Firstfala Rainbow

WASWE, iu savve long first samting wea Noah duim taem hem and famili kamaot from ark? Hem mekem wanfala sakrifaes or present long God. Iu savve lukim hem duim diswan long piksa long daon. Noah offerim present bilong olketa animal for thankiu long God for sevem famili bilong hem from bigfala flood.

Waswe, iu tingse Jehovah hem hapi witim disfala present? Ia, hem hapi. And hem promisim Noah hao hem bae no finisim world moa witim wanfala flood.

No longtaem bihaen, graon hem drae and Noah and famili bilong hem startim wanfala niufala laef aotsaed long ark. God blessim olketa and talem olketa: ‘Iufala mas garem plande pikinini. Iufala mas kamap staka go kasem taem wea pipol stap evriwea long earth.’

Bat bihaen, taem pipol herem story bilong bigfala flood, maet olketa fraet nogud wanfala flood olsem kam moa. So God givim wanfala samting for mekem pipol rememberim promis bilong hem for no mekem flood olsem kam long earth. Waswe, iu savve wanem nao hem givim for mekem olketa remember? Wanfala rainbow.

Plande taem iu savve lukim wanfala rainbow long skae taem sun hem kamap bihaen hem just finis rain. Olketa rainbow garem plande naesfala kala. Waswe, iu lukim wanfala finis? Waswe, iu lukim rainbow insaed long piksa antap?

Diswan nao samting wea God hem sei: ‘Mi promis for no finisim moa evri pipol and animal witim wanfala flood. Mi putim rainbow bilong mi insaed long olketa cloud. And taem rainbow hem kam, mi bae lukim and rememberim disfala promis bilong mi.’

So taem iu lukim wanfala rainbow, hem mekem iu tingim wanem samting? Tru nao, promis wea God talem for no finisim world witim wanfala bigfala flood moa.