Ko mwakonzekera chisautso chikulu?

1. Ndawa chani ni vabwino kukonzekera matsoka yachilengedwe?

KUKONZEKERA kupulumusa moyo wathu pakachitika matsoka yachilengedwe. Kungatithandize, kukhala na mwayi wopulumuka pakachitika matsoka yachilengedwe komasoti kuthandiza anango. Bungwe inango yopereka thandizo ku Europa idati: “Kukonzekera bwino kungatithandize maninge.”

2. Ndawa chani tichadekana kukonzekera chisautso chikulu? (Mateyu 24:44)

² ‘Chisautso chikulu’ chiyambe manjemanje. (Mat. 24:21) Koma mosiyana na matsoka yanango isepano tinkuyidikhira nthawe mweyi. Kwa magole 2000 kumbuyo, Yesu adachenjeza opfunzira wake kuti achadekana kukhala wokonzekera ntsiku mweyi. (Lewengani Mateyu 24:44.) Tikakhala wokonzeka, vidzakhale vosashupa kuti tipite mu nthawe yoshupa mweyi, na kuthandiza anango kuchita vibodzibodzi.—Luka 21:36.

3. Ndawa chani kupirira, chikondi na chifundo vitithandize kukonzekera chisautso chikulu?

³ Tikambirane makhalidwe yatatu yomwe yangatithandize kuti tikhale wokonzeka chisautso chikulu. Ko tidzachite tani peno tidzayambe kudzudziwa ndawa yakuti tinkulengeza ntontholo wachiweruzo? (Chiv. 16:21) Tidzafunike kupirira kuti tidzabvere Yahova tichimbatsimikiza kuti iye atiteteze. Ko tidzachite tani peno abale wathu aluza vinthu panango kuluza vinthu vose vakuthupi? (Hab. 3:17, 18) Tidzafunike kuwonesa chifundo kuti tidzakwanise kuwathandiza. Ko tidzachite tani peno kudzudziwa na mabungwe yawanthu kudzachitise kuti tikhale pakamalo kang’onong’ono pabodzi na abale na alongo wathu kwa kanthawe? (Ezek. 38:10-12) Tidzafunike kukhala na chikondi chikulu kwa abale wathu kuti tidzakwanise kupirira pa nthawe yoshupa mweyi.

4. Ko ni malemba yaponi yomwe yankuonesa kuti tifunika kupitiriza kuwonesa kupirira, chifundo komasoti chikondi?

⁴ Mawu ya Mulungu yatilimbikisa kuti tipitirize kukhala wopirira, wachifundo na wachikondi. Lemba ya Luka 21:19 ilewa kuti: ‘Peno imwepo mudzapirire mudzagumane moyo.’ Lemba ya Akolose 3:12 ilewa kuti: ‘Valani chifundo.’ Ndipo Lemba ya 1 Atesalonika 4:9, 10 ilewa kuti: ‘Mulungu adakupfunzisani kuti mumbakondane. . . . Koma isepano tinkukudandaulirani abale kuti, mupitirize kuchita vimwevi kawirikawiri.’ Mawu mwaya yadanemberewa Akhrisitu womwe ambawonesa kale kupirira, chifundo komasoti chikondi. Podiya kuti venze teno iwo ambafunika kupitiriza kuwonesa makhalidwe mwaya ndipo isepanombo tichadekana kuchita vibodzibodzi. Kuti tidziwe momwe tingachitire vimwevi naboni tiwone momwe Akhrisitu woyambirira adawonesera makhalidwe mwaya. Tiwone pomwe momwe tingawatewedzerere Akhrisitu mwawa kuti tikhale wokonzekeradi chisautso chikulu.

YESESANI KUKHALA WOPIRIRA

5. Ko Akhrisitu oyambirira ambachita tani kuti akwanise kupirira mabvuto?

⁵ Akhrisitu woyambirira ambafunika kukhala wopirira. (Aheb. 10:36) Iwo ambagumana na mabvuto yomwe wanthu anango ambagumana nayombo nthawe mweyire. Koma iwo ambagumana na mabvuto yazinji ndawa yakuti enze Akhrisitu. Azinji adadzudziwa na azitsogoleri wachipembedzo Chachiyuda na akuluakulu wa boma ya Roma. Kuyingizira pamwapa iwo ambadzudziwa pomwe na wa m’banja mwawo chayimo. (Mat. 10:21) Ndipo nkati mwampingu ambafunika kulimbana na vipfunziso vabodza va wanthu wampatuko, vomwe vikadachitisa kuti abale na alongo aleke kumbabvana. (Mac. 20:29, 30) Olo kuti venze teno, Akhrisitu mwawa adapirira. (Chiv. 2:3) Ko iwo adakwanisa tani? Iwo ambaganizira vitsanzo va m’malemba va wanthu womwe adapirira ninge chitsanzo cha Yobu. (Yak. 5:10, 11) Ndipo iwo ambapemphera pomwe kwa Yahova kuti awapase mphanvu. (Mac. 4:29-31) Iwo ambaganizira pomwe phindu yomwe angagumane akapitiriza kukhala opirira.—Mac. 5:41.

6. Ko mwapfunzira chani pa vomwe Merita adachita kuti akwanise kupirira?

⁶ Isembo tingakwanise kupirira peno tiwerenga vitsanzo va wanthu omwe adapirira vogumanika m’Baibolo na m’mabukhu yathu. Mulongo munango waku Albânia dzina yake Merita, adachita vimwevi ndipo adakwanisa kupirira pomwe angatsutsiwa na wanthu wa m’banja mwake, iye adati: “Nkhani ya Yobu ndiyo idanithandiza maninge. Iye adabonera maninge koma ambadziwalini kuti ni mbani yemwe ankuchitisa mabvuto yake. Olo venze teno Yobu adati ‘mpakana kufa kwangu nidzalekelini kukhala wokhulupirika kwa Yahova!’ (Yobu 27:5) Inepano nimbaganizira kuti mabvuto yangu ni yang’onong’ono pakulinganiza na mabvuto yomwe Yobu adagumana nayo ndipo mosiyana na Yobu inepano nimbadziwa yemwe ambachitisa mabvuto mwaya.”

7. Podiya kuti tinkugumanalini na bvuto ikulu manjeuno, ko mungapfunziliretu kuchita chani?

⁷ Kuti timbakwanise kupirira tifunika kupemphera kwa Yahova na kumuuza vose vomwe vinkutishupa. (Afil. 4:6; 1 Ates. 5:17) Koma panango imwepo manjeuno munkugumanalini na bvuto ikulu. Koma ko imwepo mupemphera kwa Yahova na kukumbira kuti akuthandizeni pa nthawe iliyose yomwe ndimwe wokwinyirira, wopanikizika panango kusowa chochita? Peno imwepo mu na chizolowezi chopemphera kwa Yahova kuti akuthandizeni pa mabvuto ya ntsiku na ntsiku, ndiye kuti mudzachite pomwe vibodzibodzi. Mukachita teno mudzakhale wotsimikiza kuti Yahova ankudziwa nthawe chaiyo yomwe angakuthandizeni na momwe angachitire vimwevi.—Sal. 27:1, 3.

8. Ko chitsanzo cha Mira chinkuwonesa tani kuti tikambayesesa kupirira manjeuno tidzakwanise kupirira pa mabvuto yakutsogolo? (Yakobo 1:2-4) (Onani pomwe foto.)

⁸ Tikambayesesa kupirira mabvuto manjeuno, vidzakhale vosashupa kupirira pa chisautso chikulu. (Aro. 5:3) Ko tinkudziwa tani vimwevi? Abale na alongo azinji nthawe iliyose yomwe akuyesesa kupirira mabvuto yoyesa chikhulupiriro chawo akhala na mphanvu kuti adzakwanise kupirira mabvuto yakutsogolo. Akagumana na bvuto koma nkukwanisa kupirira akhala wotsimikiza maninge kuti Yahova nthawe zose ni wokonzeka kuwathandiza. Kukhulupirira vimwevi kuwathandiza kuti adzapirire mabvuto yali kutsogolo. (Lewengani Yakobo 1:2-4.) Vimwevi ndivo vomwe vidachitikira mpayiniya munango wa ku Albânia dzina yake Mira, ndawa ya mabvuto yomwe iye adakwanisa kupirira kumbuyo adzibva kuti ni wokonzeka kupirira manjeuno. Iye adati: Nthawe zinango ambaganiza kuti ndiye yekha yemwe ankugumana na mabvuto yazinji. Vikakhala teno iye ambaganizira momwe Yahova wamuthandizira magole 20 kumbuyo ndipo akateno ambadziuza kuti: ‘Pitiriza kukhala wokhulupirika ayi kuyebwa vomwe Yahova wakuchitira kumbuyo, pale iye wakuthandiza kuti upirire mabvuto yazinji maninge.’ Imwembo mungachite bwino kuganizira momwe Yahova wakuthandizirani kupirira mabvuto. Khalani wotsimikiza kuti Yahova nthawe zose awona mukambapirira, ndipo adzakudaliseni. (Mat. 5:10-12) Ndipo chisautso chikulu chikadzayamba, imwepo mudzakhale kuti munkudziwa kale kupirira ndipo mudzakhale wotsimikiza kupitiriza kuchita vimwevi.

KHALANI WACHIFUNDO

9. Ko abale na alongo wa mpingu wa ku Antiokeya wa ku Siriya adawonesa tani chifundo?

⁹ Onani vomwe Akhrisitu adachita pomwe abale wa ku Yudeya angabonera na njala. Mpingu wa ku Antiokeya wa ku Siriya padabva kuti abale wawo ali panjala iwo adachita chifundo maninge. Koma sikuti adandobva chifundo basi nkuvisiya teno koma adawathandiza. ‘Iwo adatsonkha vinthu mobverana na momwe aliyese adakwanisira nkuvitumiza ku Yudeya.’ (Mac. 11:27-30) Podiya kuti abale na alongo omwe enze panjala ambakhala kutali maninge, Akhrisitu wa ku Antiokeya enze wofunisisa kuwathandiza.— 1 Yoh. 3:17, 18.

10. Ko tingaonese tani chifundo pomwe abale wathu womwe tinkutumikira nawo Yahova akagumana na matsoka ya nchilegedwe? (Onani pomwe foto.)

¹⁰ Isepano tingawonesembo chifundo ntsiku zino, tikandodziwa kuti abale wathu ali pabvuto. Timbawathandize mwakankulumize, tingayankhule na akulu na kudzipereka kuti tithandize pa basa iliyose. Tingachite pomwe vopereka vothandiza pa basa ya padziko yose panango kupempherera womwe ankugumana na matsoka yachilengedwe mwaya.b (Miy. 17:17) Mwakulinganiza, mu 2020, padakonzewa makomiti yoposha 950 padziko yose kuti yathandize omwe ankubonera na matenda ya Koronaviru. Isepano tinkutembeja abale na alongo wose omwe adadzipereka pa basa yothandiza abale wawo. Chifundo ndicho chidalimbikisa abale na alongo mwawa. Ndipo mwapa awapasa anzawo vinthu ndipo awathandiza kukhala pa ushamwali wolimba na Yahova. Ndipo nthawe zinango iwo afika pakumanga Nyumba za Ufumu panango kukonza zomwe zadzongeka.—Mungawone pomwe 2 Akorinto 8:1-4.

11. Ko tilemekeza tani Yahova tikambaonesa chifundo abale wathu?

¹¹ Tikambaonesa chifundo kukachitika matsoka, wanthu anango achaona khama yomwe tichachita. Mwakulinganiza, mu 2019 chimphepo chochemerewa, Hurricane Dorian chidadzonga Nyumba ya Ufumu yaku Bahamas. Pomwe angafuna kumanga Nyumba ya Ufumu mweyi, abale adakumbira munthu munango yemwe wenzelini wa Mboni za Yahova kuti atchadje kobiri zomwe angapasiwe pakukonza pomwe Nyumba ya Ufumu mweyi. Iye adauza abale wale kuti: “Imwepo munkufunikalini kupagali kobiri iliyose . . . Inepano nigule vitsulo vose vomangira. . . . Nichite vimwevi ndawa ya momwe [imwepo] muliri obverana ndipo nidabwa maninge na vomwe imwepo muchachitira azibale wanu.” Wanthu azinji ku dziko amudziwalini Yahova. Koma azinji wa iwo achaona Mboni za Yahova. Ise tikhala okondwa tikadziwa kuti taonesa chifundo kwa anango, vimwevi vichitisa kuti akhale na chifuno chodziwa vizinji va Yahova. Mulungu yemwe ‘anachifundo chikulu’!—Aef. 2:4.

12. Ndawa chani kuonesa chifundo manjeuno kutichitisa kukonzekera chisautso chikulu? (Chivumbulutso 13:16, 17)

¹² Ndawa chani tidzafunike kuonesa chifundo pa chisautso chikulu? Baibolo iwonesa kuti wale omwe alilini ku mbali ya dziko iyi agumane na mabvuto manjeuno komasoti pa nthawe ya chisautso chikulu. (Lewengani Chivumbulutso 13:16, 17.) Abale na alongo wathu angafunike chithandizo chathu olo pa vinthu vomwe tingavione kuti ni ving’onoving’ono. Ndise otsimikiza kuti Yesu Khrisitu akadzabwera kudzaweruza wanthu, adzatione tinkuonesa chifundo ndipo ‘tidzakwanise kungena mu Ufumu.’—Mat. 25:34-40.

KHALANI WACHIKONDI

13. Mobverana na Aroma 15:7, ko Akhrisitu oyambirira adalimbikisa tani chikondi chomwe wenze nacho kwa anzawo?

¹³ Chikondi ni khalidwe yofunika maninge yomwe imbadziwikisa Akhrisitu oyambirira. Koma ko venze vosashupa kuti iwo awonese chikondi? Onani momwe abale wa mu mpingu wa Roma wenzere osiyana. Mu mpingu momu mumbagumanika pomwe Ayuda womwe adalelewa motewedza chilamulo cha Mose na wanthu wakunja womwe wenze adalelewa mosiyana maninge. Akhrisitu anango wenze akapolo pomwe anango wenzelini akapolo. Vingachitike kuti anango wenze anikachilo wa akapolo. Ko Akhrisitu mwawa adamalisa tani kusiyana kumoku ndipo adaonesa tani chikondi kwa anango? Mtumi Paulo adalimbikisa Akhrisitu mwawa kuti ‘ambatambirane.’ (Lewengani Aroma 15:7.) Ko iye ambatanthauza chani pamwapa? Mawu ya chigiriki yotsumbudzuliliwa kuti ‘kutambirana’ yatanthauza kutambira munthu na kucheleza. Vili ninge munthu yemwe watambira mulendo pa muyi pake na kubvuma kuti akhale mu gulu ya azishamwali wake. Mwakulinganiza, Paulo adauza Filimone kuti ankufunika kutambira Onesimo ‘mokoma ntima’ ninge kapolo mwanzawo yemwe wenze adawathawa. (Filim. 17) Akula na Purisikila adatambira pomwe Apolo, ‘nkumuchemelera payekha’ na kumulimbisa kuti akulise makhalidwe yake ya Chikhrisitu. (Mac. 18:26) M’malo mwakuti kusiyana kuwagawanise Akhrisitu mwawa adalimbana na bvuto mweyi ndipo adakwanisa kuthandizana.

14. Ko Anna na mwamuna wake adaonesa tani chikondi?

¹⁴ Isepanombo tingaonese chikondi kwa abale na alongo wathu mwakukhala nawo pa ushamwali na kukhala nthawe ikulu na iwo. Tikachita teneuyu tidzachitisembo kuti iwo ationesembo chikondi. (2 Akor. 6:11-13) Onani vomwe vidachitikira Anna na mwamuna wake. Pomwe adandotambira utumiki wawo wa umishonale na kufuluka kuyenda ku África Ocidental, matenda ya Koronaviru yadayamba. Iwo wenze adandofika manjemanje ndipo venze vosakwanisika kuti agumane na abale na alongo wamu mpingu. Ko iwo adachita tani kuti aonese chikondi? Iwo ambayimba mafoni nkuphatisira basa zoomu nkufungula mavidiyo kuti akwanise kucheza na abale na alongo komasoti na kuwaonesa kuti ankufuna kuwadziwa bwino. Abale adatembenja maninge chikondi chomwe banja mweyi imbaonesa ndipo adayamba kuwayimbira mafoni na kuwatumizira mamensaje. Ndawa chani banja mweyi idachita khama kuti ikwanise kuwadziwa bwino abale wawo? Anna adati: “Inepano nidzayebwelini vomwe abale na alongo ambachita, pakunionesa chikondi inepano na kwa banja yangu mu nthawe yoshupa na mu nthawe yabwino ndipo chitsanzo chawo chinilimbikisa kuti nionesembo chikondi.”

15. Ko imwepo mwapfunzira chani pa chitsanzo cha Vanessa pa nkhani ya kukonda abale na alongo wathu? (Onani pomwe foto.)

¹⁵ Azinji wa ise tili mu mpingu womwe mu na abale na alongo omwe adalelewa mosiyana komasoti anamakhalidwe yosiyanasiyana. Tingakwanise kuwaonesa chikondi abale wose mwawa tikambaganizira va makhalidwe yawo yabwino. Mulongo munango waku Nova Zelândia dzina yake Vanessa, ambaona kuti ni voshupa kuzolowerana na abale anango mu mpingu. Koma iye adaona kuti m’malo mwakuti ambapewe abale mwawa omwe ambaoneka kuti anamakhalidwe yoshupa, iye adakonza voti ambacheze nawo nthawe ikulu maninge. Ndawa yakuti adapfunzira kuona kuti Yahova awakonda abale wathu, iye adati: “Kundoyambira pomwe mwamuna wangu adakhala wonyang’anira dera, isepano tidayamba kukhala nthawe ikulu maninge na abale na alongo omwe anamakhalidwe yosiyana maninge. Manjeuno niwona kuti ni vosashupa kubvana nawo abale mwawa. Inepano nikonda kusiyana kumoku, shuwadi Yahovambo akonda kusiyana kumoku ndawa yakuti wanthu omwe awabweresa m’gulu yake akhala osiyana.” Tikapfunzira kuona anzathu ninge momwe Yahova achawaonera tidzibva kuona kuti tinachikondi kwa iwo.—2 Akor. 8:24.

16. Ndawa chani vidzakhale vofunika maninge kuonesa chikondi pa nthawe ya chisautso chikulu? (Onani pomwe foto.)

¹⁶ Chikondi chidzakhale chofunika maninge pa chisautso chikulu. Ganizirani ivi, chisautso chikulu chikadzayamba, ko Yahova adzatiteteze tani? Onani malangizo yomwe Yahova adapereka kwa wanthu wake pa nthawe yomwe iwo wenze adaukiriwa na Ababulo, iye adati: ‘Imwepo wanthu wangu ngenani m’vipinda vanu ndipo fungani misuwo, mubishale m’paka ukali wangu upite.’ (Yes. 26:20) Vingachitike kuti malangizo mwaya tidzayaphatisirembo basa pa chisautso chikulu. ‘Vipinda’ vingatanthauze Nyumba zathu za Ufumu. Pa nthawe ya chisautso chikulu isepano tidzatetezewe na Yahova peno tidzakhale obverana na abale wathu. Ndawa ya vimwevi manjeuno tichadekana kuchita khama osati kundowadziwa chabe abale na alongo wathu koma kuwakonda. Vingachitike kuti kupulumuka kwathu kudzathembe vimwevi!

YAMBANI KUKONZEKERA MANJEUNO

17. Tikakhala okonzeka manjeuno, ko chani chomwe tidzakwanise kuchita pa chisautso chikulu?

¹⁷ ‘Ntsiku ya Yahova idzakhale yoshupa kwa wanthu wose.’ (Zef. 1:14, 15) Wanthu wa Yahova chaiwo anzabonerembo. Koma peno isepano tingayambe manjeuno kukonzekera tidzakhale osagunduzika na kuthandiza anango. Tidzakwanise kupirira mabvuto yaliose yomwe yadzabwere. Abale wathu akambabonera naboni tichite vose vomwe tingakwanise pakuwapasa thandizo yomwe iwo ankudekana pa kuonesa chifundo. Ndipo naboni tipitirize kukhala nawo paushamwali abale na alongo mwawa pakuonesa kuti tiwakonda. Yahova adzatidalise na moyo wosapera mu dziko yomwe mabvuto na matsoka yachilengedwe vidzakhale kulibe.—Yes. 65:17.