Proverbs
19 Hem beta for man hem poor and wakabaot followim faithful fasin+
Winim for man stupid and savve laea.+
2 Man* wea no garem knowledge hem nogud,+
And man wea no tingting gud bifor hem duim samting* hem duim sin.
3 Karangge wei blo man seleva nao leadim hem go rong,
And heart blo hem kros fogud lo Jehovah.
4 Man wea rich garem staka fren,
Bat man wea poor nomata fren blo hem tu bae lusim hem.+
6 Staka laek for mekem bigman* hapi lo olketa,
And evriwan laek fren witim man wea savve givim olketa present.
7 Evri brata blo poor man heitim hem.+
And olketa fren blo hem heitim hem go moa!+
Hem begim olketa for help, bat no eniwan laek lisin lo hem.
8 Eniwan wea waka hard for garem gud tingting* hem lovem hemseleva.+
Eniwan wea tinghae lo wei for luksavve bae succeed.*+
9 False witness bae no misstim panis,
And man wea evriting hem talem hem laea bae finis.+
10 Hem no fit for karangge man garem gud laef.
Sapos olsem hem no fit tu for wanfala servant for rul ovarem olketa ruler!+
11 Wei for minim samting savve helpem man for daonem kros blo hem,+
And pipol bae tinghae lo hem sapos hem no tingim* rong samting* wea samwan duim lo hem.+
13 Wanfala stupid son hem kos trabol for dadi blo hem,+
And wanfala waef wea savve raoa evritaem* hem olsem ruf wea gohed for leak.+
14 Haos and riches man savve inheritim from dadi blo hem,
Bat wanfala waef wea wise hem present from Jehovah.+
15 Lesy bon hem laek sleep olowe nomoa,
And man wea lesy bae hangere.+
16 Man wea obeyim komandment protectim laef blo hem.+
Man wea nating kea abaotem olketa samting wea hem duim bae dae.+
17 Samwan wea kaen lo man nating hem givim samting lo Jehovah,+
And Hem bae rewardim hem for samting wea hem duim.+
19 Man wea savve kros kwiktaem bae faendem ansa blo hem.
Sapos iu trae for helpem hem, bae iu mas duim datwan staka taem.+
21 Heart blo man garem staka plan,
Bat purpose blo Jehovah nao bae hem win.+
22 Samting wea luk naes tumas taem man garem nao hem loyal love.*+
And hem beta for man hem poor winim for hem wanfala konman.
23 Wei for fraet lo Jehovah bae lead go for laef.+
Man wea garem datfala wei bae sleep gud, and no eniting bae spoelem hem.+
24 Lesy bon putim go daon hand blo hem insaed lo dish kaikai,
Bat nomata for apim bak hand blo hem lo mouth blo hem+ nomoa tu.
25 Whipim man wea savve tok spoelem narawan+ mekem man wea no garem experience savve kamap wise,+
And stretem man wea garem wei for minim samting mekem knowledge blo hem kamap big.+
26 Son wea treatim nogud dadi blo hem and ronem mami blo hem
Hem duim shameful samting and pipol no respectim hem.+
27 Son blo mi, sapos iu no gohed lisin lo discipline,
Bae iu go difren from olketa wise toktok.