Iusim Bible for Givim Ansa

TAEM pipol ask abaotem wei bilong laef and olketa biliv bilong iumi, tingting bilong iumi saed long samting wea happen distaem, and hope bilong iumi long future, iumi trae for iusim Bible for givim ansa. Why nao olsem? Bikos hem nao Word bilong God. Olketa biliv bilong iumi kam from Bible. Wei bilong laef bilong iumi garem faondeson long Bible. Hem affectim tingting bilong iumi abaotem samting wea happen long world. Hope bilong iumi for future garem strongfala faondeson long olketa promis from God insaed long Bible.—2 Tim. 3:16, 17.

Iumi barava luksavve long responsibility wea join witim nem bilong iumi. Iumi Olketa Jehovah’s Witness. (Isa. 43:12) So iumi ansarem olketa kwestin, no from tingting bilong man, bat from samting wea Jehovah talem long Word bilong hem. Hem tru, olsem olketa man wanwan iumi garem tingting bilong iumiseleva saed long samfala samting, bat iumi letem Word bilong God sheipim tingting bilong iumi bikos iumi barava bilivim datwan nao truth. Hem tru, Bible givim iumi freedom for chus long planti samting. Winim wei for trae mekem narawan disaedem samting followim tingting bilong iumi, iumi want for teachim olketa principle wea stap long Bible, and long wei olsem letem olketa wea lisin long iumi for iusim sem freedom for chus wea iumi enjoyim. Olsem aposol Paul, iumi laek for “mekhae long wei for obey thru long faith.”—Rom. 16:26.

Revelation 3:14 storyim Jesus Christ olsem “faithful and trufala witness.” Hao nao hem ansarem olketa kwestin and deal witim olketa samting wea seknomoa kamap? Samfala taem hem iusim olketa tokpiksa wea mekem pipol tingting. Long samfala narataem hem askem man wea askem kwestin for talem hao nao hem minim wanfala scripture. Planti taem hem talem toktok bilong olketa scripture, or talem long toktok bilong hemseleva, or storyim scripture long difren wei. (Matt. 4:3-10; 12:1-8; Luke 10:25-28; 17:32) Long first century, olketa keepim olketa Scripture scroll insaed long olketa synagogue. No eni pruv stap for sei Jesus seleva ownim eni scroll, bat hem barava savve gud long olketa Scripture and hem evritaem storyim olketa taem hem teachim narafala pipol. (Luke 24:27, 44-47) Hem barava talem tru samting taem hem sei samting wea hem teachim hem no samting bilong hemseleva. Hem talem samting wea hem herem from Father bilong hem.—John 8:26.

Iumi want for followim example bilong Jesus. No enitaem iumi herem God toktok, olsem Jesus hem herem. Bat Bible nao Word bilong God. Taem iumi iusim datwan for ansarem olketa kwestin, iumi no mekem pipol tingim iumi nomoa. Iumi showimaot hao, winim wei for talem idea bilong man wea no perfect, iumi disaed strong for letem God talem wanem nao trufala samting.—John 7:18; Rom. 3:4.

Bat, iumi no want for just iusim Bible nomoa, bat for iusim long wei wea bae barava helpem man wea lisin long iumi. Iumi wantem hem for lisin witim open mind. Sapos hem fitim, iu maet introducem samfala scripture taem iu sei: “Waswe, iu agree hao toktok bilong God nao winim eni nara samting?” Or iu savve sei: “Waswe, iu savve hao Bible nao barava storyim datfala kwestin?” Sapos iu story witim samwan wea no respectim Bible, iu maet need for iusim difren kaen introduction. Iu savve sei: “Mi laek sharem disfala oldfala profesi witim iu.” Or iu maet sei: “Buk wea kasem evri ples long world winim eni narawan long history bilong man hem sei . . . ”

Samfala taem, iu maet chus for talem wanfala scripture long toktok bilong iuseleva. Bat, sapos fitim, best wei nao hem for openem Bible and readim. Long taem wea iu savve duim, showim datfala scripture long hem insaed Bible bilong hemseleva. For iusim Bible olsem hem planti taem affectim pipol long bigfala wei.—Heb. 4:12.

Olketa Christian elder garem important responsibility for iusim Bible for ansarem olketa kwestin. Wanfala mark for serve olsem elder hem wei wea brata mas “hol strong long faithful word long wei wea hem teach.” (Titus 1:9) Wanfala member bilong kongregeson maet disaedem barava serious samting long laef bihaen wanfala elder givim hem kaonsel. Hem barava important for disfala kaonsel garem strongfala faondeson long Bible! Example bilong wanfala elder wea duim olsem savve affectim planti narawan saed long wei for teach.