Isaiah
64 Hem bae gud sapos iu bin tearem heven open, and kam daon,
Mekem olketa maunten seksek bikos lo iu,
2 Olsem taem fire laetem olketa smol branch,
And fire mekem wata hem boel,
Then olketa enemy blo iu bae savve lo nem blo iu,
And olketa nation bae seksek front lo iu!
3 Taem iu duim olketa spesol samting wea mifala no tingim bae hem happen,+
Iu kam daon, and olketa maunten seksek front lo iu.+
4 Lo bifor kam yet, no eniwan hem herem or ting raonem gud,
And tu no eni eye lukim God bat iu nomoa,
5 Iu meetim olketa wea hapi for duim stret samting,+
Olketa wea tingim iu and wea followim olketa wei blo iu.
Lukim! Iu barava kros, from mifala gohed for duim sin,+
Mifala bin duim diswan for longtaem.
So waswe, bae mifala fit for sev?
6 Mifala evriwan kamap olsem samwan wea no klin,
And evri stretfala samting wea mifala duim, hem olsem kaleko wea garem blood blo period lo hem.+
Mifala evriwan bae gogo for drae olsem wanfala leaf,
And olketa rong blo mifala bae tekem mifala go olsem wind.
7 No eniwan hem singaot lo nem blo iu,
No eniwan hem trae for lukaotem help from iu,
Bikos iu bin haedem feis blo iu from mifala,+
And bikos lo olketa rong blo mifala, iu letem mifala for finis.*
8 Bat distaem O Jehovah, iu nao Dadi blo mifala.+
Mifala olketa clay nomoa, and iu nao Man for Wakem Samting lo Clay.*+
Hand blo iu nao wakem mifala evriwan.
9 O Jehovah, iu no kros tumas lo mifala,+
And no tingim for olowe olketa rong blo mifala.
Plis, luk kam lo mifala, mifala evriwan pipol blo iu.
10 Olketa holy taon blo iu olketa kamap wanfala wilderness.
Zion hem kamap wanfala wilderness,
Jerusalem hem stap emti nao.+
11 Haos* blo mifala wea holy and wea glory stap lo hem,*
Wea olketa grandadi blo mifala praisem iu lo hem,
Fire hem bonem finis,+
And evri samting wea mifala tinghae lo hem olketa distroe finis.
12 Bikos lo evri samting hia, O Jehovah, hao, bae iu no duim eni samting?
Waswe, bae iu stap kwaet nomoa and letem mifala for barava safa olsem?+