DEAL WITIM WEI WEA PRICE BLO EVRITING GO AP

Managem Gud Selen blo Iu

Wei wea price blo evriting hem go ap hem challenge for iumi evriwan. Bat no feel olsem iu no wei nao. Samfala samting hem stap wea iu savve duim for impruvim situation blo iu.

WHY DATWAN IMPORTANT

If iu no managem selen blo iu, hem bae isi for iu garem problem saed lo selen, wea datwan savve mekem iu wari and stress tumas. Nomata iu no garem staka selen, iu savve duim samfala samting for helpem iu managem selen blo iu.

WAT IU SAVVE DUIM

No spendem selen winim wat iu garem. Taem iu duim olsem, bae iu no wari tumas nomata iu no garem staka selen and bae iu fit for peim eni expenses wea maet kamap wea iu no expectim.

For helpem iu no spendem selen winim wat iu garem, mekem wanfala budget, wea datwan savve helpem iu for savve haomas nao income and haomas nao expenses blo iu. Taem iu mekem budget, ting raonem gud wat nao iu really needim. Then traem best for followim plan blo iu, and iu savve adjustim datwan if price blo olketa samting or income blo iu hem change. If iu marit, mekem disison witim marit partner blo iu.

Traem diswan: Instead for peim samting lo credit card, peim witim cash if iu savve duim. Samfala faendem taem olketa duim datwan, hem helpem olketa for followim gud budget blo olketa and no garem kaon. And tu, reviewim bank statement blo iu. If iu savve haomas selen nao iu really garem, iu bae no stress tumas.

For spendem selen fitim wat iu garem hem no isi. Nomata olsem, wei for mekem gud budget savve barava help. Datwan bae helpem iu tu for no wari tumas abaotem selen.

“Calculatem haomas selen nao [iu] needim.”—Luke 14:28.

Keepim waka wea iu garem. Wat nao iu savve duim for keepim waka blo iu? Diswan hem samfala samting iu savve duim: Mas punctual. Garem positive tingting abaotem waka blo iu. Willing for helpem narawan, and waka hard. Evritaem showim respect. Followim olketa rul lo waka, and trae for impruvim olketa skill blo iu.

Avoidim wei for weistim selen. Askem iuseleva, ‘Hao, mi garem habit for weistim selen lo samting wea no important?’ For example, staka pipol weistim selen wea olketa waka hard for hem lo olketa nogud samting olsem drug, gambling, smoke, or wei for drinkim tumas alcohol. Olketa samting hia savve spoelem tu health and waka blo olketa.

“Man wea faendem wisdom . . . bae hapi. For kasem datwan hem beta winim for kasem silver.”—Proverbs 3:13, 14.

Sevem selen for taem blo emergency. Sapos fitim, keepim lelebet selen for olketa expenses wea iumi no expectim or for eni emergency. Datfala selen bae helpem iu for no wari taem iu or wanfala famili member seke nomoa kasem health problem, lusim waka, or samfala problem wea iumi no expectim.

“Taem and samting wea man no expectim hem kasem evriwan lo [iumi].”—Ecclesiastes 9:11.

Samfala Advaes for Sevem Selen

Kukim kaikai lo haos nomoa.

For kaikai staka taem lo restaurant or peim tane kaikai or drink savve expensive tumas. Hem tru, for preparem kaikai lo haos hem needim taem and effort, bat datwan savve sevem staka selen. And tu, from iu kuki seleva, iu bae preparem gud kaikai.

Mas wise taem iu duim shopping.

Mekem shopping list, and followim datwan. Avoidim wei for peim samting wea iu no planim.
Peim staka samting taem hem cheap if hem fitim budget blo iu. Mek sure iu garem ples for keepim olketa kaikai wea savve nogud kwiktaem mekem hem no weist.
Peim olketa brand wea cheap nomoa sapos hem gud quality.
If online shopping hem available lo ples wea iu stap, hao, iu fit for iusim? Online shopping savve helpem iu for faendem olketa gudfala deal, avoidim wei for baem olketa samting wea iu no needim, and for savve haomas selen nao iu spendem.
Luk for olketa spesol sales, and discount wea available. Comparem olketa price, includim kost blo electricity and wata.

Tingting gud abaotem olketa latest samting.

Olketa company wea wakem phone and olketa nara product savve evritaem upgrade for olketa niu model for increasim profit. So hem gud for askem iuseleva: ‘Hao, wei for baem datfala latest model savve benefitim mi? Hao, mi need for upgrade distaem? And if mi upgrade, hao, mi really needim datfala latest model?’

Repairim olketa item and iusim bak.

Keepim gud olketa appliances olsem fridge or stove mekem olketa stap longtaem, and if hem nogud iu savve repairim if hem fitim. Or maet hem gud for baem olketa second hand product.

Plantim seleva own kaikai blo iu.

Iu savve mekius lo eni spes raonem haos blo iu for plantim kaikai. Taem iu duim olsem, bae iu no need for spendem staka selen lo kaikai, bat iu savve exchangem, salem, or sharem wat iu plantim witim narawan.

“Olketa plan blo man wea waka hard bae succeed.”—Proverbs 21:5.

“Mitufala evritaem chekim price blo olketa item wea mitufala savve baem evriday, and mitufala careful lo hao mitufala iusim credit card.”—Miles, England.

“Bifor mifala go shopping, mi and famili evritaem redyim list blo wat mifala needim.”—Jeremy, U.S.A.

“Mifala evritaem updatem budget blo famili for fitim economic situation lo ples blo mifala, and mifala keepim samfala selen for olketa expenses wea mifala no expectim.”—Yael, Israel.

“Mitufala teachim olketa pikinini for fixim eniting wea brek winim for baem niu wan. Diswan includim tu car blo mifala and olketa electrical appliances lo haos. Mitufala waef blo mi avoidim wei for baem olketa latest model.”—Jeffrey, U.S.A.

“Mi reducim expense blo mi lo wei for plantim olketa vegetable and feedim samfala kokorako. Datwan mekem mi fit for sharem samfala vegetable witim narawan.”—Hono, Myanmar.

Wanfala woman harvestim olketa vegetable lo garden.