Bringimap Olketa Pikinini wea Balance—Hao?
“Olketa pikinini lanem fasin for bossim seleva and for respectim olketa seleva thru long wei wea olketa kasem love and discipline from mami and dadi,” hem nao wanfala report long The Gazette, wanfala niuspepa from Montreal, Canada, hem talem. Wanem nao join insaed diswan? Olsem wanfala savveman long mind and fasin long Montreal, Constance Lalinec, hem talem, hem barava important for putim olketa klia spialaen for fasin bilong pikinini.
Lalinec, wea waka witim olketa pikinini and famili, luksavve tu hao “taem iumi blokem pikinini for kasem panis from wanem hem duim, iumi stopem tu planti samting wea olketa shud lanem.” Wei for letem pikinini duim eni samting wea hem laekem savve spoelem gudfala wei wea hem growap.
Pruv showimaot hao wisefala advaes from Bible long wei for bringimap pikinini hem barava fitim. Hem sei: “Letem Yes bilong iufala minim Yes, No, minim No.” (Matthew 5:37) Taem iu markem olketa rul wea balance and olketa pikinini bilong iu minim olketa, followim kwiktaem and evritaem. Duim samting wea waka gud for saportim toktok bilong iu. Diswan bae givim kliafala message long olketa pikinini abaotem olketa rul and samting wea mami and dadi expectim—hao pipol ‘bae harvestim samting olketa plantim.’ (Galatians 6:7; Romans 2:6) Goal bilong loving and gudfala discipline hem for olketa pikinini lane for obeyim olketa rul, deal witim wei for feel kros and lane for weit for samting wea olketa laekem, mekem grow olketa fasin wea olketa needim for kamap full-grown pipol wea balance and pipol trustim.
Samfala moa advaes long wanem God talem olketa mami and dadi abaotem wei for disciplinem olketa pikinini bilong olketa witim love hem stap long datfala buk Secret for Kasem Hapi Famili. Iu savve kasem wanfala copy bilong disfala 192-page buk taem iu fulimap and postim disfala pepa long address wea stap or address wea fitim long page 5 bilong disfala magasin.
◻ Sendem kam wanfala copy bilong buk Secret for Kasem Hapi Famili.
◻ lis kam lukim mi for wanfala free hom Bible study.