MSOLO 57
Manje tani peno mwachita chimo ikulu?
Olo kuti imwepo muchakonda maninge Yahova na kuchita chilichose chomwe mungakwanise kuti muleke kumukhumudwisa iye, nthawe zinango mungaphonyese vinthu. Olo kuti viritene machimo yanango ni yasiiyasi kuposa yanango. (1 Akorinto 6:9, 10) Imwepo mukachita chimo ikulu kumbukirani kuti Yahova alibe kuleka kukukondani, iye adakafuna kukukhululukirani na kukuthandizani.
1. Ko ni chani chomwe tichadekana kuchita kuti Yahova atikhululukire?
Wale omwe achakonda Yahova achakhala na chisoni chikulu maninge akazindikira kuti achita chimo ikulu. Koma iwo achakhazikiwa moyo pasi akaona vomwe Yahova achapolomisa wanthu wake: ‘Olo kuti machimo yanu yafuwire maninge, yadzachenesewe ninge thonje.’ (Yesaya 1:18) Tikalapa mochokera pasi pamoyo Yahova adzatikhululukire. Ko tingalape tani? Ndawa ya kudzilinga, tichaleka kuchita vinthu voipa na kugwigwirira Yahova kuti atikhululukire. Patsogolo pake tichayesayesa mwakhama kupewa voganiza pabodzi na vizolowezi vomwe vidatichitisa kuti tichimwe, ndipo tichayesesa kukhala mobverana na makhalidwe Yahova yakuchena.—Lewengani Yesaya 55:6, 7.
2. Ko Yahova achaphatisa tani basa akulu kuti atithandize tikachimwa?
Tikachita chimo ikulu, Yahova achatiwuza kuti: ‘Chemerani akulu wa mumpingu.’ (Lewengani Yakobo 5:14, 15.) Amuna mwawa achakonda Yahova pabodzi na nkhosa zake. Iwo ni woyenerera kuti atithandize kukonza ushamwali wathu na Yahova.—Agalatiya 6:1.
Ko akulu achatithandiza tani tikachita chimo ikulu? Abale awiri panango atatu angatithandize pakuphatisira basa malangizo ya m’Malemba. Angatipase pomwe malangizo yothandiza na kutilimbikisa kuti tipewe kudzabwerezera pomwe chimo yomwe tidachita ile. Kuti ateteze mpingo ku vinthu voipa, akulu angachose munthu mu mpingo yemwe wachita machimo yakulu koma afunalini kulapa.
PFUNZIRANI VIZINJI
Kulisani kutembeja kwanu pa momwe Yahova achatithandizira tikakhala kuti tachita chimo ikulu.
3. Kuwulula kuchatithandiza kuti tichile
Chimo iliyose yomwe tingachite tichakhala tinkuchimwira Yahova, ndipomwapa tichaulula kwa iye. Lewengani Salimo 32:1-5, ndipo patsogolo pake kambiranani mbvunzo uyu:
Ndawa chani ni vabwino kwa ise kuwulula machimo yathu kwa Yahova m’malo moyesa kuyabisa?
Kuingizira pakuwulula machimo yathu kwa Yahova, tichakhazika moyo pasi tikafagafaga thandizo kwa akulu. Wonesani VIDIYO, ndipo patsogolo pake kambiranani mbvunzo uyu.
Mu vidiyo, ko akulu adathandiza tani Canon kuti abwerere kwa Yahova?
Tichadekana kukhala omasuka na kuyankhula chaivo kwa akulu; iwo ni wokonzeka kuti atithandize. Lewengani Yakobo 5:16, ndipo patsogolo pake kambiranani mbvunzo uyu:
Ko kuyankhula chaivo kwa akulu kuchachitisa tani kuti vinthu vikhale vosashupa nakuti atithandize?
Ululani machimo yanu, khalani woona moyo na akulu, ndipo bvumani thandizo yachikondi ya Yahova
4. Yahova awonesa chifundo kwa wale omwe achita chimo
Peno munthu wachita chimo ikulu, nkulamba kubvera malangizo ya Yahova, iye achosewa mu mpingo ndipo tibverananayelini. Lewengani 1 Akorinto 5:6, 11, ndipo patsogolo pake kambiranani mbvunzo uyu:
Ninge isiti ya pawu, ko kubverana na munthu wosalapa kukhudza tani mpingu?
Pakutewedzera chifundo cha Yahova kwa wale omwe achita chimo, akulu ni okonzeka kuthandiza wale omwe adachosewa mu mpingo. Olo kuti chilango chikhala chowawa, azinji abwerera mu mpingo ndawa ya chilango chomwe adapasiwa.—Salimo 141:5.
Ko momwe Yahova achitira vinthu na wanthu omwe achita chimo, awonesa tani kuti iye ni wodekha, wachifundo na wachikondi?
5. Yahova achatikhululukira tikalapa
Yesu adaphatisa basa chitsanzo chomwe chichatithandiza kudziwa momwe Yahova achabvera munthu akalapa. Lewengani Luka 15:1-7, ndipo patsogolo pake kambiranani mbvunzo uyu:
Ko mwevi vinkutipfunzisa chani va Yahova?
Lewengani Ezekieli 33:11, ndipo patsogolo pake kambiranani mbvunzo uyu:
Ko ni sitepi iponi yomwe niyodikana maninge pakulapa?
Ninge nyakabusa, Yahova achasamalira maninge nkhosa zake
WANTHU ANANGO ACHATI: ‘Nichita mantha kuti nikawauze akulu va chimo yangu, ndawa anganichose mu mpingo.’
Ko imwepo mungalewe chani kwa munthu yemwe achabva mwa njira mweyi?
CHIGWATO
Peno tachita chimo ikulu, nkudzibvera tsitsi na kukhala wotsimikizira kuleka vinthu voipa, Yahova achatikhululukira.
Kubwerezera
Ndawa chani ni vabwino kwa ise kuwulula machimo yathu kwa Yahova?
Ko ni chani chomwe tichadekana kuchita kuti machimo yathu yakhululukiriwe?
Tikachita chimo ikulu ndawa chani tichadekana kufaga thandizo kwa akulu?
KUTI MUDZIWE VIZINJI
Onani momwe mwamuna munango adabvera chikondi cha Yahova chomwe chichafotokozewa pa Yesaya 1:18.
Ko akulu ayesesa kuchita chani kuti athandize wanthu omwe achita chimo ikulu?
Onani momwe chikondi na chifundo chiwoneserewa kwa wanthu omwe adachita chimo koma wosalapa.
‘Momwe akulu angathandizire wanthu omwe achosewa mu mpingo’ (Ntsanja ya ulonda ya Agosto, 2024)
Onani momwe mwamuna munango yemwe wenze adasiya chonadi adabvera kuti Yahova angamubwezerese pomwe mu nkhani yakuti: ‘Ningafunikana kubwerera kwa Yahova.’
‘Baibolo ichachinja moyo’ (Nsanja ya Olonda ya 1 Abril, 2012)