First Leta for Timothy
4 Bat spirit blo God hem sei dat taem bae kam wea samfala bae lusim faith. Olketa bae lisin lo olketa laea toktok wea pipol sei hem kam from God+ and lo olketa teaching blo olketa demon. 2 And olketa bae lisin lo olketa man wea hypocrite wea talem laea toktok,+ wea konsens blo olketa hem olsem samting wea hot iron hem bonem. 3 Olketa stopem pipol for marit+ and komandim pipol for no kaikaim samfala kaikai,+ bat God wakem olketa kaikai hia+ mekem olketa wea garem faith+ from stretfala knowledge abaotem truth olketa savve talem thankiu and kaikaim. 4 Bikos evri creation blo God hem gud,+ and hem stret nomoa for kaikaim+ sapos man talem thankiu, 5 bikos datfala kaikai hem holy thru lo toktok blo God and prea.
6 Taem iu talem disfala kaonsel lo olketa brata, iu bae pruvim dat iu wanfala gud wakaman blo Christ Jesus, wea kasem strong from message abaotem faith and from olketa nambawan teaching, wea iu barava followim gud.+ 7 Rejectim olketa laea story,+ olsem olketa story wea olketa old woman savve talem. Bat trainim iuseleva witim wei for faithful lo God olsem goal blo iu. 8 Bikos physical training* hem helpem man lelebet nomoa, bat wei for faithful lo God hem barava helpem man lo evri samting bikos hem savve mekem man kasem olketa blessing wea God promisim for laef distaem and laef lo future.+ 9 Disfala toktok man fit for trustim and barava bilivim. 10 Dastawe iumi waka hard and traem best blo iumi,+ bikos iumi hope lo God wea laef, wea hem Savior+ blo evri difren kaen man,+ especially olketa wea faithful.
11 Gohed for talem olketa komand hia and teachim olketa. 12 No letem eniwan lukdaonem iu bikos iu young, bat kamap wanfala gud example for olketa wea faithful lo toktok, lo wat iu duim, lo love, lo faith, and lo klinfala wei blo iu. 13 Go kasem taem wea mi kam, gohed waka hard lo pablik reading,+ for encouragem narawan, and saed lo teaching. 14 No ting smol lo present wea iu kasem thru lo wanfala profesi taem body of elders putim hand blo olketa antap lo iu.+ 15 Ting raonem olketa samting hia; tingting strong lo olketa, mekem evri pipol lukim klia dat iu gohed grow lo spiritual wei. 16 Lukluk gud evritaem lo iuseleva and lo teaching blo iu.+ Gohed strong for duim olketa samting hia, bikos wei for duim olsem bae sevem iu and olketa wea lisin lo iu.+