NKHANI YOPFUNZIRA 39
NYIMBO NA. 54 “Njira ni iyi”
Ayi kuchebwa kuthandiza wanthu omwe ankuchita chidwi na chonadi
“Wanthu wose omwe enze na maganizo yabwino yomwe yadakawathandiza kugumana moyo wosapera adakhala wokhulupirira.”—MAC. 13:48.
CHOLINGA
Ni vodikana kuyambisa mapfunziro ya Baibolo na kuyachemerera kumisonkhano yathu.
1. Ko wanthu anango angachite tani tikawalalikira? (Machitidwe 13:47, 48; 16:14, 15)
MU NTHAWE ya Akhrisitu woyambirira, wanthu azinji adabvuma chonadi pomwe adabva va ntontholo wabwino. (Werengani Machitidwe 13:47, 48; 16:14, 15.) Ntsiku zinombo wanthu anango achita chidwi akandobva va chonadi kwa nthawe yoyamba. Koma anango awonesalini chidwi pa nthawe yoyamba. Koma kuyenda kwa nthawe iwo ayamba kuchita chidwi na ntontholo wa Ufumu. Ko tingachite tani tikagumana wanthu omwe ana “maganizo yabwino”?
2. Ko basa yopfunzisa wanthu inkulingana tani na basa ya mulimi?
2 Basa yoyambisa mapfunziro ni yolingana maninge na basa yolima kudimba. Mulimi akandoona kuti matomati yanango yapsa, ayathyoleratu. Koma iye apitiriza kuthiriza matomati yanango yomwe yakanati kupsa. Isembo tikandoona munthu wachidwi, timbamupfunzisiretu kuti akhale wopfunzira wa Yesu. Koma timbapitirize kuthandiza omwe akalibe chidwi nkumbawauza momwe angaphindulire akayamba kupfunzira. (Yoh. 4:35, 36) Tikakwanisa kubvesa kuti peno munthu ana chidwi panango neye na ntontholo wathu, vikhala vosashupa kudziwa momwe tingamuthandizire. Mupfunziro mweino, tione vomwe tingachite pa ulendo woyamba kuti tithandize munthu yemwe ankufuna kutibvesera. Ndipo tipfunzire pomwe mwatingamuthandizire kuti apitirize kupita patsogolo.
MWATIGATHANDIZIRE MUNTHU WACHIDWI
3. Tikambalalikira, ko tingachite tani peno tagumana munthu wachidwi? (1 Akorinto 9:26)
3 Tikagumana na munthu chidwi, tidekana kumupfunzisa va Yahova kuti akhale naye pa ushamwali. Ndipomwapa, pa ulendo woyamba tidekana kuyambisa pfunziro ya Baibolo, nkumuchemerera kumisonkhano yathu.—Werengani 1 Akorinto 9:26.
4. Fotokozani chitsanzo cha munthu yemwe wenze wokonzeka kuyamba pfunziro nthawe mweyo.
4 Yambisani pfunziro ya Baibolo. Anango abvumiratu nthawe mweyo kupfunzira Baibolo. Mwakulinganiza, ntsiku inango pa Chinayi, mtsikana munango waku Canadá adafenderera kasherufu komwe kenze na vofalisa, ndipo adatenga bolosha yakuti Kondwani na moyo mpaka kalekale! Mulongo yemwe wenze pa kasherufu mwaka adamuuza kuti na kabolosha mwaka, iye angayambe kupfunzira Baibolo fovolo. Mtsikana moyu adachita chidwi maninge ndipo adapasana namba za foni. Ntsiku ibodzibodzi mweyo, mtsikana moyu adatumizira mensaje mulongo ule nkumubvunza kuti nilini pati adzapfunzire. Mulongo muyo padati angapfunze naye kumapeto kwa sondo, mtsikana ule adati: “Tani tigumane mangwana? Nidzakhale na mpata.” Iwo adayamba kupfunzira pa Chishanu. Ndipo mtsikana ule adayamba kugumanika pa misonkhano yakumapeto kwa sondo mweire ndipo adapitiriza kuyenda patsogolo.
5. Pa vochitika vinango, ko nichani chomwe tidekana kuchita tikanati kuyambisa pfunziro ya Baibolo? (Onani pomwe mafoto.)
5 Koma ni wanthulini wose omwe angabvumiratu kabodzi na kabodzi kupfunzira Baibolo ninge mtsikana moyu. Anango angatenge nthawe kuti awonese chidwi. Tingafunike kuyamba na nkhani yomwe angaikonde. Tikachita khama nkupitiriza kuwonesa kuti tikonda wanthu, kwa kanthawe kang’onog’ono tingakwanise kuyambisa pfunziro ya Baibolo. Ko tinganene chani peno tinkufuna kuyambisa pfunziro ya Baibolo? Tidachita mbvunzo moyu abale na alongo azinji omwe viwashupalini kuyambisa mapfunziro ya Baibolo. Naboni tione vomwe iwo adafotokoza.
Ko tinganene chani kuti tithandize wanthu kufuna kupfunzira Baibolo? (Onani ndime 5)a
6. Ko tinganene chani kuti munthu akhale na chifuno chopitiriza macheza?
6 Abale mwawa adafotokoza kuti m’madera yanango, pakunena va pfunziro ya Baibolo ni vabwino kupewa kufotokoza vinthu ninge kuti: “Mapfunziro,” “kosi yopfunzira Baibolo,” panango mawu yakuti “inepano nikupfunziseni imwepo.” Iwo adazindikira kuti mawu yabwino ni yakuti: “Macheza,” “timbachezerane va Baibolo” na “kuthandizana kubvesa Baibolo.” Kuti munthu afune kupitiriza macheza, imwepo mungamuuze kuti: “Nivochitisa chidwi maninge momwe Baibolo idawirira mibvunzo yodekana maninge pa moyo,” panango kuti “Baibolo ni ya wanthulini okha omwe ayenda kutchetchi. Iyo itipasa malangizo yabwino ya momwe tingachitire vinthu ntsiku na ntsiku.” Ndipo tinganene pomwe kuti: “Ni kanthawe kang’onog’ono basi, 10 panango 15 minutu. Mukanthawe mwaka tingapfunze vinthu vothandiza.” Kuti osati achite mantha, timbapewe kumuuza kuti: “Nimbabwere sondo iriyose.”
7. Ko ni pa nthawe iponi pomwe anango abvesa kuti ankupfunzira chonadi? (1 Akorinto 14:23-25)
7 Muchemereni kuti abwere kumisonkhano. Mu nthawe ya ntumi Paulo, vinkuwoneka kuti anango adabvesa kuti ankupfunzira chonadi padagumanika pa misonkhano. (Werengani 1 Akorinto 14:23-25.) Ntsiku zino vichitikambo kawirikawiri. Opfunzira wathu azinji apita patsogolo mwakankulumize akandoyamba kugumanika pa misonkhano. Ko ni nthawe yabwino iponi yatingawachemerere? M’bukhu yakuti Kondwani na moyo mpaka kalekale! pa msolo 10 pafotokoza momwe tingayachemerere. Koma osadikhira kuti mudzafikiretu pa msolo muyo. Pa ntsiku yoyamba, mungamuchemerere kumisonkhano ya kumapeto kwa sondo. Mungamuuze msolo wa nkhani ya wose panango mpfundo yothandiza maninge ya mupfunziro ya Ntsanja ya ulonda.
8. Ko tinganene chani, tikambachemera munthu kuti abwere pamisonkhano yathu? (Yesaya 54:13)
8 Pochemerera munthu wachidwi kumisonkhano, muuzeni momwe momwe misonkhano yathu yaliri yosiyana na matchetchi yanango. Wopfunzira munango yemwe adagumanika koyamba pa Ntsanja ya ulonda, adabvunza mulongo yemwe ambamupfunzisa kuti: “Ko ambachitisa ntsanja wale adziwa madzina ya wanthu wose kani?” Mulongo muyo adati tiyesesa kudziwana madzina ninge wanthu wa m’banja ibodzi. Wopfunzira muyo adati kutchetchi kwathu tidziwanalini bwinobwino. Chinango chatingamuuze wopfunzira, ni cholinga cha misonkhano yathu. (Werengani Yesaya 54:13.) Isepano tiyenda kumisonkhano kuti tikatumikire Yahova, tikapfunzire va iye na kulimbikisana. (Aheb. 2:12; 10:24, 25) Ndipomwapa, misonkhano yathu yakonzewa kuti tipfunzire vinthu vinyowani, osati kombandobwerezerabwerezera. (1 Akor. 14:40) Nyumba ya Ufumu ni malo yakuti munthu aliyese angabwere kudzapfunzira va Yahova. Pakuti tingenereralini ndale, tikhalalini ku chipani chirichose ndipo tigumanikalini pa misonkhano yawo. Tingachite bwino kumuwonesa vidiyo yakuti N’chani Chichachitika mu Nyumba za Ufumu? Tikachita tene, iye adzayende kumisonkhano ankudziwa kale vomwe vikachitike.
9-10. Ndawa chani anango azeza kubwera kumisonkhano yathu, ndipo tingawathandize tani? (Onani pomwe foto.)
9 Anango azeza kubwera kumisonkhano ndawa yoganiza kuti tidzawauze kuti akhaliretu wa Mboni. Ndipomwapa mutsimikizireni kuti tidzamutambire bwino ndipo tidzamuchichimizelini kuti akhaliretu wa Mboni panango kuchita chinthu chomwe ankufunalini. Titambira wose, kuphatanidzapo wana. Pa misonkhano yathu, wana akhalalini pamalo yosiyana na akuluakulu. Koma azibereki na wana wawo akhala pabodzi ndipo apfunzirira pabodzi. Mwanjira mweyi, azibereki adziwa kuti ko wana wawo ali kuponi nakuti ankupfunzira chani. (Deut. 31:12) Ndipo kufambisiwalini puleti kuti wanthu ambapereke kobiri. Isepano titewedzera malangizo ya Yesu yakuti: “Mudatambira fovolo ndipo mumbaperekembo fovolo.” (Mat. 10:8) Mungamuuze pomwe kuti ankudekanalini kuchita kukhala na vovala vodula maninge kuti abwere kumisonkhano yathu. Yahova aonalini mawonekedwe yathu, koma awona ntima wathu.—1 Sam. 16:7.
10 Munthu yemwe tamuchemera akabwera kumisonkhano, yesesani kuchita vomwe mungakwanise kuti iye akhale womasuka. Mudziwikiseni kwa akulu na kwa abale na alongo anango. Akambadzibva kuti watambiriwa bwino, vingachitise kuti adzabwere pomwe. Peno iye alibe Baibolo, khalani naye pafupi kuti ambawonembo malemba. Kuingizira mwapa, muthandizeni kubvesa nkhani yomwe inkukambiwa na momwe titewedzerera ndandanda.
Munthu akayamba mwakankulumize kugumanika pa misonkhano, adzamufenderere Yahova mwakankulumize (Onani ndime 9-10)
MWATINGATHANDIZIRE WOPFUNZIRA WATHU
11. Ko mungaonese tani kuti musunga nthawe ya munthu yemwe mupfunzira naye?
11 Tikayamba kupfunzira na munthu, timbafike panthawe yatidapangana ndawa iye akhalambo na vochita vinango. Ayi kumbatewedzera wanthu omwe asungalini nthawe. Ndipo pa ntsiku yoyamba, ayi kupfunzira naye kwa nthawe itali. Abale na alongo anango wodziwa vizinji adati vikhala vabwino kumulaira olo kuti adakali kufuna kubva vinango. Ayi kumbayankhula vizinji, koma mbamupasani mpata wopfunzira wanu kuti afotokoze vakumoyo kwake.—Miy. 10:19.
12. Tikandoyamba pfunziro, ko cholinga chathu chidekana kukhala chiponi?
12 Mukandoyamba kupfunzira na munthu, mbamuthandizani kuti adziwe bwino Yahova na Yesu nkuyamba kuwakonda maninge. Kuti vikwanisike, pewani kumbadziwonesa kuti ndimwe wanzeru maninge. Koma muthandizeni kumbaganizira Yahova na vomwe ankupfunzira. (Mac. 10:25, 26) Ntumi Paulo ni chitsanzo chabwino pa nkhani mweyi. Popfunzisa wanthu, iye ambanena maninge va Yesu, yemwe adabwera pa dziko kudzatithandiza kuti tidziwe Yahova na kumukonda. (1 Akor. 2:1, 2) Paulo adawonesa kuti makhalidwe mwaya ni yodikana maninge, ndipo tingayalinganize na ouro, siliva panango minyala yodekana maninge. (1 Akor. 3:11-15) Makhalidwe mwaya yankuphatanidzapo chikhulupiriro, kudziwa vinthu, kuzindikira na kugopa Yahova. (Sal. 19:9, 10; Miy. 3:13-15; 1 Pet. 1:7) Tewedzerani momwe Paulo angapfunzisira, ndipo thandizani opfunzira wanu kuti akhale na chikhulupiriro cholimba na kukhala pa ushamwali wolimba na Ababa wawo wakudzulu.—2 Akor. 1:24.
13. Ko tingakhale tani odekha komasoti obvesera tikambathandiza pfunziro yathu? (2 Akorinto 10:4, 5) (Onani pomwe foto.)
13 Pakupfunzisa, tewedzerani chitsanzo cha Yesu kukhala wodekha na obvesera. Pewani kumbachita mibvunzo yomwe yangachitise munthu kumangika. Peno pfunziro yanu inkukwanisali kubvesa mpfundo inango, pitirizani kupfunzira ndipo mungadzanene pomwe mpfundo mweyo nthawe inango. M’malo mochichimiza wopfunzira wanu kuti abvume mpfundo inango, mupaseni nthawe kuti chonadi chizike mizu muntima mwake. (Yoh. 16:12; Akol. 2:6, 7) Baibolo ilinganiza vipfunziso vabodza na vinthu vomwe tinkufuna kugwesa. (Werengani 2 Akorinto 10:4, 5.) Vikhala voshupa kuti munthu asiye vomwe akhulupirira. Koma olo nteno, tifunika kumuthandiza kuti ayambe kukhulupirira vazedi vomwe ankupfunza.—Sal. 91:9.
Pasani nthawe pfunziro yanu kuti chonadi chizike mizu mu ntima mwake (Onani ndime 13)
KO TINGATHANDIZE TANI MUNTHU YEMWE WAYAMBA KUGUMANIKA PA MISONKHANO?
14. Ko tingachite tani vinthu na wanthu wale omwe ayamba kugumanika pamisonkhano yathu?
14 Yahova afuna kuti timbakomere ntima wanthu wose, osati kukhala watsankho. Viribe basa ntundu, vinthu vomwe munthu anavo panango komwe munthu adachokera. (Yak. 2:1-4, 9) Manje ko tingawonese tani chikondi kwa womwe ayamba kugumanika pa misonkhano yathu?
15-16. Ko tingathandize tani wale omwe ni koyamba kugumanika pamisonkhano yathu kuti akhale omasuka?
15 Anango agumanika pa misonkhano yathu pofuna kudziwa momwe yachitikira, panango ndawa yakuti wa Mboni wakudera inango adawalimbikisa kusonkhana. Munthu akabwera ku Nyumba ya Ufumu, timbamutambire bwino na kucheza naye. Koma osati timbachite vinthu vomuchitisa manyazi. Khalani naye mpando ubodzi ndipo mumbawone naye pabodzi Baibolo yanu na vofalisa vanu. Ndipo peno ni vokwanisika gumanani vofalisa kuti mumupase. Kuingizira mwapa, yesani kubvesa maganizo yake. Mwamuna munango yemwe adagumanika pa misonkhano yathu, adauza m’bale yemwe adamutambira kuti ambachita manyazi ndawa yakuti wenze alibe vovala vabwinobwino. Koma m’bale muyo adamuthandiza kuti akhale womasuka, ndipo adamuuza kuti ise wa Mboni za Yahova ndiselini wanthu wapadera. Patsogolo pake, mwamuna moyu adabatizika. Koma iye ayebwalini m’dawiro moule. Nthawe zose pocheza na munthu, timbapewe kumubvunza vinthu vochitisa manyazi.—1 Pet. 4:15.
16 Peno tinkucheza na wanthu omwe abwera panango tinkukamba nkhani, timbakhale waulemu. Timbapewe kufotokoza vinthu vomwe vingamukhumudwise panango kuchitisa munthu kuti aleke kudzafuna pomwe kubwera kumisonkhano yathu. (Tito 2:8; 3:2) Mwakulinganiza, tidekanalini kunyoza vinthu vomwe iwo akhulupirira. (2 Akor. 6:3) Abale womwe akamba nkhani za wose, adekana kukhala wosamala maninge pa nkhani mweyi. Iwo adekanalini kufotokoza vinthu vomwe wanthu womwe abwera kudzatizungira angakwaniselini kuvibvesa.
17. Ko tingachite tani tikagumana wanthu ‘omwe ana maganizo yabwino yomwe yangadzawathandize kudzagumana moyo wosapera’?
17 Ntsiku iriyose ikambapita, basa yoyambisa mapfunziro inkufunika kuchitika mwakankulumize maninge. Isepano tipitirize kufaga wanthu womwe ana ‘maganizo yabwino yomwe yangawathandize kudzagumana moyo.’ (Mac. 13:48) Ndipomwapa, tidekanalini kuzeza kuyambisa mapfunziro ya Baibolo panango kuwachemerera kuti abwere kumisonkhano yathu. Mwanjira mwiyi, tingawathandize kuti ayambe kufamba pa “nsuwo woyenda kumoyo.”—Mat. 7:14.
NYIMBO NA. 64 Tinkuphatambo mokondwa basa yokolola
a MAWU YOFOTOKOZERA FOTO: Abale awiri ankucheza na nsocha yemwe ankupumula pa muyi pake. Alongo awiri ankucheza mwachigwato na m’mayi munango yemwe ni wotangwanika.