PLANET BLO IUMI BAE STAP OLOWE TU?
AIR
IUMI needim air, no just for iumi brith, bat air hem protectim planet blo iumi from radiation blo sun wea savve spoelem iumi. Sapos no eni air, temperature raonem world bae hem barava cold tumas.
Air Hem Stap lo Danger
Air pollution hem barava spoelem evri samting wea laef lo earth. Only wan percent lo full population lo earth nao brithim air wea fitim safety standard blo World Health Organization.
Air pollution savve kosim olketa sik wea mekem man short wind, lung cancer, and heart disease. Each year, air pollution hem kosim tu samting olsem 7,000,000 pipol for dae kwiktaem, nomata olketa no olo yet.
Planet blo Iumi Design for Stap Olowe
Planet blo iumi garem olketa natural process for provaedem healthy air for evri samting wea savve laef. Olketa natural process hia savve waka gud sapos olketa man no kosim tumas pollution. Lukim tu-thri example.
Iumi savve abaotem waka blo olketa forest for tekem-in carbon dioxide from air. Bat nara samting wea duim big waka winim forest hem olketa mangrove. Amount blo carbon dioxide wea olketa mangrove savve aotem, hem samting olsem faev taems winim hao olketa tropical forest savve duim datwan.
No longtaem go nomoa, wanfala research showimaot samfala big aglae olsem kelp or big seaweed, hem no just aotem carbon dioxide from air, bat hem berem tu. Olketa kelp blade wea luk olsem leaf garem olketa bag wea fulap lo air wea datwan helpem hem for float farawe. Taem hem farawe from shore, olketa bag hia wea fulap witim carbon hem bosta and sink go daon botom lo sea. Hem bae stap lo botom lo sea for staka handred year.
Atmosphere blo iumi savve recover seleva from nogud pollution and iumi lukim diswan happen lo taem blo COVID-19 lockdown. Lo 2020, taem olketa factory raonem world and olketa vehicle stop for kosim pollution, kwiktaem nomoa air hem start for klin bak. “2020 World Air Quality Report,” sei winim 80 percent lo olketa kantri wea olketa duim research abaotem, olketa reportim hao air blo olketa hem kamap klin no longtaem bihaen lockdown hem start.
Wat Olketa Man Duim
Iusim baesikol for daonem air pollution
Gavman gohed for talem olketa bisnis industry for katem daon air pollution. And tu, olketa scientist gohed for faendem olketa niu wei for stretem olketa problem wea pollution kosim. For example, wanfala process iusim olketa microbe for changem olketa samting wea poison for no spoelem iumi. And tu, olketa expert encouragem pipol for wakabaot and iusim baesikol winim wei for draev, and for no iusim staka electricity lo haos.
Samfala gavman givimaot olketa stove for kuki for daonem air pollution, bat staka pipol still no kasem datwan
Bat datwan hem no inaf, olsem iumi lukim lo olketa report lo 2022 wea kam from olketa international agency, includim tu World Health Organization and World Bank.
Datfala report storyim hao lo 2020, wan third lo population evriwea lo world depend lo olketa samting wea savve pollutim air for kuki. Lo staka ples, tu-thri pipol nomoa fit for baem olketa niu stove or faendem olketa narakaen wei for kuki.
Olketa Reason for Hope—Wat Bible Talem
“Datfala tru God, Jehovah, Datfala Creator blo skae and . . . Man wea wakem earth and evriting wea grow lo hem, Man wea givim brith lo pipol wea stap lo earth.”—Isaiah 42:5.
God wakem air wea iumi brithim and olketa natural cycle wea klinim air, and hem garem big paoa and lovem olketa man. So hem fitim nomoa for iumi bilivim dat hem bae finisim pollution from air blo iumi. Lukim article “God Promisim Planet blo Iumi Bae Stap for Olowe.”