First Chronicles
10 Olketa Philistine faet againstim olketa blo Israel. And olketa man lo Israel ranawe from olketa Philistine, and olketa killim dae staka Israelite lo Maunt Gilboa.+ 2 Olketa Philistine ronem Saul and olketa son blo hem, and olketa killim dae Jonathan, Abinadab, and Malchi-shua,+ wea hem olketa son blo Saul. 3 Faet hia kamap strong againstim Saul, and olketa man for sut lo bow and arrow lukim hem and sutim hem, and Saul garekil.+ 4 Then Saul sei lo man wea karem weapon blo hem: “Tekem sword blo iu and killim mi dae, mekem olketa man hia wea no circumcise* bae no kam and kill nogud*+ lo mi.” Bat man hia no laek duim wanem Saul talem bikos hem fraet fogud. So Saul tekem sword and killim hemseleva dae.+ 5 Taem man hia lukim Saul hem dae, hem tu tekem sword blo hem and killim hemseleva dae. 6 So Saul and thrifala son blo hem olketa dae, and evriwan lo haos blo hem olketa dae lo datfala taem.+ 7 Taem evri pipol lo Israel wea stap lo olketa ples lo valley* faendaot evriwan ranawe, and Saul and olketa son blo hem dae, olketa start for lusim olketa taon blo olketa and olketa ranawe. Then olketa Philistine go and stap lo olketa taon hia.
8 Lo next day, taem olketa Philistine go for tekem evriting blo olketa man wea dae, olketa lukim Saul and olketa son blo hem dae finis lo Maunt Gilboa.+ 9 So olketa tekem evriting blo Saul and aotem hed blo hem and kaleko blo hem for faet, and olketa sendem nius go lo evri ples blo olketa Philistine mekem olketa storyim samting wea happen lo olketa idol blo olketa+ and lo evri pipol. 10 Then olketa putim kaleko blo Saul for faet lo haos* blo god blo olketa and hangem hed blo hem lo haos blo Dagon.+
11 Taem evriwan lo Jabesh+ lo Gilead herem samting wea olketa Philistine duim lo Saul,+ 12 evri man for faet getap and go karem dead body blo Saul and dead body blo olketa son blo hem. Olketa tekem olketa kam lo Jabesh and berem bon blo olketa andanit lo big tree lo Jabesh,+ and olketa fasting for sevenfala day.
13 So Saul hem dae bikos hem no faithful lo Jehovah taem hem no obeyim toktok blo Jehovah,+ and tu, bikos hem go lukim wanfala woman wea story witim demon+ 14 and hem no faendemaot tingting blo Jehovah. So God killim hem dae and markem David son blo Jesse for kamap king.+