Isaiah

20 Lo year wea King Sargon blo Assyria sendem Tartan* go lo Ashdod,+ hem faet againstim Ashdod and tekovarem.+ 2 Lo datfala taem, Jehovah talem Isaiah,+ son blo Amoz, and sei: “Iu go, aotem kaleko for sorre from hips blo iu, and aotem sandol from leg blo iu.” And hem duim datwan, hem wakabaot raon naked and no werem sandol.

3 Then Jehovah sei: “Wei wea servant blo mi Isaiah hem wakabaot raon naked and no werem sandol for thrifala year, hem olsem wanfala saen+ and warning againstim Egypt+ and Ethiopia,+ 4 so king blo Assyria bae leadim olketa blo Egypt go prisoner,+ and olketa blo Ethiopia go lo nara kantri, olketa boy and olketa olo man bae wakabaot naked and no werem sandol, ass blo olketa nomoa showaot, wea diswan mekem Egypt hem shame fogud.* 5 And olketa wea putim hope blo olketa lo Ethiopia, and wea tinghae lo Egypt, olketa bae fraet and bae shame. 6 Lo datfala day, pipol wea stap klosap lo sea bae sei, ‘Lukim samting wea kasem pipol wea iumi putim hope lo olketa, wea iumi ran go lo olketa for olketa helpem and rescuem iumi from king blo Assyria! Wea nao bae iumi ranawe go lo hem distaem?’”