Ko ndawa chani Mulungu adawiralini mapemphero yose?

Yahova Mulungu, yemwe ni Baba wathu wakudzulu, akhala wokondwa akambabva mapephero yathu yochokera pasi pa ntima. Koma pa na vinthu vinango vomwe vingachitise kuti aleke kudawira mapemphero yathu. Ko vinthu vake ni viponi, ndipo tichadekana kukumbukira chani tikambapemphera? Mpfundo za m’Baibolo izi zingatithandize pa nkhani mweyi.

Wanthu wa mu tchetchi inango ankuwerenga pemphero ya mu bukhu ya mapemphero.

“Ukambapemphera, ayi kumbandobwerezera mawu yabodzi na yabodzi.”—Mateyu 6:7.

Yahova afunalini kuti pa ku pemphera, timbandobwerezere vomwe tazolowera panango vomwe tawerenga kuchokera m’bukhu ya mapemphero. Koma afuna kuti timbayankhule kuchokera muntima. Linganizani momwe mungabvere peno munzanu andokuyankhulani mawu yabodzi na yabodzi ntsiku iliyose. Anzanu chaiwo angachitelini vimwevi koma akuuzani va muntima mwawo. Tikambapemphera kuchokera muntima, tiwonesa kuti Ababa wathu wakudzulu ni munzathu chaiye.

Mwamuna munango ankunyang’ana kudzulu pomwe ana khadi ya mwayi m’manja mwake.

‘Muchakumbira koma mutambiralini, ndawa yati munkukumbira na volinga voipa.’—Yakobo 4:3.

Tingadikhirelini kuti Mulungu adawire mapemphero yathu peno tinkudziwa kuti vomwe takumbira ankubverananavolini. Mwakulinganiza, Yahova atichenjeza kuti ayi kuti tikhale na ntima wadyera panango kukhulupirira mulungu wa mwayi. Manje peno munthu ankujogali njuga koma wakumbira Mulungu kuti amuthandize kukhala na mwayi, ko Mulungu angamuthandize? (Yesaya 65:11; Luka 12:15) Neye, Yahova angadawirelini pemphero ninge mweyo. Koma kuti Mulungu adawire pemphero yathu tichadekana kukumbira vinthu vobverana na vomwe Baibolo ichanena.

Nkulu wa tchetchi inango ankupempherera gulu ya masocha.

‘Munthu yemwe afunga matu yake kuti aleke kubva malamulo, olo pemphero yake ikhala yosadekana.’—Miyambo 28:9.

Kale Mulungu ambadawiralini mapemmphero ya wanthu omwe ambabveralini malamulo yake. (Yesaya 1:15, 16) Koma Mulungu akalibe kuchinja. (Malaki 3:6) Peno tinkufuna kuti Mulungu ambadawire mapemphero yathu, tichadekana kuchita vose vomwe tingakwanise kuti tiwonese kuti tinkubvera Mulungu. Manje tani peno m’buyo umu tidachita vinthu voipa? Ko vimwevi vinkuwonesa kuti Yahova angadawirelini mapemphero yathu? Neye. Mulungu adzatikhulukukire tikachinja nkuyesesa kumbachita vinthu vomukondweresa.—Machitidwe 3:19.