Thandizani pfunziro yanu kuti iyambe kutumikira Yahova

1-2. (a) Ko ndawa chani opfunzira Baibolo anango angazeze kukhala kumbali ya chonadi? (b) Ko tipfunzire chani mu nkhani mweyi?

KO MUDAKAIKIRAKO kale vokhala wa Mboni za Yahova? Panango mumbachita mantha ndawa yakuti anzanu wa kubasa, azichamwali wanu panango azibale wanu angayambe kukutsutsani. Panango mumbachita mantha kuti mudzakwaniserini kuchita vinthu mobverana na mpfundo za Mulungu. Peno mudabvako kale tene, vingakhale vosashupa kuti muthandize mapfunziro ya Baibolo yomwe yankukaikira kukhala ku mbali ya chonadi.

² Yesu, adazindikira kuti mantha ninge mwaya yangakangise munthu kukula mwauzimu. (Mat. 13:20-22) Koma iye alibe kusiya kuwathandiza wanthu wale omwe ambachita matha kuti ayambe kumutewera. Komasoti adathandiza opfunzira wake kuona momwe angawathandizire wanthu mwawa (1) kudziwa vinthu vomwe vingawachitise kuti aleke kukula mwauzimu, (2) kukulisa chikondi chawo kwa Yahova, (3) kuikha Yahova pa malo yoyamba ndipo (4) kudziwa vomwe angachite peno ankutsutsiwa. Ko tingaphatise tani basa vinthu vomwe Yesu adauza opfunzira wake pakuphatisa basa bukhu yakuti Kondwani na moyo mpaka kalekale! kuti tithandize pfunziro yathu ya Baibolo kukhala ku mbali ya chonadi?

THANDIZANI PFUNZIRO YANU KUDZIWA VINTHU VOMWE VINGAMUKANGISE KUTUMIKIRA YAHOVA

3. Ko nchani chomwe chidamukangisa Nikodemo kukhala nteweri wa Yesu?

³ Nikodemo yemwe wenze ntsogoleri wodziwika maninge kwa Ayuda, adalimbana na bvuto inango kuti akhale m’mbodzi mwa ateweri wa Yesu. Pomwe padapita minyezi 6 Yesu wayamba utumiki wake, Nikodemo adazindikira kuti Yesu ambaimira Yahova. (Yoh. 3:1, 2) Nikodemo adasalula kugumana na Yesu payekha “ndawa ambagopa Ayuda.” (Yoh. 7:13; 12:42) Panango ambaona kuti aluze vinthu vizinji akakhala nteweri wa Yesu.a

4. Ko Yesu adamuthandiza tani Nikodemo kubvesa vomwe Yahova ambafuna kuti iye achite?

⁴ Nikodemo ambachidziwa Chilamulo, koma ambadekana thandizo kuti akwanise kudziwa vomwe Mulungu ambafuna kuti iye achite. Ko Yesu, adamuthandiza tani? Yesu wenze wokonzeka kumuthandiza nthawe iriyose olo pomwe Nikodemo adayenda kukagumana na Yesu usiku. Yesu adamuuza mobveka bwino vomwe iye ambadekana kuchita kuti akhale nteweri wake, ninge kulapa machimo yake, kubatizika m’madzi na kukhulupirira kuti Yesu ni mwana wa Mulungu.—Yoh. 3:5, 14-21.

5. Ko tingathandize tani pfunziro ya Baibolo kudziwa vinthu vomwe vinkumukangisa kupita patsogolo?

⁵ Olo kuti pfunziro yathu iwonese kuti idziwa malemba, iye angadekane thandizo kuti adziwe chomwe chinkumukangisa kuti apite patsogolo. Basa yake, kutsutsiwa na azibale vingamukangise kuti akwanirise cholinga chake chauzimu. Ndipomwapa, khalani wokonzeka kuthandiza pfunziro yanu. Mungamukumbire kuti mukadye naye pabodzi panango kuzunga naye pabodzi. Kuchita vinthu ninge vimwevi, vingamuchitise kuti iye amasuke nkukuuzani va mabvuto yake. Limbikisani pfunziro yanu kuti ichinje vinthu vodekana osati na cholinga chakuti ikukondwereseni, koma na cholinga chakuti ikondwerese Yahova.

6. Ko mungathandize tani pfunziro ya Baibolo kukhala yolimba ntima kuti ikhale ku mbali ya chonadi? (1 Akorinto 16:13)

⁶ Pfunziro ya Baibolo ikakhala kuti inkutsimikizira kuti Yahova adzamuthandize kuchita vinthu vobverana na mpfundo za m’Baibolo, iye adzachite khama kuphatisa basa vinthu vomwe ankupfunzira. (Werengani 1 Akorinto 16:13.) Basa yanu yopfunzisa, tingailinganize na ticha. Mukakumbukira pa nthawe yomwe mugayenda kushikola, ko mumbakonda ticha wamakhalidwe yaponi? Panango mungakonda ticha yemwe ambakuthandizani modekha kuti mumbadzithembe. Molingana na vimwevi, mpfunzisi wabwino wa Baibolo, andopfunzisalini vomwe Mulungu afuna kuti timbachite, koma alimbikisa pomwe pfunziro yake kuti na thandizo ya Yahova angakwanise kuchinja vinthu vinango pa moyo wake kuti amutumikire. Ko imwepo mungachite tani vimwevi?

THANDIZANI PFUNZIRO YANU KUKULISA CHIKONDI CHAKE KWA YAHOVA

7. Ko Yesu adathandiza tani wanthu omwe ambamubvesera kuti ambakonde Yahova?

⁷ Yesu ambadziwa kuti kukonda Mulungu kudzathandize opfunzira wake kuphatisa basa vomwe enze adapfunzira. Kazinjikazinji, iye ambapfunzisa opfunzira wake vinthu vomwe vingawathandize kuingizira chikondi chawo kwa Ababa wake wakudzulu. Mwakulinganiza, iye adalinganiza Yahova na baba yemwe akwanisa kupasa vinthu vabwino wana wake. (Mat. 7:9-11) Anango mwa wanthu omwe ambamubvesera Yesu, panango ambaonesa lini chikondi ninge mwechi kwa wana wawo. Ganizirani momwe adabvera pomwe Yesu adanena chitsanzo cha baba wachifundo, yemwe adatambira mwana wake yemwe wenze adasiya kumubvera. Iwo adakwanisa kuona chikondi chomwe Yahova achionesa kwa wana wake pa dziko yapasi.—Luka 15:20-24.

8. Ko mungathandize tani pfunziro ya Baibolo kukulisa chikondi chake kwa Yahova?

⁸ Imwepo mungakwanise kuthandiza pfunziro yanu ya Baibolo, kuti ikulise chikondi chake kwa Yahova pa kumupfunzisa va makhalidwe yabwino yomwe Yahova anayo. Pomwe munkupfunzira msolo uliwose, thandizani pfunziro yanu kulinganiza vomwe inkupfunzira na momwe chikondi cha Yahova chiriri. Pa kumufotokozera va dipo, muthandizeni kuona kuti pa kupereka dipo mweyi, Yahova alibe kundokonda wanthu ninge gulu, koma akonda pomwe iye payekha. (Aro. 5:8; 1 Yoh. 4:10) Shuwadi, pfunziro yanu ingalimbikisike nkuyamba kukonda maninge Yahova, akazindikira momwe Yahova amukondera payekha.—Agal. 2:20.

9. Ko nchani chomwe chidathandiza Michael kuchinja vinthu pa moyo wake?

⁹ Onani chitsanzo cha Michael wa ku Indonésia. Iye adakulira m’banja ya mboni koma alibe kubatizika. Pomwe adakwanisa magole 18, iye adayenda kudziko inango kuti akaphate basa yofambisa karo. Patsogolo pake adalowola koma adasiya banja yake nkuyenda kudziko inango kuti akapitirize kuphata basa. Pa nthawe mweyi, nkazi wake na mwana wake adayamba kupfunzira Baibolo ndipo adapita patsogolo. Pa nthawe yomwe amayi wake adamwalira, iye adaganiza vobwerera kumuyi kuti akasamalire ababa wake, ndipo adabvumambo kuyamba kupfunzira Baibolo. Pomwe angapfunzira mbali yakuti “pfunzirani vizinji” ya msolo 27 mu bukhu yakuti Kondwani na moyo mpaka kalekale! Michael adakhudziwa maninge. Pakuganizira momwe Yahova adabvera pomwe angaona mwana wake ankubonera, Michael adagwesa misozi. Iye adaonesa kutembeja maninge dipo, mpakana vidamulimbikisa kuchinja vinthu pa moyo wake nkubatizika.

THANDIZANI PFUNZIRO YANU YA BAIBOLO KUCHINJA VINTHU PA MOYO WAKE

10. Ko Yesu adathandiza tani opfunzira wake kuikha vinthu vodekana pa malo yoyamba? (Luka 5:5-11) (Onani pomwe foto.)

¹⁰ Opfunzira oyamba, adazindikira mwakankulumize kuti Yesu wenze Mesiya wopolomisiwa, koma ambadekana thandizo kuti akwanise kuikha utumiki pa malo yoyamba. Petulo na Andireya, enze kale opfunzira wa Yesu pomwe iye adawakumbira kuti amutewere pakuchita utumiki wa nthawe zose. (Mat. 4:18, 19) Vinkuoneka kuti iwo ambaphata basa yakupha ntsomba pabodzi na Yakobo na Yohani. (Maliko 1:16-20) Pomwe Petulo na Andireya ‘adasiya vose’ nkuyamba kutewera Yesu, panango iwo adachita mapulani yanango kuti akwanise kusamalira mabanja yawo. Ko nchani chomwe chidachitisa kuti achinje vinthu pa moyo wawo? Nkhani yomwe iri mbukhu ya Luka iwonesa kuti Yesu adachita chodabwisa chomwe chidawalimbikisa maninge kuti Yahova angakwanise kuwasamalira.—Werengani Luka 5:5-11.

11. Ko tingaphatise tani basa chitsanzo chathu kuti tilimbikise pfunziro yathu?

¹¹ Tingakwaniserini kuchita vodabwisa ninge momwe Yesu adachitira. Koma tingafotokoze vitsanzo va momwe Yahova athandizira wale omwe amuikha pa malo yoyamba. Mwakulinganiza, ko munkukumbukira momwe Yahova adakuthandizirani pomwe mudayamba kugumanika pa misonkhano? Panango mumbadekana kuchita kuyankhula na bwana wanu nkumuuza kuti mukwaniserini kupitiriza kuphata basa nthawe zoingizira na cholinga chakuti mumbagumanike pa misonkhano. Pomwe munkufotokozera pfunziro yanu vomwe mwagumana navo, muuzeni momwe chikhulupiriro chanu chalimbira pa kukwanirisa cholinga chanu cha kuikha kupemphera chaiko pa malo yoyamba.

12. (a) Ko ndawa chani tidekana kutenga ofalisa osiyana siyana nkuyenda nawo ku pfunziro? (b) Ko mungaphatise tani basa mavidiyo kuti muifike pa ntima pfunziro yanu? Perekani chitsanzo.

¹² Pfunziro yanu ingalimbikisiwe pomwe nakubva momwe Akhrisitu anango achinjira vinthu pa moyo wawo kuti aikhe kupemphera chaiko pa malo yoyamba. Ndipomwapa, tengani abale na alongo omwe ana vikhalidwe vosiyanasiyana kuti muyende nawo ku pfunziro yanu. Akumbireni kuti afotokoze momwe adapfunzirira chonadi, na vomwe adachita kuti basa ya Yahova chikhale chinthu chodekana pa moyo wawo. Kuingizira mwapa, patulani nthawe kuti munyang’anire naye mavidiyo yomwe yagumanika pa mbali yakuti “pfunzirani vizinji” panango pa mbali yakuti “kuti mudziwe vizinji” mu bukhu yakuti Kondwani na moyo mpaka kalekale!. Mwakulinganiza, pomwe munkupfunzira msolo 37 wa bukhu mweyi, mungachite bwino kuifotokozera bwinobwino pfunziro yanu mpfundo zogumanika mu vidiyo yakuti: Yahova adzasamalire vosowa vathu.

THANDIZANI PFUNZIRO YANU YA BAIBOLO KULIMBANA NA MABVUTO

13. Ko Yesu adakonzekeresa tani opfunzira wake kulimbana na viyeso?

¹³ Yesu kawirikawiri ambawauza opfunzira wake kuti adzatsutsiwe na wanthu anango komasoti azibale wawo. (Mat. 5:11; 10:22, 36) Pomwe utumiki wake umbafika kumapeto, iye adachenjeza opfunzira wake kuti adzagumane na mabvuto ndipo patsogolo pake adzaphewe. (Mat. 24:9; Yoh. 15:20; 16:2) Iye adawalimbikisa kuti ambakhale ochenjera pa utumiki wawo. Adawauza pomwe kuti ayi kuti ambagegedzane na munthu aliyese yemwe ankuwatsutsa, koma adekana kukhala tcheru nthawe zose na vomwe angawanenere na chakulinga chakuti apitirize na utumiki wawo.

14. Ko tingathandize tani pfunziro yathu kulimbana na viyeso? (2 Timoteyo 3:12)

¹⁴ Ninge Yesu, tingalimbikise pfunziro yathu kuti ikonzekere kutsutsiwa pa kumufotokozera vinthu vomwe iye angadikhire kubva kwa anzake wakubasa, azishamwali wake na azibale wake. (Werengani 2 Timoteyo 3:12.) Anango mwa anzawo waku basa, angambawagozali ndawa yakuti achinja moyo wawo pakufuna kutewedza mpfundo za m’Baibolo. Pomwe anango angambatsutsiwe na mavizinyu yawo ndawa ya mpfundo za m’Baibolo zomwe iwo ankupfunzira. Tikambakonzekeresa mapfunziro yathu kulimbana na viyeso, iwo adzakwanise kupirira akadzagumana navo.

15. Ko nchani chomwe chingathandize pfunziro ya Baibolo kukhala yolimba pomwe ankutsutsiwa na wanthu wa m’banja yake?

¹⁵ Peno pfunziro yanu inkutsutsiwa na wanthu wa m’banja mwake, muuzeni vinthu vomwe vingachitise iwo kukhala okhumudwa. Panango iwo angambaganize kuti wa Mboni za Yahova apfunzisa vinthu va bodza, panango ingandokhala tsankho ndawa yosafuna wa mboni. Olo Yesu adagumanambo na vinthu vosowa chilungamo ninge mwevi kuchokera kwa azibale wake pomwe iwo ambaganiza kuti iye ankupenga. (Maliko 3:21; Yoh. 7:5) Thandizani pfunziro yanu kuti ipitirize kukhala yodekha, komasoti kuti ambayankhule mokoma ntima kwa wanthu wose kuphatanidzapo wa m’banja yake.

16. Ko tingathandize tani pfunziro ya Baibolo kuti imbafotokoze vomwe ikhulupirira munjira yabwino?

¹⁶ Wanthu wa m’banja yake akafuna kudziwa vizinji vokhudza Baibolo, vingakhale bwino kuti wopfunzira Baibolo moyu achifotokoza vinthu ving’onong’ono m’malo mofotokoza vinthu vizinji nthawe ibodzi. Ndawa yakuti akafotokoza vinthu vizinji pa nthawe ibodzi, wanthu wa m’banja yake mwawo angafoke ndipo angafunelini kudziwa vinthu vizinji vokhudza Baibolo. Ndipomwapa, limbikisani pfunziro yanu kuti akambafotokoza vinthu vokhudza Baibolo, ambafotokoze munjira yakuti pambakhale mpata wakuti adzacheze pomwe pa nthawe inango. (Akol. 4:6) Panango angandokumbira wanthu wa m’banja yake kuti aone wokha pa saiti ya jw.org. Mwapang’ono pang’ono vimwevi vingachitise kuti iwo apfunzire vizinji vokhudza Wamboni za Yahova.

17. Ko tingathandize tani pfunziro ya Baibolo kulimbana na maganizo yoipa yomwe wanthu anango anayo pa nkhani ya Wamboni za Yahova? (Onani pomwe foto.)

¹⁷ Imwepo mungaphatisire pomwe basa ndandanda ya nkhani yakuti “Mafunso Ofunsidwa Kawirikawiri” pa jw.org kuti muthandize pfunziro yanu kukonzekera midawiro yasashupa ya mibvunzo yomwe azibale wake na anzake wa kubasa angamuchite. (2 Tim. 2:24, 25) Pa kumaliza msolo uliwose, kambiranani naye mbali yakuti “wanthu anango achati” mbukhu yakuti Kondwani na moyo mpaka kalekale!. Limbikisani pfunziro yanu kuti imbakonzekere midawiro pakuphatisa basa mawu yakeyake. Ayi kuzeza kumuuza momwe iye angachitire kuti ambakonzekere bwino. Kuchita vimwevi kungamuthandize kuti ambafotokoze vomwe akhulupirira molimba ntima.

18. Ko mungathandize tani pfunziro yanu kufotokoza vomwe ichakhulupirira mu umboni? (Mateyu 10:27)

¹⁸ Yesu adalimbikisa opfunzira wake kuti ambalalikire ntontholo wabwino kwa wanthu azinji. (Werengani Mateyu 10:27.) Pfunziro yathu ikayamba mwakankulumize kufotokoza va chikhulupiriro chake, vichitisa kuti iyambe mwakankulumize kuthemba Yahova. Ko mungathandize tani wopfunzira Baibolo kuti chimwechi chikhale cholinga chake? Kumpingo akalengeza basa yapadera yolalikira, muthandizeni wopfunzira wanu kuti aone vomwe angachite kuti akhale wofalisa. Muthandizeni kuona momwe wanthu azinji aonera kukhala vosashupa kuyamba kulalikira pa nthawe ya padera mweyi. Iye angaphindule pomwe, akadzipereka kuti ambakambe nkhani pa misonkhano ya nkati mwasondo. Akapfunzira kukamba nkhani, iye angakwanise kufotokoza bwinobwino vomwe akhulupirira molimba ntima.

ONESANI KUTI MUTHEMBA PFUNZIRO YANU

19. Ko Yesu adaonesa tani kuti ambathemba opfunzira, ndipo tingamutewenzere tani?

¹⁹ Akalibe wayenda kudzulu, Yesu adauza opfunzira wake kuti adzaonane pomwe. Opfunzira wa Yesu mwawa alibe kubvesa kuti iwo adzayendembo kudzulu. Olo nteno, Yesu ambandoganizira va kukhulupirika kwawo osati vinthu vomwe iwo ambavibvesa lini. (Yoh. 14:1-5, 8) Iye ambadziwa kuti opfunzira wake ambadekana nthawe kuti abvesese vinthu vinango ninge va chidikhiro choyenda kudzulu. (Yoh. 16:12) Molingana na Yesu, tingaonesembo kuti tinkukhulupirira kuti pfunziro yathu inkufuna kukondweresa Yahova.

20. Ko mulongo munango waku Malawi adaonesa tani kuti ambathemba pfunziro yake?

²⁰ Tidekana kukhulupirira kuti pfunziro yathu inkufuna kuchita vinthu vodekana. Mwakulinganiza, onani chitsanzo cha Chifundo, mulongo munango yemwe akhala ku Malawi. Iye adayambisa pfunziro ya Baibolo pakuphatisa basa bukhu yakuti Kondwani na moyo mpaka kalekale! na ntsikana munango wa katolika dzina yake Alinafe. Pomwe adamaliza kupfunzira msolo 14, Chifundo adabvunza pfunziro yake va nkhani yophatisira basa fano popemphera. Koma Alinafe adamudawira kuti: “Chimwechi ni chosalula chamunthu.” Pamwapa Chifundo adadzibvunza kuti peno angayime kupfunzira naye Baibolo. Koma iye adapitiriza kukhala wodekha pakupfunzira na Alinafe, nachidikhiro chakuti ntsiku inango adzabvese. Pomwe yadapita minyezi yanganani patsogolo pake, pomwe adafika pa msolo 34, Chifundo adamubvunza Alinafe kuti: “Ko kupfunzira Baibolo komasoti va Mulungu wachikondi Yahova, kwakuthandiza tani mpakana pano?” Chifundo ankufotokoza momwe Alinafe adadawirira. Iye adafotokoza mpfundo zizinji zochitisa chidwi ndipo ibodzi mwa iyo ni yakuti: “Wa Mboni za Yahova achitalini vinthu vomwe Baibolo iletsa.” Nthawe pang’ono patsogolo pake, Alinafe adasiya kuphatisa basa mafano ndipo adayenerera kubatizika.

21. Ko tingalimbikise tani shungu yomwe pfunziro yathu inayo yofuna kumbateteza chonadi?

²¹ Olo kuti ‘Mulungu ni yemwe akulisa,’ isepano tina udindo wothandiza pfunziro ya Baibolo kuti ipite patsogolo. (1 Akor. 3:7) Tichita vizinji pakuingizira kumupfunzisa vomwe Mulungu afuna kuti iye achite. Tithandizira kuti akulise chikondi chake kwa Yahova komasoti timulimbikisa kuonesa chikondi mwechi pakuchinja vinthu vinango pa moyo wake, kuti aikhe vinthu vodekana pa malo yoyamba. Ndipo timulimbikisa pomwe kuti ambathembe Yahova akagumana na mabvuto. Pakuonesa momwe timuthembera, tilimbisa chikhulupiriro chake chakuti iyembo angakwanise kuchita vinthu mobverana na mpfundo za m’Baibolo na kukhala wolimba pa kusalula kutumikira Yahova.