Protectim Youngfala Teeth

LONG wanem taem nao teeth bilong iu start for grow? Maet iu sapraes for savve hem start taem iu insaed yet long bele bilong mami—maet bifor mami bilong iu savve hem babule! Dastawe hem important for mami wea babule for kasem inaf nutrient, olsem calcium, phosphorus, protein, and olketa vitamin.

Waswe long olketa baby wea just born? Olketa savveman sei baby wea susu long botol savve isi for kwiktaem garem rotten teeth, planti taem tufala teeth long front nao firstaem for rotten. Bat hao nao diswan happen? Samfala baby evritaem susum milk, juice, wata wea olketa putim sugar insaed, or soft drink from botol taem olketa gogo for sleep. Drink hia wea hem susum garem sugar insaed wea bacteria savve grow. Then bacteria hia mekem olketa acid kamap wea savve spoelem teeth bilong baby—especially sapos acid hia stap long teeth for full naet. Samfala baby wea garem rotten teeth savve lusim teeth bilong olketa kwiktaem tumas, wea savve barava affectim wei wea gudfala teeth bilong olketa hem grow bihaen.

Hao nao dadi and mami savve protectim teeth bilong baby bilong tufala wea soft? Wei for mami nao susum baby, bikos milk bilong mami hem no garem bacteria and hem rich long olketa antibody. Bat, sapos mami iusim botol, olketa savveman sei mas stop for iusim taem baby hem kasem 18 month. And tu, olketa sei for iusim botol only for feedim baby—and no for mekem hem stop krae. And sapos mami iusim botol for mekem baby sleep, bae hem gud sapos hem givim wata nomoa. Bihaen each taem wea baby susu, savve iusim wanfala klin soft kaleko for klinim teeth bilong baby.

Man savve stopem wei for teeth rotten from taem pikinini smol. Stretfala wei for lukaftarem teeth—yes, for baby tu—hem important tumas!