NKHANI YOPFUNZIRA 10
NYIMBO NA. 31 Muziyenda Ndi Mulungu!
Tewedzerani kaganizidwe ka Yahova na Yesu
“Pakuti Khrisitu adabonera pa nthawe yomwe wenze munthu, namwembo konzekerani pakukhala na maganizo yolingana na yomwe Khrisitu wenze nayo.”—1 PET. 4:1.
CHOLINGA
Kuona vomwe Petulo adapfunzira na kaganizidwe ka Yesu na kuona vomwe tingapfunzirepo.
1-2. Ko kukonda Yahova kuphatanidza chani, ndipo Yesu adaonesa tani chikondi chimwechi?
YESU adafotokoza lamulo yodekana maninge mu Chilamulo cha Mose pomwe adanena kuti: “Mumbakonde Yahova Mulungu wanu na ntima wanu wose, moyo wanu wose, mphanvu zanu zose na maganizo yanu yose.” (Luka 10:27) Kukonda Yahova kuphatanidza pomwe ntima wathu, vokhumba vathu, vokonda vathu na vomwe tichita. Ndipo kuphatanidza pomwe kudzipereka kwathu kwa iye na mphanvu zathu zose kuchokera pasi pa ntima. Kuingizira pamwapa, kukonda Yahova kukhudza maganizo yathu na vomwe tiganiza. Ni shuwadi kuti tidzabveselini maganizo ya Yahova yose. Koma tingakwanise kubvesa momwe iye aganizira tikambapfunzira “maganizo ya Yesu.” Inde, ndawa yakuti Yesu adatewedzera mwaugwiro kaganizidwe ka Ababa wake.—1 Akor. 2:16.
2 Yesu ambakonda Yahova na maganizo yake yose. Iye ambadziwa vomwe Yahova ambafuna kuti achite ndipo wenze wotsimikiza kuchita vimwevo olo kuti vidakamubweresera mabvuto. Yesu ambayikha maganizo yake pakuchita chifuniro cha Ababa wake. Ndipomwapa, iye alibe kubvuma kuti pagumanike pomwe chinthu chinango chodekana maninge kuposha vimwevi.
3. Ko ni mwayi uponi womwe Petulo wenze nawo, ndipo adalimbikisa Akhrisitu kuchita chani? (1 Petulo 4:1)
3 Petulo na atumi anango enze na mwayi wokhala pabodzi na Yesu nkumbawona momwe iye ambaganizira. Pomwe Petulo adanemba kalata yake yoyamba, iye adalimbikisa Akhrisitu kuti adzikodzekerese kuti akhale na maganizo yolingana na ya Yesu, kutanthauza kumbaganiza ninge iye. (Werengani 1 Petulo 4:1.) Mawu yomwe Petulo adaphatisa basa yakuti “konzekerani” yaphatisiwa basa kawirikawiri kwa masocha. Ndipomwapa, tinganene kuti kuganiza ninge Yesu ni chida cha nkhondo chomwe ni champhanvu maninge chomwe chingatithandize pakulimbana na maganizo yathu yofuna kuchita vinthu voipa komasoti na dziko ya Satana iyi.—2 Akor. 10:3-5; Aef. 6:12.
4. Ko tipfunzire chani mu nkhani mweyi?
4 Mu pfunziro mweyi tione vinthu vitatu, (1) momwe tingatewedzerere maganizo ya Yahova, (2) kukhala odzichepesa ndipo (3) kukhala oganiza bwino. Kuti tipfunzire vimwevi naboni tione momwe Yesu angaganizira komasoti momwe tingamutewedzerere.
MBAGANIZANI NINGE YAHOVA
5. Ko ni pavochitika viponi vomwe Petulo alibe kuganiza ninge Yahova?
5 Nthawe inango Petulo wenzelini na kaganizidwe ka Yahova pa vinthu vinango. Yesu adauza atumi wake kuti adzayende ku Yerusalemu ndipo kumuko akamangiwe na atsogoleri wa chipembedzo, kudzudziwa mpakana kufa. (Mat. 16:21) Petulo ambadziwa kuti Yesu ni Mesiya wopolomisiwa yemwe adzapulumuse wanthu wa Mulungu. Ndipomwapa, panango venze voshupa kwa iye kubvesa kuti Yahova angabvume kuti Mwana wake abonere teneuyu. (Mat. 16:16) Ndipomwapa, Petulo adatenga Yesu nkuyenda naye pambali nkumuuza kuti: “Dzikomereni ntima Ambuya. Ayi kubvuma kuti vimwevi vikuchitikireni olo pang’ono.” (Mat. 16:22) Koma Yesu alibe kubverana navo vimwevi ndawa yakuti Petulo ambaganizalini ninge Yahova.
6. Ko Yesu ambaonesa tani kuti ambatewedza kaganizidwe ka Yahova?
6 Yesu ambatewedzera mwaungwiro kaganizidwe ka Ababa wake. Ndipomwapa, iye adamuuza Petulo kuti: “Yenda kumbuyo kwangu Satana! Ndiwe chokhukhumudwisa kwa ine, ndawa vomwe uganiza ni maganizolini ya Mulungu, koma ni maganizo ya wanthu.” (Mat. 16:23) Volinga va Petulo panango venze vabwino, koma Yesu alibe kubvuma malangizo yake. Yesu ambadziwa kuti Yahova ankufunalini kuti iye ambandoganizira vofuna vake vokha. Pachochitika mwechi Petulo adapfunzira kudekana kwakuganiza ninge Yahova. Imweyi ni pfunziro ikulu maninge kwa isepano.
7. Ko Petulo adachinja tani kaganizidwe kake kuti ambaganize molingana na Yahova? (Onani foto.)
7 Patsogolo pake Petulo adaonesa kuti ankufunambo kukhala na kaganizidwe ka Yahova. Vimwevi vidaonekera pomwe idafika nthawe yakuti wanthu wa makhaindi yanango omwe enzelini Ayuda achitembo mbali ya wanthu wa Yahova. Yahova adatuma Petulo kuti akalalikire Koneliyo yemwe wenze munthu woyamba wa khaindi inango kuti akhale tumiki wa Yahova. Ayuda ambabveranalini na wanthu wa makhaindi yanango. Ndipomwapa, ni vosadabwisa kuti Petulo ambadekana kuchinja kaganizidwe kake. Patsogolo pakuti Yahova wamuthandiza Petulo kubvesa chifuniro chake, iye adachinja kaganizidwe kake na momwe angaonera wanthu wa makhaindi yanango, ndipo “alibe kuzeza” kuyenda kukagumana na Koneliyo. (Mac. 10:28, 29) Ndipo phindu ni yakuti iye adalalikira Koneliyo na wanthu wose wa m’banja yake ndipo iwo adabatizika.—Mac. 10:21-23, 34, 35, 44-48.
Petulo na anzake ankungena m’nyumba mwa Koneliyo (Onani ndime 7)
8. Ko tingaonese tani kuti tiganiza ninge Yahova? (1 Petulo 3:8 na mawu ya m’nyantsi)
8 Magole yanganani patsogolo pake, Petulo adalimbikisa Akhrisitu kuti ambakhale na “maganizo yabodzi” panango kuti kuganiza molingana. (Werengani 1 Petulo 3:8 na mawu ya m’nyantsi.) Tingachite vimwevi tikapfunzira m’Baibolo momwe Yahova aganizira ndipo nkumbamutewedzera. Mwakulinganiza, Yesu adalimbikisa ateweri wake kuti ambayikhe Ufumu wa Mulungu pa malo yoyamba pa moyo wawo. (Mat. 6:33) Pakuganiza vimwevi, panango m’bale munango wa mumpingo mwathu angasalule kutumikira ninge mpainiya panango kuyamba utumiki wa nthawe zose. Tichadekanalini kunena vinthu vomwe vingamukhumudwise m’bale muyo, panango kunena vinthu vomwe vingamuchitise kuti iye ambandoganizira va iye yekha. M’malo mwa vimwevi, tichadekana kumbayankhula vinthu volimbikisa pa volinga vake nkumbamuthandiza.
KHALANI ODZICHEPESA
9-10. Ko ni chitsanzo chikulu chiponi chodzichepesa chomwe Yesu adachionesa?
9 Ntsiku yomaliza ya moyo wake akanati kuphewa, Yesu adapfunzisa Petulo na atumi anango khalidwe yabwino maninge ya kudzichepesa. Wasala pang’ono kuphewa, Yesu wenze adakumbira Petulo na Yohani kuti akamukonzere chakudya chomaliza akanati wafa. Chibodzi mwa chinthu chomwe iwo adachita panango chenze kuikha basiya na thaulo kuti munthu munango asambise mapazi ya wanthu omwe enze adachemerewa akanati kudya chakudya. Manje ko ni mbani yemwe adakakhala wodzichepesa maninge kuti achite basa mweyi?
10 Mosaganiza kawiri, Yesu adapereka chitsanzo chikulu maninge cha kudzichepesa. Iye adachita chinthu chomwe kawirikawiri chimbachitiwa na kapolo. Mosakaika atumi adachita chidwi maninge na vimwevi. Baibolo inena kuti Yesu adavula malaya yake yakunja, nkumangirira thaulo nchiuno mwake nkuikha madzi m’basiya ndipo adayamba kusambika mapazi yawo. (Yoh. 13:4, 5) Yesu adasambika mapazi ya atumi wake ose 12 kuphatanidzapo Yudasi yemwe patsogolo pake adadzamupereka. Vidamutengera nthawe kuti amalize basa mweire, koma adapitiriza kukhala wodzichepesa ndipo adamaliza kuwasambika ose. Patsogolo pake iye adafotokoza modekha kuti: “Ko mukudziwa kuti ndawa chani nakusambikani mapazi yanu? Imwepo munichemera kuti: ‘Mpfunzisi’ komasoti ‘Ambuya’ muchita bwino, ndawa ndinedi Mpfunzisi komasoti Ambuya. Manje peno inepano yemwe ndine Ambuya komasoti Mpfunzisi, nasambika mapazi yanu, imwembo mufunika kusambikana mapazi.”—Yoh. 13:12-14.
Kudzichepesa chaiko kuphatanidza maganizo yathu ya pasi pa ntima . . .
11. Ko Petulo adaonesa tani kuti wenze adapfunzira kukhala wodzichepesa? (1 Petulo 5:5) (Onani pomwe foto.)
11 Petulo adapfunzira na kudzichepesa kwa Yesu. Pomwe Yesu adabwerera kudzulu, Petulo adachita vodabwisa. Iye adachirisa mwamuna munango yemwe adabadwa wopunduka. (Mac. 1:8, 9; 3:2, 6-8) Gulu ya wanthu idawona chodabwisa mwechi ndipo adamuzungulira (Mac. 3:11) Ko Petulo adakaphatisa basa mwayi moyu kuti atambire ulemu ndawa yakuti muchikhalidwe chawo kutambira ulemu chenze chinthu chodekana maninge? Neye, Petulo adakhala wodzichepesa, ndipo alibe kubvuma kuti ulemerero ubwere kwa iye. Ndipo adapereka ulemerero wose kwa Yahova na Yesu nkunena kuti: “Ndawa ya dzina yake komasoti ndawa yakuti tikhulupirira dzina yake mwiyo, munthu yemwe mukumuwona komasoti kumudziwa uyu wapola.” (Mac. 3:12-16) Mu kalata yake inango yoyenda kwa Akhrisitu, Petulo adawalimbikisa kukhala wodzichepesa. Mawu mwaya yankutikumbusa pomwe Yesu adamangirira thaulo nchiuno mwake kuti asambike mapazi ya atumi.—Werengani 1 Petulo 5:5.
Patsogolo pakuti wachita chodabwisa Petulo adadzichepesa ndipo adapereka ulemerero wose kwa Yahova na Yesu. Isepanombo tingakhale odzichepesa pakuchita vithu vabwino mosadikhira kuti tiwine chinthu chinango panango kupagaliwi (Onani ndime 11-12)
12. Ko tingapitirize tani kukulisa khalidwe yodzichepesa ninge, Petulo?
12 Tingatewedzere chitsanzo cha Petulo pa kukulisa khalidwe yodzichepesa. Koma kumbukirani kuti voyankhula vathu nivokwaniralini kuti tionese kuti ndise odzichepesa. Petulo adaphatisa basa mawu yakuti “maganizo yodzichepesa,” vomwe vitanthauza kuti kudzichepesa chaiko kuphatanidza pomwe maganizo yathu ya pasi pa ntima. Tichita vinthu vabwino kwa wanthu anango ndawa yakuti tikonda Yahova komasoti wanthu. Osati ndawa yakuti tinkufuna kuti tilemekezewe. Isepano tingaonese kuti ndisedi odzichepesa tikambatumikira Yahova na abale wathu mokondwa, olo kuti wanthu anango angaonelini vomwe tingachite.—Mat. 6:1-4.
KHALANI “WOGANIZA BWINO”
13. Ko kukhala “woganiza bwino” kuphatanidza chani?
13 Ko kukhala “woganiza bwino” kuphatanidza pomwe chani? (1 Pet. 4:7) Mkhrisitu woganiza bwino achita khama kuti asalule vinthu vomwe ni vobverana na maganizo ya Yahova. Iye abvesa kuti palibe chinthu chodekana maninge pa moyo wake kuposha ushamwali wake na Yahova. Kuingizira mwapa, iye adziwona mwachikatikati ndipo azindikira kuti adziwalini vose. Munthu yemwe ni woganiza bwino awonesa kuti athemba Yahova pa kupemphera nthawe zose kukumbira malangizo yake.a
14. Ko ni pavochitika viponi pomwe Petulo alibe kuthemba Yahova?
14 Usiku womalizira akanati kuphewa, Yesu adauza atumi wake kuti: “Mose imwepo muthawe nkunisiya nekha.” Pakudzithemba maninge, Petulo adadawira kuti: “Podiya anango wose awa athawe nkukusiyani, ine nekha ningathawelini!” Usiku moule Yesu adalangiza anango mwa opfunzira wake kuti: “Khalani maso ndipo mupitilize kupemphera.” (Mat. 26:31, 33, 41) Sembe Petulo adaphatisa basa malangizo mwaya, mosakaika iye adakakhala wolimba ntima nkudawira kuti wenze nteweri wa Yesu. Koma iye adalamba Ambuya wake ndipo adawawiwa ntima maninge na vomwe adachita.—Mat. 26:69-75.
15. Ko nchani chomwe chidathandiza Yesu kuti apitirize kukhala woganiza bwino pa usiku womaliza akanati kuphewa?
15 Yesu ambathemba maninge Yahova. Olo kuti wenze waungwiro, iye adapemphera mobwerezabwereza akanati kufa. Vimwevi vidamuthandiza kuti akhale wolimba ntima nkuchita vomwe Yahova ambafuna kuti iye achite. (Mat. 26:39, 42, 44; Yoh. 18:4, 5) Petulo adaona pomwe Yesu ambapemphera pa nthawe yoshupa mweire ndipo vimwevi vidakhudza maninge moyo wake.
16. Ko tinkudziwa tani kuti Petulo adadzakhala woganiza bwino? (1 Petulo 4:7)
16 Kuyenda kwa nthawe, Petulo adayamba kuthemba maninge Yahova. Ndipo adapemphera kukumbira malangizo yake. Patsogolo pakuti Yesu wamukisiwa iye adatsimikizira Petulo na atumi anango kuti iwo adzatambire mzimu uchena kuti akwanise kulalikira ntontholo wabwino. Koma Yesu adawakumbira kuti adikhire ku Yerusalemu mpakana vimwevi kuchitika. (Luka 24:49; Mac. 1:4, 5) Ko Petulo ambachita chani pomwe ambadikhira? Iye pabodzi na Akhrisitu anango “adapitiriza kupemphera.” (Mac. 1:13, 14) Nkuyenda kwa nthawe mu kalata yake yoyamba, Petulo adalimbikisa Akhrisitu kuti akhale woganiza bwino na kupitiriza kupemphera kwa Yahova kukumbira malangizo yake. (Werengani 1 Petulo 4:7.) Petulo adapfunzira kuthemba Yahova ndipo adakhala wothandiza maninge mumpingo.—Agal. 2:9.
17. Mosatengera maluso yathu ko nchani chomwe tichadekana kupiriza kuchita? (Onani pomwe foto.)
17 Kuti tikhale woganiza bwino, tichadekana kupitiriza kupemphera kwa Yahova viribe basa luso yomwe tinayo. Tikafuna kusalula vinthu vodekana maninge, isepano tipemphera kwa Yahova kukumbira malangizo yake nkuthemba kuti iye ankudziwa vinthu vomwe ni vabwino kwa isepano.
Petulo adapfunzira kuthemba Yahova na kumbapemphera nthawe zose. Peno tinkufuna kukhala oganiza bwino, tichadekana kukumbira malangiza kwa Yahova makamaka pomwe tinkufuna kuchita chosalua chodekana maninge (Onani ndime 17)b
18. Ko tingamutewedzere tani bwinobwino Yahova?
18 Ni vabwino maninge kuti Yahova adatilenga munjira yakuti timbakwanise kutewedzera makhalidwe yake. (Gen. 1:26) Ni vobveka kuti tingakwaniselini kumutewedzera Yahova mwaugwiro. (Yes. 55:9) Koma ninge Petulo, tinkufuna kuti nthawe zose timbatewedzerere maganizo ya Yahova nkukulisa khalidwe yodzichepesa na kukhala oganiza bwino.
NYIMBO NA. 30 Atate Wanga, Mulungu Wanga Ndiponso Bwenzi Langa
a Kuti tidziwe vizinji vomwe vitanthauza kukhala oganiza bwino, onani pa jw.org panango pa JW Library mu nkhani yakuti: “Kufotokoza mavesi a m’baibulo” pa “2 Timoteyo 1:7 —‘Mulungu sanatipatse mzimu wamantha,’” pa kamsolo kakuti “Kuganiza bwino.”
b MAWU YOFOTOKOZERA FOTO : Mulongo ankupemphera cha mutima pomwe ankudikhira kuchita intrevista ya basa.