YAHOVA ATIDZIWIRA
16. Ko nchani chomwe Yahova adziwa kwa isepano chomwe isepano tingachikwaniselini kuchibvesa (Salimo 139:1-6)?
16 Werengani Salimo 139:1-6. Mulengi wathu adziwa bwinobwino vose vokhudza isepano. Ndipo adziwa pomwe va makhalidwe yathu na kawonekedwe kathu. Iye atibvesera nthawe zose. Kuingizira pakubva vomwe tinkuyankhula iye akwanisa bwinobwino kudziwa chomwe tinkufuna kunena. Yahova adziwa pomwe vose vomwe tichita, na chifukwa chomwe chitichitisa kuchita vimwevo. Mpfumu Davide adaonesa kuti Yahova nthawe zose ali tcheru kuti atithandize pa bvuto iriyose. Ko mudzibva tani ndawa yodziwa kuti Ambuya wa vinthu vose, Mulengi wa kudzulu na dziko yapasi, adera nkhawa munthu aliyese payekha? Ko nivosachitisa chidwi? Davide adanena kuti: ‘Kwa ine ni voshupa maninge kuti nibvese vinthu vimwevi. Ni vapadzulu maninge mwakuti ningakwaniselini kuvifikira.’—Sal. 139:6, mawu ya m’nyantsi.
17. Ko ndawa chani vingakhale voshupa kwa isepano kubvesa kuti Yahova atidziwa bwinobwino?
17 Ndawa ya komwe tidakulira, chikhalidwe chathu na vomwe timbakhulupirira kalekale tikalibe kupfunzira chonadi, nthawe zinango vingakhale voshupa kuona Yahova ninge Baba wachikondi yemwe atidera nkhawa. Panango tingakumbuke pomwe kuti vophonya vathu vakumbuyo ni vikulu maninge mwakuti Yahova angafunelini kuti tikhale naye pa ushamwali ndipo ali kutali maninge na isepano. Olo Davide ambadzibvambo tene nthawe zinango. (Sal. 38:18, 21) Panango vingachitike kuti munthu yemwe ankuchita nkhama kuti ambachite vinthu vomwe vikondweresa Yahova angadzibvunze kuti: ‘Peno Yahova anidziwa bwino, ko ndawa chani iye ankufuna kuti nisiye umoyo womwe ninkuona kuti ni wabwino kwa inepano?’
18. Ko ndawa chani ni vabwino kutsimikizira kuti Yahova atidziwa kuposha momwe isepano tidzidziwira tekha? (Onani pomwe foto.)
18 Nivabwino kubvuma kuti Yahova atidziwa bwino maninge kuposha momwe isepano tidzidziwira na kuti iye awona vinthu vabwino kwa isepano vomwe tikwanisalini kuviona tenkha. Olo kuti iye awona vophonya vathu, awona pomwe khama yomwe tichita kuti tiyesese kukhala na makhalidwe yabwino ndipo atikonda maninge. (Aro. 7:15) Takwanisadi kubvesa kuti Yahova adziwa vomwe tingakwanise. Vimwevi vitipasa mphanvu kuti tipitirize kumutumikira mokhulupirika komasoti mokondwa.
Tikambalimbana na mabvuto yosadikhirika, Yahova atithandiza kupirira pakulimbisa chikhulupiriro chathu nkumbakumbukira mapolomisi ya kutsogolo (Onani ndime 18-19)c
19. Ko tinkudziwa chani vokhudza Yahova?
19 Tidziwa kuti Yahova ni chikondi. Tinkukaikiralini vimwevi olo pang’ono. (1 Yoh. 4:8) Tinkudziwa pomwe kuti vose vomwe iye atikumbira, atikumbira ndawa yakuti atikonda ndipo atifunira vinthu vabwino. Tinkudziwa pomwe kuti Yahova ankufuna kuti isepano tidzatambire moyo wosapera. Ndipo kuti vimwevi vikwanisike, iye adatipasa dipo. Phaso mweyi, ititsimikizira kuti olo kuti ndise ochimwa tingakwanise kumukondweresa Yahova. (Aro. 7:24, 25) Ndipo tinkudziwa kuti “Mulungu ni nkulu kuposha mitima yathu ndipo adziwa vose.” (1 Yoh. 3:19, 20) Yahova adziwa vose vokhudza isepano ndipo iye atsimikizira kuti isepano tingakwanise kuchita vose vomwe angatikumbire.
20. Ko ndawa chani tidekanalini kukhala na nkhawa na vomwe tinkudziwalini?
20 Yahova anena vose vomwe isepano tidekana kudziwa. Tikakhala odzichepesa nkubvuma vimwevi, tidzakhalelini na nkhawa na vinthu vomwe tinkudziwalini. M’malo mwa vimwevi tingambayikhire nzeru pa vinthu vomwe ni vodekana. Mwanjira mweyi, tidzawonese kuti ndise odzichepesa ndipo tithemba Yahova ‘yemwe adziwa chirichose.’ (Yobu 36:4) Ni shuwadi kuti tingakwaniselini kubvesa vinthu vinango manjeuno, koma tinkudziwa kuti Yahova apitirize kutipfunzisa mpakana kalekale. Vimwevi ni vabwino maninge ndawa yakuti tidzalekerini kupfunzira vinthu vabwino va Mulungu wathu wachikondi, Yahova.—Mla. 3:11.
NYIMBO 104 Mzimu Woyera Ndi Mphatso Yochokera Kwa Mulungu
a Yesu, adzatsogolere pa nkhondo yomenyana na dziko ya Satana iyi. Ndipomwapa, nivobveka manjeuno kunena kuti manje iye ankudziwa ntsiku ya Arumagedo na kuti nilini pomwe iye “adzapambane pa nkhondo mweyi.”—Chiv. 6:2; 19:11-16.
b MAWU YOFOTOKOZERA FOTO : M’bereki na mwana wake ankukonzekera kashola kapangozi kuti banja ikhale yotetezeka peno pangachitike vinthu vosadikhirika.
c MAWU YOFOTOKOZERA FOTO: M’bale yemwe ankulimbana na mabvuto, ankuganizira chimwemwe chomwe adzakhale nacho kutsogolo mu dziko inyowani.